見OpenRice有咁多好評 就行咗去買外賣 佢個舖位幾細.. 唔係太多位 買咗椰香海南雞髀飯$48 本身見佢個盒細細，都驚唔夠食 一打開一邊就係沙律，另一邊就係雞髀 飯就喺下邊 我鍾意佢個沙律唔會太酸太鹹.. 味道淡淡地啱啱好 而佢個雞可能轉左雞髀啦… 所以啖啖肉亦都好滑又唔會太肥 另外平時出邊個d通常都係油飯.. 而佢就用椰香.. 當堂罪惡感都少啲🤪🤪 同埋個飯食得多都唔會覺得好肥膩 份量都好足夠 呢間海南雞飯我一定會encore❤️❤️

今日外賣左招牌豬扒返屋企食 之前食過筲箕灣間分店覺得幾好味... 所以諗住其他分店都會差唔多 點知返到屋企打開個蓋之後就呆咗 啲豬扒睇落又黑又乾... 好似overcooked 佢仲要好薄，薄到好似牛肉乾咁 個賣相已經極度唔吸引 $52有5片... 正常豬扒嘅一半大細 食落口好鞋... 一d肉汁都冇仲有哽胃嘅感覺 味道係死鹹味，食完要飲好多水 同埋個鹹味仲會留係個口到好耐 覺得一d都唔抵，又好難食...真係好失望 一定一定一定唔會再食呢一間 重要野要講3次

今次去買外賣 去到時都見佢有9成full 門口都有一兩個等緊外賣 2盒飯都等左大約20分鐘先拎到.. 冇諗過佢要咁耐🙈😭 我叫左滑蛋叉燒飯 近排食左幾間唔知點解都係瘦叉 諗住今次應該會唔同掛.. 點知一打開盒飯我白眼都翻埋 呢d係咩叉燒... 黑色嘅大佬 佢唔單止係瘦... 佢係乾... 同埋我已經唔覺得佢係叉燒 因為得都唔識得去形容佢 佢個蛋係比較好食... 不過我衝擊仲係好大 成個飯都冇咩點食 我男友叫左滑多雞扒飯 蛋正常... 塊雞扒... 黑色嘅.... 我男朋友講左句 「唔怪得外賣要等咁耐，佢全部野都overcooked」 一定唔會再有下一次

呢間貓之眼 我幾年前已經開始有幫襯佢 嗰時都未有咁多人食 唔係好洗排隊 不過今年年頭我再去嘅時候 雖然排咗一個鐘隊 不過值得嘅 今次趁平日放假.. 11:30就去左.. 因為唔想再等咁耐 今次食忌廉雞肉加燴牛肉汁蛋包飯 我勁鍾意佢嗰隻蛋呀 日本蛋 勁有蛋香同埋好滑 講吓佢個忌廉雞肉先！ 雞肉好滑，有3舊 佢個汁我覺得有啲偏淡既.. 不過我鍾意佢有d菜可以balance番 另外燴牛肉汁.. 個味好濃.. 可能因為咁所以我覺得忌廉雞個汁係淡 同埋佢有好多牛肉比左我 呢間餐廳都食過幾次 員工亦都好有禮貌 下次再去應該會食個漢堡扒，好似好正咁

星期五晚同個friend諗住搵間pub可以飲嘢catch up 大約7:30嚟到都可以walk in （得返一兩張枱） 餐廳亦都有講低用餐時間個半鐘，冇人等位就可以繼續坐 我哋想飲紅酒，佢哋既staff都有介紹返 最後開左1枝酒同叫左2樣野食 第一樣係炸豆腐 $88 呢樣係見到隔離枱有叫，好似好吸引我哋就order埋 佢份量都好多，賣相亦都好靚 炸得好香口.. 完全冇油膩感 第二樣係豬手 $278 上枱嘅時候，個staff有問我地洗唔洗幫手切埋 佢有薯條同酸洋蔥做配菜 薯條正常，不過個洋蔥太酸啦真係 另外豬手好實在， 啲肉大大嚿 食落好有滿足感，啱晒我哋食肉獸 好鍾意餐廳入邊嘅氣氛 成件事好chill... 最後我哋坐咗三個幾鐘

