今晚同個朋友出咗奧海城果邊，原本都唔係好諗到食咩，但見到有間地舖食泰嘢嘅「泰爸爸」，就決定食佢～🛶 泰式拼盤 $138 拼盤包括咗炸蝦餅、炸魚餅、春卷同埋串燒雞。多人嚟食時好啱揀呢個拼盤做小食～佢份量都算多。蝦餅同春卷正常發揮嘅好食！炸魚餅我好耐無食過，點埋個甜甜辣辣嘅醬👍🏻 而串燒雞肉好嫩，就咁食已經好正！連埋個甜甜地嘅沙嗲醬更加無得彈！ 鮮蝦炒金邊粉 $88 食得泰嘢好多時都會叫返個炒金邊粉，而呢個金邊粉好足料！好多蝦～🦐🦐🦐 泰式香茅燒雞（半隻） $98 香茅燒雞肉質好juicy！唔會韌，而個醬汁都係微微辣。 泰式炒通菜 $72 食得多肉就點返碟菜，味道唔錯！通菜好入味，辣辣地，係油咗少少～ 最後再點咗兩杯嘢飲。 椰汁沙冰 $30 平時嘅椰汁沙冰多數都會好甜，但呢杯相對地唔會好甜，反而變得有清甜嘅感覺！值得推介！ 泰式凍奶茶 $28 呢度環境同食物質素都好ok，有機會都要再嚟食過！

踏入新一年，同個fd收工諗住唔好hea食，搵間好少少嘅餐廳試試～見到佐敦”PLATO!” 評價同質素好似幾好，一於試試佢！🍻 原本都十五十六諗緊點咩食好，但見到個至尊二人套餐幾唔錯，一於直接揀佢唔駛諗咁多！ 蒜片白酒欖油紐西蘭青口 先嚟頭盤青口，即使係2人套餐，但份量非常足！紐西蘭青口肉質夠厚，個汁好入味～😋 餐湯方面，羅宋湯正常發揮。而朋友轉咗做法式龍蝦湯🦞，試咗佢少少，味道都幾香濃！唔錯～ 德國脆皮咸豬手 主菜方面，我哋其中一款揀咗咸豬手～塊皮真係堅脆～咬入口果陣都勁脆勁響！好似食厚切薯片咁～😝豬手肉好嫩好林唔乾身，值得推薦！ 炭燒美國安格斯肉眼牛扒 醬汁唔會好濃味，所以唔會遮晒肉眼牛扒原本嘅味道，亦都食得出幾香牛味🐂。叫咗5成熟，但比預期中熟咗啲啲～如果再生少少就更好。 巴馬火腿牛肝菌意大利飯 個套餐雖然只包兩款主菜，但由於無飯落肚硬係差少少。於是就加多個意大利飯～牛肝菌好香，連埋咸咸地嘅巴馬火腿同意大利飯非常夾。 朱古力心太軟配意大利雪糕 套餐包咗一款甜品，自己一向都鍾意食朱古力，而且又見多人推薦呢度嘅心太軟，咁緊係要跟一跟！一叉開，香濃嘅朱古力醬就漏晒出嚟，連埋個雲里拿雪糕一齊食，無得輸～呢個推介果然無中伏！🤪 最後兩杯飲品我哋都揀咗奶昔，我點嘅朱古力奶昔飲落有一粒粒嘅朱古力碎，夠晒濃滑！🍫 而朋友果杯OREO奶昔個味就係cookie & cream雪糕～都好飲！ 呢一餐好飽好滿足！今次揀咗二人套餐，下次再食唔叫餐嘅話，burger/pizza 好似都可以一戰！

喺荃灣搵食，好多時經過小巷都會見到”Zeppelin Hot Dog Shop”有好多人企晒喺門口幫襯同等熱狗。🌭 呢晚一於都叫款熱狗嚟try try佢～點咗熱狗之後其實都唔算要等好耐，大約十零分鐘喥就有。多人幫襯而又即叫即做，點都預咗要等一等。 澳式風情熱狗 $38 熱狗到手熱辣辣，香濃嘅千島醬汁配埋菠蘿、煙肉、芝士粒同紐綸堡腸，夾晒入好軟熟嘅熱狗包喥！呢個組合無得彈～好啱我口味～ 呢間值得再食，同埋下次再食會加$12配多兩款小食/汽水。今次太飽只為一試個熱狗係咩料～🤪

