今日中午開完會同兩個同事食午飯，雖然銅鑼灣成日去但係一講到中午食飯就真係無咩頭緒，還好另外兩個同事平時都食開，最後介紹左間快、靚、正既餐廳。餐廳由會展站行去十分鐘唔駛，佢算係新派嘅港式茶餐廳，門面光猛、入面環境都幾舒服。由於晏晝時間座無虛席，我地三個都爭取時間睇下有咩嘢好食，鋪頭不論喺牆身定係枱面都貼滿餐牌，食物選擇多不勝數   ，不過我哋呢啲鍾情港式口味既，每人一個飯餐就算。等咗大約15分鐘，食物終於都陸續上枱啦~~~ 每一樣食物都出晒煙，應該都係即叫即做。首先介紹我嘅咖哩吉列豬扒飯，佢有兩塊吉列豬扒每塊份量好大，豬扒外脆而肉嫩，但我覺得主角反而係馬拉咖哩汁，香濃咖哩同香葉味非常惹味。女同事嘅焗鮮茄牛脷飯，佢一上枱已經俾佢個賣相吸引，個份量相當大而且鋪喺上面嘅芝士、茄汁都非常多，我都忍唔住試咗啖。佢個飯係炒飯底粒粒分明，再配合個汁每啖都好豐富，試埋佢個牛脷，估唔到口感好似牛脷芯咁好嫩好淋。另外男同事個沙爹牛肉炒河好正而份量好大碟，佢個沙爹牛肉好多，牛肉嫩滑有牛味好有質感，而沙嗲汁亦好香濃。河粉底雖然無撈埋嚟炒，但係簡單撈一下所有河粉掛晒汁，一啖河粉一啖牛肉真係差的食晒...... 食到咁上下就上埋個餐茶，我一如既往凍檸茶，凍檸茶就無咩特別都係用新鮮檸檬，入口都好夠凍好解渴。女同事就正常熱咖啡，不過比較特別嘅就係男同事既西班牙咖啡，個款成杯黑牛咁，有咖啡冰再加埋啲忌廉見到都好特別，下次有機會我都試下。飲緊嘢之際見到隔離枱食緊菠蘿油，見到都心思思想食，最後忍唔住要咗份鮮油多，一上枱賣相吸引而且好夠熱，打開入面見到有兩大塊厚牛油，我同個男同事每人一件，一咬就感受到冰火口感，值得一試。 成餐飯好滿足，最後埋單每人都係$80蚊左右，晏晝呢啲時間喺銅鑼灣食飯性價比都算高。總結一下：地方好夠大而且坐得舒服，人多但舒適；服務方面始終人流多等候時間稍長，不過整體上可以接受。離開時見到餐廳門口仲有麵包賣  ，最後買咗一打蛋撻返去同其他同事分享下~~~

坊間好多報章、雜誌間中都會介紹香港、九龍同新界受歡迎嘅雞髀，而對於經常飲飲食食嘅我當然亦都有幾間心水啦，但反而香港區選擇唔係好多，不過今日俾我試到一間性價比極高嘅高質雞髀皇。由於新一年公司都開始忙，所以今日搞咗一輪先有時間食個下午茶，正當煩惱緊食咩好既時候，有個男同事介紹一間喺蘭芳道嘅快餐店好好食，對於咁嘴刁嘅我嚟講真係要試過先知...
