小成子心心念念無數次，終於再次黎到。因為老去每次必定要留電話排隊，所以我們永遠去完食個輕食就時間岩岩好有位，否則齋等就餓暈都似，但一食左野就一定唔能夠鹹甜都食，個肚唔夠裝。 店舖門面以木系和玻璃為主，增加古典味，亦令空間感上升～ 燒孜然牛肉刈包配藜麥柚子醋沙律～首嚐鹹食，有驚喜！一碟兩件，餡料頗多，孜然味好香，離遠就聞到，而且味道惹味。刈包有奶香味，而且質感鬆軟～ 茉莉綠茶拿鐵～omg!上次飲重焙烏龍茶拿鐵已經一試難忘，今次試下另一款，更勝烏龍茶～茉莉香味好出，而且由頭帶到尾，飲到最底仍夠茉莉香味～三種元素好夾，好平衡，令人好想續杯！ 蜜香紅茶～蜜味香純，淡淡的甜味漫延於口腔內，挺適合女仔飲。叫左呢壼茶，感覺自己都文青左，甚具古典美～ 店內陳設以木系為主，真的好像回到從前的古典大宅一樣，雖然舖頭細細，但勝上樓底夠高，令人不會感到壓迫～再加上店內不斷播放一首又一首的老歌，令人不禁跟住低聲吟唱～環境的佈置和選曲更令時光彷彿回到從前，凝固於老香港的感覺～

4年前小彤子為我慶生已經黎過一次，今日到我和為小彤子慶生再次造訪，場地大變身，餐廳用近似Tiffany blue的顏色和整體裝修風格更添高雅感，而且一大面牆壁畫了貓貓壁畫，鍾意貓的小彤子一見到更雙眼發光～ 菜式配搭有諗頭，有d打卡必備、有d配搭好特別、有d則特製醬汁大大提升了菜式對味蕾的衝擊……再加上食材樣樣都好新鮮，物超所值！！！ 海膽魚子醬多士～完全無得輸，多士夠曬脆，而海膽和魚子醬好creamy多到滿瀉，眼球和味蕾都滿足到一個點～ 新鮮生蠔~今日有兩個品種，各有特色，都大大隻好有睇頭，一款creamy d，另一款則海水味重～ 油封法國鵪鶉脾及栗子～鵪鶉脾煙燻味好重好香，而且肉質好鮮嫩多汁，特別要讚個醬汁，蜜甜帶少少酸好開胃～ 北海道帆立貝刺身及温泉蛋～篤爛左温泉蛋，令蛋黄汁和帆立貝完全融合，再加上Lime Sorbet，撈埋個口感和味蕾實在好有驚喜～Lime Sorbet的酸酸甜甜帶出帆立貝味道鮮味，好夾而且清新到爆，一啖接一啖完全停唔到口～ 托斯卡尼鮮肉蕃茄濃湯＆松露牛肝箘湯～兩個湯都好味，真是鹹魚青菜各有所好。一個鮮味醒胃feel，特別一提個魚好滑；一個菇菌愛好者不能自拔，菇箘味濃松露味香～ 北海道牛乳慢煮白鱈魚柳～我本身並非特別鍾情於魚，但牛奶煮魚好好味，魚肉在肉類黎講輕d，配合牛奶的creamy好特別。魚肉質地實淨但唔嚡，有咬口，加上蜆好鮮味，畫龍點晴～ 龍蝦意大利麵～龍蝦大隻有蝦膏，表面再燒一燒過，好香！再配上蕃茄意大利麵，都真是無得輸的配搭～ LOVE SONG及FONDNESS～兩杯飲品都清新好飲，岩曬女仔易入口好打卡，青蘋果清新，無花果特別～ 甜品拼盤～大大細細猶如九大恒星一樣令人目不暇及，綠茶、朱古力、藍莓、芒果、玄米茶、檸檬、士多啤梨、芝麻、椰子……食到停唔到口～影相打卡又好，吃落肚又好，都真是完全無得輸和令人念念不忘～

