成日去大埔食飯都只係去大埔超級城周邊嘅餐廳搵食，食得多都有少少悶，所以就試下去大埔墟附近發掘吓有咩餐廳好食啦。行過見到有幾個人企喺間餐廳門口等位，就吸引咗我埋去睇吓有咩好食，發現原來係食西餐嘅，而且價錢又唔貴，加上見到精選套餐有自己鍾意食嘅黑松露忌廉汁煮嘅意粉，所以就排隊等位試吓啦。 跟餐忌廉湯 黑松露忌廉汁海蝦燴意粉 一嚟到見到三隻都幾大嘅海蝦放喺面，而且黑松露嘅味道都好突出，一嚟到就聞到好大陣黑松露嘅味道，醬汁都好濃郁，而且意粉軟硬度適中，除咗加入蘑菇之外，亦都加入咗少少蘆筍，令到成個意粉層次有所提升。可惜海蝦並無任何調味，好似白烚蝦肉咁，如果佢可以加返少少調味，同煎一煎啲蝦肉咁就完美啦。 黑啤忌廉汁碎牛肉帶子燴意大利飯 另外，我哋亦嗌咗一個比較特別嘅黑啤忌廉汁碎牛肉帶子燴意大利飯。本身我哋滿心期待住呢個特別嘅黑啤忌廉汁係點，結果一見到真身就有啲後悔啦，因為佢嘅醬汁太過多，令成個飯好似變左湯飯一樣，而且佢嘅帶子係用咗珍珠帶子仔，再加上碎牛嘅樣子不太討好，所以喺外表上已經扣咗唔少分，而味道亦算中規中矩，下次應該唔會再叫呢個飯。 海棠魷魚鬚 除咗主菜之外，我哋亦加錢配搭左一個是日嘅小食，就係海棠魷魚鬚啦。哇…呢個魷魚鬚真係好好食，佢嘅炸衣唔係好厚，而且有好香嘅海苔嘅味，魷魚鬚又好彈牙，一流啊😋😋😋佢比我哋食嘅主菜更出色，為咗呢個小食我一定會再返轉頭幫襯👍🏻👍🏻👍🏻

每次去大埔行街，途經附近都會見到有一班人企喺間舖嘅門口，搞到我都唔敢行埋去，因為怕要等好耐先有得食，但另一方面又好好奇，啲滷味係咪真係咁好食呢🤔長期都咁多人排隊。終於今日忍唔住走左埋去攞位啦，結果又唔係真係要等好耐喎👍🏻👍🏻👍🏻係門口見到個餐牌，除左滷水鴨/鵝之外，仲有豬/牛/雞等等選擇，所以都真係算幾多選擇。咁我當然係選擇食滷水鵝啦，而朋友就唔食鴨同鵝嘅，所以佢就揀左食豬頸肉😋 招牌滷水獅頭鵝+鮮鵝油撈麵 一開始諗住叫鵝片拼豆腐，但見到隔籬枱啲鵝片唔算多，而且又唔係咁想食豆腐，所以就搏一搏直接叫佢過招牌滷水獅頭鵝啦。起初以為叫滷水鵝一定會有好多骨啦，結果又唔係喎，竟然有好多肉，反而得好少骨，而且肉質都好彈牙，非常驚喜😍😋但鮮鵝油撈麵方面，我就覺得無咩特別，唔係好食到鵝油嘅味，反而食到少少鹼水味。好在加左少少麻辣醬，令到碗麵有返啲味道。 香烤焦糖滷豬頸肉+鮮鵝油撈麵 起初見到呢個豬頸肉平平無奇，同出面一般嘅泰國餐廳整嘅差不多，但一食落口，就知道好唔同，真係食到有焦糖嘅脆口口感，肉質好爽口，配上附送嘅酸辣汁，真係非常好味，係我食咁多間豬頸肉之中排頭三位。但可惜嘅係佢嘅份量好少，食幾塊就好快食晒。😖如果豬頸肉嘅份量多番少少就好啦。😂

