見到ig有人寫食評，評分幾好，就book咗位試吓，openrice book位可以有7折。 規定每人一定要叫一杯野飲，但野飲唔計7折，本身飲品唔平（一個椰青60蚊），所以就算有7折，最後埋單都算貴，3個人700百左右。 點解我會覺得貴呢，係因為我覺得好唔值。 先唔講野食，講環境。 卡座嘅凳全部都好似發哂霉咁，一睇就唔乾淨。 轉位之後更衰，天花板直接甩灰，凳，袋，枱全部都有灰。 一開始以為得一個位有，結果喺直接影響到食物。 仲要食食下飯，突然一啲批蕩掉咗落隔離枱地下。 再講服務。 基本上0，全部人都喺長期扮睇你唔到，以為佢哋真喺好忙，長期行嚟行去，但就只喺行嚟行去。 埋單仲好笑，佢話係個位埋單，咁我哋就問佢會唔會有apple pay，佢就話拎部機過嚟，結果就等咗15分鐘。最後我地選擇咗行出去俾錢，點知就有一個waiter喺正我地面前無視我哋，直接問同事 佢哋出嚟做咩。 企得喺收銀機前面唔喺想買單，仲可以做咩？😀 拋開所有嘢唔講，只講野食，食物勉強合格，但個價錢唔值。 ▫️風味炸薯條配黑松露醬，泰式甜辣醬 薯條份量多，但唔喺脆😂 有啲似放耐咗個種 ▫️泰式豬頸肉 糯米飯配泰北酸辣汁 正常。 ▫️蛋漿黃咖喱酥炸軟殻蟹配香酥餅 軟殻蟹腥到不得了，食左一啖冇再食過。 連好唔怕腥嘅朋友都話覺得腥，所以你可以想像下。 香酥餅，油，硬 唔鬆脆，無牛油香又無麵粉香。 所以呢碟剩咗9成。 ▫️冬蔭功煙三文魚溫泉蛋貓耳朵 完全冇冬蔭功味，溫泉蛋都唔係平時嘅溫泉蛋，佢係實蛋嚟😂 貓耳朵正常，個質感我幾鐘意。 ▫️雙色芒果糯米飯 最正常，但亦只喺正常。

▫️Ngor Hiang $78 其實因為佢似我嫲嫲整嘅一款菜，所以叫咗嚟試 腐皮包豬肉餡再拎去炸，香口得嚟唔太油，好食 ▫️Nonya Laska $102 都幾正宗 椰秒味出，唔會得個辣字 配料大方😂 麵質剛好 ▫️Cendol $58 其實就喺黑糖冰😂 黑糖冰配椰果 紅豆 同埋面頭少少斑斕啫喱

其實佢地啲野食ok，叫外賣又快，份量又多，價錢都可以接受。 但服務態度真係唔得，好似唔優做咁，完全毁哂所有野。當你個人企正喺門口，啲員工見到你，仲係正你面前經過，都唔問下你幾多位/有咩幫到你，就由得你企。 如果自己唔主動捉個人問，應該企到下世都冇人理你。個下我已經決定左唔會有下一次。 落單個時，個個人態度又差，真係唔多想做咁。你問佢野，態度又好衰咁答返你。既然你地咁唔想做生意，咁你地就成功少左個客了😀 有時態度真係大於一切

💚Avobar💚 牛油果控必到。 呢到喺牛油果控嘅天堂，所有野都有牛油果成份，真喺都喺啖啖牛油果🥑 ▫️Avobar Cobb Salad $148 因為去之前食得好飽，所以清清地食個沙律就算。 牛油果以玫瑰形狀放喺正中間，拎嚟打卡就啱哂。 就好正常嘅一個沙律，真喺冇乜特別😉 ▫️Matcha Pancakes Sweet Banana $118 不過不失，唔喺好食，但又唔難食。但個pancakes 喺完全冇抹茶味，連唔食抹茶嘅朋友都完全冇問題，食得好開心😂😂Pancake質地偏硬。 香蕉就喺眼見到個幾舊，而唔喺mix埋一齊，所以正正常堂。 好處喺，糖喺自己落，所以幾甜就自己話事。 總括而言，都唔喺好值得去😉

🔸GARLIC FRIES + TOMATO CHUTNEY$68 一如既往的正。每次必叫。 🔸 RED VELVET PARFAIT PANCAKE $158 Pancake一定喺首選，食過幾次都覺得好正。 但今次真喺失準，直情喺唔好食。成舊好似未熟咁，搞唔掂。 🔸 TIGER PRAWN FENNEL RISOTTO $220 本人鐘意食ristto，所以呢個唔錯。蕃茄味剛好，唔好太多，又唔膩。 🔸 CATCH OF THE DAY $288 魚幾嫩滑，唔腥。薯蓉好creamy，幾香黑松露味。好食。 🔸 14 SOUTH MARY $60 推薦俾鐘意試新特別野嘅人，好值得一試。