不是第一次到稻埕食下午茶，好多地方星期六日會無下午茶，免蝕本，但稻埕即使星期六日仍然有幾抵食的tea set，抵讚～ 入camp前難得天光住就收工，梗係獨自去偷歡，享受寧靜一刻，眾樂樂不如獨樂樂，偷偷chill一chill～ 店舖裝修以深木色為主，店內枱與枱之閒的空間充足，坐到卡位就當然舒服不過，但中間的枱都唔會太迫或太近。半開放式的設計令空間延伸至商場，店舖近商場的出口人流量唔算超多，所以即使坐近商場都唔會感覺好人來人往或者好多人望住。 一個人食得唔多野，因為tea set都選擇豐富的，鹹又有甜又有，任君選擇～個人對滷肉飯真是無抵抗力，去到邊都好想食，明明我未嘟QR code前係想食甜品嫁～ 鹽酥雞排滷肉飯set～一次過滿足曬兩個願望！鹽酥雞炸得ok，唔會好油，而且味道無得輸～滷肉入味和偏肥，但唔會令人覺得油膩，而是有油香味，滷肉和汁都多，，一啖接一啖食唔停手，一碗飯唔覺意就食曬。糖心蛋又係無得輸，好味的，d汁我習慣倒埋落飯～ 茉莉龍珠綠茶(set飲唔洗加錢的)～茉莉味香味四溢且持久，但可能我第一壺浸太耐先斟（我食曬成個set先開始嘆茶），所以第一轉偏苦和澀，但是第二轉味道就平衡番，無左苦澀味。 黑麻油雞翅～自己屎忽鬼，無啦啦想食，但其實唔加都夠曬食，性價比不高。雞翅肉厚的，但黑麻油味可再加強～ 總括而言，休閒食tea絕對抵～

大圍小店日新月，行經見有一台式小店新開，不禁好奇一試，探探龍與鳳～店面裝修別緻，具特色，感覺頗用心～ 豆乳雞～ 紙本meun上無的，但QR code落單頁面有，可能是新研發小食？！講明是有骨的炸雞，小成子眼大睇過龍，睇錯左無骨的。炸雞炸得不俗，外脆但肉質不乾。性價比來說，份量ok，唔會特別少份量。唯豆乳味無特別發揮，亦不多覺有，所以不如食回鹽酥雞，惹味又無骨～ 招牌滷肉飯～ 台式食品每次必點滷肉飯，雖然看似簡單，但滷肉飯的優劣使小甜甜我直接判斷會否回頭。滷肉飯的汁足夠，但卻香味不足，肥豬肉切粒，但卻油香味不足，無讓人一試難忘之感。飯中有一頭髮，唯有挑左出黎，當見唔到，繼續食。 家傳肉燥乾拌麵～ 因為和滷肉飯的汁和肉燥是一樣的，所以汁和滷肉一樣有香味不足的問題，但肉汁夠的，所以不會食到一半便變成了難以入口的乾麵。刀削麵的質地和咬口值得一讚～ 自疫情起已無去旅行幾年，睇見此圖有感彷如隔世。小甜甜真是好想快d衝出香港，過台灣尋找台灣原味道～相信不遠矣～hope so～