一講起上水符興街，大家第一時間會諗起藥房同藥妝店，但其實嗰度仲有幾間茶餐廳的。當中就有比較顯眼嘅海盜王餐廳啦，話佢比較顯眼係因為門口用左鮮明嘅天藍色，大大隻字寫住海盜王，所以真係幾易認！🤣而且裏面嘅裝修真係以海盜為主題，都幾特別架👍🏻 呢間餐廳我都黎過幾次，差不多次次都係食意粉，今次我就叫左個忌廉煙三文魚意粉，分量對於我哋女仔黎講真係剛剛好，唔會太多或太少，味道亦都不過不失，貌相同味道同出面啲西餐廳都算有得比，但價錢只係$5x就食到，真係算抵食啦！！👍🏻

最近同朋友約食飯，大家唔知食啲乜嘢好，我突然諗起可以同佢哋食最近非常受香港人歡迎嘅酸菜魚🤣🤣所以我就搵左呢間打卡度幾高下嘅姚姚酸菜魚啦🤣🤣因為整間舖頭都用咗女仔最愛嘅Tiffany Blue為主色調，而且裝修都有心思，非常適合打卡😍再加上呢間舖頭除咗酸菜魚之外仲可以食到片皮鴨，呢個組合非常吸引👍🏻👍🏻 今次我哋有三個人，而且大家都比較細食，所以叫咗一個二人餐就已經足夠了。仲可以一次過食晒佢嘅王牌酸菜魚同片皮鴨，價錢方面都好合理。 姚姚酸菜魚拼北京烤鴨套餐 呢個套餐包括咗四樣菜式： 🔸北京填鴨（半隻） 🔸酸菜魚 🔸孜然椒鹽鴨架 🔸酸辣土豆絲 首先會上左北京填鴨、酸辣土豆絲及孜然椒鹽鴨架先。第一眼望到隻北京填鴨都整得好靚，鴨皮烤得好香好金黃，而且附送嘅餅過皮都幾薄，加上青瓜絲、蔥絲、甜醬等等包起來食，同其他酒樓不相伯仲，但價錢就經濟好多👍🏻👍🏻👍🏻 差不多食完北京填鴨之後就會上主菜酸菜魚啦！酸菜魚嘅份量都幾多下，魚肉都好滑，但酸菜就有少少酸過酸同鹹咗少少。美中不足嘅係佢冇加寬粉喺裏面，感覺就好似欠缺咗啲嘢咁，如果可以加番少少酸粉，咁就非常好啦！ 總括而言，姚姚酸菜魚非常適合同三五知己聚會食飯，特別係同女性朋友，因為可以食吓嘢打吓卡，而且座位都非常舒適。回頭率非常高呀！👍🏻👍🏻👍🏻

今日途經大埔超級城見到呢間日本西餐廳平時好多人排隊，竟然無人排隊（可能時間比較夜啦🤣），梗係入去試一試啦！入到去店員就帶左我哋行到最入嘅座位，可能係比較夜啦，人流唔算好多，所以環境比較靜，私密度都幾好，好似真係去左日本當地嘅西餐廳咁😊座位方面都好濶落，坐得好舒服👍🏻 食物方面，我地叫左炸軟殼蟹扁意粉同鰻魚玉子蓋飯。 炸軟殼蟹扁意粉 擺盤真係好靚，成隻軟殼蟹炸得好挺身，唔會軟淋淋咁，可以呈現返一隻蟹嘅形狀🦀配埋白汁扁意粉，而且醬汁都幾多下，完全唔會乾，非常易入口。另外，係隻軟殼蟹下面仲內藏乾坤，竟然有兩粒帶子係度，粒子都好彈牙。整體來講呢個扁意粉好啱我心水，非常推薦👍🏻👍🏻👍🏻 鰻魚玉子蓋飯 相比炸軟殼蟹扁意粉，呢個鰻魚玉子蓋飯嘅擺盤就有少少遜色了，只係用一個碗裝起，分量望落去好少，非常普通。不過一黎到就聞到好香嘅燒汁味，而且個玉子都好厚。但本人可能食得比較淡口味，略然覺得鰻魚嘅醬汁過濃，而且玉子亦有少少過甜，但整體來說呢個鰻魚玉子蓋飯都唔錯的，但擺盤方面就真係要改善一下。 抹茶牛乳 & 焙茶牛乳 餐飲我哋就叫左抹茶牛乳 & 焙茶牛乳，貌相幾吸引，但焙茶及抹茶味略然不足，味道較淡。