去到見到門面同普通茶餐廳分別不大，門外有賣麵包嘅櫃檯，咁我哋兩個就當然堂食啦。
入到去見個裝修都好乾淨衛生，地方雖然唔算好大但環境一流，見到佢嘅餐牌款式同埋價錢都比較大眾化同一般茶餐廳差不多。      不過入嚟嗰陣時見到差不多每枱入面都有人食緊雞髀，估計呢度既雞髀應該真係招牌，既然係咁我嗌左個芝士黑松露炸雞髀配薯條加杯凍檸茶，而男同事就要咗個常餐（瑞士汁雞髀撈公仔麵、火腿嫩滑炒蛋、菠蘿包） 同杯凍檸茶。
由於係即叫即做，所以大約等咗十分鐘到啲食物都陸續上枱啦~ 首先係同事個常餐見到我都已經心動，因為佢呢個瑞士汁雞髀好大隻，而且加上瑞士汁撈公仔麵，淨係呢一個賣相都已經好吸引，佢個炒蛋都好金黃同埋最緊要有好少茶餐廳會俾菠蘿包，所以我都叫佢俾我食少少。誰不知真係好介紹，佢呢個瑞士汁雞髀有好濃香瑞士汁而且勁入味又有肉汁，再加埋一啖麵一啖肉咁樣食成件事非常夾啊。佢份炒蛋炒得好嫩滑好Creamy，加上佢呢一個菠蘿包都係自家製嘅，成個餐真係超值。等多五分鐘我嘅芝士黑松露炸雞髀配薯條都上枱啦~ 就咁睇佢嘅份量真係食完都唔駛食晚飯，佢個雞髀係用麵包糠炸嘅，所以賣相同大埔嗰款都差不多而上面鋪上芝士同埋黑松露，上餐時已經聞到好香，終於到我開餐啦~ 首先切開雞髀見到佢嘅外皮非常之脆而且非常多肉汁，入口時好夠熱加上黑松露同芝士嘅香味衝擊成個口腔，估唔到香港區都可以搵到咁出色嘅炸雞髀，淨係食呢一個雞髀我都覺得已經值回票價，再試埋佢嘅薯條先。佢嘅薯條係粗皮薯條，由於係即叫即炸所以好香脆而且仲好有薯味，食咁熱辣辣又惹味嘅嘢，一定要配杯凍檸茶先得，凍檸茶甜到適中，檸檬新鮮份量都好夠大，整體上都好滿足。
喺銅鑼灣咁旺嘅地段都有啲性價比咁高嘅茶餐廳真係冇得彈，用餐呢段時間人流都絡繹不絕，食得咁豐富又飽埋單每人$60蚊都唔駛，簡直係平~ 靚~ 正~ 出門口時都開始見到有人龍，最後我地係麵包櫃都買咗幾個包聽日當早餐  ，呢間質素完全可以媲美坊間嘅雞髀皇，必試!!!

又到咗Weekday最後一日，今晚收咗工約咗班朋友喺太古坊飲酒，話時話疫情後都好少有呢啲活動，呢排天氣涼左而氣氛又好，所以朋友都選擇比較清靜嘅地方飲下嘢傾下偈，太古坊算係好適合既地方。
由於我同另一個朋友都比較早收工，所以就約埋一齊搵個地方食少少嘢先，雖然太古坊平時都比較少去，不過由鰂魚涌站行五分鐘就到，估唔到大型商業區都有旺中帶靜既環境，旁邊仲見到有啲住宅區而兩旁都有好多小店，趁未夠鐘搵的野食打個底先至再去飲嘢。
行咗一陣之後見到街頭有間食蛋包飯既小店叫蛋爺，門面都幾乾淨而且從餐牌見到食物嘅賣相好似幾吸引又有得堂食，所以最後決定喺呢度食個飯。好彩呢個時間好多人未放工唔算好多人，咁我哋搵個靚位就睇下有啲咩嘢好食先，餐牌大部份以蛋包飯為主，但都仲有其他食品，例如蕃茄湯烏冬或撈公仔麵等等都好似幾吸引，不過最後兩個都揀咗蛋包飯，可能大家都鍾意食蛋啦。我叫咗個日式叉燒蛋包飯，而朋友就要咗個秘製雞扒蛋包飯，等咗大約十分鐘所有食物都已經上晒枱啦~ 兩個飯都係即叫即整非常夠熱，而且見佢哋煮緊嘅過程中整份蛋都好用心，小店就係有呢份心思。從賣相上睇兩碗飯份量都非常吸引，首先講下我嗰個嘅日式叉燒蛋包飯，碗內有五大塊叉燒，而且每一塊都有用火槍燒過，所以食落口時候油脂甘香而且肥瘦均勻，再加上佢嘅有香濃嘅蛋味，好有嫩滑口感，一口餸一啖飯成件事拼湊得相當好。