觀塘工廈出名多好嘢食。今日就嚟咗呢一間喺成業工業大廈嘅日式餐廳。 裝修雖然簡單，但用色幾和諧日系，幾cozy! Menu 而家用優惠價$18就可以食到小食。呢個自家製蝦芝士春卷估佢唔到都幾好食，高質！春卷皮薄薄哋一層，唔會好厚好油。入面嘅蝦滑好入味，芝士呈流心狀，配埋佢嘅辣沙律醬，真係想再食多幾舊。 招牌手打和牛漢堡扒蘭王蛋飯 ($128) 佢有三款醬汁選擇，分別係秘製漢堡汁、白味噌汁、日式咖喱汁。店員好親切，分別會介紹三隻味嘅特點俾客人選擇。我就揀咗秘製漢堡汁，可能係聽到秘製兩個字想試吓佢有幾特別。另外有兩款配料可以選擇，分別係日式泡菜同埋芥辣酸瓜。 佢嘅賣相好靚，堆到好似山咁高，令人食指大動。最高嘅係蘭王蛋，其次係蘿蔔蓉、日式泡菜、和牛漢堡扒。 蘭王蛋橙黃色，筷子插落去蛋漿即溢出，感覺新鮮。 日式泡菜冇韓國嘅泡菜咁辣咁酸 個和牛漢堡扒真係超正，佢外面煎到微焦，入面呈粉紅色，嫩滑而牛味濃。 最後以一杯熱柚子蜜作結 ($5)

本身唔係食開素，但喺朋友推薦下就嚟食下依間素食cafe。小店晚市時段人流滿滿，冇訂位見有d人要等好耐。 菜品比較簡單，但全部都圖文並茂。 跟餐嘢食可以揀配一杯熱嘅玄米茶唔使加錢，玄米茶好香，感覺都幾高質。 黑松露炸蝦帶子意大利飯 ($128) 素食嚟講做得幾出色。帶子係啲菇菌類，整到連個口感、味道都好似食緊真嘅一樣，尤其係個煎嘅帶子皮，帶點咸香又有少少脆，好有驚喜。 炸蝦都好好食，個脆皮應該係腐皮整，外脆内軟。 見隔離枱有拎d芝士粉，我哋又貪得意拎一份，原來係d nuts碎，倒落意大利飯又幾夾。 自家製茼蒿青醬意大利粉 ($88) 個意粉感覺係走健康路線，唔係好咸。可以落啲檸檬汁調味。配料以菇菌同茼蒿為主。 黃薑焗福花配自家製乳酪 ($58) 見個名幾特別就叫咗，福花其實係椰菜花，但感覺偏咸。自家製乳酪唔係好夠。佢仲落咗少少藍莓，個組合幾特別。 最出色嘅可以話係個甜品 日本南高梅柚子青提慕絲蛋糕 ($68) 第一次食純素蛋糕，佢少咗cream嘅肥膩感，食落清新自然冇冇乜負擔。青提同埋蛋糕入邊嘅柚子都好清甜，非常好食。 糖漬檸檬伯爵茶杏仁撻 ($58) 成個甜品好balance，因為有糖漬同埋檸檬，食落感覺酸酸甜甜，伯爵茶味道好出。 甜品太好食，下次嚟要再食吓唔同款式。

