魚露炒雜菜-味道啱啱好，冇草青味，魚露味突出，唔太咸。材料豐富又夠新鮮，唔同種類既菜同菇(包括白蘑菇呀！)，秋葵嫩口有驚喜🥦🥬🥒🌽🥕 紅油抄手唔止第一次食，個皮同餡係正常同平時食開灣仔碼頭分別唔大，辣椒油好香好鍾意，亦唔太辣唔油膩，十分開胃！ ***如果碟子大多一倍，外觀會吸引d 腸仔酥卷-酥皮夠薄，腸仔稍為實身，唔咸，個蜜糖芥末醬好味！ 上次食過樂樂雞，都推介既！ （仿肉呢d好睇個人感想，大家不妨一試）

狗仔等睇醫生既時候，要一個鐘先輪到我哋睇。 唔緊要啦附近超級多食肆，但是理解唔到係2pm茶餐廳咁多都要排隊，仲要係冇乜特別又唔係黃店😛 於是揀左就喺隔離呢間餐廳食嘢，個經理喺門口叫我地試吓，我問狗狗可唔可以入去，佢都好歡迎，帶位、落單、上菜嘅態度都好親切；環境舒服、洗手間乾淨。 食物有誠意，starter有薯仔洋蔥湯、餐包跟牛油、黑醋沙律👍🏻👍🏻 點左個黑極豬&海鮮魚批，我覺得個豬係值得推介嘅。 餐飲叫咗熱朱古力同埋凍檸茶，埋單$221

🍣冇魚生唔得既朋友當然可以叫，不過性價比不高，壽司無驚喜 海鮮卷：ok，像平時食既太卷(有魚生版)，呢類粗卷方間不多。包左咁多野喺裏面，用筷子夾起都唔會散👍🏼 4件承惠$98 🐂燒牛配生蛋：一串兩舊，頂嗰件包住金菇+菜；下面嗰件就唔清楚包住啲咩。成版menu最大幅圖以為好好吃，有點失望。生蛋黃大隻又新鮮👍🏼 承惠$88 燒雞脾肉：誠意推介，成餐飯比呢道扭轉局勢！最正係雞皮，夠脆，味道剛好，冇肥膏，雞肉不會假滑 也不鞋～聽講d雞係無打針^_^ *服務態度一般，太多散仔，對餐牌、食物不熟悉 *店內裝潢、播放音樂有氣氛，唯間中人聲較噪

睇食評知道呢間有梳乎里pancake, 而且餐廳有咁多個like, 一於同閨蜜們黎食個afternoon tea! 🔹星期六下午四點鐘，一入餐廳都比較靜，坐左大概4分3枱，帶位同我地講限時個半鐘（唉又係最唔想聽到既問候，間餐廳明明冇人等位） 餐廳檔次即時low晒～ 🔸點左個抺茶梳乎里，電子餐牌上寫要30分鐘，當時餐廳唔忙，結果都要超過30分鐘先上菜。 ▫️件cake好白身 整得唔香，上面既綠色野唔知係咩cream黎，唔覺有抺茶味，一切件梳乎里 d綠色野澎湃咁流落黎(too much)。入口好鬆軟，三幾啖食完 承惠$130大元。。。 性價比拍馬都追唔上am.pm 我真係企係到食好過 另點了忌廉墨魚意粉，面質幾好，個醬汁溝左mustard唔夾，睇個人口味啦... 服務方面足以令我以後唔會再黎幫襯！有一位朋友遲左黎好肚餓，點左野食，個侍應即時走過黎話：下你地落左野食呀？就黎夠鐘wor.. (如果規矩唔容許，你可以先同我地講，並收起桌上既電子餐牌，或在電子系統set到時提醒而冇得下單）我地反問係咪唔嗌得 唔得就算，佢又話ok叫我地快d食-.- 但間餐廳空空如也 仲靜過我地入黎既時候！🔺我地話其實咁需唔需要埋單出去再入黎（要跟規矩丫ma!）個濛豬眼女侍應竟回應：會同出面門口同事講(唔比我地入)，嘩你咁都講得出#%*¥€+ 之後野食到左，女侍應在我地枱旁兜黎兜去，一邊用對濛豬眼望我地，未食完就黎問收碟，仲放張單係枱中間叫我地埋！ 點呀究竟 呢到係任食火鍋定放題，間餐廳咁安逸你冇其他事情做？收碟時跌地發生巨響、廁所梘液好稀、冇晒抺手紙、垃圾桶爆晒冇人理、員工locker位亂而都係客人會經過，請餐廳反思。