當然都有試埋朋友嗰碗秘製雞扒蛋包飯，佢地既雞扒做得好好照燒汁嘅味道好出，肉質相當鮮嫩多汁，份量亦都唔算少，估唔到淨係一碗飯都已經咁有驚喜。由於係套餐所以都有兩款小食配搭，我哋要咗個吉列蝦同埋餃子皇。食物都即叫即整所以入口時非常燙口，吉列蝦外脆內嫩，餃子皇雖然都係炸嘅但係鮮嫩多汁，質素都頗高。最後飲埋套餐附送嘅百香果水果茶，甜度剛剛好之餘再配合好多果肉，飲落肚嘅時候好清新。食完濃味嘅嘢之後飲返一啖，成個套餐都俾到好完滿嘅感覺。 我哋兩個食完埋單大約$150蚊左右，係呢啲商業區都食到呢啲高質素嘅小店真係難得，呢間餐廳都好值得推薦，最後坐咗陣間差不多傍晚，我地又要去第二輪飲酒啦~~~  

新一年多左好多客搵我哋，希望新一年更加好。今日土瓜灣重遊舊地，記得對上嗰次傾完生意就喺附近試咗間滷味店，印象中呢頭好多新派食肆。經過北帝街發現兩邊都開左好多餐廳，但有間舖頭吸引到我，除咗門面比較乾淨外，大大張海報寫住$16蚊12粒魚蛋，仲要每人限購兩份，搞到我都心思思想試下，話晒由朝到晏都未食過嘢，而且諗住食多少少當獎勵自己~
鋪面唔太大約有十張枱左右但環境衛生好乾淨， 牆身貼滿晒餐牌內容都係車仔麵為主，除咗一般車仔麵有嘅餸之外，見佢有啲招牌、自家製等潮汕出名嘅肉丸，    雖然坊間好多所謂嘅肉丸，但係大部份都係粉多過肉，入口時一啲肉味都無。正當我猶豫緊食咩好嘅時候，職員都有主動走過嚟介紹潮汕食品，原因係所有丸都係自家廠房製造所以都好好食，仲話好肚餓又想試晒大部份嘅都可以跟住咁嗌，最後我都抵抗唔住跟住嗌，最多攞返屋企再食過。
首先車仔麵叫咗三個餸、而小食嗌咗生炸潮汕三寶、重料咖喱三寶、椒絲腐乳通菜同一支豆漿，我諗晚餐都可以唔駛食。等左陣食品都陸續上枱啦~ 上枱啦~ 見到每樣嘢都係驚喜。首先豆漿一放喺我面前都已經會心微笑，成個雪人狀見到都開心，其後飲完味道仲相當好，豆味香濃而且甜度適中完全唔覺漏。椒絲腐乳通菜，見到海報寫係菜園直送，一問之下原來每日由本地菜園送抵舖頭，所以都非常新鮮，真係每條通菜好脆身，再配合椒絲腐乳仲好惹味。一不離二到呢一個咖哩三寶(魚蛋、魷魚、牛柏葉)，佢個咖哩汁同埋魚蛋果然真材實料，每粒魚蛋比較其他嘅都大而且仲非常彈牙，咖哩醬膽職員話用幾十種材料炒成嘅，果然辣得嚟非常過癮。魷魚同牛柏葉味道質感都新鮮正常，但配合咖哩汁所有食品都提升一個層次，好值得點選。正當辣到飛起嘅時候聞到非常香嘅味道，生炸潮汕三寶(汕尾馬鮫豬肉丸、有魷魚的魷魚丸、深海粒粒墨魚丸)每款有三粒，首先馬鮫豬肉丸完全食唔到粉嘅質感，每咬一啖都好滿足而且彈牙，馬鮫肉質甘香完全真材實料。有魷魚的魷魚丸，同個名一樣每粒都有魷魚肉，而且又好彈牙新鮮，超級正~ 再試埋深海粒粒墨魚丸係即叫即炸，熱得黎好彈牙，而且有粒粒嘅墨魚肉，強烈建議一定、一定、一定要試晒。最後試埋個車仔麵油麵(炸豬扒、豬大腸、一喜秘製菜肉餃)，但呢個時候已經有六成飽，不過見到入面嘅餸菜又令我食慾大增。湯底係我最鍾意嘅香濃沙嗲汁配合油麵，油麵既爽口彈牙掛上濃香嘅沙嗲極惹味。豬大腸滷得好入味無任何騷味，每嚿都好爽口。炸豬扒即叫即炸好多塊，而且甘香嫩滑多汁。試埋個一喜秘製菜肉餃，自家製果然貨真價實，菜同肉嘅比例好完美，每啖除咗食到佢肉汁之外亦都唔會太漏，配合得好好。本身諗住食少少點知依家大滿足，職員見我食得咁開心都忍唔住整啖黃金雞湯我飲話係佢哋招牌，盛情難卻下就趁熱飲咗啖湯，真係唔好講笑佢完全顛覆咗我對雞湯嘅味道，呢個黃金雞湯有超濃嘅雞味完全係想飲完再飲，原來車仔麵加$3蚊就可以試到。雞湯內加咗魚腐、汕尾小米粿，小米粿係鄉下嘅味道，煙煙韌韌有啲似粉果，但令我驚喜嘅係呢一個魚腐，因為入面係空心，入口時濃香雞湯喺個口度爆開，口感超豐富。
