黎來旺角呢頭，見到呢間係深圳嘅烤肉店-貓抓烤肉，竟然開左黎香港，即刻忍唔住要上去試下，睇下有咩分別。 成間店都係貓主題，十分多打卡位，愛貓人士真係好去試下啦。 一出電梯，已經見到員工企左係到，好好禮貌，帶左我地兩人去左張四人檯，好闊落，雖然係烤肉店，但唔係好大浸烤肉味，唔會食到成身都係個浸味。 張檯已經set好左，已經放好左三個醬汁，一支檸檬水同餐牌，落單係用QR code自助落單。 哇，見到個餐牌忍唔住同朋友講，呢個價錢烤肉真係抵，不過要試下先知啦，但係！係無令我地失望嘅，性價比極高。 由於兩位都好細食，就無叫set啦，散叫左一份貓抓全牛拼，現拌魷魚🦑，貓抓烤茄子🍆同埋一個貓抓拌飯。 貓抓全牛拼($258)有五款，每款都好多塊，肉質嫩，有幾款係有醬汁調左味，都好好食。 現拌魷魚🦑($42)，份量十足，好新鮮，呢個價錢真係抵食。 貓抓烤茄子🍆($39)，呢個就烤好拎上黎，可以即食，落左孜然粉，辣椒粉，唔錯。 總括黎講，呢個價錢食烤肉，真係好抵食，而且味道也十分唔錯。

一早已聽聞獲得東京連續五米芝蓮嘅金色不如帰係銅鑼灣fashion walk開左間姐妹店-牡蠣不如帰。之前已經試過又一城個間金色不如帰，果然出色，於是今日約左朋友黎到銅鑼灣試下呢間牡蠣不如帰。 店鋪空間感十足，以2-4人檯為主，愛蠔者嘅朋友諗都唔諗就叫左個 牡蠣鹽味拉麵。 呢個拉麵蠔味幾香，無蠔腥味，火箭菜同個湯底又好夾，拉麵係自家製的，口感彈牙，面質係我鐘意個款。 另外，仲叫左個豚骨辛拉麵，平時食得辣嘅我 覺得呢個麵有少少過辣，但係個醬汁醃得好食，有啲醃菜係入面。 小食揀左個白菌海老真丈天婦羅，呢個超出預期咁好食，一上碟就係熱剌剌，唔厚炸粉，唔油，菇入面釀左蝦滑，好鮮，唔鹹。

最近係會展附近做完野，經過呢間頗有特色又別緻嘅日式餐廳，望左下餐牌，價錢唔貴，款式、種類亦算多，決定入去試下。 職員安排了卡位比我地，座位寬敞舒適，一坐低，職員已經好快咁放低個餐牌同埋一壺檸檬水比我地，同職員傾起，原來樂富都有一間，九龍人都可以去試下，呢間食物質素唔錯，價錢唔貴。 店鋪設計簡單，以木色為主調，牆上都有幾幅畫裝飾。 今次叫左一款定食，一款御膳，兩款小食同埋一杯果茶。 比目魚柚庵燒御膳🍱 呢款御膳配有四款小菜，一個溫泉蛋同埋麵豉湯。而主角比目魚則足足有兩大塊，魚肉雪白嫩滑，魚皮亦燒到脆卜卜，送飯一流。 三重吉列定食🍱 三重吉列包括豚肉，蝦同埋蠔，炸粉好薄，亦係新鮮炸起，好好食，同御膳一樣配有幾款小菜，麵豉湯，呢個多左芝麻，比你自己研碎，加係醬汁入面。 自家製牡蠣餃子🥟 一碟有5隻，本身以為會好腥，點知唔會，反而好鮮，粒蠔好飽滿，唔洗點醬汁已經好好味。 西柚玫瑰花茶 西柚同玫瑰好夾，西柚好清新，加上淡淡玫瑰味，絕配！

之前已經食過三代目，性價比極高，今次黎到愉景新城，見到竟然有呢間，即刻入左去，唔洗揀其他餐廳。 今次叫左一款拉麵，一款丼飯，一款天婦羅，兩款小食同埋海膽壽司，一杯野飲。 全部都好好味。 拉麵揀左辛燒豚梅肉拉麵，麵質適中。唔會過硬或偏腍，湯底辣辣地，正！ 配左溏心蛋同埋筍，好好味！ 汁燒五花豚丼，五花肉舖滿成個碗，亦配左溏心蛋，啲汁已經淋左落飯到，唔洗自己落。好方便！ 呢個飯分量好多，五花肉燒過，條邊燶燶地 南瓜甜薯天婦羅，炸粉唔會過厚，啱啱炸起，南瓜同甜薯都好甜，好新鮮。 小食揀左炸雞軟骨同埋大蜆味增煮，炸雞軟骨就正正常常，反而大蜆味增煮就好出色，一般居酒屋都係只係得清酒煮蜆，今次呢個味增唔會太過濃，亦放左檸檬，味道清新。 海膽壽司啲海膽好新鮮，正！ 最後飲品方面叫左朱古力爆脆， 呢款唔會過甜，朱古力味重！值得一試。

兩個人叫左個二人餐，十分抵食又夠飽。 揀左春卷 （兩條）， 大條又足料，裏面有蝦同紅蘿蔔，脆卜卜。 前菜揀左個口水雞 （ 要加$38），將雞肉撕成絲，配埋佢個辣汁，十分惹味，仲有皮蛋作配菜。 主食揀左京蔥爆牛肉，牛肉腍，唔會過硬咬唔到個啲，送飯一流。 干鍋花菜係我每次黎呢間必點嘅一款，望落簡單一款，只得辣椒同埋花菜，但係！好好食，應該落左花椒油，不過今次有少少鹹。 野飲揀左檸檬玄米梳打 （無酒精個款）， 好好飲！每次去都必點。

