同friend喺平日去咗試呢間新餐廳 排咗10幾分鐘隊就有得入去 平日有lunch set都幾抵食 加多$25就有杯野飲同waffle仔 Waffle食落似係即叫即整 好趣卜卜！ 食物、環境都唔錯 美中不足既係 繁忙時間一位頸背有紋身既員工態度比較唔耐煩 令餐飯食得有啲唔愉快

最近見到網上有人介紹呢間大埔小店
主打椰子汁同中式榚點
所以放假就滿心期待諗住去試下
點知第一次去，(可能太早啦)椰子未有貨、榚點就要早一日訂
所以兩手空空而回
不過店主都好好，好有耐性同我講下一次可以喺FB inbox佢地落訂先黎
.
過咗2日我就決定要再試下呢間小店既名物
所以就依店主所講早一日喺FB落訂第二日去拎
. 開鋪一個鐘內我已經去到
不過已經開始有人排緊隊
因為鋪頭得2個人，加試野飲係每杯人手整(開椰子...ect)
所以都等咗20分鐘左右先到我
天氣熱真係少D耐性都唔得！最後我買咗椰汁班蘭榚($20)、特濃班蘭($25)、黑芝麻榚($25)、紅棗榚($25)同埋一杯椰子汁($35, 唔記得影相) (每個味道既榚點其實有2條)
整體榚點味道濃郁、彈牙又煙UN
食得出落少咗糖
榚點幾厚身，對得住知價錢～
椰子汁好大杯
無另外加糖，所以飲落味道好天然
同埋係好大杯！
.
我覺得呢間係值得一試既小店
不過如果要買榚點記得早一日訂！
去到預咗可能要等10-25分鐘(人手有限)
同埋記得留意佢邊日休息/開幾點
以免摸門釘呀！

星期四放工約咗朋友黎呢間居酒屋食飯。一上到去見到門口既燈光、裝飾顏色柔和，令人覺得好舒服！不過餐廳門外走廊位置比較重煙味，令成件事有少許失色。 由於我比朋友早到，所以就一個人慢慢睇住menu先。呢度既侍應都好好，喺我等待期間不斷為我加茶，又會主動介紹是日推介。加分位係，佢地等到我朋友入座先拎隻杯斟茶俾佢，而唔係喺我坐低之後就斟定放喺到。鹽燒牛舌 $68
牛舌數量十分多，應該有8-10塊，非常驚喜！牛舌唔單止冇膻味，食起來仲好有嚼勁同多汁。椰菜味道清甜、口感爽脆，估唔到伴碟都咁出色！豚肉露筍卷 $36
食落唔會太乾，露筍都幾甜，不過SIZE有啲細。明太子煎蛋卷 $78
推介！！！蛋既部分出色，鬆軟多汁，厚厚既蛋卷包住粒粒明太子，口感豐富，明太子數量絕對唔孤寒，每一啖都食到好多明太子，正！海膽汁燒蠔 $118
呢個真係一定要試，海膽汁好濃郁，蠔又大隻、多汁，配埋碟底既菜一齊食，食落唔會好滯，反而出奇地夾！雞湯卡邦尼拌烏冬 $88
見係網試食評推介所以又叫一碟試吓，果然名不虛傳！烏冬夠煙un、掛到汁，醬汁濃厚，食落好滿足！刺身拼盤 $380
有7款唔同既刺身，食落幾新鮮！魚肉口感柔嫩，有陣陣既香味，魷魚略帶粘粘、彈牙口感。好有趣既係每份刺身都有少量柚子味道，唔會反感，但係未必每份刺身都有需要放柚子。

另外，我哋都叫咗柚子酒、蘋果梳打，味道正正常常，但比較多冰，所以好快就飲完一杯。

今日兩個人喺西九龍中心行完，就喺附近搵食！見IG有人推介，就去咗試呢一間小店！ 一入去鋪頭唔算好大，大約容納到5-6人堂食，我諗佢主要都係做外賣生意吧。 同友人叫咗好多炙燒壽司，最平$6有交易😍飯細細舊，但魚生絕對足料！我最中意既辣味三文魚都有好多舊三文魚！成啖食好滿足又唔會太辣🥰🥰整體味道都好出色！ 美中不足係叫咗兩輪都出現漏單情況，大家堂食最好數清楚有冇黎齊先好食🙈🙈🙈

