是日星期六 諗住去唱錢所以係下午茶既時間又黎到深水埗了 今次就繼續係西九龍中心既food court 去番之前食過既空姐牛肉飯揾食 Menu 壽喜燒雞翼飯 ($25) 當時食客並唔多 俾完錢幾分鐘之後就可以拎到野食了 一拎到上手就聞到好香既醬汁味 3隻又大又飽滿既雞翼鋪左係個飯上面 隻隻都煮到表面泛油光 色澤好靚 睇落都好吸引啊 食落都好入味 唔會太咸 個飯底就係用左日本米 不過今次就好似硬左d 買滿$20就附送玄米茶一杯 我就無加錢換其他飲品了

朋友係附近住 見到新開左間文青台式小店 就話要約我黎試下 點知約到過埋新年先約到一日 係門面既玻璃就已經揾到文青最中意既字句 滷水豬手飯 ($63) 賣相好正 淨係睇個樣都知道佢夠入味 個滷水汁甜甜地又唔會咸 豬手唔會太肥膩 仲有3大舊咁多 酥炸排骨滷肉飯 ($58) 選用嘅豬肉都係比較瘦 唔會有重重嘅肥膩感 個汁又濃又香 撈飯真係好正 而酥炸排骨肉質就比較結實 椒鹽花枝丸 $23 3粒 丸上面有層脆皮 咬落去之後就係彈牙又帶有重重椒鹽味既花枝丸 好惹味 朋友點嘅飲品 十勝紅豆奶茶 都唔錯 熱棉花糖可可 一打開杯蓋就見到咁既樣 一杯熱可可上面有少少泡 棉花糖上面又灑左唔少既可可粉 未飲就已經覺得係滿滿既幸福感 不過棉花糖好快就會溶係可可入面 如果想咬下棉花糖既就要快d夾佢岀黎 跟餐既原盅燉湯 當晚係粟米紅蘿蔔湯 果然係落足料 碗碗都有好多湯渣 飲落好鮮甜 係住家嘅味道 走嘅時候發現 原來呢間小店仲可以透過OpenRice 拎飛添 好方便

我同男朋友又約咗係我哋嘅中間點見面 食餐飯 揀黎揀去就揀咗呢間台式蝦煲專門店 我地bk左6點鐘開餐 一入門口就見到大大個嘅魚缸裝住好多好生猛既蝦 我哋一坐低望下個嘅Menu就諗住揀個蝦煲聽老闆講 胡椒 奶油 檸檬辣蝦呢3款都係用正宗台式既做法 而避風塘蝦.鹹蛋黃蝦就係用比較港式既做法 迎合港人口味 最後我地揀左個奶油蝦煲 ($188) 我地落完單之後 店員係直接去個魚缸度撈d蝦入廚房煮 真係估唔到 八隻大頭蝦整齊地排列係煲裏面 香氣四溢 我地就即刻興奮地開動 一反轉隻蝦就見到滿滿既蝦子 我仲以為係小店特登釀上去 點知老闆話係蝦本身有架 季節性限定 隻蝦未剝殼 我地已經係咁吮 蝦頭又有滿滿既蝦膏 真係愈食愈興奮 肉質鮮甜彈牙 係夾集左奶油.牛油.蒜蓉.洋蔥等各種配料既精華 仔細d睇清楚原來大頭蝦肚入面都藏左滿滿既蝦籽 醉雞卷 ($88) 未放入口已經聞到濃烈既酒香 用左花雕酒 杞子等材料 肉質就較為結實 辣酒煮花螺 ($138) 呢味菜又係用煲上 真係有成煲咁多 份量十足 花螺隻隻鮮甜 咬落又爽又脆 仲有少少既辣酒味 食落好過癮 小店有提供竹簽 等我地可以好容易咁一粒一粒挑岀黎 魯肉飯 ($58) 我地兩個人分就岩岩好 汁唔多但係魯肉整到好香 撈飯食就岩岩好 仲跟埋隻溏心蛋 又甜又滑 薄荷菠蘿梳打 ($38) 我地食完行岀門口嘅時候 發現魚缸裏面嘅蝦都已經所剩無機喇