🆗▫️蜜汁脆鱔 前菜小食。炸得好香脆，外皮帶少少甜味，不過醋味偏濃，但小編幾鐘意。 ▫️手切蒜泥白肉 正常。個底墊咗啲粉皮，不過都入味。 ▫️萵筍絲 正常。 ▫️紅燒年糕炆黃魚 一放低喺撲鼻而嚟嘅腥味。不過奇怪嘅喺入口唔腥，還可接受。 味道還好，肉質都ok，唔嫩唔散。年糕都多，唔會太‘林’。值得一提喺個蒜頭，好好食。 🆗▫️脆煎灌湯小籠包（五件） 好熱，食個時真喺要小心啲汁。呢個做法幾特別，個底幾脆，有啲似生煎包。 如果同金牌小籠包比，我鐘意金牌小籠包多啲，傳統好食啲🙈 ▫️銀絲卷（蒸） 正，冇特別。不過外皮偏硬。會選擇留返quota 食其他。 ▫️手工白菜水餃 （八件） 正常。不過皮薄，餡多。 ▫️大上海牛肉餅 （三件） 可以唔洗叫。 唔太好食，油，乾，但入面肉質juicy。 ▫️菜肉餛飩拉麵 正常。麵質有咬口，幾入味。餛飩冇特別。 ▫️上海擔擔麵 個人覺得上海婆婆好似仲好食。 💯▫️原桶黑豆腐花 幾特別，香黑豆味，幾滑。而且份量多。 ▫️脆炸蘋果肉桂卷（三件） 唔洗叫，唔好食。 同牛肉餅一樣，油。蘋果少，冇肉桂味，而且喺脆硬。 P.s. 我喺幫襯過幾次，然後一次過寫😂😂

💯▫️松鼠桂魚 好好食。 酸酸甜甜，夠脆。考功夫嘅餸菜？🤔 ▫️蓮香蜜餞火方（四件） 唔知喺米招牌都呢，見枱枱都會嗌，所以唔執輸都叫嚟試吓🤣 但喺我就覺得麻麻地，偏乾身，再加上佢有金華火腿做餡，都偏咸。 不過佢有用咗脆片嚟做中和，同時增加口感。 🆗▫️金牌小籠包（六件） 正常。多汁。 💯▫️蘿蔔絲酥（三件） 好食。 佢真喺有酥嘅感覺，而且唔油膩，但鬆脆。 ▫️蜂巢鍋貼 唔洗叫，噱頭野。食返正常鍋貼比較好。 ▫️炸醬拉麵 麻麻地 🆗▫️高力頭沙香蕉（四件） 正常，入面幾滑，而且真係一舊香蕉喺到 P.s. 第一次幫襯個時，佢前菜喺傳統北京個時，有花生豆腐個種。但再去已經變左cheap肉鬆同木耳。

▫️香辣乾炒海鮮河粉 $88 味道好咸，咸多過辣。配料嘅海鮮都幾腥，不過多種類。 ▫️大城招牌船麵 $98 呢個喺佢哋嘅招牌，但喺真心不了。味道怪怪地，麵質偏‘林’。 但配料幾多，但唔好食。而且好咸。 ▫️青檸汁燒豬頸 $78 最正常。不過肉質睇得出唔太靚同埋偏硬。 總括嚟講，呢間餐廳喺街坊餐廳嘅質素，但絕對唔喺街坊價。 P.s. 上菜速度快，但員工態度好差，而且衛生幾差，上菜個時啲員工手指插哂落啲餸到（重點基本上個個jei哂甲），同埋所有餸都喺凍。

之前食過一次外賣，個次啲野麻麻地，尤其喺咖央多士，但有人留言叫我堂食一次，好食好多，我終於肯去堂食😂。 ▫️ 新加坡喇沙摻摻 $82 正常。不過味精味偏重。份量ok。 ▫️地道老鼠粉 $88 偏咸，麵質都幾‘林’，唔好食。 ▫️海南雞飯拼喇沙米線 $108 呢個最抵，兩樣都食到。 喇沙一樣都喺正常。海南雞幾嫩，油飯ok。 ▫️ 烤馬來蔥餅配咖喱 $56 呢個不得了，個蔥餅硬到根本無辦法咬開，更加唔好妄想話吞。 不過同餐廳話返之後，佢哋都幾好，話可以換/cancel order。 ▫️班蘭咖央多士 $28 現場食都唔好食😂 麵包‘林’同凍。味道冇特別。

▫️香蒜鮮蕃茄醬汁燴德國豬肉腸意大利粉 配是日餐湯+日式芝麻醬雜菜沙律 +"Artisan Sourdough" $98 先講湯同沙律，份量同味道正常，就喺普通嘅忌廉湯同沙律芝麻醬。 麵包鬆軟，不過唔酸，面頭仲幫你搽埋牛油（冇得揀）。 到個意大利粉，不得了。 冇蒜味，甚至一粒蒜都睇唔到。汁多到不得了，每一條都掛滿汁，鐘意食醬嘅人啱哂。 醬就類似平時食嘅蕃茄汁。普通豬肉腸，但意粉偏‘林’，冇乜咬口。另外明明menu冇寫有茹，但啲茹仲多過啲腸😂 野飲揀咗熱低糖綠茶，正常，但佢糖漿喺沉哂底。 ▫️日式叉燒拉麵 $68 賣相幾好，湯底都幾好味。拉麵正常，唔‘林’，不過份量幾細。呢個可以叫嘅🤔 P.s. 佢都幾趕，當你放低餐具個刻，就已經走埋嚟問可唔可以收。但佢又未到趕你，可能因為位置幾多。 不過佢價錢都幾貴，性價比底，所以都唔會再幫襯。