車仔麵永遠都係我最愛😍 葵芳廣場出名多嘢食，難得有時間過去葵芳接家姐收工，佢介紹我食呢間車仔麵，原因係啲辣菜脯好好食😱，而且唔辣，佢每次食都要落好多。望一望啲餸，竟然我鍾意嘅全部都有，當然要試😋 四餸米粉 $67 我揀咗水魷魚（+$5）、牛柏葉、豬皮、牛腩配米粉同腩汁。 四餸米線 $67 家姐揀咗豬紅、雞翼尖、冬菇、水魷魚（+$5）配米線同腩汁。 3個餸係$52，我地加多1個水魷魚餸要加$16，普通餸就$11，水魷魚即使要加錢都好值得食，因為係好爽口彈牙。 辣菜脯我唔識欣賞，但家姐每次都落落落好多。可樂都係+$3，真係好抵食😋😋

又嚟食燒肉啦🥳🥳 當晚6:30pm嘅時候竟然冇人排隊等搭𨋢！餐廳都好少人，不過原來係時間尚早，7:30pm嘅時候已經坐滿超過八成了。 前菜 配菜自取區 牛肋骨肉 $150 感謝我的燒肉夥伴🥹 每次都幫我燒得好出色，牛肋骨肉口感嫩滑，骨邊濃郁的牛肉鮮味比更他部位更加出。另外今次解鎖咗新食法，嘗試用爐邊芝士包住牛肋骨肉，令口感更豐富有層次。 蟹籽紫菜飯團 $50 呢個飯團真係首選，好平好抵食，每次包 飯團嘅重任都交比我，已經掌握到竅門令到飯團好實唔會散開，食過嘅朋友都讚好👍 蔘雞湯 $125 份量兩個人剛剛好，除咗有三大碗湯外，仲有好多雞肉，唯一不足係蔘味唔夠。 水冷麵 $95 夏天一定要食水冷麵，食完燒肉要食水冷麵，任何時候都可以食水冷麵🥳🥳，解膩又清新，唔好用鉸剪剪得太碎🤣🤣。 酷啤斯（蜜桃汁） 左 $30 桃子汁 右 $30 兩罐飲品味道有啲相似，分別在於桃子汁較租，酷啤斯相對清新啲。

朋友推介呢間餐廳，雖然係小店，望入去雖然好似好細間，但原來入面有兩層。 CRAB"PANI PURI" 蟹肉沙律脆球 店員介紹理念係類似印度炸脆球，食嘅時候咬一啖後望入面好多蟹肉，蟹肉搭配沙律醬好開胃。 KUIH PIE TEE 拖羅小金杯 成個小金杯拎起一齊食嘅口感最好，外層薄脆、內裡有拖羅、青提同鰹魚芥辣啫喱，口感豐富，食材搭配新奇又特別。 RAVIOLO 流心蟹肉、青口，蝦意大利雲吞 呢個雲吞真係令人喜出望外！ 除咗有蟹肉、海蝦、青口、茄子外，最特別地方係搭配冬蔭，唔會辣但又有特色，東南亞地區嘅人都會鍾意。 ZHANIANG CHICKEN 菊普湛江雞 食材包括葡萄葉釀米、椰菜仔、柑桔、菊普。雞胸好嫩口，食材嘅搭配好大膽，充分表現到中西合璧。 STRAWBERRY MOUSSE 龍井士多啤梨慕絲 完全唔會好甜，士多啤梨內有蘋果肉，西式甜品搭配試雨前龍井茶香味，令到口感同味道更有自己特色。 **其他分享：每道菜都會附有中文介紹，職員好親切，好好笑容，用心服務，仲提醒我每個月都會轉餐牌，如下午時間openrice訂座可以有8折優惠，態度一流！