經過發現有開 男朋友即刻表現到好開心 因為我哋試過好多次特登黎食都係無開 佢就係對呢個豆漿油炸鬼嘅組合念念不忘 油炸鬼唔會油林林又唔會乾爭爭 點埋豆漿一齊食好正 不過如果熱少少就好了 呢碗豆漿唔會太甜 飲入口唔會係成口糖水嘅感覺 而係濃濃嘅豆香 好多人都買一大枝豆漿走 坐低食野短短既十五分鐘已經見到店家不停refill豆漿 新鮮滾熱辣既豆漿由一桶桶既膠桶度不繼倒岀黎 豆腐花好滑 有薑汁味 不過係好淡 就算我本身對薑味好抗拒都可以接受到 但係我始終都係中意某某地方既桂花味豆腐花多d 一碗豆漿配油炸鬼 仲有一碗豆腐花夾埋就$31 其實我地唔知每樣係幾錢 因為小店無標明價錢

雖然呢排既天氣都係熱辣辣☀️ 但係突然好想打邊爐 所以就特登揾到黎將軍澳廣場呢間新開既馬祖分店食晚餐 今次我地就揀咗$223嘅Prime Grade牛肩胛肉放題套餐 一人一鍋既設計令我地可以各自揀番自己中意既湯底🍲 係12款既藥膳養生湯底入面 我揀左藥膳椰子清雞湯 男朋友就揀左藥膳花雕清雞湯 特別推薦椰子清雞湯🐔 個湯底真係超清甜 其他醬汁都唔駛拎已經覺得好夠味 套餐有得任食Prime Grade牛肩胛肉 西班牙無激素豬肉片 台灣沙茶牛肉 精選雞腿肉 同 深海魚柳 不過我地都係主攻牛肉為主 呢度既牛肩胛肉脂肪分佈均勻 肉味濃郁 肉質鮮嫩細緻又有口感 好食到停唔到口 encore左好多碟 自助區仲有超過30款火鍋配料 私心推介墨汁腸 芥末魚丸 同 男朋友最愛既芫茜燒賣 仲有仲有..超過15款飲品同多款雪糕雪條 其中Mövenpick雪糕就有雲呢拿同士多啤梨味🍦 不過無自家制既茶飲就有少少失色 不得不提既係呢度鋪面好大好闊落 環境好乾淨 完全無痴立立既感覺 食都食得開心啲🥰

今次已經係第二次到訪 不過上次就係去尖沙咀分店 而今次就嚟咗灣仔嘅分店 晚上六點左右 唔駛等位可以直接入座😀 我地order左個二人餐 $768 + 10% 包一個海鮮拼盤 一個前菜 一個主食 同2杯野飲🥂 Seafood combo🦀 有成12款海鮮揀 其中原隻波士頓龍蝦 松葉蟹腳 同 阿拉斯加蟹腳就要另外加錢 而我地就揀左唔駛加錢既小龍蝦、馬尼拉蜆、翡翠螺🐚 過左陣 侍應就拎住大大個藍色網膠袋係我地面前起勢咁shake 一打開個袋就見到3款海鮮都好新鮮 不過小龍蝦就好睇唔好食 因為本身都無乜肉 所以要好努力先食到少少肉 蜆同螺都好厚肉 而且完全無沙又無雪藏味 配埋Mr crab cajun sauce真係超級惹味 少少辣好過癮 推介✨✨ 海鮮袋入面仲有索晒精華既粟米 香腸 同 薯仔 超級入味👍🏻 水牛汁脆炸雞翼🐓 個醬汁真係雞翼既靈魂所在 雞翼炸到香脆可口😋 蟹肉卡邦尼扁意粉🍝 扁意粉超級creamy 加入鮮甜既蟹肉同粒粒煙肉 份量十足 真係要2個人分先食得晒😀

今次揀左SET A $198 既雞肉豚肉放題套餐 包41款食品 限時90分鐘⏳ 一坐低 我地着左餐廳提供既即棄圍裙之後就開始瘋狂落單 店內係採用「燒肉新幹線」既智能化模式去送餐 好有系統 企理又乾淨👍🏻 $198套餐既肉類既選擇唔算好多💬 雞有雞胸肉同雞髀肉 雞髀肉好嫩滑 而豚肉就有豬五花同埋豬梅肉等等 我地最中意食豬腩肉🐖 燒完之後特別香脆美味😛 不過連雞翼都無就有少少失望🥲 其他任點既食物包括多春魚 菇類 蔬菜 同多款小食炸物🍤 其中重點推介既係吉列炸蠔 香脆的炸皮包裹著軟嫩的生蠔真係超好味 炸粉唔會太厚 我地每人都食左幾隻🦪🦪🦪 另外店內有個自助corner 有飲品甜品沙律同雪條任拎 野飲都有十款八款 除左最基本既汽水之外 仲有橙汁 蘋果汁 利賓納 雜果賓治 柑桔美人水 等等🍹 當日既甜品都有五款🍮 有Oreo 木糠布甸 北海道牛奶布甸 黑森林慕絲 楊枝甘露 野莓奶凍 我試晒咁多款 覺得呢度啲布甸奶香味濃 特別岀色😝😝 下次岀左糧真係要試埋佢個和牛套餐🐮

