餐廳位置唔難搵，響D2 Place 2對面億利工業大廈內，一出電梯左手邊就見到門口有好大條花柱，好易就見到。 呢日下午茶3:30PM左右嚟到，因為過哂lunch time 高峰，所以冇乜人，坐得舒服。 店內裝修充滿歐洲風情，座位空間充足

今次一行二人分別選擇兩款lunch sets:

❇️先來餐湯
▶️香濃忌廉湯，入口順滑 ❇️香煎北海道帶子龍蝦汁扁意粉($148)
▶️擺盤精緻，賣相吸引。兩粒帶子有微微焦香，口感彈牙鮮甜。扁意粉軟硬度適中，重點係龍蝦汁味道非常香濃，每條意粉都掛滿龍蝦汁，充滿龍蝦鮮味！ ❇️燒美國豬肉眼扒伴牛肝菌忌廉汁($148)
▶️份量十足，size又大又厚，外面煎得焦香，雖然厚，但都容易切開，入面肉質唔會好乾，肉味香濃而且保留到肉汁，而附上的牛肝菌忌廉汁味道同塊扒都幾夾，而且提升味道層次，加埋配菜炸薯角，已經好夠飽 飲品：
❇️美果洋甘菊(+$21)
▶️茶包，正正常常
❇️Chocolate banana smoothie(+$24)
▶️香濃朱古力味及香蕉味，但又唔會太膩，幾好飲 如果響荔枝角長沙灣一帶，想舒舒服服食餐高質西餐，呢度會係一個好選擇！

位於重慶大廈旁邊地庫「Health 慶方」，之前都嚟過幾次搵食，原來最近開咗一間車仔麵店，呢日就嚟試試。

餐廳門口有一個懷舊車仔麵檔，入面雖然裝住假食物，但像真度極高，遠處已經比佢吸引到！ 餐廳裝修充滿大牌檔風情，入面地方好大好寬敞，座位闊落舒服。 望望餐牌，食物種類選擇多，除咗車仔麵之外仲有飯類，亦有好多特色小食。 老闆娘好nice，親自過嚟介紹唔同食物的特色，原來有好多都係廚師精心調配的。

❇️滷水豬大腸牛腩飯($55)
▶️牛腩夠腍，而且入味，豬大腸冇任何臊味而且爽口，個汁甜甜地，撈飯食一流！😋 ❇️自選車仔麵
▶️揀咗粗麵、豬皮、陳皮魚蛋、汕尾馬鮫豬肉丸、胡椒豬肚丸、特級瀨屎牛丸(腩汁) ($72)
汕尾馬鮫豬肉丸︰呢款係老闆娘推薦，以手打馬鮫魚同豬肉製成，非常彈牙爽口，果然冇介紹錯！
豬皮煮得夠爽，好怕有D舖頭煮到好腍，但呢度唔會
胡椒豬肚丸及特級瀨屎牛丸都大大粒，同樣好彈牙，但反而瀨屎牛丸未至於好爆汁，不過肉味都幾濃 ❇️香辣單骨雞中翼($28)
▶️雞翼外皮炸得金黃香脆，入面肉質保持到嫩滑 ❇️上湯鴛鴦餃($35)
▶️本來係有韭菜餃及菜肉餃，可惜韭菜餃剛好賣哂，只得菜肉餃。外皮唔會太厚，一口一啖size剛剛好 ❇️咖喱四寶(魚蛋、魷魚、牛腩、牛柏葉) ($59)
▶️咖喱汁係廚師特別秘製，味道好香濃，帶少少辣夠惹味之餘亦唔會覺得加咗味精，同出面食開的味道果然有唔同！
魚蛋大大粒，同樣非常彈牙魚蛋，魷魚同牛柏葉口感都好爽脆同入味
牛腩同樣炆得夠腍，配合咖喱汁一齊食，成個組合更加無得輸！ ❇️獨立淨餸
▶️日式蟹柳、芥末貢丸、汕尾馬鮫豬肉丸、魚肉，配秘製黃金雞湯(+5) ($53)
呢幾款同樣係老闆娘推薦，蟹柳係舖頭特別揀過，唔係一般買到嗰D，口感的確比平時食開的較為厚實。魚肉帶有魚香，芥末貢丸咬落去有少少wasabi味，刺激一下味蕾。
重點係個秘製黃金雞湯，一入口濃濃的咸香雞味，而且帶點奶香，口感順滑。好奇問老闆娘點解個顏色會鮮黃，原來加咗南瓜😍，唔怪得色香味俱全，絕對值得加錢轉呢個湯底，實在好好味！ ❇️飲品：自家製石斛竹蔗茅根水($10)
▶️清甜解渴，自家製夠健康！ 總結：幾乎所有食物都好好食，睇得出用心製作用心經營，而且大大碗又足料，價錢甚至比起新界好多地方都仲平，而且服務態度殷勤，好surprise食到咁高質的車仔麵，絕對值得一去再去！