你哋唔好以為我清得晒咁多食物，食到大半個胃已經容不下，食淨打包返屋企再慢慢嘆，埋單前仲叫咗個黃金雞湯返去俾我另一半試下。見到外賣盒時真係令我大開眼界，個外賣盒好精緻，職員話原來係用機器壓制出，而圖畫係自己設計， 睇得出呢間小店好用心經營，算係見過咁多間其中一間質素同服務都做得好出色嘅餐廳。最後食左咁多嘢埋單大約$200蚊左右，真係好值得性價比極高。
既然咁好食都幫手推介下，呢間餐廳黎緊仲會係尖沙咀重慶站開多間分店，諗真下尖沙咀真係好似無咩好食嘅車仔麵，開咗之後一定要再幫襯。

經過呢個炎熱嘅聖誕節後，終於開始感受到寒意啦~ 新一年大家真係要身體健康，第一個工作日要去將軍澳開會，仲記得過往食過呢頭嘅餐廳質素都非常之高，所以對呢一區都有好深印象，今日一如以往開會~ 開會~ 開會~ 搞到大約四點半鐘先完成手頭工作，但又未到晚飯時間，所以同秘書小姐求其搵少少嘢食之後先返去。由於呢區天氣都算比較寒冷，所以都諗住搵啲熱野食，途經新都城商場見到間門面幾Cyber嘅舖頭，個舖頭名叫做 ”椰子星球” 果然好貼題~~~ 見到佢入面裝修陳設都幾靚，絕對係俾啲女士打卡用，秘書小姐見到已經話想試下，既然係咁食少少嘢算啦。
佢個餐牌大部份都係甜品，不過亦都有小食同埋好適合依家天氣嘅燉湯， 我呢啲有選擇困難症揀咗一段時間，   最後要佢哋招牌椰子甜品同埋餐牌推介嘅燒仙草椰子奶，而秘書小姐就揀咗個燉湯。
等緊嘅呢段時間秘書小姐喺度自拍，而我就比較鍾意睇製造過程，見到部機器開椰子都真係幾有趣，等咗一陣間幾款食品已經搞掂可以上枱啦~ 佢哋呢度真係好有心思，喺枱上面放咗啲聖誕裝飾等人哋打卡都靚啲。我嗰杯燒仙草椰子奶個器皿好吸引成個衛星咁，所以都急不及待飲幾啖。由於係熱飲椰奶味道果然好清甜，再配合仙草嘅爽口同佢入面粒粒煙韌嘅椰子肉好有口感，呢杯嘢一啲都唔乏味，而且食材都好天然唔會死甜仲好潤喉暖胃，諗真下已經好耐無飲過街外嘅甜品。其後不得不提呢一個芒芒UFO，佢嘅份量就係成個椰青咁大個仲要加到滿滿的，而佢嘅外形又真係成個椰子星球，果然無改錯名...。星球入面有椰子肉，而上面有好豐富嘅甜甜芒果肉同埋煙煙韌韌嘅小丸子，最緊要加埋佢附送嘅椰乳，溝埋嚟食口感好豐富，最緊要係食得到好新鮮嘅椰子肉同椰子水，真係招牌貨!!! 飲左杯椰子奶已經好飽，所以都同秘書小姐Share食。但見到秘書小姐個燉湯好香，佢又真係好滋補，呢個花膠蟲草燉椰子烏雞湯就咁睇個份量都正常，但入面嘅配料相當豐富，有新鮮嘅椰肉、烏雞、蟲草花、花膠，我飲咗一啖發現佢呢個燉湯除咗清甜之外，肯定完全無任何味精。雖然呢間餐廳裝修比較新派，但佢嘅出品就有好傳統嘅質素，所有用料都好新鮮，而且淨係睇佢個燉湯已經知道好用心機同時間，椰子就固然好新鮮啦。今餐三樣嘢埋單都係$140蚊左右性價高，呢一區果然深藏不露，食過幾次都依然仲咁有競爭力同埋吸引性，食完後我都下意識問秘書小姐：「我哋幾時再嚟呢度開會~~~」，呵呵...

