今日放工又唔想煮飯，於是就喺附近一間裝修雅致，坐得舒服而又多選擇嘅茶餐廳開餐。 阿女去到茶餐廳，必會叫的乾炒牛河，河粉加入入瑞士汁同炒，甜甜地，乾身得來又不油膩，再加上大量軟滑的牛肉片，同幾條翠綠菜心，份量大到兩個女仔食都夠。 另一必點就係厚切焗豬扒飯，因為即焗的關係所以需時，一上枱已經聞到芝士同蕃茄汁的香氣。 厚切的豬扒鋪滿整隻碟，軟腍得來又不會鞋口，撈勻酸酸甜甜的茄汁芝士同炒飯底同食，不用幾分鐘就清晒。 估唔到茶餐廳會有咁出色嘅酸菜魚，味道很正宗，拍得住某些川菜的酸菜魚，大大盤，而且用料十足，大大片的魚片軟滑冇骨， 仲有大量紅薯闊粉、蘑菇、萵筍、大豆芽同鹹酸菜，豐富到不得了，最重要係味道很正宗非常啱我口味。涼瓜炆䱽魚，超級惹味而且碟頭都好大，䱽魚成隻碟咁長，份量十足，煎過的䱽魚加豆豉同涼瓜炆煮後更加入味，要來撈白飯一碗都不夠吃。 雖然不一樣的格局設計，不一樣的菜式，但依然保持住茶餐廳大碟頭豪邁的風格。

踏入12月， 又係時候要購買聖誕禮物， 所以約朋友shopping之前，就去呢間專食可麗餅的小店試下！ 簡簡單單的一餐，配上餐廳簡約的日式裝修， 輕鬆舒服的環境！ 我哋share食，點了一鹹一甜的可麗餅，一底雞蛋仔，再加二杯特色飲品！ 薄薄的餅皮軟熟得來帶有少許煙韌，手捲賣相造型很漂亮！ 煙三文魚牛油果碎蛋可麗餅～平時比較少吃鹹的,三朵可愛玫瑰花造型的煙三文魚，咸咸香香，配埋碎蛋同好creamy牛油果一齊食，味道出奇地夾！ 食完鹹的就再吃甜的，紅豆鐵觀音髒髒麻薯可麗餅～ 聽個名就知道餡料好豐富， 雪糕內有濃濃的茶香味，一試難忘，加上紅豆和麻薯好match, 這個下次一定再叫！ 杭州桂花雞蛋仔～外脆內軟而且每粒都有粒粒桂花在內，味道極之清香，好特別，一粒接着一粒食唔停口！ 除了可麗餅，店舖另一主打是茶飲！ 所以我哋都點了兩杯，普洱燕麥奶～ 普洱茶我經常飲，卻從未試過加燕麥奶，兩者溝在一起，可以中和普洱茶的濃度，飲落有淡淡的茶香味，值得一試！ 藍莓橙滇紅～藍莓和橙加上紅茶，飲得出有水果味道亦都有茶香味，誰也搶不了誰的味道，出奇哋夾！ 飽餐後繼續shopping去！👍

相約阿女去食近期紅爆嘅創意點心，叫咗一籠原創點心、一上枱色彩繽紛，十分嘅吸睛。 脆脆富貴紅米腸粉，食落冇乜特別，只係擺碟精美，味道就同其他酒樓無乜大分別。 最特別係一口鹹水角，用竹籤串起，炸得非常外皮酥脆內裹軟糯。 另外叫多一碗（普通擔擔麵），真係冇改錯名呢碗擔擔麵冇乜特別不過不失，麵質過淋，好彩味道免強搭夠，真係普通過唔普通。

同事昨天喺西環買返公司請大家食，真係一食難忘，知道灣仔新開一間，於是便去買來返尋味。一食真係驚為天人，酥皮鬆脆而不漏滯，雖然用極多牛油去製造，食落也不會滿手油膩，蛋漿極之香滑，略嫌牛油味蓋過蛋味。另外買咗幾個咖啡朱古力撻咖啡蛋漿下便鋪上一層薄薄嘅朱古力，經焗過之後，朱古力半溶狀態，一口咬落，酥皮香脆得來，有濃香咖啡味又不失朱古力嘅香味，因為太酥脆，食時要小心酥皮散落一地，太太太好食。

今日放工跑完步，同事建議去公司附近一間唔錯嘅越南菜餐廳，去到竟然有位坐低後，我哋每人提議一個小菜！ 先嚟個軟殼蟹牛油果米紙，米紙包住生菜、牛油果、粉絲同軟殼蟹，點上酸汁清新爽脆，就算食多幾件都唔會有罪惡感。 黃咖喱雞扒配手抓餅，我個人比較鍾意多椰汁嘅咖喱，所以呢個必點，雞扒份量頗多，再加上薯仔同香濃嘅咖喱配上手抓餅同吃，味道一絕。另加 $30有三片蒜蓉法包，同樣都係點咖喱好好食。 越南春卷又係必點小食之一，炸得香脆，包上生菜再點酸汁同食，又係好食到停唔到口。 蝦頭蝦膏海鮮炒金邊粉，味道都唔錯，有大蝦、魷魚、仲有青口，不過就食唔出有蝦膏嘅味道。 炭燒豬頸肉亦都唔錯，外皮脆內裏就爽彈，點上秘製醬汁一齊食，可以減輕油膩感。 青檸梳打清新解暑 凍奶茶不過不失茶味唔係特別香

