話說OpenRice book咗7:00，去到見到細細嘅門口圍嘢人唔知做咩，同老闆講book咗枱，佢話要等15分鐘，我問點解book咗枱都要等，老闆答：「而家7:13，留枱只會留5分鐘」 1. OpenRice訂枱時無咁寫 2. 有兩位都係book 7:00但7:25先到嘅就可以直入，咁即係唔關張枱留幾多分鐘事 3. 再加其他準時到嘅客人都係要等 4. 最後成7:45先入座 既然有得畀人book，好心就安排得好啲！ 食物等好耐，上枱係靚嘅，但食落口就一般，甘筍湯無乜味，沙律係屋企貨式，蟹膏意大利飯好麻麻，豬仔骨肉質乾，羊架過生；另牛扒、薯條、蕃薯條、雪糕都OK。

姊妹們相聚夜，大家都鍾意食生蠔同新鮮海膽，所以就揀咗呢間—蠔詩。

一坐定咩都唔好講，先嚟每人兩隻生蠔！我哋揀咗要creamy啲嘅生蠔後，侍應哥哥就幫我哋揀咗5款... 由檸檬開始順時針方向，生蠔品種如下： 兩個食完Gillardeau Oyster嘅美女都話呢款最正，但可惜已經無貨，唯有翻take另外兩個靚女覺得好食嘅Sadanha Oyster，先前個兩個美女仍然覺得Gillardeau好味啲！ 而我...唔算係生蠔愛好者，而且今次試食所揀兩隻都係唔出色嘅，只可以簡單咁講...新鮮，但肉唔厚，未夠滿足。

西班牙毛白風乾豬火腿伴蜜瓜，火腿鹹度剛好，肉多過脂肪，啱啱好，哈蜜瓜未夠甜，同件數較火腿少。西班牙珍寶野生紅蝦刺生（10吋）$160，影得唔靚，menu寫10吋，計埋個頭應該夠，但蝦頭用咗嚟煮冬陰公湯...一隻五個人分都唔算試得好清楚，不過都食到佢肉質爽口，唔點豉油都夠鹹！用紅蝦頭煮嘅冬陰公湯，好夠酸夠辣，仲有蜆同青口添，呢個好味道！

海膽一板，有生青瓜、生翠玉瓜同紫菜畀我哋連海膽食...海膽顏色偏淡，但都算新鮮，我認為最好係用紫菜包海膽食，先食到鮮味，不過最敗筆嘅係用四洲紫菜！四洲紫菜本身有味精，分散咗味蕾品嚐海膽嘅原味，如果餐廳可提供新鮮日本紫菜，就一流！活藍青口（日本青酒），呢款好味，可能真係活青口，所以新鮮又無雪藏味，以火腿洋蔥等煮汁，好惹味，青口數量仲好多添芝士、牛油果、蟹肉焗薯皮，我一向唔like牛油果，但呢個焗薯完全食唔好牛油果陣腥味，真係有蟹肉，幾個材料混埋一齊，好match，唔錯勁辣非洲雞配香蕉片及牛油飯。老老實實，無諗過呢碟會係全部分開，雞還雞、香蕉還香蕉、飯還飯咁...我一試個汁，爆咗句「好Na辣」，朋友們以為我講粗口，我澄清啲辣汁真係有種Na Na地又好辣嘅味道！侍應哥哥話呢個係老闆秘製嘅辣汁，喺口入面辣一辣就無，又係嘅，隔一陣就唔再覺得辣～雞本身都辣辣地，外皮香口，牛油飯都無咩特別。香煎鵝肝、大蝦龍蝦油意粉，首先我係唔食鵝肝，朋友話好香口，大蝦就ok，但唔知關唔關我唔食鵝肝事，我覺得啲意粉好羶味，雖然夠硬身，但我唔係幾受到陣味（應該係我嘅問題，唔關碟意粉事）

幾年前喺呢度同準上司初次見面，淨係飲咗杯咖啡，之後每朝番工都經過，但都未入過去幫襯；到今日last day，有個好好嘅管理層同事請我哋食lunch，終於認認真真咁食下啲主食

我哋每人叫咗個set lunch，有湯或沙津選擇，而主菜就有4-5樣嘢揀...

我自己揀咗湯，是日靚湯係磨菇湯，面頭有幾點麵包糠，當然要趁佢仲脆要拿拿聲放入口啦！磨菇打成嘅忌廉湯，雖然有磨菇味，但唔太濃，湯比較稀同味淡。 沙津上面有天隻溫泉蛋（好在我無叫，我係唔鍾意食蛋嘅），同事話個沙津好好味，可以理解到嘅，鍾意食蛋嘅人將蛋汁同菜撈埋一齊食，又鮮又juicy，應該好啱口胃