星期六下午同朋友去黃大仙廟 去之前緊係要醫肚啦 本來想去另一間食堂，但係太多人等位 行前d就去到呢間食炸雞，又唔洗等位.. 即入 我哋入去嗰陣時佢都差唔多滿座 所以我地坐左門口隔離個位 不過坐嗰度唔好就係... 個位係喺排隊嘅人隔離... 得半身間隔隔開我地... 所以萬一排隊嘅人冇戴口罩而佢又咳嘅話... 我哋嗰個位係會食晒既🙈 不過當時好彩又冇乜人排隊，所以ok啦 我就叫咗個滑蛋炸雞丼 佢一拎上嚟我已經覺得個份量好足啦 有四件好大嘅炸雞，再加埋啲蛋不得了呀！ 佢嘅炸雞入邊係好滑，出邊係keep到脆 唔會好似出邊有滑蛋豬扒飯，未食個皮已經淋曬 佢價錢又平喎 $49 食完之後我真係覺得好滿足呀❤️ 不過如果再多啲蛋就好啦

星期五同朋友食生日飯 晏晝就去咗呢一間食lunch 之前見朋友食過，見賣相吸引 嗰日我12點已經去到，唔駛等 喺門口有部機，落咗order先入座 我就叫咗和牛丼，完全比佢個蛋黃吸引咗 佢成間鋪都係吧枱，你就可以睇住廚房點樣整你個飯 佢整完攞過嚟嗰時，會再擺個甫士俾你影相好搞笑 佢面頭嗰隻蛋黃勁大勁吸引 和牛食落有入口即溶嘅感覺 佢個飯其實幾細個，男仔應該唔夠食 我落order嗰陣唔見話可以加飯etc.. 份量冇得set 如果你叫麵食的話，佢就有得俾你追加唔同item 不過今次食飯感覺幾好，只係佢背景音樂有啲大聲.. 同朋友傾偈要有啲大聲😂 下次會再黎試埋個面

平日夜晚做完運動喺天后區搵食 行咗幾間都冇咩心水，咁不如食camper啦！ 耐唔耐都食..鰂魚涌同天后分店都有食過 夜晚大約8:30，唔使等位 平時都係食佢個慢煮豬軟骨，今次一於試吓其他 我就叫咗個 生薑燒汁牛肋胡麻湯烏冬$69 食落個烏冬好滑👍🏻個湯底味道唔係太重個隻 牛肉份量都多.. 不過有d唔夠入味 另外我男朋友叫咗個親子丼$69 因為佢係定食，所以有跟湯 男朋友話份量都幾大，佢啲飯都食唔晒 佢激讚個雞呀好滑好入味.. 我試左一件.. 都真係幾好味 下次再嚟我會試返佢個豬軟骨啊

今個星期終於返去office, 仲約左2個朋友一齊食lunch 見呢間餐廳平日行過都已經想試.. 個裝修幾得意... 不過次次都要等位就冇去到 今次lunch time特登12:00去到，立即有枱餐廳都已經好快滿座 心思思想食炸嘢，所以就試咗佢個招牌鹽酥雞大碗飯同埋仲見佢有個讚字喺隔離，咁應該好好食既心諗 呢款飯要$82，佢一上到黎我已經覺得好乾.. 可能因為平時我鍾意食啲多啲汁嘅飯啊 佢啲雞係炸得幾香口嘅同埋都多肉汁 另外我哋每人都加咗$20飲杯珍珠奶茶 我叫左半糖 咁諗住珍珠奶茶其實都好難唔好飲 但係佢又真係可以唔好飲喎 佢茶味好勁，珍珠幾好食嘅.. 但係我叫半糖，係可以一啲甜味都冇 我哋三個女仔冇人飲得晒杯野 最後埋單大約$110每人... 我應該唔會再返嚟呢間㗎啦...試咗一次就算

呢期去唔到台灣唯有食返d台灣野黎止下癮 呢間餐廳喺炮台山地鐵站附近 我哋平日1:30去到...舖頭入邊都有幾台客 好彩唔使等位 首先係男朋友叫嘅滷肉飯 不過雖然叫咗大碗，不過我男朋友食完都係得五成飽 但係佢話味道係OK嘅 另外我叫嘅紅燒牛肉麵 我食完之後都有7分飽 個湯好味， 牛肉就正常普通一片片咁樣 反而我最鍾意食佢啲蘿蔔因為入晒味 最後每人大約$50 平日食飯出邊都係差唔多呢個價 下次會再試下其他野 另外加咗杯茉香奶茶3分糖 冇咩特別