有朋友極力推薦這間味火鍋，剛好有兩位朋友生日要食生日餐，所以就 決定試呢間，裝修幾特別，而且座位寬敞坐得舒服，因為我們有九個人，餐廳特意安排了房間給我們，非常細心！ 這是任食的我們六點開始入座，食到10點！ 因為有九個人，所以我哋可以試齊酸菜魚、魚肉嫩滑，酸湯非常夠味，好味道我哋連湯都飲埋。雞煲~用自家製秘製汁去炒非常惹味,雞肉嫩滑不鞋口，吸收咗濃杰嘅秘製醬汁好好食。芝士焗龍蝦～ 新鮮彈牙，加入大量濃郁嘅芝士一齊焗超正。到達芝士焗生蠔~又係落大量芝士同焗，生蠔非常鮮甜肥美。 每人試少少不敢食得太飽，因為之後仲有重點海鮮打邊爐！ 非常推介手砌牛很美味 九個人可以開兩個喎，要咗一個鴛鴦鍋，一邊冬陰功一邊同椰子雞湯底，冬陰功湯底超級夠味，食材都唔使再點醬料，椰子雞就冇乜特別！ 除太量醬料任你溝之外，仲有大量汽水任攞任飲。 最後個個都食到捧住個肚話飽，嗰陣時間都只不過係8:30，大家都不約而同話下次再嚟呢間食，最重要係不限時間，而且性價比超高！

今日會展開工，聽聞深水埗出名嘅豬膶麵已經開到嚟灣仔。所以大清早7:30就過嚟呢間盛傳已久嘅漢發麵店，要一嘗招牌豬潤麵。 除咗豬潤麵出名，聽朋友說牛筋牛腩也很出色，菜品十分多。我叫了一碗豬膶米粉加午餐肉。上枱豬潤香氣撲鼻而來，湯頭清甜，豬潤竟然可以切到半寸厚，都仲係爽彈而不蘇，招牌果然係名不虛傳。 兩片厚厚的午餐肉，份量非常之大，煎得外脆內軟，女仔食完兩片已經飽咗七成，建議可以同朋友share食。 唯一美中不足的是沒有早餐套餐，不包飲品要額外加，對於一個早餐價錢就偏貴。

生日月份特別多朋友請食生日餐，我揀咗好耐冇去食的三木韓國餐廳，因為覺得這間的食物比較正宗！ 坐低叫了餐之後，店員就送上泡菜，六小碟，六樣我都非常之鍾意很啱我口味！ 三個人嗌咗三個餐，再加一個海鮮煎餅，煎餅加入大量海鮮同香蔥韭菜，外皮非常酥脆香口，食前點上一些秘製辣醬汁，簡直有畫龍點睛的效果，非常惹味！石鍋雜錦飯，石鍋啲熱力絕對不可少看，上枱仲發出吱吱聲，熱力逼人，倒入辣椒甜醬用匙羹攪勻，鍋底仲有非常香口的飯焦，熱辣辣吃不停口！ 辣蕎麥冷麵，凍嘅冷麵加入辣醬蘿蔔青瓜撈勻同食，清新開胃，蕎麥麵煙煙韌韌，係我非常喜愛的口感！ 反而呢碗海鮮湯麵非常之普通，冇特式亦都冇乜特別嘅味道，下次都不會再叫！ 總括嚟講食物嘅味道都係好正宗，但服務態度就非常之一般，可能人手不足嘅關係，服務真係一般般！

又係朋友請食生日餐，介紹咗佢成日去食嘅川菜，店舖不算大細，全場滿座，剛好有客人嚟咗我哋才有位。我哋叫咗滕椒酸菜魚同香辣雞煲酸菜魚係我嘅至愛，魚片夠大片夠嫩滑，滕椒湯底夠晒惹味，飲完都唔覺得口渴，正！不過略嫌配菜太少，有萵筍、闊薯粉同大豆芽菜，每樣份量都非常少，如果加多些少就更完美！叫咗小辣嘅香辣雞煲，雞肉夠嫩夠入味，辣度又適中唔錯！店家的串燒，亦都做得十分出色，呢份茄子少少辣，茄肉欶淋，真係超級好食！燒墨魚餅亦都係必要嘅，非常彈牙👍另外叫咗兩杯特大同一杯細嘅金吉話梅七喜，食辣嘢配上這一口，簡直係最佳拍檔！下次再來，因為仲有好多食物我都想食😋

朋友請食生日飯，我便提議去北角呢間可以望到海景，兼且性價比超高的韓燒，星期一至日都有午市套餐，而且無需要+1服務費。 因為之前有食過，所以一坐低馬上點了兩個堂食黑毛豬五花肉套餐套餐，包括豬排骨肉，梨汁雞肉、同醬油五花肉及一碗白飯，份量非常之多，仲有生菜、自家醃製涼菜同雞蛋任添加任食，套餐加$8仲有杯特飲，非常抵食！另外要咗一份特級五花肉套餐，包括有五花肉、牛五花、牛小排，肉類考得香口，鎖住肉汁唔會乾柴，實在好食。 套餐加另加$58便有兩種炸雞可以加配，我哋揀咗香辣炸雞，雞肉炸得外脆內有肉汁，非常Juice，少少辣甜甜地十分惹味。