葵芳新開左間伝說丼屋 新開期間光顧仲送一張買一送一優惠券 平安夜晚約埋朋友黎慶祝 黎到門口已經有條長人龍.. 好彩排左大約30分鐘就入座 可能因為4人枱要併枱 所以覺得座位有點逼 不過價錢就唔貴 豚肉飯仲有分唔同SIZE 另外仲有炸雞小食～ 和風牛肉飯丼($48)另配$15日本蛋套餐 普通牛肉丼，味道唔算太特別 牛舌丼($58)另配$18溫泉蛋套餐 牛舌既量唔少，不過略嫌有D韌 以上丼飯只有一個SIZE(滿足) 女仔胃口比較細就覺得啱啱好~

假日經過沙市城中心 但由於早上既關係 好多食店都未開 幸好呢間CAFE開得比較早 我地一行六人有五人都係食同一款餐 *感味.大滿足早餐(All day breakfast) 喵喵多士配無花果果醬、芝士腸、菠蘿、煙肉、 炒蛋、乳酪、薯餅、茄汁豆 無花果果醬好足料，入面真係有果肉 仲要大大粒，配多士好好味 但個乳酪就比較失望，有少量燕麥同乾果 但乳酪味道偏酸 本身lunch set話加$25可配任何飲品 我問侍應是否任何飲品都可以 佢仲答我話所有飲品都得 咁我就睇餐牌見到杯好靚個名又好特別 痴_線邪惡bb朱古力 杯野黎到有d後悔，因為杯飲品勁細杯 雖然怖滿好多朱古力粉同朱古力碎 但飲滿口好易比d朱古力粉卡住喉嚨 同埋杯飲品勁勁勁甜..我鐘意朱古力都頂唔住 而且杯飲品真係太細杯，一口就飲曬 最後仲要收我原價$45!!貴多$20

早前新開左間一人燒肉 門口放左d日本裝飾都幾靚 終於有時間可以試下 放工一條友去拎位 A號等2張枱, 以為好快 點知都等左半個鐘 因為佢多數嗌2位既號碼入 明明門口見到裡面有吉枱 但都唔叫號碼 唔知係未想製造門外好多人排隊既現象 價錢方面都划算 新張期間再送50g肉或小食 牛豚套餐200g+50g牛五花($78) 包麵豉湯、中華沙律及白飯 味道方面,牛五花正正常常 顏色鮮紅算新鮮 但豬五花就好差 顏色方面偏白, 食落有陣豬so味 食左一塊已經唔想再食第二塊 而且夾肉果個夾好實好難用 夾幾下手已經又紅又痛 加上店員態度都有待改善 我坐係近門口收銀位 聽到佢係罵客 而且佢地對住年長少少既客比較燥底 呢間一人燒肉，試過一次就算啦

朋友介紹左呢間打卡地中海餐廳 餐廳有宗教背景; 座位都坐得舒適 店內大大幅花牆好靚 可以邊食飯邊打卡影靚相 佢既精選套餐好抵食 有湯，主菜同飲品都只係$65左右 而且份量都幾多 是日餐湯-南瓜湯 飲落啖啖南瓜味 小食 茄子鷹嘴豆泥配彼得包 鷹嘴豆含有豐富既營養 入口容易又好味 鷹嘴豆蔬菜球配黑醋汁 口感豐富 但個皮有點硬及乾身 主菜 水波蛋沙克舒卡牛肉中東米飯 菲塔奶酪菠菜沙克舒卡雞肉配中東米飯 意瓜雜菌配中東米飯 主菜整體都唔錯 飯既份量幾多 我都食唔曬一碟飯 個汁有點唔夠送飯

星期五晚上係旺角行到攰攰地又餓餓地 天氣又開始秋涼 諗住搵間火煱舖坐下食下飲下 行到創興門口有好多人派傳單 其中呢間價錢最平, 人均唔洗$200, 2小時任飲任食 價錢十分親民🤩 但無BOOK位又驚等得耐 不過都諗住上去碰下運氣 點知去到門口唔洗拎籌可以直接入 因為個場都幾大 我地嗌左沙嗲同芫茜皮蛋湯底 (不過個湯底都等得有D耐) 肉類同海鮮係要寫紙 有蜆,蝦,青口,脆肉鯇... 其他配料就出去自己拎 雖然價錢平,但食物種類都好多 例如有鴨血/鵝腸/大腸/牛柏葉/水魷魚.... 甜品同飲品類別都多元化 不過,甜品款我就覺得唔試都可以

