週六午後與咖啡空間的偶遇緣分 剛巧到北角看傢私，網上搜尋到以咖啡及環境出名的咖啡空間。從門面看已經比一般地鋪大，內裡的空間十足，實在是普通咖啡店或餐廳不能比較的！光是這寬敞的空間及簡約的佈置，已經讓人感覺放鬆！ 下午茶餐絕對適合午後鬆一鬆，份量適中，圖中的公司三文治有別於連鎖快餐或一般茶餐廳的既定材料，是以蔬菜、鮮菇及蛋為主要餡料，配合獨特的味道，清新之餘亦十分美味！ 另一下午茶餐為迷你喇沙米線，香氣濃郁，附有流心蛋，湯頭不會令人口渴！ 最後並且是最重要的，咖啡十分好飲！就算單買都只是三十元一杯，而且是自家烘焙，無論咖啡還是奶蓋都絕對比連鎖店優勢！大家經過港島一定要到訪，享受這片刻的寧靜時光！

星期五放工一定要搵個好地方同閨蜜聚一聚 一直都好鍾意牧羊少年，坐得舒服，野食好食份量又夠！ 沙津清新開胃，菜爽口，配上煙三文魚同麵包粒有唔同口感！ 蝦意粉實在太香，忍唔住食左兩啖先，蝦肉新鮮質地結實，醬汁令意粉好好食！ 燒雞外脆內嫩，唔會乾淨淨，配菜輕輕燒過亦十分惹味！ 最後呢個一上枱我地都忍唔住嘩一聲，大食如我地都食唔晒既併盤，送啤酒一港呀！腸仔好味有唔同款，細細塊薯餅食唔停，忍唔住一口接一口！ 飲品揀選果茶，中和一下！

經過一星期繁忙工作，難得可以提早放工，一定要搵個舒舒服服既地方享受生活，經過Lifetastic，見到喺澳洲食過既西瓜蛋糕，立刻衝入去！ 見到店面陳列既蛋糕，唔洗食，順粹睇下都已經覺得好痊癒呀，可能呢個就係蛋糕既魔力。 入到去被安排坐窗邊，坐位好闊好舒服，裝潢佈置亦走簡約北歐風，可以一邊享受空閒片刻一邊打卡。 餐牌上有各款蛋糕可供選擇，但我估大部分人都會選擇草莓西瓜蛋糕，因為實在太獨特喇！ 原片西瓜喺層層分明既蛋糕中十分突出，西瓜清爽得黎唔會水汪汪，夾層的幼滑忌廉同脆脆餅底，豐富左整件蛋糕既口感！蛋糕面的乾花除左裝飾外，食落口為蛋糕帶來淡淡清新花香，無敵呀整個配搭！ 另外我地仲叫左酥皮窩夫，平時已經抵抗唔到窩夫引誘，仲要係酥皮窩夫，熱辣辣又香脆，充滿牛油皮既酥皮搭配movenpick雪糕，加上新鮮雜莓，酸酸甜甜真係好好味呀！ 甜品蛋糕出色之餘，飲品亦十分吸引，抺茶紅荳奶昔帶有淡淡甘味，中和蛋糕的甜膩感，而且杯頂有抺茶大福同玄米粒做伴，好好飲又好好食！

台灣過江龍除左廉價任食火鍋之外，呢間「寛巷子」實在是具水準之選，單看門面及店內裝潢佈置，已別樹一格。 門面的復古大門十分吸晴，除了品嚐美食外，室內及室外的佈置都值得拍照 湯底挑選了元珠小染（溫和麻辣）和養生白鳳（雞湯），每道菜名均詩意十足，完全突顯出寛巷子的個性！兩個湯底中間圓型部分原來是存放香辛料，讓麻辣具香氣又不用怕吃到一口香料，十分貼心的設計！ 玫瑰松板是必食之選，亦是必拍的菜式，看到這朵栩栩如生的玫瑰上桌令人為之驚艷，細問下製作過程是師父挑選最上乘部份，順著紋理切開，然後擺盆，便造成花瓣紋理分明的玫塊松板！更難得的是，玫瑰除了貌美外，味道亦十分鮮甜，配搭濃郁的雞湯，令人忍不住一瓣接一瓣的品嚐。 寛巷子又豈止玫瑰一道殺手鐧，其餘各款美食亦款款特色，分別有由菠菜包著手工豆皮及白芝麻的菠菠糖，創新大膽的配搭異常出色，於鍋中煮四分鐘後豆皮軟韌剛好，芝麻香濃郁！ 杏香野菊以杏仁片在蝦滑上堆疊成花狀，配上數顆紫玉米，視覺與味道同時品嚐，賣相之美讓人細意品嚐，蝦滑的爽滑口感與杏仁片香脆咬口互相配合，加上玉米的甜亦帶出蝦肉的鮮味！ 枝仔冰即是台灣的雪條，竟可以變成火鍋配料，絕對看出店家對台灣文化的熱愛，造型認真，連放著枝仔冰的碗亦刻意堆滿碎冰，乍看與雪條無異。枝仔冰以豬肉及蝦肉做成，外皮是軟糯q彈的粉皮，拿著木棍咬一口十分彈牙。