主菜到喇！牛扒（五成熟），一個字

牛扒淋身，容易切又容易咬，只用鹽同胡椒醃面，唔落汁都好好味最歡喜係食落陣陣香烤味，完全唔膩！薯條都好脆呀！

卡邦尼意粉，我無留意餐牌有無寫明，但一上檯就覺得用黑松露煮卡邦尼好意外！意粉煮得剛剛好，唔硬唔軟，卡邦尼汁蓋咗少少黑松露嘅gas味，而黑松露又調節咗卡邦尼汁好膩嘅感覺，用四字成語嚟形容就叫「相得益彰」我哋仲叫咗個魚，外面以煙肉包住，上面有啲露荀同芒果做嘅汁，底有啲薯蓉。同事嘅評價係魚有啲雪藏味，魚肉可以再滑啲，芒果汁好味建特別呢個set lunch有個美中不足嘅地手—唔包飲品嘅...想飲埋嘢就加$25/set，我哋叫咗cappuccino 同奶茶，無咩特別咁啦～

放工之後梗係嚟個happy hour啦！但唔一定係去飲嘢嘅，走去掃下街邊小食都係個唔錯嘅選擇！

利強記出名係雞蛋仔、夾餅咁，但其實有樣食物比佢啲出名之作更好味...就係佢哋嘅辣汁！辣汁有沙嗲味，夠辣又夠濃，可面燒賣或者魚蛋，我自己就比較歡喜佢哋嘅魚蛋，夠實淨，唔腥，又有咬勁每一粒都要'Yaum'勁多辣汁咁食，成日都想留番啲汁嚟送飯...但唔可畀人知我臨食晚飯仲走去篤魚蛋，我唯有忍痛將超好味嘅辣汁掉落垃圾桶

好多次經過哥登堡餐廳，都好奇呢個懷舊嘅店名同門面究竟隱藏住咩好味嘅嘢食，有時夜晚仲見到人喺門口排隊，真係點都要食一次！

機會到啦～星期日嘅夜晚，門口仲未有好多人等，我哋就喺用霓虹光管繞成嘅Welcome下等咗陣，就叫咗入去坐最尾嘅卡位，兩人坐一排...

喺門口已經諗好今晚食乜...就係左上角嘅紐西蘭牛柳餐 再配羅宋湯同紅豆冰（唔駛另加錢架！）

先上兩個暖暖地嘅餐包（唔駛影啦，係人都知餐包係點樣），再上羅宋湯...

一飲....差啲忘記咗嘅味道—辣中帶酸嘅羅宋湯，好經典嘅味道！細個時唔鍾意飲羅宋湯，因為佢又辣又酸，而家十間餐廳有十間嘅湯都唔辣嘅...呢碗就唔同，愈飲愈溫暖，喺冬天飲簡直一流主菜上台喇～～～兩塊牛柳，一份係黑椒汁，一份係蒜蓉汁，伴菜有波浪紋薯條、一片厚蕃茄、同埋急凍三色豆（係咪超經典呢？）

牛柳一厚一較薄，先食較薄個塊，竟然係well done，已唔係我想要嘅7成熟，而且肉汁爭咁啲喎～而厚個塊就真係我想要嘅7成熟，因為牛柳嘅厚薄影響煮嘅生熟度，呢一塊就有返啲肉汁喇！

我個人嚟講覺得黑椒汁比蒜蓉汁好，無咁「杰」，而蒜蓉汁感道都麻麻地，偏甜。最後係紅豆冰，質素一杯，但飲埋佢，今餐就真係好懷舊經典喇～

好耐之前嚟過呢度lunch，間唔時都會掛住蘇三嘅味道，呢種掛念同一般嘅唔同，係好似想念住新識嘅朋友，期待住更深嘅認識

上次之後，淨係記得有豬骨湯出前一丁，見到餐牌$78碗公仔麵仲要收加一，心入面有啲猶疑好唔好叫其他感覺上抵啲嘅嘢食...不過今日都係朝著呢碗公仔麵嚟到蘇三，咁就照點啦！

日本版出前一丁豬骨湯味上面鋪滿燻雞、芥蘭，同埋我最愛嘅葱花，侍應先生好細心咁提醒食之前撈一撈個底可能係怕有啲味粉沉底啦我照做咗，但仍然希望個湯再濃味啲就更正！

我一邊食一邊諗下點可以解到呢碗公仔麵收$78，我就集中注意力喺啲燻雞度...嗯，雞肉好實淨，無雪藏味，雞皮爽口，帶點木燻嘅味道侍應先生介紹話呢個係由玫瑰紅茶加黃塘去燻嘅，聽到呢度，就覺得畀$78都係值得嘅，價值唔喺個結果上面，而係喺個過程度

今日午餐我食得好開心，內街小店用心製作，配埋別緻嘅裝潢，同懷舊嘅枱布，人情味甚濃

6:45pm到達餐廳，仲未有好多人，但到7:30左右餐廳已經坐滿，呢間喺横街轉彎嘅小店應該有啲料到 我今日好想飲湯，已經決定咗無論是日湯係咩，我都要叫一碗飲「忌廉椰菜花湯」當侍應員話我知是日湯時，我呆咗兩秒，諗唔到椰菜花整嘅湯係點嘅...我而家可以同大家分享下，白色嘅湯完全無任何湯渣或配料，平平常常稀稀地嘅白湯，如果無人講，我相信我唔會知道入面有椰菜花點都好，算滿足咗我想飲湯嘅慾望！