去完中環街市咁啱見到呢間近日出名既米線舖 因為佢餐牌同某間米線舖相近 無人等位可以直入，不過要同人塔枱 用QR落完單個姐姐話我地無落單 搞左一大輪先OK 我同朋友都係諗過試下口味 直接叫一碗過橋米線share 加$1叫左四川麻辣5小辣 其他個湯底都唔差 又唔係太重口味 雖然個湯底望落去白雪雪 但飲落其實都夠麻同夠辣 米線同餸既份量其實唔多 一個人食呢碗過橋米線應該都係啱啱飽 我地要求米線爽口d 但佢太爽口，爽口到有部分係唔熟 仲係硬條，食唔到 餸菜方面 牛肉好硬，咬唔郁 腩肉好肥又無味 豬肉太大片，但好彩唔難咬 其他就不過不失 酸菜係比較好食同想再食既一款 我同朋友都覺得 要食米線都係去返平時食開果間米線舖啦~

之前係社交媒體見到朋友去呢間食飯POST靚相 自己都心思思想去潮聖下 於是約埋朋友仔黎一場飯局 個名好靚好特別，開頭以為係浪漫既意思 點知原來真正既意思係D食材經過十萬八千里終於到我口裡 首先入內覺得成間餐廳都掛滿乾花好夢幻 不過環境偏暗，地方都偏細 而且冷氣唔夠涼，越坐越熱 (可能我地坐正lift口位) 晚餐加$45可以轉套餐 包湯、餐包同$55以下飲品 Over $55補差價 當日餐湯係甘荀湯配餐包 個湯幾好飲，但個餐包有點硬 食左1/4已經唔想食 卡邦尼意粉 意粉味道偏重口味 卡邦尼D汁好濃好杰 烏魚子櫻花蝦意粉 完全食唔到烏魚子 只係得櫻花蝦同蒜片 可能烏魚子已經溶曬係個汁度 不過成碟都偏咸 飲品方面，凍飲都較細杯 玫瑰抹茶既抺茶偏濃 飲落有DD苦澀 玫瑰味唔突出 最靚係杯紅寶石朱古力鮮奶， 用黎打卡影相都呃到like 總括︰雖然環境優美，但食物同飲品質素唔太好 價錢又唔算平，人均消費都要$170左右 試過一次唔會再ENCORN...

假日得閒行遠少少去食下午茶 發現呢個商場有間台灣餐廳 疫情咁耐無去過台灣,有D掛住台灣美食 仲要有臭臭鍋(去台灣必食之一) 立刻叫個大腸鴨血臭臭鍋配百香果綠茶 朋友食下午茶餐魯肉飯配蜂蜜紅茶 餐廳唔算多人，座位都坐得舒服 臭臭鍋既配料都幾多, 配白飯一碗 仲可以加錢要其他配料,唔建議加配料 加配料既價錢都頗貴, 轉烏冬要加$9 本身鍋內有粉絲、菜、金菇、丸、蜆等等 味道都幾臭下，整體不過不失 呢個價錢都算抵食 魯肉飯既肉燥都多，碗飯雖然望落較細 但佢壓平左D飯，份量都夠女仔胃口 由於用餐期間有D不愉快事件 店員態度令我唔想再去光顧

睇社交媒體知道KCC 8樓開左間日式一人鍋餐廳 有日式壽喜燒、韓式泡菜鍋及中式麻辣鍋 啱曬鐘意一人打邊爐既人去 當日坐靠窗位置，邊望境邊打邊爐 雖然個境只係望馬路同巴士站，但感覺都幾寫意。 星期六中午人流較少，坐得闊落同寧靜。 入坐後店員都好詳細介紹食物及QR落單方法 調味區有不同種類的醬油 可選日式風味酸汁、蒜蓉及蔥粒。 仲有白飯放題任裝 麻辣湯底+安鞍斯牛肉配野菜盛盒 另加配烏冬及可樂 初初嗌麻辣湯底仲驚會好辣 食落一點都唔辣，但個湯底有好大陣麻同辣味， 野菜盛盒都幾豐富，雖然量唔多，但種類多 朋友個壽喜燒都唔錯，湯底甜甜 但有不同的配菜~ 最重要係不設加一服務費。

平時去深井都係食燒鵝多，食到有點厭 加上又玩得夜，就搵下有無開得晚夜少少既食肆 咁啱比我地發現呢間雞煲店 第一次光顧，食店唔算大 但勝在冷氣風扇多，唔驚邊食邊出汗 而且店員都好友善，好照顧我地 由於太晚既關係，我地都唔想食太多 點左半隻雞煲(小辣)、這不是餃子、水魷魚和薯粉 雞煲附上一大堆芫茜，而且味道夠濃，後悔叫左小辣，因為小辣真係無乜辣味 但夠香同有少少麻味。雞肉都大件，而且嫩口，唔會好鞋。煲內既洋蔥同蒜頭都入曬味 水魷魚份量都算多，而且好乾淨好爽口。 店員仲提我地唔好淥太耐。 薯粉入鍋後好快就熟，吸曬雞煲既味，特別好味~ 特別要讚這不是餃子，黑松露味好突出，加上香菇碎，令人一試愛上 我地仲encorn多碟添~ 食完雞煲我地仲點左碟酥炸香茜蠔仔 細細粒，脆卜卜，一啖一個，送酒一流。 整體食物質素同店員態度都唔錯 只係價錢略嫌貴左少少。