「韓印紅」平時見到，估唔到原來喺香港係有餐廳，韓式食品超市「韓印紅」旗下第1間韓國餐廳位於尖沙咀，餐廳面積大、位置闊落，星期日嘅夜晚好多人，餐廳由韓國老闆打理。 半半：鹵豬蹄和白切肉＋辣拌蕎麥拌麵 配肉的泡菜好特別，暫時係我喺香港食過最好的泡菜，回憶起韓國的味道🥹 鹵豬蹄和白切肉份量好多，用菜包肉再加上配菜泡菜，令到口感更豐富。 辣拌蕎麥拌麵唔算好辣，但份量又係好多，最後食唔晒。 醬油蟹配醬油蟹飯 好耐冇食醬油蟹🥹🥹，一碟嘅份量都好多，兩個人食剛剛好。 店員主動介紹，教我地將一半嘅醬油蟹唧落去飯度攪拌，再將攪拌後嘅醬油蟹同飯放入蟹殼入面，令到飯有醬油蟹嘅醬汁、又有肉嘅鮮甜，口感層次提高。 當晚餐廳老闆落場幫手，仲送咗每枱都有韓版益力多。另外，不得不提呢邊慶祝生日嘅方式好特別，邊個損友生日記得book餐廳嘅時候講定，全餐廳會幫你一齊慶祝🤣🤣🤣

最近同朋友嘗試多咗唔同嘅素食餐廳🍴，新一年最想係改變自己嘅飲食習慣，想更健康啲，特別鍾意啲色彩繽紛嘅嘢食😋 牛油果雜菜沙律 $98 牛油果份量十足，好滑又creamy，雜菜好脆口仲有車厘茄，配上黑醋汁作調味好開胃。 鮮粟米忌廉濃湯（奶）$42 口感好滑，鮮甜濃厚。 香菇竹笙菜胆翅湯 $68 盅湯湯料好豐富，有冬菇、白菜、竹笙、素翅等，更令到湯底非常濃郁和精華。 京都片皮鴨 $128 推薦！餐廳特色素食，好少見到素食做得咁精緻，賣相真係同片皮鴨有9成似！味道就有7成似，搭配青瓜、黃椒、紅椒再加上特製醬汁。 日式半煎炸餃子 $48 有4隻餃子🥟，餃子香口又唔會太油膩。 蜂蜜薑茶(熱）$38 飲品方面款色都好多，仲有台式飲品，不過最近唔舒服所以飲杯熱蜂蜜薑茶，甜度剛剛好又有少少薑味。 紅豆椰汁糕（奶） $22 口感煙煙韌韌，唔會太甜。

觀塘區有好多台式餐廳，但有特色令我印象深刻嘅就唔算多，呢間1.01除咗食物令我印象深刻外，佢嘅裝修都好有自己特色🥳，即使係工廠區呢邊，但夜晚同朋友嚟食都差唔多滿場，喺觀塘區算係知名嘅台式餐廳。 1·01芒果魯肉飯 $58 呢個係1.01必食推薦！魯肉飯本身已經好吸引🤩加埋芒果落去就係滿分！暫時都無係其他台式餐廳見過。 呢個價錢有咁多芒果真係好抵，芒果好甜，撈埋魯肉配飯就食完一啖又一啖😋 蜜汁排骨便當 $68 好大份😍😍 排骨佔咗便當三分之二，排骨全部炸得酥脆內嫩，淋上蜜汁配飯，呢個價錢抵到可以食兩個！ 鹽酥雞球 $18 呢個價錢鹽酥雞可抵食！唔係街邊果種好油膩嘅感覺。 炸鮮奶·芋泥二文治 $48 鮮奶卷咬落去好軟滑，唔會好甜但有鮮奶味。芋泥二文治外皮鬆脆，入面嘅餡係濃郁芋泥，好滑又好食，推薦！ 芝 •芋頭鮮奶 $34 芋頭加上芝士奶蓋同鮮奶，令到杯飲品口感豐富同有層次，最緊要係無冰！ 古早奶茶加仙草$18 仙草配奶茶係唔會錯🥳，唔會太甜又有奶茶香味🥤