中秋期間要外遊，提早同媽媽團圓食中秋節飯，上網見到lost star live house bar & eatery，決定帶媽媽享受一下。 餐廳裝修精緻，北歐風格令人覺得溫馨得來又型格，高試高樓底，坐落好舒服呀。餐廳中間仲有舞台，平日有live band表演，享口福之餘亦讓耳朵享受，可惜今晚剛打完風，未有現場表演，惟有下次再黎聽過！ 餐牌有好多晚餐選擇，我同媽媽花多眼亂，款款都好特別。 先上菜的是小食豚背油薯條，一來到已經聞到那股香味，可以不用蘸茄汁都同樣好食。加上兩杯飲品，分別是主要菠蘿味的Glad you came同雜莓one more night！ 呢款墨西哥式薄餅係必食推介，薄底夠脆夠薄，餡料充滿住蟹肉同蝦肉，凍凍地搭配微辣蛋黃醬，味道獨特食落好開胃！ 白雪梨酒煮蜆亦係另一個推介，從相已經可以見到蜆肉好嫩，火候控制好好，加上酒味香濃，我一邊食蜆一邊呷酒，真係好好味呀！ 我地平時較少點豬做主菜，但呢個豬鞍令人一試難忘，口感極嫩，特別拍照顯示豐富肉汁鎖在肉內，配上雪梨汁中和豬肉予人的油膩感覺。 帶子扁麵軟硬適中，帶子肉切食薄片令人可以一口品嚐到扁麵與帶子的鮮味。 最後是甜品，起初以為係焗梳乎厘，原來睇漏眼係冷凍梳乎厘，經職員解釋先明白好似雪糕質地，食落又幾得意，帶淡淡橙味，配合牛油金寶脆脆，為這餐完美謝幕！

為慶祝胖買辭職，想啤一啤，又想食好野，Channel 3 tapas bar & restaurant滿足晒兩個 願望！ 酒吧環境甚有情調，廚房細細想像唔到煮出如此美味的西班牙菜！ 煙三文魚沙津夠凍，令人胃口大開！ 白酒忌廉煮青口醬汁十分惹味，既有酒香，亦有忌廉幼滑口感，而且青口數量多，可以盡情品嚐！我忍唔住用青口醬汁蘸飯蘸豬手，實在好愛呢個醬呀！ 德國蜜汁燒豬手燒得香脆可口，脆皮與嫩肉配搭天衣無縫，令人忍唔住一口接一口！ 巴塞隆拿海鮮炒飯有勁多海鮮，大蝦新鮮蝦肉結實有蝦味！

一入到店內本身仲覺得裝修幾好同坐得幾舒服，點知野食一上枱即刻大失所望！ 點左涼拌小黃瓜，是到台式食店必選，準備起筷時見到有條人體毛髮喺上面，咩胃口都無晒！仲要店員無講過一句唔好意思或者對唔住，只係大聲嬉笑！服務態度差勁！ 另外點左鹽酥雞滷肉飯，莫名其妙只係黎左鹽酥雞，（相中已被我食左幾舊）催左兩次先話漏左飯。個飯應該改名做滷肉片飯，全碟得四片！此店唔係單一既食物質素問題，令我要邊食邊寫食評，連好少比劣評既我都忍唔住！