又來到元朗搵食，今次就去咗Yoho，試下呢間日本拉麵店
平日夜晚都幾多人，不過都好快有位

見到個晚市二人套餐做緊$298/2位 (原價$382)好似幾抵，所以就試下

晚餐可㨂2主食，有拉麵亦有飯類，另外可揀2款小食同兩杯飲品 既然呢間係主打拉麵，當然就要叫拉麵啦！

❇️醬油低溫叉燒麵(+$20)
▶️一上枱，賣相已經相當吸引，粉嫩的叉燒圍住碗邊，足足有7大片！
叉燒肉質軟腍，本身係微溫狀態，食的時間可以浸一浸入湯底先再食，入口唔駛點咬。湯底採用秘製醬油豚骨，濃郁但唔會太鹹。拉麵偏幼身，口感彈牙，加埋半隻半熟蛋，味道非常不錯！😋 ❇️橫濱風醬油濃厚拉麵
▶️每次食拉麵我都必先品嚐一下湯底，因為湯底屬拉麵的靈魂所在。呢款湯底用上雞豬熬製而成，入口非常鮮味香濃，個人覺得湯底味道比上一款更優勝。呢款麵質較粗，口感同樣彈牙，碗邊舖有好多塊大大的高級海苔，加埋菠菜、全隻半熟蛋等配菜，材料都幾豐富，不過得一片半肥瘦叉燒略嫌少咗啲 ❇️蝦餃子(5隻)
▶️呢款小食都幾特別，用原隻蝦肉做餡，蝦肉都幾爽口，加埋沙律醬更加惹味😋 ❇️蔥花牛舌
▶️牛舌薄切，油脂豐富，入口好爽口彈牙，而且肉味香濃 ❇️炸明太子雞翼 ($52)
▶️小食方面另外加咗呢款明太子雞翼，雞翼炸到外皮脆脆地，入面明太子有少少辣，整體都幾惹味 ❇️巨峰乳酸梳打 (+$8)
▶️其中一杯飲品加錢叫咗呢款，味道唔會太甜，都幾清新 呢度整體食物質素都幾好，兩個人食到飽都只係$400左右，性價比高之選！
🔎拉麵Jo
📍元朗元龍街9號形點 I L1樓1072號舖

#香港美食 #元朗美食 #日本菜 #日本拉麵 #日式餐廳 #hongkong #hkig #hongkongfoodie #hkfoodie #hkfoodblogger

每次經過開元朗呢邊，都比呢間小店橙橙黃黃的裝修同燈光所吸引，充滿韓式大排檔風味🤩
❇️秘製柚子蘿蔔($20)
▶️先來一個前菜，蘿蔔醃製過，配合柚子醬，甜甜酸酸都幾開胃 ❇️鐵板燒濟州黑毛豬($188)
▶️連埋石爐上枱，因為上枱侍應先至會點火，可以自己控制烤的時間。黑毛豬肉厚切，肉味香濃。中間有豐富油脂，燒熟後都唔會太乾，配理附上的醬汁食更加惹味 ❇️韓式牛肉炒粉絲($108)
▶️份量都幾足料，頂頭有好多蛋絲，下面牛肉份量都好多，肉味夠，除咗粉絲，仲有蘿蔔絲、椰菜絲及洋蔥，口感層次豐富，亦唔會炒得好油 ❇️新沙洞炸物拼盤($118)
▶️入面有：甜薯芝士條、紫菜粉絲卷、炸韓式餃子及韓式年糕配甜辣醬。炸物全部即炸，外脆內軟，每款味道都幾香濃。年糕口感煙韌，配醬汁食都幾惹味亦唔會好膩。 ❇️招牌原粒蜂巢蜜米酒 /2人份 ($98)
▶️第一次飲呢款米酒，個酒埕好有風味，每隻杯都有好大粒的蜂巢蜜，將米酒倒入去飲，蜂蜜其實唔會溶得好多，不過都會飲到淡淡的甜味，就算唔太飲得嘅朋友都啱飲 ❇️順帶一提，呢度其中一款招牌菜係醬油蟹，不過由於唔食得生冷野所以今次冇叫到