前排先同朋友講九龍塘又一城開咗分店，估唔到連旺角都開咗😱😱😱，新店位於旺角東Moko新世紀廣場嘅food court，剛剛開已經人氣旺盛，好彩座位都算多，唔需要等好耐就入座。 韓國螄蚶拌飯 $192 呢個螄蚶拌飯又係差不多每次必食，一半嘅螄蚶配一半嘅飯，有少少辣更加惹味！ 炸大魷魚拌炸醬麵 $195 食過唔同分店，好似係第一次見炸魷魚配炸醬麵，炸醬汁份量剛剛好。 酥脆雞胸軟骨 $62 雞胸軟骨同平時食開嘅有啲唔同，炸完嘅雞胸軟骨又爽又脆。 濟州柑橘乳酪 $68 熱情金菠蘿沙冰 $68 呢兩杯飲品係呢間店嘅特色，每次見到原個橙同菠蘿係上面都覺得好得意💕💕，柑橘係乳酪底比較甜，菠蘿係沙冰底有少少酸又帶點清新。 柑橘窩夫伴雪糕 $135 呢間嘅窩夫係唔會令人失望，窩夫搭配柑橘果肉、雪糕同忌廉令到口感豐富又有層次。

餐廳入口係古代嘅背景，可以換衫打卡😂😂 嘉慶椰子藏雞濃湯鍋 見其他人影呢個相好靚，估唔到現場睇更加靚🥹！加咁乾冰令到上鍋時充滿仙氣，乾冰份量應該都多，足足成分鐘。 一上嘅時候已經好濃嘅椰子味，剪開腐皮後入面包住好多雞，啲雞係生雞所以一直要煮耐啲！記得要飲湯，煲過湯後椰子味又重又甜🥹🥹，飲咗兩大碗！ 本地牛頸脊騸牯牛肉(限定)(細) 牛肉好靚，肉味香濃，份量兩個人食都足夠，厚度切得剛剛好，大約煮15秒好快熟。 滾得囍餃子拼盤十粒 朋友作為餃子達人，表示可以一次過食五款餃好正！最特別應該係馬蹄冬菇豬肉餃，口感豐富😋 滾得囍豊盛雜菜拼盤 入面係裝得好實好滿，而且有好多款唔同嘅蔬菜，有驚喜！ 黃金雙拼(秘製鹹蛋黃醬） 超級邪惡😈😈😈！炸響鈴同炸魚皮配上秘製鹹蛋黃醬，又香又脆！ 白牛柏葉 唔洗特別介紹🤣打邊爐必食 竹蔗茅根一渣 藍妹生啤500mL 邊爐當然最開心要啤一啤，但我唔舒服唯有飲竹蓆茅根，竹蓆茅根好足料！

好開心可以接到朋友收工，一齊喺旺角搵嘢食，咁啱經過見到呢間泰國菜餐廳，價錢唔貴，款式都多，而且網上好評都好多。 辣椒膏炒蜆 $128 蜆肉無沙，大大粒搭配辣椒膏甜甜辣辣好野味，辣度係唔食得辣嘅人都食到。 菠蘿炒飯 $68 $68呢個份旺好抵食😋😋！仲有配海鮮、大蝦、肉鬆令到口感更豐富。 豬頸肉炒通菜 $78 通菜好爽口，用朋友好快就清咗成碟，豬頸肉份量再多啲會更好。 芒果糯米飯 $58 芒果好甜，糯米飯好熱，口感偏軟身，如果飯粒硬少少口感會更好。 泰象啤 $25 食泰國菜飲象啤是常識～可以平日同朋友淺酌一杯真係好幸福，$25支喺餐廳飲好抵。

天氣一轉凍，又係打邊爐食燒肉嘅時候了😋 呢間燒肉店已經推介晒比身邊嘅朋友，旺角、尖沙咀、銅鑼灣分店都去過晒了😆，今日陪朋友去銅鑼灣買禮物，順便再食過！ 喜來烤肉 $158 擺盤好靚又有心思，烤肉口感嫩滑又充滿牛肉香味，唔需要點醬汁都好入味。 豬頸肉 $150 好脆好爽口，不過有啲難燒，所以我哋先剪開一半再慢慢燒。 蟹籽紫菜飯團 $50 呢個飯團真係好抵食！差唔多次次都必嗌，好鍾意自己整，可以整細細粒一啖食晒，飯粒撈埋蟹籽、紫菜、醬汁令到飯團口感好豐富。 水冷麵 $95 食一啖燒肉，再食一啖水冷麵🍜好正😋！水冷麵浸住冰水，食嘅時候涼浸浸，而且口感都好爽口，可以解燒肉嘅油膩。 可惜兩個人嗌唔到太多食物，如果一班人一齊食就可以試多啲唔同款式。