又到開心星期五，今年雖然遲來的冬天，但一諗起下星期就嚟到聖誕節心情都開心返晒。難得星期五趁依家冬天拿拿聲去洗車先，一如以往去返營盤街附近嘅車房幫架車扮靚靚。放低部車行下附近有乜嘢可以買返屋企食，呢條街開咗好多新嘅舖頭，見到有一間專做外賣嘅韓國舖頭，心血來潮見咁耐無食過就食呢間啦~ 佢嘅門面唔算大，但睇佢嘅餐牌款式都唔算少喎，   係我諗緊呢段時間見到有好多外賣單，而且見佢份量都好多，最後驚食唔晒就要咗兩個一人餐，分別一人炸雞套餐同埋一人便當餐。個職員都話兩個人食都已經好足夠，間外賣店啲單都真係無停過，大約等咗15分鐘左右所有食物都終於齊晒，果然好似佢咁樣講份量真係唔少。 最後攞返架車後揸返屋企準備開餐，返到去我隻寶貝第一時間聞下個袋，梗係啦~ 有熱辣辣既炸雞喎~ 餵完佢食嘢之後，我哋都準備開餐囉~
上枱啦~ 打開晒啲食物手機食先，影相個陣發現性價比相當高，份量好夠大但價錢一啲都唔貴。首先講佢嘅一人炸雞套餐，佢有四件雞仲附送一兜蜜糖等你返到去先點，咁就唔會淋晒，呢啲細心位值得加分。咬佢一啖炸雞，成件雞脆卜卜而且肉質鮮嫩多汁，配合佢嘅蜜糖勁香甜。最後到佢個海鮮湯份量非常大碗，個湯辣辣地好開胃，入面有好多海鮮配料，有魷魚、蜆肉、蝦仁等，亦有蔬菜仲有隻半生熟蛋，溝埋嚟食非常惹味。配合埋佢送嘅木耳絲同埋酸蘿蔔仲有一大碗白飯，真係好飽好值得推介。 之後到另一半食嘅一人便當餐，我當然要試埋啦~ 佢嘅烤牛肉份量都多而且烤得好香，加上地道韓國炒粉絲真係好好味，粉絲煙煙韌韌又大碟。便當入面有幾款雜錦小食，有雞蛋卷同埋蔬菜、香菇等，每款食物都好入味，佢個雞蛋卷好有驚喜，雞蛋好嫩滑唔會好乾身，成個便當都豐富。另外有三款前菜分別係紫菜卷、芝士卷、同埋蕃薯餅，件件都係炸到卜卜脆好香口，入口好夠熱。 最後好彩食得晒，飲埋兩罐餐飲成件事好完滿，呢餐飯都係$150蚊，有呢啲質素嘅外賣店真係一定要推介，下次有多幾個客人一定要試埋佢個部隊鍋同埋個魷魚鬚，應該都好正~~~

又到月尾喇，今日同另一半放左日假，朝早處理完一啲大事後不經不覺都到下晝，一如以往諗住喺佐敦附近搵啲嘢食，食完嘢就行返去九龍站，估唔到11月天氣都仲係咁熱...。
行到熱熱地諗住搵一間坐得舒舒服服嘅地方食個下午茶Chill下，行到佐敦道見到除咗平之前食開嘅餐廳外發現又多咗一間新開嘅冰室，見到佢個門面好有懷舊感覺，而且望入去都真係有八、九十年代嘅味道，最重要係見到下午茶餐牌一啲都唔貴喎，咁我哋兩個都不約而同行入去，雖然呢的時間無中午咁多人但入面都座無虛席，我哋揀咗個舒服涼爽嘅座位再睇下有咩嘢食。 佢個餐牌款式種類都非常之多，       不過吸引到我眼球嘅就係貼咗喺舖頭入面嘅招牌菜，例如乾炒牛河、招牌西多士等等都幾吸引，而且性價比極高。