今日去左依間西班牙餐廳，裝修幾有西班牙特色，都幾有情調！而且D waiter都好友善咁介紹食物俾我地～
首先叫左兩個tapas, 依個係西班牙銀鱈魚蛋餅，賣相好令～上面白色既汁係銀鱈魚既汁加olive oil，加埋蛋餅酸酸地咸咸地好好味！入面既鱈魚好大粒好多，好足料～另外依個脆炸和牛薯蓉球賣相好令！入面都好多牛肉，加埋上面D汁酸酸地幾好食～不過就比較普通之後就係主菜啦！依個西班牙乳豬烤左好耐好香口，配上燒汁， 最特別係配埋依個肉桂蘋果，加埋一齊食出奇地夾！D皮好脆又唔會好膩，好味！最後仲叫左甜品，西班牙吐司配乳酪雪糕，吐司好軟熟，有D Belgium Waffle既感覺～加埋面頭既餅碎同雪糕，又凍又熱咁唔錯～仲叫左一jar classic sangria, 酒味唔算濃，幾rich幾好飲～happy hour仲買一送一添！本來一jar就幾貴，但買一送一都飲得過！整體黎講，依間餐廳野食好味服務都唔錯，但價錢有點貴，特別日子先會去食啦，都值得推介！

今日同朋友又嚟咗M3食dinner, 不過係嚟咗大圍嘅新分店😬餐廳內擺放了聖誕裝飾，充滿節日氣氛，
我地order咗凱撒沙律配煙三文魚，黑松露帶子意粉同木魚花鮮蝦薄餅。沙律都幾豐富，有新鮮嘅沙律菜，麵包粒，煙肉粒，車厘茄，大大塊嘅煙三文魚，仲有粒半熟蛋，味道相當唔錯😆意粉煮得剛剛好，黑松露味香，蜆幾鮮味，最欣賞係d帶子，微微煎香，保持到嫩滑口感，好好味😋Pizza中間有大量木魚，啱晒鐘意食木魚嘅我😬😬每件pizza上都有隻蝦同菠蘿，餅底好脆口，薄薄地唔會好易食滯。飲品新推出咗沙冰系列，嗌咗杯pink lady試下。店員話入面有雜莓，乳酪，牛油果，蜜糖。飲起上嚟幾rich，雜莓味比較突出。甜品要咗蛋白餅，脆脆地嘅蛋白餅入面有芒果雪糕，外層就有d生果做裝飾，賣相幾靚。蛋白餅偏甜，可以配上旁邊嘅熱情果醬嚟食，中和返個甜度。
M3食物質素高，環境又唔錯，係一個同朋友聚會唔錯嘅選擇☺️

今日同朋友行開沙田，就帶咗佢嚟M3 Italian食晚餐。
今晚order咗一份自家煙燻三文魚配水煮蛋，薯蓉及泰國露荀，一個焗蕃茄阿拉斯加長腳蟹意大利飯，一個甜品同一杯mocktail。Virgin Mojito飲落幾fresh，有淡淡嘅薄荷香加上青檸嘅味道，幾解渴😆依個煙燻三文魚賣相幾靚，薯蓉舖底，上面放咗幾條露荀，再放上三文魚同水煮蛋，旁邊仲有沙律菜，所以好豐富。好欣賞個三文魚同薯蓉，三文魚啖啖肉，而且肉質幾滑，而個薯蓉整得好香好好味，忍唔住食多幾啖😂個Risotto做得好出色，飯嘅軟硬度剛剛好，吸哂蕃茄嘅酸甜味，好開胃。飯面有三條長腳蟹同一塊芝士，味道唔錯👍👍再嚟係甜品檸檬凍霜，外層嘅mousse食落好滑，入面係檸檬流心，酸酸地幾好味，可惜餅底淋咗d，但整體算唔錯。
今晚依餐同朋友都食得好滿意😊下次可以再嚟！