有晚約左朋友係油麻地附近見面，但又唔知道有啲咩嘢食，咁咪上網睇吓啦，結果俾我見到呢間有live band表演嘅樓上coffee shop/西餐店，見好似幾有特別咁，就決定上去試下啦！話佢隱世係因為佢上去舖頭條路有少少隱蔽，搵左一陣先搵到🤣🤣🤣 雖然整間舖嘅面積唔係好大，但環境都幾好，座位之間都幾濶下。但由於我哋坐係佢個煮食爐附近，而佢又係open kitchen,所以油煙都比較大，呢度都扣左啲分😅 我自己叫左個炭燒肉眼牛扒，我覺得不過不失啦，我今次叫左7成熟，佢都做到嘅，並無出現過熟情況，醬汁都幾好。本身以為煮菜會係薯條，結果原來係薯餅，而且仲整得幾脆下，唔錯👍🏻 朋友就叫左蕃茄司華力腸長通粉，雖然貌相平平無奇（可惜唔記得影相），但朋友就話好好食，好有家嘅感覺🤣🤣 最後我叫左杯特飲- 比利時特濃朱古力，貌相唔錯，有一層厚厚嘅cream,我當自己食緊甜品咁😊而整杯朱古力一啲都唔甜，仲帶有朱古力嘅甘味，整杯野飲都好正😍

之前成日聽朋友講呢間新派韓國餐廳好好食，今日終於有機會去試吓啦😍但今次只係得兩個人食，所以只係叫左1個Pizza🍕同1份半半炸雞🍗之前成日聽朋友講呢間新派韓國餐廳好好食，今日終於有機會去試吓啦😍 韓國烤肉芝加哥Pizza 呢個Pizza同一般嘅芝心批Pizza好唔同，因為佢放左雙倍嘅馬蘇里拉芝士同巴馬臣芝士係pizza嘅中間位置，批邊又有加左唔少芝士，一拎起就有超強嘅拉絲，口感非常豐富，煙煙韌韌～另外，Pizza中間嘅牛小排甜甜地，一啲都唔韌，真係好好味😍 韓國炸雞～蒜香甜辣秘製炸雞 & 蜂蜜牛油秘製炸雞 由於想食唔同味道嘅炸雞，所以今次我哋叫左half & half (12件）兩款唔同味道嘅炸雞。蒜香甜辣秘製炸雞，雖然佢叫做甜辣炸雞，但係一啲都唔辣食落仲甜甜地添。蜂蜜牛油秘製炸雞，蜂蜜嘅甜味，加上牛油嘅香味非常之夾。佢嘅炸雞件件都好大件，而且炸粉一啲都唔厚，熱辣辣得來又多肉汁，非常好味🤤，係好地道嘅韓式炸雞👍🏻👍🏻👍🏻 最後想講吓餐廳嘅環境，座位都算闊落，但係背景音樂略為大聲咗啲，有啲嘈吵，同朋友傾偈時要大聲啲對方先聽到。😅

最近喺社交平台經常見到呢間賣現切手Tiramisu嘅舖頭，經常都有好多款唔同味道嘅Tiramisu，而且主張係零卡糖，搞到我心思思想去試吓🤤今日我終於嚟到荃灣分店，見到起碼有10多款唔同味道選擇，例如有經典原味Tiramisu、宇治抹茶年糕Tiramisu、港式糖水楊枝甘露Tiramisu等等。睇到人花多眼亂，不過我呢個抹茶控，當然梗係揀咗宇治抹茶味啦🤣 雖然一件Tiramisu要$58，價錢略為有少少貴，但佢size一啲唔細件，而且裏面放咗唔少麻糬，材料十足。淡淡的抹茶甘香配上微甜嘅紅豆蓉，再加上煙煙韌韌嘅麻糬，口感十足，味道相當唔錯👍🏻😋 最後我都想稱讚一下呢間舖頭，雖然只係買一件Tiramisu，佢都會送一個保溫袋俾客人，非常細心👍🏻👍🏻👍🏻