最後我哋兩個每人一份下午茶，我就食招牌乾炒牛河而另一半就食炸雞髀配薯條，正當點飲品時發現其他顧客都飲緊特飲，仲係我出面都好少見嘅奶茶紅豆冰!!! 我倆去日本都必試當地嘅紅豆，咁呢度都有當然要試下啦。呢個地方環境都非常舒適，除咗懷舊之外座位都好寬敞。等咗大約十幾分鐘，食品開始上枱啦~ 上枱啦~ 首先就係兩杯特飲，奶茶紅豆冰同普通紅豆冰，由於我比較鍾愛奶茶所以第一時間攪勻後飲啖落肚，真係好透心涼而且仲好有驚喜，佢嘅紅豆煮得好爛，入口時都有好香甜嘅紅豆味質感非常好，再配合奶茶香濃味道非常之夾。另一杯普通紅豆冰睇佢嘅賣相亦唔差，椰奶再加紅豆冰質感亦都好滿意。到主打招牌乾炒牛河都上枱，第一時間俾佢吸引嘅唔係個賣相而係聞到好香，睇落好有鑊氣，雖然下午茶但係份量都好大，入面嘅配料都係同港式嘅差唔多，不過最令人欣賞係炒得好靚唔會有多餘嘅油份，而且牛肉亦非常多。我急不及待試佢嘅牛肉，好有牛味而且肉質好有咬口，絕對無俾醃料乸到無晒牛味，質感一流。再試埋佢嘅河粉，每一條都好分明好新鮮，條條都有煙韌度證明唔會擺得過耐而散晒，佢成碟都炒得好香口，認真一流。當然配合埋佢嘅辣椒醬，味道會再提升一個層次啦。到炸雞髀配薯條，薯條係波浪薯條，口感一定俾M記嗰啲好食好多，而且好香脆好有薯味，不過重點當然係佢呢個炸雞髀，由於即叫即炸所以皮脆肉嫩好燙口，另一半比較斯文所以用刀叉食，見佢切出嚟雞肉油脂滿溢，熱辣辣之餘再加埋佢嘅伴碟蔬菜健康又美觀，賣相好吸引。 食完埋單兩個人平均都係$50蚊，係呢一區有呢一個質素同埋性價比咁高嘅都真係買少見少而且仲要新開嘅，而且佢餐牌晚餐啲小菜亦都好吸引，下次放工要試埋佢嘅晚餐，正~~~

號外! 號外! 天大嘅喜訊，話說早前上網見到有篇報到係講旺角肥姐個大仔喺觀塘廣場落腳亦都係賣滷味，質素味道都係一樣。由於我成日都要去觀塘，所以對我嚟講真係個好消息，而佢哋兩夫婦開呢間叫做青蛙仔，果然名都一樣有Gimmick。
今日中秋節可以一早放工，而且今晚要喺觀塘做節，所以收工即刻揸車去觀塘試下新店。觀塘廣場細細個已經成日去但咁多年無咩點變，行咗一陣間已經發現間舖， 鋪面唔大但係人流就非常之多。門面已經擺放咗好多滷味，就咁睇個樣就知道好新鮮，點解? 因為所有滷味流量相當快，咁當然新鮮啦~ 喺排緊隊呢段時間，見到餐牌除咗滷味之外都仲有好多小食， 燒賣、陳皮魚蛋嗰啲就基本，仲有啲馬鮫魚肉丸同埋烏冬， 款式比肥姐多叫人花多眼亂。等咗一陣終於到我啦，第一時間叫個EVA店長推介嘅Red Card，入邊有墨魚、紅腸、生腸，另外再要多一串鮑魚仔同埋生腸花，正當點得興高采烈嘅時候，老闆娘建議我可以試埋個馬鮫魚肉丸，因為係自家手打好彈牙爽口，咁我當然來者不拒。 等咗一陣終於都可以上枱啦~ 上枱啦~ 雖然店舖唔算大但佢亦可以立食，既然架車泊到老蓮咁遠，咁都係食埋先至去做節。