旺角小店多如繁星，每次揀都揀到頭爆咁滯，真是想玩點指兵兵算～ 今次因為最終目的地在太子，所以想住近近地揀旺角火車站近太子的舖頭，小琪子話費事行到花墟個邊咁遠～ 舖頭細細，裝修唔算好有特色，不過都光鮮明亮的～ 唐揚炸雞楓糖漿班㦸～ 小琪子就係睇中左佢，所以下定決心揀呢間的，不得不試舖頭的signature。未食之前勁好奇炸雞係鹹的，楓糖和班㦸係甜的，點撈得埋呢？點知又真是can try wo，炸雞外脆內嫩，雞肉的肉汁有被鎖住，仲保留到幾juicy。個班㦸都鬆軟，但唔係食空氣個種，蛋香味都幾重，口感實在的。上面的温泉蛋畫龍點睛，I like it！蛋黄汁液順住d雞的表皮覆蓋住d雞的脆皮，好味，正呀~ 蟹黃芝士通心粉～ 芝士通心粉本身就係my favourite ，因為唔多地方有，都算係傳統懷舊野，所以只要有係meun，我都會好想叫黎食。作為唔係主菜，而是當小食happy share佢用料好足，本身通粉咁整法都飽和易滯，所以份量夠晒。今次揀左有蟹黄的version，但其實效果一般盤，蟹黄的鹹香太搶，下次有機會的話會試下另一隻味～ 蜜糖味的Fry雞翼我鍾意食～ 喜出望外的雞翼山，首先份量唔少，而且落蜜糖唔留手，炸雞翼和唐揚炸雞一樣，入面肉質嫩滑juicy~ 蕃薯條～ 另一樣happy share的小食，粉量十足，大大dull滿到瀉咁滯。甜甜地，可以唔好咁普通食薯條未嘗唔係好事。

餐廳裝修走歐洲宮廷風，舖頭雖小，但已有置身法國凱旋門的感覺，做一日法國女仔，享受一趟偽Emily in Paris之旅～

招牌威靈頓羊架～
果然係招牌，威靈頓牛就見得多，威靈頓羊真是第一次見。羊味出眾，肉質嫩滑～落足所有料，無偷雞，菇菌和ham齊曬，好重要嫁！因為咁先有甘香和釣番個肉的鮮味出黎。另外個酥皮都好鬆，配菜都值得欣賞～




香蒜鮮大蜆扁意粉～
香蒜味濃，大蜆鮮味肉甜，扁意粉易掛汁，椒絲釣味出色～


牛油香煎蟹餅～
牛油味香，蟹餅外脆內軟，啖啖蟹肉鮮甜，薯蓉畫龍點睛，正中本小姐下懷，我實在太鍾意薯蓉，so creamy~


法式班㦸：焦糖香蕉榛子朱古力味～
法式浪漫少不了法式甜品作結，焦糖香蕉上脆下軟，加上雪糕點綴，冰火交融，打開女仔裝甜品的另一個胃～


呢間餐廳點少得提到環境呀，食食物也食環境，餐廳內內外外任何一個角落都是打卡位，鍾意影相的sis岩曬呀～我呢d唔擅長影相的都可以打卡打成咁，相信大家的技術只會令效果更佳～

環境雖小，五臟俱全，最岩女仔打卡，代替月亮懲罰你，呢個月亮裝飾打卡一流，兒時回憶美少女轉身變已變成戰士，正爆呀～ Starter~煙三文魚他他配牛油果藜麥沙律 個頭盤好豐富，成個配搭令沙律高級左好多，個口感幾得意，三文魚肉淋身的，但藜麥就有咬口的，加埋牛油果又fresh～ 封煎北海道帶子，蟹肉蟹籽，明太子忌廉扁意粉～ 齋睇名已經覺得個意粉夠曬多料，一上到枱，果然名不虛傳，睇樣已經夠晒豐富，多到滿瀉的感覺呀～ 軟殼蟹明太子蟹肉蟹籽牛角包高窩夫配洋蔥圈～ 雖然同意粉一樣，但軟殼蟹的吸引力實在太大，每次見到就好像磁石咁，吸咗埋去！好正呀洋蔥圈套得不讚，比薯條正好多。軟殼蟹外脆內軟唔會好柴，蟹蟹蟹夾在中間好好味，個牛角窩夫都算創新野，唔係度度有，下次再叫其他味一試～ 總結，食個lunch，環境、食物、氣氛、人流都贏晒，都無得唔bookmark再黎～晚餐個meun 5 courses都幾吸引，下次應該夜晚再黎幫襯，試一試d肉類大盤～