每次同朋友仔講去台北，大家都會話要食馬辣，彷彿馬辣=台北，宜家唔洗再飛去打邊爐，近近地放左工就可以大飽口福喇！ 價格親民，我地趕得切放工趕來，避過人潮。 一入去就見到大大架超吸睛列車，就係靠佢載住我地既美食喇！ 由於時間尚早，放工既人潮未到，等我地打到一半去添野食時，場內已經坐無虛席嚕！場內裝修同坐位都令人感覺好舒服，一啲都唔迫！ 食物櫃既火鍋食材款款新鮮，丸類選擇十分多，我最推介相中右下角兩款餃子，因為我係睇住師傅現場包嫁，多汁好味！ 打邊爐除左食材重要之外，我話醬料都極重要，我最愛炸蒜，試過去到火鍋鋪無炸蒜，我戰鬥力都會大減呀。馬辣提供超多種醬料，包你搵到你想要既味道呀。 除左有罐裝飲品提供之外，仲有咖啡同花茶，我比較鍾意食飽後飲杯花茶，消消滯。 牛肉每款都各有特式，切得薄薄一片，口感鬆軟，有肉味。 除左自行出去列車取食材之外，仲有肉同海鮮都以紙點單，但上菜極快，唔洗擔心！ 最欣賞馬辣既細心，盛載肉類既器具邊上有相應顏色做記號，我試過無數次出外打邊爐連店員都分唔到肉既種類，搞到食極都食唔到想食既肉。 湯底配合各式配料濃度剛好，不會太油膩或太咸。 甜品除左各式雪糕雪條外，仲有焦糖燉蛋，唔洗再去食糖水。

每次經過Fire Bird都被佢外貌同從店內散發出來的食物香氣所吸引，今日終於忍唔住，相約胖買一齊黎品嚐一下和牛！ 入到店內坐低，更加知道無揀錯餐廳喇，因為真係坐得好舒服好闊落，高腳凳好貼心地喺枱腳上安裝左腳踏，唔洗怕唔夠腳長吊下吊下！ 雖然我地今次無坐吧位，但睇住廚師製作美味既食物，又係另一番滋味，下次一定要試下！ 頭盆先品嚐慢煮溫泉蛋凱薩沙津，溫泉蛋幼滑既口感遍佈雞肉同爽脆蔬菜上，加上淡淡黑松露汁，營造出酸酸甜甜既味道，作為頭盆的確可以令人胃口大開！ 緊接住係魔鬼火焰原隻雞脾，火焰一出真係好吸引呀，幫住火焰都有好治癒既感覺 火焰過後原隻雞脾出現喇，侍應哥哥仲好有心機咁幫我地切食細細件，值得一讚係火焰令雞皮更脆，但雞肉依然保存滑嫩多汁既口感！ A4和牛紋理清晰，未食已經知道係上乘食材，加上侍應哥哥細心烹煮，肉味濃厚，油脂分佈平均，搭配蔬菜及特式醬汁，忍唔住立刻加點白飯，送飯一流！ 霜降A4和牛壽喜燒都同樣出色，肉質鮮嫩，口感鬆軟，油脂分佈平均，牛味濃郁！搭配濃郁壽喜燒湯底，令人一啖接一啖呀！

與友人正積極減肥，決定到地理位置便利的「悠蔬食」來一場走肉大餐！ 甫進「悠蔬菜」已覺與一般素食餐廳的裝潢不同，天藍色的椅子搭配白色歐陸窗花，予人清新優雅的感覺，清新的感覺打從裝飾中散發出來。 一揭開餐牌已被豐富的晚餐吸引，前菜、湯品、主菜、甜品及飲品一應俱全。 三款前菜各有特色，酸酸甜甜十分開胃，尤喜歡紅菜頭、蘋果及核桃的配搭，口感特別。 盅湯湯料豐富，濃郁的花菇香味，黃耳亦爽滑有口感，重點是絕不油膩，這亦是我喜愛素食的原因之一。 香芒牛油果手卷口味獨特，當中的莒蓿芽口感爽脆，每咬一口都感受到清新蔬菜味道，吃完整份手卷也不覺負擔，十分推介作為女生減肥的美食。 腐皮卷以幾可亂真的雞脾外形登場，咬下去完來是以腐皮層層卷成，香脆可口，想不到簡單的食材也能變得這樣美味。 擔擔麵麵質口感適中，湯底濃郁，令人忍不住一口麵一口湯的把整碗消滅。 西西里茄鮮甜美味，每根意粉都被濃郁的茄醬包圍，雖然走肉，但味道因蔬菜的鮮味而更突出，搭配鮮甜多汁的大烤菇，是整晚我最喜歡的菜式。 香芒千層班戟的每層班戟也薄如紙，每層中夾雜香滑奶油，放盡口裡盡是軟滑滋味。 脆脆芭菲單是賣相已讓人忍不住替她多拍照，以奶油製成的玫瑰，加上脆脆及草莓，形成亮麗的外表，絕對是內外兼備的甜品。