就咁睇佢嘅賣相已經知實好味，第一時間試佢個鮑魚仔，每粒都好飽滿又大大粒，入口彈牙爽口非常新鮮。當然滷味除咗食材新鮮之外，要再配合靈魂甜醬同埋芥末。跟住到生腸啦，果然新鮮嘅食材真係已經贏咗一半，咬一啖非常爽口好味，好欣賞係佢每一嚿都切得剛剛好，一口一口咁食令人欲罷不能。之後到呢個紅腸，坦白講比起出面真係厚切好多，而且每一塊亦係一口剛剛好，真係無得彈。墨魚非常爽口彈牙，完全無煙韌感覺，粒粒豐富爽口。最後到呢個生腸花，呢款平時好少食，但係估唔到一試就出奇地好味，佢俾起生腸更加爽口，再配合醬汁食成件事提升到另一個層次。一路食一路同老闆娘傾下計真係件樂事。最後試埋老闆娘介紹嘅馬鮫魚肉丸，係湯底上加咗啲海帶，而佢啲魚肉丸都大大粒，魚肉丸非常彈牙完全無腥味，要新鮮嘅食材先至會有呢啲效果，其後老闆娘話加少少咖哩汁會更加好味，果然真係將成件事提升咗惹味程度。 呢餐午餐真係非常非常之滿足，埋單都係$100蚊左右，對我嚟講呢餐嘅質素果然係平、靚、正，下次經過觀塘一定會每一次都要食~~~

今日正直中秋節，祝大家人月兩團圓，今日公司有得收早，本身放咗工之後同屋企人一齊做節，但唔好彩地另一半抱恙，所以我要好好照顧下佢先。剛先去完觀塘之後去旺角諗住買少少食材今晚煲碗靚粥佢食下，經過廣華醫院嗰頭諗住去街市買啲菜乾煲粥，呢個時間都開始人頭湧湧，果然做節先有少少氣氛。買完野諗住返去嘅時候，見到有人買啲燒味返去做節，雖然我哋唔駛但係見到呢檔嘅燒味都幾吸引，所以都想買少少返去應下節。
行到去舖頭門面唔係好大，透過玻璃亦都見到佢除咗基本嘅燒味之外，都仲有啲鹵水鵝，種類都算多元化。喺側邊見到大部份街坊都係做節用嘅，見師傅斬得咁落力我咪走去同個職員吹咗兩句水，正當我諗緊食咩嘅時候，店員都介紹佢哋舖頭出名既五味鵝，佢係用秘製嘅汁去整嘅，雖然睇落去都係似鹵水，不過既然佢話做法唔同又咁推推介，咁即管試下啦。既然得我自己一個食，咁我嗌咗一個雙拼五味鵝拼呢個紅腸，哈哈~~~ 冇計啦，我真係好鍾意食腸，見個師傅好賣力斬緊我嗰一盒飯，嘩~ 佢都相當夠份量，等咗一陣終於都可以攞得喇，而且仲送多碗湯俾我添，真係有心。 買齊晒啲嘢返屋企慢慢嘆，返到去由於只得我一個，所以係呢個時間快的處理好晒啲食材煲粥，趁煲緊粥呢段時間，我都要醫好我嘅五臟廟先，一打開盒飯已經有一陣甘香味湧出嚟，個賣相真係非常之好，鹵水鵝同埋紅腸嘅份量好多，我都急不及待開餐啦~ 第一時間試下五味鵝先，放入口之際果然同坊間食嘅鹵水鵝係有啲唔同，雖然佢嘅做法應該都差唔多，但係佢嘅味道估唔到出奇地好味。首先佢嘅鵝肉好嫩，肉質吸收咗佢嘅鹵水香味，食入口時唔咸，味道剛剛好。雖然平時我都唔係非常好鹵水鵝，但係佢呢份五味鵝飯居然整得好好食，而且一的都唔肥，令我刮目相看。紅腸當然就係正常啦，三扒兩撥嘅時間，我已經好快將盒飯KO咗。最後飲埋碗湯，正正常常冇味精做得唔錯，估唔到個職員冇介紹錯，佢呢間嘅鵝飯你哋試過就一定知我冇介紹錯。 好啦，我又要繼續煲粥啦，各位中秋節快樂~~~    