依家做緊醬油蟹預訂優惠$198（原價$298）

一至四全日供應
五六日，只限七點前
公眾假期沒有優惠
優惠必須電話訂座

⭐️優惠不能同時使用

臨近農曆新年想食得豐富少少但又唔想成日食中餐，今次就選擇食日本任食放題。
位於荃灣大鴻輝中心嘅呢間御滿屋，一共有ABCD 4款價錢的放題組合可以選擇，當然價錢越貴，可揀的食物種類越多，食材價值越高。今次我地揀咗最經濟的A組合(星期一至四5:30pm入座，成人每位$258)，但其實都已經好多款食物可以選擇。 近門口位置有一個自助區，有沙律、日本前菜如八爪魚仔、螺肉、蟹籽、中華沙律，亦有豬耳、鴨胸、蜆、蝦、東風螺，仲有炸物、爆谷等。 飲品區有好多款罐裝飲品、啤酒，仲有冷熱清酒同梅酒；雪糕區亦有多款杯裝雪糕、雪條、甜筒、雪米糍；甜品區有切片生果、不同味道啫喱同蛋糕等等，剩係自助區都多選擇到數唔哂！😄 其他自選任食有多種刺身、壽司、天婦羅、串燒、炸物、燒物、鍋物等等 ✅刺身整體都幾新鮮，其中推薦甜蝦、大赤蝦同帶子，好鮮甜，鮑魚亦新鮮彈牙！ ✅燒物方面，比較推薦西京比目魚同蒜蓉生蠔 ✅炸物就推薦炸榴槤球同埋流心椰汁球，兩款一咬就好流心，而且榴槤同椰汁味濃😋 因為食量有限，實在無辦法每款都試，甜品只試咗抹茶千層蛋糕，雪糕亦只試
軟雪糕。 ✅軟雪糕有北海道牛奶味同抹茶味，當中牛奶味好香濃，夾埋抹茶味一齊食剛剛好！ 總結：食物款式選擇豐富，上菜速度同收碟速度都好快，亦冇乜漏單情況，價錢合理，如果生日去的話仲有優惠，難怪未夠7點都已經咁多人。

響香港我較少幫襯串燒店，因為多數都又貴又唔太好食

但呢晚嚟到屯門呢間主打串燒的餐廳，估唔到有驚喜喎！🤩

餐廳地方雖然唔算好大，但座位空間感足夠，坐得舒服，而且有大電視播足球⚽️，鍾意邊飲酒邊睇波嘅人就啱哂！ 店員先送上一杯好特別的「火樹銀花」，原來係炸意粉，脆卜卜，唔講都唔知係意粉，本身冇乜調味，底下有沙律醬可以點嚟食，用嚟送酒都應該唔錯！食物方面，除咗串燒，仲有飯麵套餐，都幾多選擇。

❇️日式咖喱豬頸肉飯$68（套餐包一罐汽水或果汁）
▶️非常大碗，材料亦好豐富，除咗豬頸肉，亦有粟米仔、豆角、紫菜絲、中華沙律、黃椒。豬頸肉肉質爽滑，加埋甜咖喱汁，好食！ 嚟到當然要試下呢度的串燒啦！
❇️日本厚切牛舌心串$38及日本牛助肉串$38
▶️牛舌心入口爽口彈牙，牛助肉厚得嚟都算腍，牛肉味濃，兩款都唔錯！
❇️日本蛋蟹肉大啡菇$20
▶️啡菇夠Juicy，頂層舖咗木魚絲、沙律菜絲，加埋流心蛋，口感豐富，但似乎唔係好食到有蟹肉 ❇️燒鱔串$48 ▶️肉身都幾厚，有鱔味，只係略嫌味道淡咗少少
❇️雞三角軟骨串$18、西班牙黑豚腩串$38
▶️雞三角軟骨爽脆而且入味，西班牙黑豚腩好腍，咬開有少少油份，好香肉味！❇️燒生蠔$36 ▶️一上枱就好驚喜，因為好大隻！蠔肉新鮮而且肉身肥厚，上面舖咗炸蒜同蔥絲增添惹味，但燒完都仍保留到蠔入面D汁，$36咁大隻生蠔真心抵！ 呢一餐兩個人加埋只係$400左右，已經試到好多款串燒而且好飽，整體嚟講好食又抵食，而且環境舒適，店員服務有禮，值得推薦！