裝飾方面有點懷舊，一坐低就比天花板的燈同吊扇吸引，因吊扇係燈光下不停轉動，而枱是玻璃面係燈光反射下，令到我地有點頭暈，於是請伙計熄咗佢 串燒金錢雞 聽過金錢雞呢款出名燒味，當然要試啦！望落底層有點似我鍾意食嘅叉燒，入口時不過不失，沒有驚喜 生煎蓮藕餅 餅內蓮藕粒咬落爽脆香口，除此之外食不到其它味道 招牌醬烤骨 一放低原來係成舊肥豬肉，如果整得好食的話送飯一流，之後伙計幫我地切開，第一件事睇得出應該好諗，第二就係層肉真係好肥，入口感覺好油，相信大廚應該無先炸過將油逼返出黎就煮，雖然肉諗但唔入味 菜膽上湯雞 推介嘅菜式，先望雞肉已經好想食，入口雞肉諗得黎滑有雞味，不禁食多兩舊 豉油皇蒸釀豆腐 選用百福豆腐，蒸完都好滑，而面頭釀嘅魚肉入口有少量魚骨要留意，味道尚可 馬拉糕 聽聞馬拉糕出名，於是點一籠試下，分量比一般大同件數多，食落口感唔錯，但嫌食落無馬拉糕味 章魚蓮藕排骨湯 個湯味道唔錯，蓮藕煲得夠諗，但飲唔到章魚味 椰汁芋頭西米露 芋頭同西米都夠軟身，但冇椰香 ***留意，試業初期客人只可使用現金找數

發現Lunch Time喺旺角食日本野嘅選擇真係唔多，搵嚟搵去都係啲放題，爭鮮又排晒隊... 最後搵到呢間瑟縮一角嘅和食，睇落應該開咗冇耐，仲好新淨，餐牌上面嘅價錢都相當划算！ 叫咗個兩個set: 1. 刺身拼盤&稻庭烏冬 刺身拼盤嘅種類唔少，有蝦、油甘魚、三文魚、赤貝、不寄貝、蟹柳、玉子。 每款兩片，意外嘅係佢仲有兩片黃瓜（漬蘿蔔） 稻庭烏冬都好好味，湯底唔錯。 2. 黑椒牛肉飯 跟胡麻豆腐 個黑椒汁做得唔錯，牛肉係好似吉野家個種，牛肉同飯嘅份量十足，混埋紫洋蔥同白洋蔥。 胡麻豆腐有兩舊，好味👍🏼 免費跟餐飲只有熱玄米茶同埋低糖綠茶，麻麻地..

成間野冇樣掂，唔該腦細反思下，班唔知伙記定親戚，只會同你趕走晒d客 之前寫左六百幾字評論分享此店不愉快經歷，臨搞掂就冇電... 算啦可能係唔想我留住呢d回憶 總括黎講，我唔知你間泡飯如何，街頭呢間唔該顧掂先 價錢牌好多伏位，先幾蚊雞 就明刀明搶標價啦，d細字伏味濃，咁只會令客人比錢時錯數 覺得尷尬... ... 陰埋陰埋兩三蚊你估大陸咩 地方細，侍應行出行入只會不斷擦過你個身體 態度差到離晒譜，比錢黎食野仲要受氣，背脊骨落