以前喺深水埗店嘅時候已經幫襯過Q1，今次第一次嚟新店食，水準仲保持到。平日晚市時段滿座，可見佢受歡迎程度。 米紙蝦卷 ($45/2) 有得揀要魚露或者係自家醬。魚露都大概知佢係咩味道，所以今次就食咗自家醬。佢係類似花生醬底，落埋其他材料好似係炸蒜同埋蘿蔔絲。個醬簡直係米紙卷嘅精華，因為如果淨係食嗰個米紙卷嘅話就會比較淡味。 米紙卷用咗啲葉包住，入面嘅材料結實整齊，有扎肉、粉絲、生菜、蝦等，都好新鮮。食一條已經夠晒飽。 蟹膏蕃茄湯檬 ($65) 用手機落單嘅時候可以自由選擇要多d或者唔要咩配料。重點配料好似係蟹膏塊都可以加錢要多一嚿。 個湯做得好入味，蕃茄味同埋蟹膏味都balance到，檬粉軟硬度適中。 沙甸魚軟包 ($42) 平時食法包有時會覺得好介口，今次就想試吓軟包好唔好食。個包暖暖哋，食落好舒服。茄汁沙甸魚嘅味道唔會太酸。 越南香茅雞翼 ($35) 主要係食到佢個香茅味，冇話好驚艷，個皮有少少脆。 芒果糯米卷 ($35) 有啲似食緊長洲糯米糍，軟綿綿，芒果唔酸 。呢款就加埋椰絲，加添一份東南亞風味。 斑斕綠豆糕 ($15) 係我心心念念嘅斑斕綠豆糕啊，以前食過一次之後念念不忘。佢帶有少少斑斕嘅香味，食落煙煙韌韌軟綿綿。初初坐低嘅時候落單佢就即刻上，食完一個覺得唔夠喉想再叫多一個嘅時候，已經賣晒。 滴滴咖啡 ($32) 啡香濃馥，味道醇厚，順滑好飲！ 椰皇 ($30) 夏日炎炎好啱飲，清甜解渴。

今日同屋企人嚟咗屋企附近呢一間餐廳食個家常便飯。餐廳都幾光猛同裝修都幾乾淨企理。 菜品種類繁多，除咗港式小炒、家常菜類，川辣菜式都有唔少，又估佢唔到喎。 藤椒魚皮 ($42) 個魚皮做得好出色，藤辣好過癮，有麻麻哋嘅感覺。魚皮整得啱啱好，食落彈牙有口感。非常之好嘅開胃小菜。 椒鹽田雞 ($88) 比想像中多炸粉，雖然食落係香口嘅，不過炸粉以下嘅田雞略嫌冇乜鮮味。 豉汁蒸䱽魚 ($92) 估唔到有依個款食，而且個䱽魚都幾大條，啖啖肉。豉油係酒樓級蒸魚豉油。 瑤柱蝦米浸時蔬 ($71) 食個清清地菜，好好嘅位係可以揀唔同嘅菜款。今次食西蘭花。蝦米同d菇菌類都有d多。 鐵板茄子班腩炒麵 ($66) 原來個麵係炸麵底，上面嘅茄子同班腩入味，而且份量多，幾香口好食。 柚子蜜 跟餐加$10就有，不過好似落得太多，略甜。

今日同屋企人去咗呢間中菜廳食飯。佢嘅位置喺南洋商業中心入邊嘅地庫，有少少唔顯眼。 五香燻魚 ($108) 咸鮮嘅口味好啱做餸，炸到外面香脆，裏面唔太硬。 太白醉翁乳鴿 ($98) 原本想叫普通乳鴿，但竟然賣晒，就叫咗依個嚟replace，點知好有驚喜。個乳鴿酒味濃郁，啖啖肉，肉質嫩滑多汁，皮薄又唔肥。 尚宛擔擔麵 ($68) 同平時食開嘅擔擔麵唔同，佢有一浸辣油喺面，唔係好似花生湯底嘅感覺。不過啲麵條煮到軟硬適中，都還好嘅。 蘿蔔絲酥餅 ($48) 好好食而且有睇頭。黑色嘅蘿蔔絲酥餅配上少少金箔，成個菜即刻高級咗。個酥皮唔會好厚粉，入面嘅蘿蔔絲熱辣辣，好正！ 花素蒸餃 ($38) 貪佢健康唔肥膩，點埋醋食提味，不過不失啦。

尖沙咀天文臺道有幾間日本餐廳，今日去開尖沙咀shopping，就揀咗一間都有幾多好平嘅餐廳嚟食吓。

食居酒屋最啱就係嗌sake，喺店員推介之下，我哋揀咗呢支越後櫻純米大吟釀。佢比較易入口，帶着淡淡嘅sake清香，後勁唔強，好啱女仔飲。店員仲俾我哋選擇自己鍾意嘅sake杯。