喺Openrice見到呢間餐廳有好多好評 就同朋友book咗星期六19:45黎試下 . 去到等咗一陣已經好快入得 安排咗一張二人枱俾我地 仲好細心比多張凳俾我哋擺背囊❤️ . 餐廳樓底好高 所以空間感十足 . 等咗十分鐘左右就上咗主菜 前菜就等咗好耐先上😅 所以呢到上菜次序係有啲奇怪 . 椰青: 😋😋😋😋😋 好清甜，十分推介 . 滿載海鮮飯: 😋😋😋😋😋 個人覺得有少少太甜，不過一次半次唔怕啦🤪兩個人share都食唔哂 . 越式拼盤: 😋😋😋😋😋 豬頸肉有咬口，蝦餅厚身香脆！只係油咗少少 . 整體而言，味道同環境都唔錯。只係人手有啲短缺，所以未必可以serve得好貼，不過服務態度都好好！回頭指數高😍！

銅鑼灣食飯郁啲都$100 咁岩俾我搵到間價錢較為平民、味道有水準、食物又飽肚既創意㕑房 星期六一點幾去食都唔算太多人，座位都幾闊落 午餐選擇多，最平$52有交易，仲附送台式飲品 另一啲午餐選擇 朝早11點前都可以黎食下早餐 飲品menu，但台式飲品竟然冇珍奶🥲 本身想叫拉麵食，但係見個個都食西餐同港式茶記飯，所以改變主意，嗌咗份茄醬焗厚切豬扒飯配百香果綠茶 跟餐配送嘅百香果綠茶 - 有啲甜，但係味道都可接受(自己飲咗幾啖先記得影相) 茄醬焗厚切豬扒飯 $52 等咗大約十分鐘就上咗焗豬扒飯，首先好鐘意將豬扒切到一件件、去埋骨咁上菜，令到食客唔會食得咁”呢啡”，可以啖啖肉咁食！另一方面，豬排整得鬆脆，可以話係正！芝士佢都唔孤寒，鋪到成碗面都係😍飯底唔似連鎖餐廳咁得個甜字，食得出佢落咗好多香料，所以層次感好出❤️有機會一定會再去幫襯！因為佢抵食、大份、好味道👍🏼

想同友人搵餐廳慶祝生日 見呢間餐廳好多好評 訂位又有9折 所以就book咗位！😆 星期六去到唔算太多人 所以都幾舒服同寧靜 環境幾有日本風格！ 職員都好友善 會主動介紹唔同菜式俾客人 叫咗龍捲風沙律同費城卷 龍捲風沙律入面有沙律菜、中華沙律、蟹柳等等 好食又碟！😋 我非常喜歡佢既壽司pizza!!! 上面係魚生同醬 下面係炸過既飯 加埋一齊食係出奇地match嫁！ 最正係可以幫你喺碟上寫埋”Happy Birthday” 認真😂生日年年同蛋糕影都悶啦 所以覺得好特別😍 整體味道有水準！❤️❤️ 價錢都相當親民又食得飽 有機會一定會再黎食👍🏼👍🏼

最近見好多人介紹呢間小店 去開銅鑼灣就決定去試下！ 入到去成個環境都好舒服 裝修都好靚、好有心 就好似去咗其他國家咁 Staff都好friendly 會主動介紹daily special俾客人 先上Macha Latte 同Chai Latte 味道合乎水準 Chia Latte幾香 個人幾中意 炸雞Waffle: 用咗印度香料 覺得幾特別 畢竟唔係間間cafe用呢種煮法 雞炸得幾香口同juicy 值得一讚！ 焦糖布丁蛋糕: 好好食！十分推介 布丁部分好滑！ 成個食又唔會覺得好濟 整體係一間幾唔錯既cafe 週末黎呢度食餐brunch會係幾輕鬆

喺銅鑼灣諗住搵間餐廳醫肚 點知就出事 叫咗碗台式魯肉飯 上菜速度幾快 但味道真係令我非常失望 魯肉味道好淡、肉又少、又多油 感覺似係食緊豬油撈飯 第一次食咁難食既魯肉飯 平時好少寫食評 今次寫係避免有更多人中伏 如非必要，真係可以唔洗試黎間餐廳