久抑呢間面食好幾年，每次經過都爆澎！唔做下午茶 晚市六點半先比入，今晚終於咁岩開門前十分鐘在門外等，已有條小龍🐉 當然等緊時就上[開飯喇!]參考各位意見，而大部分都係嫩雞燴麵、大排麵、嫩雞燴麵、大排麵...🐓🐖 餐牌有d我都唔多明，而由於我條佬唔喜歡魚🐟，趁自己一個就叫個燻魚麵，下次帶佢黎食其他野 👩🏿‍🍳👩🏿‍🍳👩🏿‍🍳#%&@/呢到既特色唔係個個接受到，介紹下先，中間打河呀姨算最好，雖然都係大大聲冇禮貌語；裡面廚房呀姨最惡，狂話d客，好似全世界得罪佢咁；樓面個呀嬸講國語，態度差 唔識做 冇經驗，大陸西一名；洗碗呀姐就狂食花生。👂🏻👀 🗯小插曲分享：話說張枱埋面個客order大排麵，先上豬扒後上麵，樓面呀嬸將豬扒放左喺個客對面就算，有位先生好心幫手遞過去，點知一下子成塊豬扒跌左落枱面冇得食😂😅🤣 個男人同樓面呀嬸解釋，大陸西嬸聽完即縮，驚咩鑊，行遠左去打河台好細聲話人跌左野食...@%#^* 男人一邊食麵一邊再同打河呀姨解釋，打河呀姨叫廚房整過 仲親自行出黎傳菜👏🏻 落完場第一個鐘已經咁燥底，唔知係咪上海人既風格🇨🇳 旁聽： 冇雞絲粉皮 冇春卷 冇青菜 冇粉絲 係賣晒，定冇整？唔整點解要寫係餐牌？得4張餐牌 點解唔貼野遮住或者改一改？ 有塊黑板 點解唔寫有咩售罄？客人們點菜 話冇既時候d語氣好似話個客唔岩咁-.- 講返我個燻魚麵🐟🍜 麵量算多，唔似夏x館、翡翠xx小籠包咁幾啖冇晒。 燻魚有四件，係四件呀！ 之前見到別人的食評話外跪肉嫩，但我食完全唔係嗰回事... 而係正常傳統乾爭爭硬過豬扒，𡁻緊第一塊已經冇信心食得晒，味道係幾好既！唔浪費慢慢食 鄉村風味... 誰知 食到最後一舊既時候，裡面係鮮嫩魚肉😍 總結：前三舊係🐟🐟🐟隔夜老魚，最後一舊係新整的🐟 🔺唔少人外賣，可能因為美孚住宅區又冇乜好野食，而餐廳入面得4張枱 4個位...... 堂食眼冤，返屋企舒舒服服，當然order外賣同樣有氣要受la😹 筷子有套；熱茶好飲；免茶芥加一 服務比到2星既

長沙灣舊區之中，忽然見到門面寬闊 有特色吸睛嘅Cafe！ 入到去waiters嘅服務態度招呼唔錯，請我地坐梳發位，有咕臣但竟然冇第一時間諗可能污糟而攞開，反而安心坐左埋去。 另一端係升高左而且放左好多酒既bar枱，幾有feel ... 座位之間走廊鬆動，從容不迫 洗手間衛生，梳妝鏡同旁邊嘅掛畫都有悉心設計過（當心唔好俾掛畫嘅內容-toilet cam嚇親)。 雖然得一格，廁紙唔缺，連抹手紙都有 下午茶都幾抵食，價錢都係三十幾，仲有跟餐飲，去圖～

樂富地鐵出口，穿過公園行冇耐就到呢間好有特色外牆嘅石屋，閘外有好大張poster引領你入去😍 天氣宜人，坐outside最好不過，太陽傘下膠枱膠櫈 一啲污糟嘅感覺都冇🤗 原來石屋餐廳入面嘅環境同埋樓上雅座都相當不錯，有feel! Menu嘅選擇唔算太多，勝在簡潔大眾化，總有一款啱你 價錢經濟。家下出面食個egg benedicts 閑閑哋都八九十蚊啦. 呢到抵玩！ 點餐係直接喺收銀機叫完比錢，餐具同埋調味料係自己攞嘅，冇收加一服務費，都依然有waitress收碟抹枱