喺OpenRice訂座有折之餘，仲送一客磯煮鮑魚。依款鮑魚比想像中軟身，唔係好哽胃，味道亦都足夠，唔需要額外再點其他調味料。


南非鮑魚($98)
相比起磯煮鮑魚，呢款南非鮑魚就比較彈牙，而且會食得出佢嘅鮮味多啲。


海膽松葉蟹蓋甲羅燒 ($138)
老實講海膽味就唔算好突出，可能以蟹膏為主打。不過蟹味都好濃郁，充滿着鹹香鮮味，配上三塊梳打餅食。如果再多啲蟹膏就好啦！


白鱔 ($78)
去親居酒屋都一定會叫白鱔。都幾推介呢個白鱔，佢啖啖肉之餘，仲鎖住啲肉汁。肉質嫩滑，外皮彈牙，而且仲保留到少少脆皮嘅感覺。




厚切牛脷芯 ($78)
牛脷芯可以話係牛脷入邊最好食嘅部份。呢個厚切牛脷芯唔硬唔老，嫩滑多汁，油脂豐富，好食！


Seasonal 龍蝦串 ($118)
店員推介咗我哋幾樣seasonal嘅菜式，其中一樣就係呢個龍蝦串。龍蝦味都幾濃郁，肉質結實，調味足夠。


另外一樣就係蒜蓉元貝 ($98)
元貝啖啖肉非常之好食，佢落咗個牛油汁，即使只有簡單嘅蒜蓉同埋蔥調味，已經覺得好有口福。另外佢用咗啲海帶墊底，啲海帶點下個牛油汁食都好好食。


西京燒銀鱈魚 ($188)
又係是日推介菜式之一，個銀鱈魚嫩滑多汁。西京燒醬汁唔會太鹹，反而會提升咗魚嘅味道。作為沙律醬控嘅我，點咗勁多沙律醬食，沙律醬亦都同個魚好夾。


茄子 ($30)
茄子燒到啱啱好，不過不失啦！


綠茶蕨紅豆白玉 ($68)
甜品係朋友話想食嘅。紅豆偏甜，不過豆味濃郁，豆蓉嘅狀態啱啱好，個脆餅因為冇乜味所以襯個紅豆蓉食都OK。綠茶蕨餅甘甜，白玉煙靭。美好嘅一餐以甜品作結。

今日同朋友嚟咗喺呢間位於尖沙咀嘅玩味餐廳。之前去過佢另一間分店，今次再嚟食下。 餐牌設計上有心思，雖然要花多少少時間先睇得清楚究竟嗰樣係咩嚟。 黑過墨汁三文魚pizza （$138) 以Pizza嚟講價錢唔係好貴。佢係屬於薄片pizza，食落唔會太飽。佢用墨魚汁同芝士墊底，上面每一塊pizza都加左d半生熟三文魚，仲有車厘茄中和返個飽滯感。好surprise個三文魚都幾大塊。 鵝肝槓上肝菌飯講十次 ($188) 超滿足的一個飯，值得要讚嘅位係risotto煮得啱啱好，而且每一粒米飯都吸滿忌廉汁，完全冇話乾。厚切鵝肝肥美之餘，煎到外脆內軟。牛肝菌份量都好多。 都係香芋鮮奶好味D ($56) 唔係好明點解會有呢個名。呢個係香芋鮮奶，有少少似維記嘅香芋雪糕味，唔會太甜。同埋竟然有拉花！ 放心冇咩杏仁味好香的杏仁焦糖綠茶 ($46) 見到呢個名所以先安心叫, 因為平時都唔係好飲杏仁味嘅嘢。呢個焦糖綠茶其實佢只有微微嘅杏仁香味，而且甜甜地的。

