一行十人去食午市飲茶放題，食物只係正常，唔可以話係好食，普通飲茶嘅質素！經常漏單，一路追單，追完又追，都係無！無禮貌，某款食物無哂又唔同講，去到last order叫佢追，又話賣哂、無晒😡無唔緊要，你一早講聲，唔好等人係到白等！！ 特別係個帶有鄉音嘅白衫枱面，超無禮貌，淨係叫無哂無哂！同經理即場反映，佢竟然答佢都無辦法，嘩呢間酒樓真係唔掂，做唔掂午市放題就唔好做！ 絕對唔會再嚟😡一間令人失望又失望嘅酒樓！

Happy Friday！今日揀左黎旺角食上海野，6點幾黎到，唔洗等位直入雅座！人未齊已經揀定個小籠包！ 等多5分鐘人齊就叫餸，三個人叫左5個餸，小籠包、回鍋肉炒粗麵、上海炒年糕、蒜蓉炒通菜、糖醋魚塊！ 先黎個通菜，蒜蓉味夠香濃，但欠缺鑊氣。 回鍋肉炒粗麵，呢個真心唔錯，少少辣，好野味，配料多，加上有一片片豬肉絕不欺場！ 小籠包！皮太厚了！作為一個小籠包完全唔合格！肉餡湯汁唔夠多！ 糖醋魚塊，連重口味嘅我都覺得太濃味，同埋魚塊先炸再炒，做得太鬆散，一般般！ 上海炒年糕，肉絲、菜、年糕比例岩岩好、係咸左少少！ 總括黎講，🤔未必有下次，因為個小籠包真心扣左好多分！

又到一星期尖沙咀午餐時間，今日黎到永年士多！聽聞佢係由元朗殺到出黎尖沙咀！真心勁！ 今日2點幾黎到，人唔算多！黎到首先揀餸、買飛、排隊拎麵、搵位食！成個流程好順暢！ 我揀左蘿蔔、魷魚、墨丸米粉大辣 一黎到試下個湯頭！非常濃郁可口！層次豐富，重點係個辣係好辣！飲第一口湯已經知道我大鑊了！早知叫中辣試下先！ 蘿蔔真係好正！一定要叫！首先量多有有5到6件，而且非常入味，鮮甜、無根、入口即溶、水份高！咁先係蘿蔔架麻！ 到魷魚，真心講，無乜特別，有4到5件，係爽脆嘅，不過唔入味！ 再黎到墨丸，其實係花枝丸，我最鐘意的！因為花枝丸比墨丸更香口！ 仲米粉爽口，煮得岩岩好！ 整體黎講滿分！有下次！不過我下次都應該要量力而為，叫中辣算！因為食到尾真係要辣到拍住枱同流口水咁食🤣 另同行友人叫左豬紅比左一件我試，個豬紅亦都做得好出色，入味，滑！

金鐘一餐Lunch閒閒地都70蚊，高消嘅地方！今日又黎食Simplylife，相對黎講下午茶係幾抵食嘅！份量岩岩好！ 今日黎到又揀左食Beef Burger，配辣薯條條有十幾條咁！之前食過Lunch menu個Burger，係大份啲，但食哂會太飽，所以比較鐘意揀Tea黎食！ 講番個burger，肉嫩多汁，煮得岩岩好，芝士睇相都知道好夠多，但我覺得芝士味唔夠濃，到個飽就一般，如果可以做到個飽皮夠脆就正啦！ 薯條就正常唔特別，係有少少香辣味，係幼薯條，都有少脆！

今日午餐！晚餐都係尖沙咀搞掂！放工都成9點！走左去食茶木！上到去只需5分鐘左右就有得入坐！真開心！ 坐底二話不說就決定要個墨汁花枝手作麵！因為之前食過，真心覺得正！今日一定要encore ！再黎叫多個豬扒肉燥飯！加多杯凍Mocha同黑糖芒果芋圓！ 上菜！ 其實一向本人都非常欣賞茶木嘅手作麵，質地煙韌，爽滑！不論放湯定無湯都係好正！個墨汁香濃帶有蒜香！花枝片煮得岩岩好！好爽口！呢個墨汁手作麵味道層次係豐富嘅！只差在唔夠熱！如果serve上台係熱辣辣就Perfect啦！ 到個豬扒肉燥飯，正正常常！不過不失！同樣一個問題，唔夠熱辣辣！ 呢杯邪惡的Mocha真好不得了！肥到頂點！但係Happy Friday請容許我放縱一下！呢杯野見到都令人好合皮！其實佢嘅真身係一杯Mocha沙冰，所以係好凍！同埋有好多小冰粒係入面，結果我叫左杯熱水加入去，飲得舒服啲！ 最後最後！甜品來了！黑糖芒果芋圓！甜左少少，芋圓夠煙韌，仲有珍珠、薏米、紅豆！不過同樣佢入面有好多小冰粒，所以都係要揀哂佢出黎物食，會舒服啲，如果唔係會太凍了