將軍澳海傍開左好多新既食肆 不過價錢比較親民既選擇就真係唔多 行過見到呢間既二人餐幾抵食就即刻走左入去試下 $278既2人餐都有2個唔同既選擇 我地就揀左Set A 有炸雞 有Pizza 仲包埋餐湯 沙律 小食 同 野飲 食肉獸pizza 9寸左右既薄脆批 上面鋪滿混有意式肉醬既雞肉 煙肉 莎樂美 同 辣肉腸 入口啖啖肉 叫得食肉獸真係有番咁上下份量👍🏻 個Pizza仲係岩岩岀爐 熱辣辣 批邊香脆 加分📈 黑松露薯條 薯條有黑松露醬鋪面 咬落香脆 不過黑松露味就唔太夠 要另外加廿幾蚊轉就唔係咁值 見到隔離枱嗌左唔駛加錢既原味薯條份量一樣 點埋蕃茄蓉醬應該一樣咁好食👀 墨西哥香辣汁烤雞 烤雞烤到岩岩好 肉質嫩滑 墨西哥香辣汁唔算太辣 對於我呢啲唔食得辣既人黎講係少少辣好過癮😆 一人一隻雞髀一隻雞翼 滋味又惹味😋 野飲方面可以加錢轉特飲 不過我哋都係簡簡單單咁嗌左兩杯凍檸茶少甜

是日星期日 難得放假就同男朋友一齊去觀塘工廈搵野食 搵到呢間新開嘅花系cafe Boon 上到去既時候都已經三點多 食lunch嘅人都開始埋單走 所以唔使等位 Menu 醬油漬三文魚配牛油炊飯 青醬蜆肉汁 ($158) 攞盤好靚 三文魚柳外皮煎到金黃色 好香脆 肉質食落又夠嫰滑 加上顏色鮮艷既三文魚籽醬油漬就令三文魚柳鮮味更突岀 牛油炊飯好好食 但係份量就唔算多 香煎北海道和豚配洋薏米 燴野菜 洋蔥汁 ($158) 落單嘅時候店員有提醒我地和豚煮熟後會呈粉紅色 不過我地就要求煎至全熟 用上豬肩位置既日本和豚食落十分爽口 肉味濃郁 仲正過食豬頸肉 燴野菜就包括蓮藕 豆角 蘿蔔 同東菇 真係有肉又有菜 好健康 抹茶紅豆銅鑼燒配花生醬意大利雪糕 ($98) 銅鑼燒口感鬆軟 抹茶紅豆餡甜而不膩 加上花生醬雪糕黎食真係超級夾 推介 雜莓乳酪沙冰 用左新鮮既覆盆子 黑加侖子 黑莓打成既雜莓乳酪沙冰飲落酸酸甜甜 開胃又清新 伯爵奶泡 厚厚既奶泡順滑細膩 有陣陣伯爵茶香味 口味偏甜 飲落有温度 鋪面唔大但環境舒適 好中意呢種淺湖水綠做主調既設計

平日既夜晚同朋友黎到尖沙咀既garden bar and restaurant 食個light dinner 飲杯野傾下計 白酒忌廉煮青口配水晶麵包 青口份量都唔少 但就偏細粒 加入白酒既忌廉汁味道偏酸 水晶麵包烘到熱辣辣 點埋忌廉汁都幾好食 乳豬腩片配欖油蒜片辣椒意粉 我地一齊share個意粉 份量唔多 加入洋蔥湯豆角入去炒 落左蒜片辣椒等調味 但味道都係偏淡 意粉就軟硬適中 醉雞翼尖 雞翼尖醃到超級入味 入口有微微酒味好惹味 真係忍唔住食完一隻又一隻 咬到牙仔都軟 食到成枱都係骨🙈 日式炸豆腐 炸豆腐有木魚碎鋪面 相當有日式風味 食落外脆內軟 好有驚喜 鱈魚乾 鱈魚乾微微烤過 食落好似薯片咁脆口 配上七味粉同埋沙律醬一啲都唔乾 食落仲好滋味添 伴酒一流👍🏻 Menu