之前同朋友難得地約喺太和食飯，先發現原來太和都幾多嘢食可以一試。結果今晚收工再戰太和，去咗一間酒吧餐廳”Noc Noc”食吓嘢吹兩咀。 有晒聖誕裝飾，呢啲時候嚟幾有氣氛～🎄 先嚟小食方面，叫咗兩款： 松露樹皮 $58 其實一開始叫果陣唔係好知係咩嘢嚟，見朋友話叫就試吓咁～但食落都幾有驚喜，樹皮好薄好脆，就咁食都已經食唔停口，連埋沙律醬食仲正！ 炸魷魚圈 $68 另一款小食係炸魷魚圈🦑，份量算多，適合多人share食。魷魚唔韌同熱辣辣，但食果陣點多啲醬會好味啲，唔點醬嘅話味道會略為有啲淡。 主菜方面： 黑松露雜菌天使麵 $118 呢款係會令我下次想再食嘅pasta～🤘🏻一送到嚟已經好香黑松露味。天使麵煮得啱啱好有咬口，而且好多汁同雜菌，所以一啲都唔好乾！好味～ 德國鹹豬手 $198 以前食過太多又韌又乾嘅德國鹹豬手。原本有少少擔心會有近似嘅情況，但食落發現鹹豬手皮脆肉雛，豬手皮夾埋甜甜地嘅蜜糖一齊食幾啱我口味，厚薯條我都照點蜜糖唔拎茄醬～ 飲品方面雖然主打都係酒類，但又見有咖啡飲，今次一於試吓佢☕️: Caramel Cappuccino $42 平日叫caramel多數都係落焦糖醬，而呢喥竟然好似焦糖燉蛋咁燒一陣焦糖係面，唔怕甜嘅我覺得好加分！ Caffé Latte $38 最後總結一吓，呢喥食物同咖啡都比預期好。環境偏暗，同場都多人邊食邊飲酒吹吓水咁～

住馬鞍山咁多年，一直都唔易搵泰國嘢嚟食，始終真係無咩選擇。不過前排先知原來係馬鞍山廣場入面有間叫「新泰東南亞餐廳」，收工一於約埋個friend去試一試！🤪 平日晚飯時間，雖然未去到門口要大排長龍，但入面其實都full要等一等。而餐廳入面好寬敞同舒適，坐低慢慢諗食咩好都未遲。 鐵板蠔仔炒蛋 $98 份量好大，兩個人食嘅話預有少少多。呢款係我去泰式餐廳都經常會叫嘅一味菜，而呢間煮得好好味，蠔仔好大隻又夠多，仲要炒得嚟一啲都唔乾身！ 椒鹽軟殼蟹 $78 係避風塘嘅味道！😋軟殼蟹炒得好香口，相對較為濃味。同埋軟殼蟹即使唔算好多，但以呢個價錢嚟比都算合理！ 泰式燒春雞釀香茅黃飯 $188 燒春雞送到上枱後店員再即場切開，香噴噴熱辣辣嘅黃飯再湧出嚟～燒春雞肉好雛，而且因為要釀飯入去，所以春雞入面嘅骨都去晒，啖啖肉！ 串燒沙爹 $88 串燒共有6串，雞牛豬各2。好適合多人share食！沙爹醬甜甜哋，串燒本身亦有醃好，就算無沾沙爹醬都好有味～ 今次人少，叫唔到太多嘢食，所以無點到咖哩同印度薄餅。下次有機會都要試吓佢～😋 椰青 $45 去得泰國餐廳，當然要飲原個椰青！非常清甜解渴同解辣！不過呢度飲品選擇都算幾多，下次食可以試吓其他嘢飲～ 總結嚟講，喺馬鞍山食泰國菜終於有返個選擇～雖然價錢未係最平民，但食物質素同環境都叫滿意，同朋友/家人間中食吓都唔錯！🤘🏻🤘🏻🤘🏻