頭盤小食：爆谷蝦，外脆內彈牙，係佐啤酒嘅好選擇頭盤2號：鹹魚仔凱薩沙律加雞肉，鹹魚仔肉只有一小片，唔係幾食得出味道...雞肉無咩特別，係沙津入面嘅包仔好鬆脆，菜都新鮮 黑松靈意大利飯配帶子，呢個帶子好好味，香口彈牙，但得兩粒就唔係幾夠喉喇 紐約牛扒，外層脆香，切開時肉汁隨住刀鋒流出嚟，沾少許鹽，好好味，只係露筍老咗啲意大利肉醬寬麵，牡丹雖好，都要綠葉扶持，呢味味道正常，唔會搶咗牛扒或意大利飯鏡得嚟，酸味味咁剛剛好

難得同同學放咗工去食飯，梗係要食埋甜品啦！

我改個標題係「錯過一次，唔可以錯過第二次」，因為之前喺隔離個間紅大門食完，想食甜品，竟然見唔到呢間甜姨姨！今次食到之餘，仲好有驚喜

我點咗芒果三重奏（芒果乾+芒果布丁+芒果肉），布丁呢就無咩特別，令我諗起羅拔臣啫喱嘅味道，芒果肉係好甜，最值得一讚嘅係芒果乾，切得一絲絲咁，容易入口之餘，更加強咗整碗甜品嘅芒果味名符其實三重奏：芒果布丁味較淡、芒果肉係原味、芒果乾則味濃，質地上三者嘅分別大家諗都諗到啦

介紹埋其他同事食咩先...

同事A揀呢個芝麻豆腐西米露，話因為餐牌寫係得獎作品，啖啖黑芝麻味，而且唔同口感，鍾意食芝麻糊嘅朋友千祈唔好錯過同事E鍾意食QQ嘅嘢，揀咗呢個芒果黑珍珠豆腐花，豆腐花好重豆味，唔會太甜，我諗甜姨姨嘅木桶豆腐花應該都係出名嘅，暫時未喺其他地方食過呢個味道同事C就食椰汁芒果紫糯米，我個人嚟講就唔食紫糯米嘅，不過芒果好甜，紫糯米好煙韌，椰汁都好解渴

如果問我係將軍澳寶琳唔駛點排隊等位又好味嘅餐廳，我會推介呢間距離地鐵站5-10分鐘路程嘅西餐呢度除咗野食有水準之餘，仲有幾部飛鏢機玩，我去個陣食滿$100仲有一個代幣去玩夾公仔機食過幾次，我都夾中過一個公仔，同一、兩包薯片

唔係出名嘅餐廳先好食，呢間嘅意大利飯都好正，足料三文魚，配忌廉煮意大利飯，唔油又唔膩，上面幾條火箭菜，點綴之餘亦去除意大利飯喺口入面黏黏嘅感覺一個pizza好唔好味在於個底整得好唔好食，我哋今次揀咗個薄底嘅，就好似脆薄餅乾上面鋪滿咗唔同嘅材料，啖啖肉，又唔會滯好有黑松靈味，扁意粉煮得較挺身，唔"漏"又爽，好味道柚子雞翼，外皮由柚子蜜包住，而且香脆可，唯獨肉唔夠味，可能係醃得唔夠餐廳有個自助餐湯、飯品吧，每人十幾蚊加呢個自助吧，就由你任飲任食，喜歡飲餐湯嘅人就要飲番夠本啦

好多餐廳都係愈食愈不及從前好味，不過呢間吉豚屋就一直保持水準吉列嘅嘢食都係外脆內軟，又保持到肉汁！

聽個名就知呢度主要食炸豬排啦～今次點咗和風汁吉列豬排飯，有兩個size，分別係梅（細）同埋竹（大），我每次都係叫梅，有時仲要少飯添除咗和風汁，仲有個滑蛋豬排飯，飯上面有洋蔥炒滑蛋，而和風汁就係飯上面有一層椰菜，可以落檯面嘅芝麻醬係菜度，容易啲入口，亦調節咗吉列嘅熱氣。如果嫌和風汁唔夠嘅，檯面仲有一樽畀你任落除咗吉列豬，仲可以選擇蝦同雞，而雞嘅飯/餐仲係比其他平一啲，以下就係吉列雞排定食，外層脆卜卜就唔駛再講，啲雞軟軟，亦無雪藏味側邊個啲椰菜絕對唔係伴碟，可以加芝麻醬食，咁呢餐就有肉又有菜啦～另外定食仲有碗豬肉片湯，以薄肉片、紅白蘿蔔，加調味而成，食咗熱氣嘢飲，中和一下！