大圍小店多如尖沙咀廣東道名店，能夠長期人氣高企，keep住有人龍，質素一定有番咁上下～ 小霆子揸車，唔洗由大圍站行過去咁遠，點知紅色暴雨下仍然要排隊等位，只是無左平常週末的成大堆人，變左細堆人～ 盒子吐司 E For Egg名物 金沙軟殼蟹三文魚籽海鮮沙律盒子吐司～呢個組合真是點計都無得輸，sure win，連一向高傲的小霆子都話好食！軟殼蟹鬆脆，唔會乾曬，入面都juicy，有沙律的少少酸味，令個吐司好醒胃，食極都唔會覺得膩和濟～ 特色飲品出色有創意 開心果特調～個人對開心果味特別偏好，之前小成子整開心果甜品，食到我停唔到口，所以今次一見到cafe唔常見的開心果口味，點會唔叫呢？！開心果配豆腐，都幾特別，豆腐味都好出，開心果香味可再濃多少少。飲品稍為杰身，不過I love it~ 竹炭黑芝麻鮮奶～芝麻味無咁甜，男士首選，杯飲品一上黎好有中國水墨畫feel，小霆子表示幾解渴～ 其他食品可以不試 黑椒十勝牛肉定食配温泉蛋～其實預左主食非佢強項，不過小霆子係男士，總要頂一頂肚啦！其實呢個基本組合都唔會差得去邊，樣樣食材都無乜特別，味都無特別。 日韓炸雞拼盤～日式炸法ok juicy，韓式造法恕我地唔夠受得辣，我地三個都食左一舊就放棄。

小琪子book左自己和朋友成日幫襯的b.o.t.h同我慶祝生日～ 近窗邊是兩層高的大大大玻璃，雖然係夜晚，但感覺都係特別舒服，唔像困左係商場，相信日頭有自然光就更正斗，下次即管黎食tea，嘆下日光浴先～ 香脆軟殼蟹牛油果芝士牛肉漢堡～揀burger真是揀到選擇困難，呢個又想食、那個又唔錯、呢種都少有wo......最後軟殼蟹成功突圍，始終軟殼蟹真是無得輸，軟殼蟹萬歲！burger上枱好靚仔呀！芝士半融，有番咁上下厚，粗薯條吸引簡直畫龍點睛～ 香菇墨西哥雙重芝士薄餅～近期對墨西哥薄餅有莫名的偏愛，唔好問點解，總知見到就好想食。芝士味香，菇味濃，I like it~ 熔岩提拉米蘇疏乎厘斑㦸～小琪子特別推介呢度的疏乎厘，點可以唔試真d。兩塊厚厚的疏乎厘，空氣感都夠的，唔會死實實，蛋香味和咖啡酒味可再重d，不過宜家咁食都滿足的～ Garfield~Milkshake吸引人，夏日就是要爽一爽！earl grey味的milkshake真是第一次見，都幾特別呀～厚厚的cream雖然明知好肥，但就係忍唔住飲曬落肚～

遲來的慶生飯聚，小欣子揀左二次造訪的Owens，既然是小欣子翻兜的小店，相信都有番咁上下～ 環境白色系為主，枱和枱之間密左少少，不過夠光猛，都舒服的～ 人氣cafe有時會因為人流過多而服務麻麻，呢度無呢個問題，服務態度好好，叫甜品時用囗型remind寫碟，店員完全了然於心～ 薯條三兄弟～粗薯條一向是我至愛，份量都幾多，再加上三種唔同的醬汁，芥末醬我特別鍾意，my favourite~ 法式牛肝箘軟殼蟹意大利飯～呢個組合又係無得輸的，軟殼蟹好味就一定，牛肝箘味可再增加就更佳。呢度的意大利飯是燴得比較乾身，我個人喜好濕一d、creamy一d，不過純屬個人喜好only~ 美國安格斯肉眼牛扒～五成熟上枱剛好，牛味ok，份量都大件。有黄芥末和燒汁，個人比較鍾意黄芥末，令牛味有所增強～ Triamisu和法式焦糖燉蛋～其實好想試homemade cake，有好多款選擇，不過傳統甜品又耐無食，所以按捺不住叫左。Triamisu夠滑，但若酒味和咖啡味可更濃便更佳。法式焦糖燉蛋外脆內軟，如蛋香味更濃和軟身少少則更佳。