今晚同朋友去咗旺角「Running燒」食韓式燒烤放題。好耐之前其實都喺喥食過一次，感像中係一間可以翻兜再食嘅韓燒店，今晚一於叫埋朋友再戰一戰～🥩💪🏻 應該係平日關係，今次去到都算快就有位～唔駛點等位。 一坐低店員就即拎咗前菜俾我哋邊食邊落單。當中塊蘿蔔係用嚟清潔個鐵板用。唔知會唔會有人食錯過。😆 主要嘅落單紙有3張（其實仲有1張係酒類，但我哋今次無飲酒） 聽落3張紙好似唔係好多，但實際上睇埋紙上嘅食物會發現各式各樣嘅肉類/海鮮/小食同熟食都有。基本上張張紙都好有衝動想點晒佢！ 蒜蓉芝士生蠔、生蠔、扇貝、帶子、魷魚圈 海鮮類整體食落都新鮮，而且賣相都算吸引！👍🏻當中我特別鍾意蒜蓉芝士生蠔、帶子同魷魚圈～蒜蓉芝士生蠔即使唔係好大隻，但燒溶咗嘅芝士配埋蠔呢個組合，其實都已經無得輸！🥴而魷魚圈就算燒耐咗，食落都依然好淋，好味！ 茄子、厚切豬腩肉、辣味五花肉、豬頸脊肉 厚切豬腩肉非常好燒易控制，厚實嘅豬肉🐖，連埋生菜同醬汁包埋一齊食，好！滿！足！ 醬汁牛五花肉 🐂牛肉之中，醬汁牛五花肉係我呢餐食過其中一款特別鍾意嘅肉。五花肉唔易燒燶，而肉身薄切，本身醬汁好入味，燒好其實直接食唔需要點其他醬汁都已經好good～ 最後都想講一講佢哋嘅熟食～ 柚子味炸雞🐓 呢喥炸雞有三款口味（原味/柚子/噴火）。炸雞炸到外層好香脆而內裡juicy～選擇咗其他味嘅話就會配埋相應醬汁俾你點嚟食。我平時唔係特別好柚子味，但估唔到炸雞加上柚子味竟然有新鮮感而又好食！值得一試。 水冷麵🥢 平時食放題，相信好多時都會盡量唔點粥粉麵飯，又唔知幾大碗，又怕太飽肚食唔到其他～但呢碗水冷麵份量唔會好大，其實只係幾味就可以KO，同朋友share嘅話，食完差啲想再叫多碗。😝 水冷麵麵質幼身好彈牙，湯底冰涼又少少甜甜地幾清新～食咗咁多燒肉，整返碗食吓幾啱！

今晚約咗朋友聚一聚食吓嘢吹吓水。朋友話有間新開嘅日本餐廳可以一試，於是就跟咗佢哋去「溏串小町」try try！🍻 入到去個環境寬敞，啲位唔會泊得好埋。而且個裝修幾啱feel，俾到我喺日本居酒屋食嘢嘅感覺！🇯🇵 值得一提係呢喥order嘢食係直接scan佢地個QR code嚟揀嘢食，入面會直接show埋價錢同埋check返叫咗啲咩都方便！ 揀好嘢食之後，店員拎咗個前菜元貝我哋食。味道鮮甜好好味！ 新鮮粟米 $28 特盛牛柳串 $68 豬五花腩 $28 日本博多雞肉 $48 相信呢喥串燒都會係必試之選，雖然店員有推介我哋一款串燒拼盤，但我哋俾特盛牛柳串吸引住！所以決定散叫串燒～ 果然串牛柳無令我失望，🐂肉夠厚但唔韌，燒到唔會過熟，咬落去仲有肉汁！另外🐓雞肉亦都好味，唔乾身，可以點少少調味料（香草檸檬/麻辣海鹽）吊吓味！ 日本蠔肉刺身 $68 火炙三文魚皮壽司 $40 帶子壽司 $48 生蠔夠大隻，好有鮮味而又一啲都唔腥！值得一叫～而火炙三文魚皮壽司🍣有驚喜！原以為魚皮會好乾身，點知食落先知原來係咁肥美。仲要份量多，非常抵食！🤑 鱈魚干 $68 味道同雞泡魚乾差唔多，都係甜甜哋少少煙韌，連蛋黃醬一齊食會好易食唔停口！👍🏻 冰鎮原隻魷魚仔 $33 冰鎮效果好似令到魷魚🦑肉質更爽口！平平哋當小食咁叫嚟試吓都唔錯～ 加洲卷 $38 醬油湯烏冬 $38 清酒煮蜆 $58 就咁食蜆肉時，少少清酒味，而蜆肉原身味道仲仍然係喥，都幾鮮甜。鐘意酒味嘅可以加多少少清酒嚟食～🍶 最後總結一下，呢喥食物水準同環境我覺得都係中上水平！👍🏻係部分食物價錢偏高，但幾適合成班friends一齊去聚聚，叫多幾款share食～