今日係第一次同男朋友嚟到九龍城，依度真係有好多泰國菜館，朋友介紹嘅緣故，我地就去咗泰好味食晚餐，試下係咪真係“太好味“先😂
餐廳唔算大，座位比較窄，如果前後枱都有客嘅話會坐得比較辛苦，好彩我地早到，冇乜客，坐得幾舒服😊考慮咗一陣，我地嗌咗生菜包，炸皮蛋，豬頸肉，菠蘿炒飯，紅咖喱雞，仲有椰汁冰同泰式凍咖啡~本身男朋友仲想嗌串燒，但基於真係驚食唔晒就俾我阻止咗😅飲品率先送上，椰汁冰飲落幾特別，甜得嚟好似帶有少少咸味，椰汁味好濃，幾唔錯！至愛咖啡嘅男朋友話要試下泰式咖啡係點，所以order咗，佢話有香濃嘅咖啡味，好正😀豬頸肉迷嘅我一見到碟豬頸肉已經急不及待夾咗舊擺入口，豬頸肉肉質算唔錯，唔會太乾，唔點醬汁食落甜甜地，而醬汁就辣嘅，個人就認為點咗野味d😆之後就試下個生菜包，大概有6塊生菜，肉碎就加入咗芫茜，洋蔥炒過，幾香口，少少辣，用生菜包住食既fresh又飽肚，男朋友大讚好味👍炸皮蛋係男朋友話要食嘅，開頭聽個名我對佢興趣不大，試咗一舊我卻愛上咗佢❤原來好好味㗎喎！皮蛋面用魚肉包住再上面包糠炸至金黃色，食到淡淡嘅魚味，再配上甜甜地辣辣地嘅泰式辣醬，味道一流😄男朋友見我咁鐘意食，好得戚咁話自己揀得好😂跟住到紅咖喱雞出場，雞肉份量唔算多，但都幾多配菜，有豆角，椰菜花，西蘭花，菠蘿粒。雞肉唔太入味，而且唔夠滑身，不過個咖喱汁就好正，個汁雖然比較稀，但卻有濃郁嘅椰汁味，比起其他幾道菜式食落較辣，所以啱晒鐘意食辣嘅我，依個汁用嚟撈飯真係一流😋最後就到個菠蘿炒飯，用菠蘿殼裝住嘅炒飯賣相好靚，表面有腰果，肉鬆，雞肉。飯加入黃薑粉炒，所以微辣，菠蘿粒又甜又多汁，好味！整體嚟講味道唔錯☺
最後我地食到捧住個肚走，真係好飽😂😂下次先嚟試下d串燒😆

之前都有聽聞過恆發嘅雞蛋仔好好味，咁啱今日係九龍城見到，就拉住男朋友去買返底試下😊我地買果陣前面已經有5,6個人排緊隊，所以我地都拿拿臨嗌咗底原味，以免越嚟越多人😛等咗一陣，雞蛋仔到手喇😍啱啱整起嘅雞蛋仔熱辣辣，香噴噴！！！我搣起一粒果陣嘅感覺係咁硬嘅😶咬一啖發現原來係外脆內軟㗎😋😋😋外層好脆，好似食緊鬆脆嘅蛋卷咁，而入面仲係軟腍腍嘅，好有蛋香，好好食呀！同男朋友你一粒我一粒咁好快食晒一底，真係好正😍

今日同男朋友行完街好肚餓，見到Cafe 1950啲餐牌都幾吸引，就入咗去食☺
食物選擇都好多，搞到我嘅選擇困難症又出咗嚟😂最後男朋友發板，嗌咗鵝肝肥牛石鍋炒飯，美國安格斯肉眼扒，再加個小食芝士肉醬焗薯條。最先送上嘅係芝士肉醬焗薯條，薯條用上粗薯條，食落更有口感，可惜薯條唔夠熱…肉醬份量都算足夠，但略嫌芝士份量不足，加多d味道應該會更佳😄跟住就到肉眼扒，男朋友要咗5成熟，跟飯同黑椒汁，塊扒好大塊😍依個價錢嚟講真係幾抵食，因為個餐仲有跟個餐湯同飲品👍肉眼扒肉質都唔錯，可惜似乎煎耐咗d, 唔係5成熟，食落似7成…再嚟就係個鵝肝肥牛石鍋炒飯，同樣跟餐湯同飲品😀個飯一上枱已經聞到香味😃鵝肝煎得幾香口，石鍋熱度十足，食咗好耐都保持到個熱力，而且仲令邊邊d炒飯出現飯焦，食落好野味，正😋
整體嚟講餐廳嘅環境同服務都唔錯，食物又ok,下次有機會再嚟食😆