又到一星期一次！食勻尖沙咀大行動！今日行遠啲，走到黎天文台道食韓國野！以前都有黎過明洞Express，但起碼有2至3年無食！所以今日又再黎！坐底揀食咩，又係人生交叉點！ 今日係豬肉飯、辣海鮮麵同辣冷拌麵之爭！最終豬肉飯勝出！ 點菜後5分內有得拎！好可惜，見到個碗飯個樣，真心大失所望！ 我只能講，圖文不符！豬肉份量多，但乾身、硬、口感粗鞋！味淡，水汪汪嘅水定醬更加係唔知想點！兩個字:失望！ 所以最終我只好自己去拎韓式辣醬，為佢調味！ 反而個跟餐湯幾好飲，有濃濃的胡椒香！菜多！好可惜個主角唔得！下次再去第二間吧！反正尖沙咀韓國餐廳極多！

一星期總有一餐晏要係尖沙咀解決！尖沙咀餐廳多到暈！所以決定要次次食唔同餐廳！今日點燈點到黎阿一豬扒米線！ 款式都好多！我就揀左個招牌豬扒酸辣米線！朋友仔就揀左個魚肉小雲呑米線！🤣明明就係豬扒最出名！我地再叫多個拍青瓜小食！ 拍青瓜到！夠辣夠酸又爽脆！份量正常！亦都好入味！ 再黎就都我個豬扒米線，一開始問落單個姐姐大辣會唔會好辣！自己問完都覺得係費話！🙊所以就叫左個中辣試下先！黎到一試味！一向好辣嘅我，都不禁講左句，係咪清湯黎架🤣所以當機立斷叫佢比碟辣油我加辣！ 呢個麻辣辣椒油正！好香花椒味同夠哂辣！為我個米線生色不少！ 佢呢間啲米線係屬於粗身的，但仍然非常爽滑，絕對唔會煮得太焾身！豬扒就更加唔洗多講，一個字正！仲要有成3件！ 朋友叫個魚肉小雲呑就好一般，咪就係魚肉用個雲呑皮包住咁囉！ 總括黎講有下次！價錢亦合理！

陪朋友仔黎到上環試婚紗，早啲黎到搵食！係Openrice睇左好幾間，揀個輕便下午茶！地點唔難搵，係熟食中心入面！4點幾黎到都幾多人！大部份人都一定會叫個西多士同樽仔奶茶！所以我地都跟風！ 西多士！超多煉奶的！好正！新鮮即整👍🏻熱辣辣！Yummy!!!不過入面係無花生醬個啲，應該話係無餡料先埋，不過大量煉奶搭夠！😘 蛋牛治烘底 非常足料！好香！另外再叫左杯熱奶茶同熱咖啡，係唔錯的！但其實凍樽仔奶茶水先係呢到最出名！

八海山最愛嘅日本餐廳之一，佢曾經扎根係銅鑼灣，我放學飯堂首選，後來出黎做野都不時去食，直到3,4年前，銅鑼灣個間執左後，就冇黎過尖沙咀呢間，今日重遊舊地！ 12點半黎到諗住叫個是日便當啦，點知已經賣哂！！！咁只好叫第二最愛日式牛肉火鍋定食！ 個日式牛肉火鍋分量足！個湯底一流！超濃郁！鍋底用娃娃菜做底，入哂味，超級正！鍋內有好多料！雞蛋、牛肉、金菇、冬菇、豆腐、芋絲、娃娃菜！成個餐都只係$68，無錯係$68！超低調的！仲要包前菜同餐飲！！唔似得啲連鎖集團，前菜又加錢，餐飲又加錢咁！ 唔記得講！前菜個沙拉都好新鮮，個日式醋好清新！重點又黎啦！個蒸蛋係一流，滑就到不得了！仲要有一陣濃郁嘅香菇味！無得輸啦！ 最後黎個熱咖啡為我個懷勉過去嘅做一個完美嘅句號！完美的一餐！ 另外，全間餐廳嘅員工都非常有善！

同事慶生來到食午飯！不錯不錯！ 餐牌都算選擇多！我揀左個煎魚飯餐！送上枱時見到份量都多！ 個個好香！味道偏甜，如果可以的話做到個皮係脆身嘅話就就一流啦！ 天婦羅個粉漿夠薄！香脆可口！最鍾意食係南瓜！ 身為互動愛好者，呢碗烏冬一般般，唔夠爽口彈牙！價錢嘅關係對佢要求會比較高！ 個蒸蛋好滑，係超級滑，都好香蛋味！不過我竟然覺得八海山個蒸蛋好食啲！ 個餐個有個少甜品，忌廉泡芙！呢個都幾好食，我覺得佢好特別係因為我食完成個餐先食佢，佢都仲係凍凍的👍🏻不太甜！