收工約咗朋友喺荔枝角睇戲，比較少嚟荔枝角，所以直接喺app搵間特色少少嘅餐廳試一試！最後揀咗去”Pizza Piazza”食意大利薄餅！🍕 門面見到佢哋嘅burger其實都幾吸引，但今次同朋友預咗食pizza，如果另一樣又漢堡包好似太類近。所以今次只好skip一skip！ Order咗之後會先送上熱辣辣嘅軟包，再配埋橄欖油同醋俾你一齊食～ 雙拼薄餅(辣肉醬至尊+芝士四重奏) $158 講講呢喥主打特色pizza🍕，款式選擇有好多，睇埋細字發現原來可以雙拼！啱晒唔多人而又想試多個口味嘅我哋！Pizza即點即焗，送到嚟嘅時候好香好熱，睇落已經非常吸引！ 辣肉醬至尊辣得嚟好惹味，有令人食完即想再食嘅感覺！芝士四重奏🧀原以為食落會好漏好滯，點知又完全唔會，咬落去少少煙韌而又濃厚嘅芝士，掂！ 西班牙黑毛豬扒 $168 份量比我預期中多，黑毛豬扒夠晒厚切，竟然仲要有兩塊！豬扒厚身得嚟唔會韌，配埋佢個醬唔錯！另外佢個side係好甜嘅番薯條🍠，唔駛茄汁都已經好好食！ 意大利仁餅朱古力奶昔 $38 呢款奶昔唔算稠，比較似凍朱古力奶。朱古力味非常濃，加埋餅碎嘅口感幾good～👍🏻 意大利芝士蛋糕 $48 我哋見佢有個雪櫃show晒啲cakes出嚟，雖然都已經好飽，但忍唔住都想食返件！😂 食落件tiramisu霖酒味偏重，頂層好creamy好軟滑！

可能因為我成日搭車都會經過「台灣麵」嘅關係，每當喺荃灣想食台灣嘢嘅時候都好易諗起呢間鋪。今晚一於去食一食佢！ 每次食都必揀呢個餐！一個大碗分兩邊，A/B 任揀，連原本係麵嘅都可以改做肉燥飯！自由度極高！👍🏻 雙排雙格餐 (A+B款) $65 今次揀咗A.香酥雞腿肉燥飯+B.韮菜肉雲吞乾拌麵。雞腿🍗真係成隻劈三嚿咁上，連埋肉燥飯喺底，份量好足！另一邊三隻韮菜餃雖然唔可以話好大隻，乾拌麵亦唔算好多，但整體嚟講兩邊加埋個份量都係中上同埋味道都good！👍🏻 建議比較大食嘅話最好就咪揀晒兩邊都係麵底，如果唔係就有機唔夠食。 酥炸花枝丸(6粒) $33 另外叫咗款小食，送到嚟果陣熱辣辣🔥，而且花枝丸味道都一向無死，好味！ 雙拼餐餐飲轉台式飲品都係加$4，價錢合理！我叫咗凍胚芽奶茶，叫少冰真係少到俾我～👍🏻台式奶茶少少偏甜，而胚芽如果可以再多啲就更好！

出開大埔嗰邊搵朋友，夜晚佢推介咗一間泰國新派餐廳話要同我一齊食吓！所以就跟咗佢去呢間「木船」試一試喇！🛶 行到去門口其實都已經有啲人排緊隊等位，但好彩2人枱咁啱有張俾我哋！👍🏻 雖然呢間餐廳唔係啲好寬敞嘅餐廳，但入到去個感覺都算舒服同埋個環境幾colorful！ 青木瓜沙律 $62 食得泰嘢好多時都會叫青木瓜沙律，少食辣嘅我一心都係食少少就算，等我朋友食多啲（佢太鍾意呢個沙律😂）。估唔到佢又出奇地好味，夠凍得嚟又甜甜辣辣幾開胃！ Combo小食拼盆(小) $52 除咗個沙律外，都諗住叫多個小食。最後揀咗小食拼盆，感覺多啲泰小食可以share食。招牌菠蘿炒飯配虎蝦 $158 起初見menu張相好似好堅，以為出到嚟個樣點都會有啲出入，結果一送上枱時望到即刻眼前一亮！串燒菠蘿🍍勁甜勁好食！虎蝦🦐配埋個汁嚟食好夾，但留意一吓個汁有少少偏辣。菠蘿炒飯份量比我預期多，啲飯去到好底都仲有！食到我地勁飽，叫得上招牌，果然有驚喜！😝 上：迷紅小象 $45 下：夏日芭東海灘(菠椰) $58 嘢飲方面我哋叫左兩款。迷紅小象係菠蘿、蘋果同香蕉做出嚟嘅沙冰，飲落去菠蘿同蘋果味好出，酸得嚟好醒胃！菠蘿椰子🥥沙冰就比較接近平時椰汁沙冰，但又有啲菠蘿嘅酸甜吊一吊！幾特別～ 其實呢喥嘅嘢飲都幾有亮點，好多都好大杯，賣相又夠勁，搞到我唔識揀！😂見到隔離位飲咗呢杯，都好似好吸引咁！有機會真係想試試佢！