今次已經第2次黎食。 因為得2個女仔，食唔到好多野，所以只係叫咗2份小食，1份主食。 上）豬頸肉米紙卷 $68 原本打算叫牛油果芒果紙卷，但係無哂牛油果，所以改叫呢個。餡料好多，配甜酸汁食，都幾惹味。但係口感上，應該係牛油果芒果會正啲，因為豬頸肉係乾身，不過都唔係柴嘅口感。 下）越式炸蝦多士 $80 一上枱就放入口，點知一咬，就俾入面啲餡“辣”親少少個咀，證明佢真係即炸。上面凸起嘅部分全部都係蝦肉，好足料，入面仲有芝士餡，係會流出黎果款。配埋黑松露蛋黃醬，好食！ 蝦多士裡面嘅芝士餡 主食 炸軟殼蟹伴咖喱農夫包 $160 軟殼蟹好大隻，咖喱汁好惹味，配包食。不過汁浸住個包太耐的話，會令到個變淋，口感無咁好。個人覺得配飯會正啲，如果可以有得揀配飯就好了。但係整體講都係好食。 樓上舖，環境闊落，好適合同朋友傾計。 講起越南菜，暫時黎講，呢間會係我嘅首選 👍🏻

宜家好多店都有賣無味精嘅燉湯， 不過咁有椰子味嘅燉湯就第一次飲。 今日第一次試左烏龍燉湯， 加$9可以配埋紫薯飯、雞翼（一隻）同菜圃。 第一啖入口當然要試下個湯先啦， 嘩，真係好有椰子味，啲雞肉都燉得幾林， 但紫薯飯就唔夠熱，雞翼都唔係熱的，菜圃不過不失。 有機會下次再試其他燉湯。

有book 位，等左一陣就可以入座。 因為無哂無骨雞，所以叫左一份烤雞一份炸雞。 烤雞，兩隻味，$158。好細隻雞，同一般韓國傳統炸雞份量有好大分別，啲雞件細好多，數量都少好多，而且味道一般。百幾蚊一份，相當唔抵食。 蔥蔥炸雞，$148。純粹係炸雞上面加啲蔥。原本以為係韓國傳統炸雞果款，點知唔係，上面無炸粉，食落同烤雞無咩分別。啲醃蘿蔔完全唔夠味，分明醃唔夠，係食過最無味道嘅醃蘿蔔。如果韓國醃蘿蔔醃嘅酸味程度係100分，佢得10分。 炸軟殼蟹，$78一份。無咩蟹味。個人覺得元氣嘅炸軟殼蟹好食好多。 手抓飯，$78。侍應上菜時問要唔要幫我地整埋，我地話唔使，朋友自己用佢提供嘅手套自己整，唔難整。味道唔特別，但欣賞佢紫菜夠多。 另外，想特別講下手套。手套係帶有少少類似磨砂質地，唔會黏住食物，而且比一般手套厚少少，唔會滲油入手，不錯。 芒果波蘿mocktail，$98。不過不失嘅飲品，唔係好甜，易入口。 見到有咁多食評都係俾哈哈笑，仲以為好好食，點知好一般，而且唔係傳統炸雞，份量又少，價錢又唔平。呢個價錢喺出面其他嘅韓國炸雞店，已經好大份，好好食。所以今次勁失望，絕對唔會再黎食！