每次嚟親food court我都會選擇幫襯匠工房秀吉😆都有一段時間冇食過，貪心嘅我每樣都想食，男朋友就幫我買咗個有齊炒麵，八爪魚丸同燒餅嘅套餐，一次過滿足哂我三個願望😂而佢自己就嗌咗個奄列炒麵加八爪魚丸套餐。套餐加$4有一杯汽水，我地2個都加咗😛
燒餅面搽咗一層燒汁後再唧上沙律醬，仲係上面加上木魚作為點綴，賣相靚之餘食落真係好美味，正😍所以每次我都會想食個燒餅😊😊但其實燒餅份量好多，好易食滯，好彩今次有男朋友同我share先食得哂😂八爪魚丸又係必食，每粒八爪魚丸入面都有大大粒嘅八爪魚，好足料，八爪魚口感彈牙，加上燒汁同沙律醬一齊食，好好味😋至於個炒麵都唔錯嘅，但我比較鐘意男朋友果個炒面，因為有蛋包住，又唧上沙律醬同茄汁，令炒麵變得更好味😆食完依餐真係好飽好滿足😉

McDonald's推出咗紫薯雪糕都已經有一段時間，但到今日先有機會試到😂😂😂鐘意紫色嘅我望住杯新地筒已經俾隻色吸引住，真係好靚❤雪糕一入口已經有股濃郁嘅紫薯味，個味道就好似食緊紫心蕃薯一樣，令我好surprise!!!開頭以為只係得個樣，冇諗過味道咁唔錯👍等我得閒再買嚟食下先😆

今日同男朋友嚟到恒安邨依間餐廳食下午茶，茶餐嘅選擇都算多，小食類，焗飯/意粉，炒粉麵都有。最後我決定食返個鮮茄焗豬扒飯，跟餐要咗杯凍檸茶，而男朋友就要咗XO醬乾炒肉片河，跟餐要佢至愛嘅凍咖啡☺飲品方面不過不失，正常。等咗陣我嘅焗飯就送上喇，賣相尚可，汁嘅顏色並唔係蕃茄嘅鮮紅色，食落似燒汁多於茄汁，但可以接受，豬扒唔錯，幾香口，飯嘅份量都足夠，茶餐$28有個焗飯都算唔差了，不過飲品就要加錢先有。到我食咗半個飯男朋友個炒河先到，開頭佢仲話我嗌焗飯一定等好耐，估唔到佢果個仲耐過我😂炒河賣相一般，顏色太深，可能師傅落老抽重手咗😂但聞落幾香，我試咗啖，味道唔錯喎，食到XO醬嘅微辣，河粉亦炒得有鑊氣👍不足之處係肉片炒得太乾身，食落好硬，同埋河粉太碎，男朋友最後要用匙羹輔助先食到😅

今日同男朋友係新城市行街，見到Sweet Monster嘅我突然好想試下個爆谷雪糕，就買咗杯同男朋友share, 一齊sweet下😊男朋友鐘意食朱古力，所以我地買咗朱古力爆谷雪糕😆雪糕外層舖滿一粒粒嘅爆谷，賣相好吸引😍雪糕好好味，好滑好重奶味，我好鐘意😋個爆谷其實都幾好味，但我就覺得太甜了😯如果甜度減低會好好多😝整體嚟講依個爆谷雪糕唔錯😁 唔好睇佢個杯好似好細咁，其實份量都好多，睇下，食到中間都係滿滿嘅雪糕，好足料👍所以2個人一齊食啱啱好😉