由於今個月公司生意幾好，大家返工都好開心，睇到近期啲新聞JPEX事件，搞到人損手爛腳，搵咩鬼快錢，好心做人腳踏實地啦。由於比較得閒，睇緊新聞時見到一個廣告介紹，尖咀有間好有特色而且質素高嘅餐廳，幾近屋企而且呢排另一半無咩時間煮飯，既然有推介就試一試啦。
去到尖咀海港城，泊好架車之後搵間餐廳發現沿途人流好少，到底發生過什麼事~ 去到四樓見到門面好別緻，喺服務台見到有個輪盤，安排入座後發現個格局好似賭枱， 旁邊亦有好多藝術品，由環境到餐具、餐牌都好別緻打卡一流。  
 欣賞環境同時侍應都喺旁邊詳細介紹，食品款式非常之多，最後我哋點左六款食物及兩杯飲料。等緊食物嘅時候我哋都不停打卡完全沒有悶場，等咗大約十幾分鐘食品開始上枱啦~ 首先係兩杯飲品，我個杯有酒精Bubble Colada係用匙羹飲嘅，泡泡下面有順滑既蜜瓜椰奶口感清新酒精濃度唔太高，所以一杯唔影響駕駛嘅。另一半無酒精Sexy Mama，有熱情果、火龍果加上菠蘿汁，好新鮮而且青甜爽口消暑一流。到食物介紹啦，第一味係脆皮和牛配香橙柚子醬，就咁睇佢和牛外面有層好薄嘅炸粉，入口時外皮超脆，但肉質係非常非常之鮮嫩質素最少有A4，牛味好濃好香口。之後到爵士湯，佢係餐廳嘅招牌，瓦器外表好似係一隻瑞獸裝住湯底香濃既龍蝦湯，入面有好大塊花膠、螺片同木瓜，煲起後成碗湯味濃料足，必定要試。到流沙黃金銀雪魚，上枱後第一眼見到已經俾吸引住，佢啲咸蛋黃推到好鬆散好脆，一啖食落口更加無得頂，佢咸蛋黃香味道濃郁，銀雪魚肉質鮮嫩多汁，皮好脆有蛋黃咸香，值得試~ 之後到菜蔬濃湯瑤柱花膠浸菜苗，佢份量剛剛好菜苗鋪上滿滿嘅花膠及瑤柱，食完咁多濃味嘢，到依家清淡少少就唔會覺得飽滯，花膠同瑤柱好足料而且質素好高，有豐富骨膠原加上佢嘅菜苗亦好新鮮，整個過程食品鋪砌得相當好，主食到最後係龍蝦膏海膽炒飯，一打開個蓋已經香氣撲鼻，從賣相上睇炒飯上面有海膽及有龍蝦肉，炒飯炒到粒粒金黃，急不及待食一啖，果然海膽非常新鮮完全唔腥，龍蝦肉彈牙爽口，加上炒飯粒粒分明唔油膩。起初仲以為唔夠食點知非常飽。休息咗一陣上埋個甜品黃金香橙卷 ，外表好似芝麻卷，靠近去聞下有清香嘅橙味同賣相好精美，上面有金箔嘅係橙皮粒入口清香，香橙卷橙味好濃入口好清新，完全將剛剛嘅食品一下子變得清香解膩，好似未試過咁高質素既食物，款款都好精緻，而且環境非常舒服寬敞好有格調。
最後喺我哋食緊甜品嗰陣時，居然遇到另一個驚喜，就係見到香港人都喜愛嘅家燕姐，佢都有對住我哋微笑，整件事變得完美110分，好人好事埋單走人，每位人均$900蚊，呢餐飯價錢可以講話係非常之值得，必定要試。