對上一次嚟過呢間Gram食過佢地招牌梳乎厘覺得唔錯，今次再嚟就試下佢地另一主打 ─ 班戟。望望餐牌，pancake都好多款式選擇。除咗甜pancake，原來仲有鹹pancake，今次就每樣試一款啦！❇️雜果朱古力班戟 $108
▶️呢款pancake擺盤好靚好吸引，色彩非常繽紛😍
一共有3塊pancake，舖滿唔同種類生果，上面再唧有朱古力醬。pancake金黃鬆軟，入口有好香濃的牛油同蛋味，水果新鮮清甜，口感豐富之餘，食完又唔會覺得好膩❇️三文魚牛油果班戟 $128
▶️呢種配搭真係第一次試，同樣一碟有3塊pancake，上面有煙三文魚及牛油果片，雖然係鹹食，但同pancake味道都夾到喎！加埋伴碟的沙律菜感覺健康D。如果食厭粉麵飯想轉下口味，可以試下呢款鹹pancake，都飽到肚的！

晚飯時間，見到呢度做緊晚市優惠，好似幾抵，所以就去試下 因為呢晚係星期六，所以係$88三選一款優惠，覺得都ok，所以叫咗$88 極品BB豬，另加咗個海皇粉絲雜菜煲 點知一上枱，碟BB豬細碟得可憐，得6片咁大把，原來所謂BB係指碟嘢的份量，簡直少得可憐，的確有少少被騙感覺😑 其實咁嘅價錢咁嘅份量，食物質素又唔係特別好，計埋茶芥加一都將近$300，真係唔好怪依家咁多人選擇北上或去外地飲食同消費啦！ 應該冇下次了！☹️

香港專門售賣龍蝦包/海鮮包的地方好少，原來尖沙咀K11 Musea就有一間。 小店地方唔大，只有幾張bar椅，但店舖的裝修好有特色，模仿一隻船咁，配合返海鮮的主題，感覺都幾有特色。外籍店主服務態度親切友善🥰
❇️Lobster Roll Set 龍蝦包套餐 (包沙律、飲品)，另加周打蜆肉湯 ▶️嚟到當然要試下招牌的龍蝦包啦！個包係新鮮即製，麵包外層咬落好香脆，食落味道甜甜地，亦食到牛油香味。 入面用上加拿大龍蝦，龍蝦拆咗肉，唔會好大舊容易食，但龍蝦肉滿滿，混入沙律醬但又唔會覺得好膩。 入面亦有大大片生菜，同時亦附上檸檬可以按喜好加入龍蝦肉中，令味道及口感更豐富😋 ▶️跟餐的沙律都幾大碗，而且好新鮮

▶️周打蜆肉湯材料豐富，有薯仔亦有好多蜆肉粒，入口creamy而且好香濃蜆肉鮮味，都幾好飲！ 整體來講，食物質素唔錯，價錢合理，鍾意食海鮮的朋友要嚟試下！

初見有兩間分店，之前去過荃灣分店覺得都唔錯，今次就嚟旺角呢間再試上次冇試過嘅食物 ❇️初見香草吉列牛(配溏心蛋) $138 另加$8白飯轉讚岐烏冬
▶️呢款招牌菜上次冇試，今次點都要試下
一碟有大約12塊厚切牛肉，份量都算幾多 每塊外層都包滿綠色香草，其他地方比較少見，都幾特別！ 每次可以放3-4片牛肉響石板上
好快已經燒熟，入口肉質都算腍，有鹽同秘製醬汁點嚟食
個人比較鍾意點醬汁食，可以提升牛肉肉味
讚岐烏冬食落彈牙 ❇️安格斯牛肉‧豚骨湯拉麵 $70
▶️湯底夠味但唔會令人好口渴，麵質爽口，牛肉肉味都算幾濃，整體份量都唔少