今日同朋友嚟咗呢間喺尖沙咀嘅居酒屋。佢個氣氛都幾好，仲有榻榻米座位選擇，好有feel。 牛油果醬山葵漬 ($68) 牛油果新鮮唔會過熟，佢落咗d豉油，食落有d似食緊魚生。山葵漬食落剌激，起到提味作用。 炙燒和牛壽司 ($158) 首先店員會用個火槍燒一燒個壽司。燒完之後個和牛半生熟，入口即溶好軟滑，仲可以滴啲牛肉汁同葱增加風味。 明太子醬厚燒玉子 ($68) 玉子燒落咗豉油甜甜地，食落軟綿綿，明太子份量適中唔太鹹，落埋啲白蘿蔔蓉中和返個咸味。 五雕刺身盛盒 ($328) 擺盤有心思，以為五雕係五款但係其實有三文魚、蝦、鮪魚、帶子、三文魚籽、油甘魚等。食三文魚籽嗰陣時覺得佢尤其新鮮，因為個外皮好脆身。 白鰻魚串燒 ($138) 鰻魚脆皮彈牙有口感，仲鎖住到肉汁，兩串唔夠喉啊！ 日本甜醬牛肉鍋 ($138) 天氣凍最啱食啲鍋物, 個牛肉鍋得三片牛肉份量有啲少, 不過可能佢唔係一般肥牛啦。蔬菜類都好豐富，有冬菇、金針菇、豆腐、娃娃菜、小棠菜等。 白桃梳打 ($58) 飛雪蜜瓜梳打 ($62) 比較特別嘅係飛雪蜜瓜梳打，原來有埋雪糕喺面，撈埋一齊幾好飲！ 人均 $560

好耐冇食過大陸式燒烤，今日嚟到呢間喺油麻地嘅燒烤店回味一下。 一坐低店員就落咗啲粉喺我哋隻碟度，一款係孜然粉一款係辣椒粉，孜然粉好香好惹味，辣椒粉反而就唔係好辣。 Menu 都有好多款選擇 藤椒魚皮 ($38) 大推! 感覺係全日最好食嘅一味小食。 首先魚皮非常之彈牙。 入口有種爽麻風味，非常剌激，有令人食唔停口嘅過癮滋味。 鐵鍋卜卜蜆 ($68) 煮到咁上下啲蜆會卜卜聲咁樣打開，除咗蜆之外仲有豆腐卜同埋粉絲，不過粉絲浸得啲湯耐就比較鹹，建議快啲食。 粗店烤粟米 ($32) 既然係招牌就諗住試吓，第一次係燒烤店食烤粟米，感覺幾好食。佢落咗好多奶油令到個粟米好滑同香口。 新鮮生蠔 ($24) 落咗大量蒜頭，生蠔好肥美，冇乜海水味。 蒜蓉烤茄子 ($38) 中規中矩，一絲絲嘅茄子入口軟滑。 串燒 烤大漠羊肉串 ($48/5) 羊肉肉質嫩滑多汁，羊味香濃但唔會太羶 鹽燒牛舌 ($28) 有一厚一薄兩片，薄嘅ok好食但厚嗰塊有少少硬 烤鴨舌 ($28/5) 調味適中 雞軟骨 ($22/2) 仲keep到d肉質，唔乾 錫紙娃娃菜 ($34) 有一大pat蒜蓉提味，娃娃菜煮得啱啱好，唯口味偏鹹，重口味朋友可能會鍾意多d。

今日同朋友嚟咗尖沙咀呢間裝修好和風嘅餐廳食。 Menu好多選擇，啱晒唔同人嘅口味。 黑門角切海鮮沙律 ($98) 呢個角切沙律材料好豐富，魚嘅話有三文魚、吞拿魚等，又有車厘茄、沙律菜、蓮藕等食材。個沙律醋酸酸地，成個沙律唔會乾，都算係幾重口味嘅沙律。 黑門帆立貝伴魚子醬 ($98) 紫菜包住帆立貝、紫蘇葉、三文魚籽、海膽同魚子醬，一啖食晒多重滋味。 海膽蟹味噌甲羅燒 ($88) 甲羅燒應該算係店舖嘅主打，有好多唔同口味。由店員親自幫我地燒。蟹膏醬撈咗其他材料，好似係蔥花、蟹肉、飛魚子等，加上鵪鶉蛋黃，份外香滑有口感，點梳打餅食一流！ 胡椒豬骨豚肉鍋 ($178) 蔬菜食材豐富，有大葱、菇菌類、豆腐、芋絲、娃娃菜、紅蘿蔔等。豬骨湯香濃，令食材都好入味。 鐵板燒海鮮雜菌 ($188) 炒得超入味，好香黑椒味！有鮑魚、蝦、魷魚，其中要數鮑魚入口最軟滑。 雞髀肉大蔥卷 ($58) 大葱鮮嫩唔老，同雞髀肉一齊烤到微燶。 都算係幾圓滿嘅一餐！