夜晚唔知食乜好，就決定去試下湯米嘅臭臭鍋，一人一鍋，唔洗就朋友口味！ 而且性價比好高，每個鍋都係一百以內。 呢到提供好多唔同種類嘅鍋，有日式味增鍋，泰式海鮮鍋，巴蜀烤魚鍋，藥膳豚肉鍋，咖喱奶蓋鍋。今次我揀左日式味增鍋配粉絲，朋友揀左泰式海鮮鍋配白飯。 日式味增鍋 🥘 $96 滿滿的一鍋，有好多款食物，有豚肉，娃娃菜，蟹柳，粟米， 雲耳，冬菇，豆腐等。湯底唔會越煲越鹹，我另外單點左花螺，$28 一份，有8粒，好新鮮。 除左一人鍋之外，仲提供左好幾款台灣小食同飲品。 今次叫左鹽酥花枝墨魚丸同埋鹽酥金針菇與冬菇。兩款都好好食，花枝墨魚丸彈牙，可以食到粒粒墨魚。而金針菇令我眼前一亮，好脆，加上調味粉，好好食！

位於將軍澳區嘅美味日式居酒屋 - 三代目 店舖裝修後主打紅黑色，放左好多日式擺設，亦有一面酒牆，充滿日式風格。 職員十分友善，有禮貌，一坐低無幾耐職員已放低杯茶。值得稱讚嘅係雖然係用QR Code落單，但係店員都有放低一本menu比我地睇，手機落單固然方便，亦有圖文並茂，但我更加鍾意睇住menu，揀野食。 款式種類都算多，有拉麵，燒物，天婦羅，丼飯，炸物。 今次叫左豚肩叉燒拉麵，麵質適中，唔會太硬或太淋，湯底豬骨味濃厚，叉燒唔肥唔柴，好食！ 最鍾意佢配埋個溏心蛋，正 海之天婦羅包括左蝦，鯛魚，帶子，墨魚，全部都好新鮮，炸粉唔多。一向鍾意食南瓜嘅我，當然有叫到南瓜甜薯天婦羅，亦都無令我失望，好好食！ 另外，仲叫左個炸雞軟骨，份量多，好脆，唔油，值得一試。 今次無order到飲品因為餐廳仲拎緊酒牌，唯有下次再黎過啦

一直都知道將軍澳南區好多美食，而且評分都好高，今次同朋友一齊去左一間串燒店，絕對係會再訪嘅。不但止食物美味，而且服務好好。 佢個位置好方便易搵，地鐵站A2出口行5分鐘就到，就喺Donki樓下。 店舖環境簡單舒適，行一個木系極簡風路線。一坐低職員已經放低個蠟燭爐，等啲食物keep住熱，但其實啲嘢食上嚟嘅時候已經全部熟晒，唔洗自己再燒。職員隨即放低個QR code比我地scan睇menu同點餐，仲好貼心咁提醒如果唔食辣就打係備註到。 食物種類十分多，除咗提供串燒之外，仲有熟食，例如酸辣粉，薯條，麻辣鴨血等等。 今次叫左十一款食物，兩杯野飲。 ［大漠烤羊肉串］ $48一份 5串 呢個真係必點之選，一向都好鍾意食羊肉，呢個羊肉味重，肉質鮮嫩多汁，咬落去好鬆軟，加上落左孜然粉，十分惹味。 ［烤小牛肉］ $48 一份 5串 雖然小牛肉外貌普普通通，但都好好食，肉質滿滿，烤到恰到好處，唔會太老。 ［烤珍寶蟹柳王］ $25 一串 呢個就不會不失，略欠佢太幼。 ［金針菇牛五花卷］$28 一串 一串有三個，牛五花包住金針菇，好好食！ 值得叫 ［烤雞脆骨］$28一份 兩串 呢個我比十分，好味！略嫌佢有啲貴。 除咗肉類仲叫左幾款海鮮，質素都好好，雖然落咗辣椒同埋蒜蓉，都食得出海鮮嘅鮮味。 ［蒜蓉烤生蠔］ $38一隻 蒜蓉同蠔真係好夾，再加上放左辣椒，好好食，蠔新鮮，無殼碎。 ［蒜蓉粉絲烤扇貝］$42 一隻 扇貝好大隻，絕對對得起個價錢，底下用咗粉絲鋪左，粉絲好入味，扇貝新鮮。 ［清酒煮蛤蜊］$68一份 蛤蜊好大隻，一份有好多隻，無沙。味道清甜。 蔬菜就叫咗兩款 ［烤椰菜花］ $18 一份 1分後椰菜花有三粒，覺得有少少貴，但係味道都唔錯。 ［蒜蓉金針菇］ $38一份 蒜蓉金針菇放係錫紙盤入面烤，用咗蒜蓉去調味，加左牛油，成件事好夾好好食。 最後叫做左麻吉年糕燒，$23 一份 一個 燒得啱啱好，外層微脆，裏面好煙韌，配左煉奶同砂糖，但覺得砂糖太大粒，細粒少少會好啲，配煉奶食已經好足夠。 嘢飲方面叫咗個冷泡茶同埋森林元氣水果茶，水果茶好大杯，入面水果都好多，唔會太甜。而冷泡茶就不過不失，有茶嘅清香。