今日難得去到上環做野，作為上海菜粉絲嘅我晏晝路經呢間「醋娘子」已經見好吸引，上網睇發現係良心小店，就決定今晚晚飯就喺到食啦💛 食完係絕對會想翻兜嘅店🤣🤣💗 店內環境唔大，我諗平時應該做午市多，佢都好多午市套餐，晚飯時間店唔算多客，反而靜靜地坐得好舒服😌 Menu都好多選擇，咩都想食嘅小朋友就問員工有咩好推介，佢哋推薦干鍋系列，所以就揀咗個干鍋雞配小辣第一次食干鍋嘅我哋發現好惹味！用熱鍋上，仲有用火熱住炸雞塊好多，又有大量洋蔥，正 之後再嗌咗大路野，麻辣牛𦟌配海蜇都好香！牛𦟌全部大大舊不過海蜇反而無乜味，主要靠個汁～ 小籠包同上海炒年糕就係我必食嘅兩樣都做得出色！小籠包皮唔算勁薄，但都夠肉汁有咬口炒年糕都好正，量夠又惹味，重點係個年糕煮得剛好，煙韌有口感，最怕啲餐廳煮到爛哂 總括嚟講係好出色又抵食嘅上海菜，menu入面有好多菜我都好想試！下次再戰💛

呢間喺朗豪坊嘅burger我已經想試好耐，但一定未約到人過嚟一齊食，但如果獨食又會只係食到一個飽試唔到其他 今次終於搵到人陪，就可以一戰～ 未入到去我已經揀好要食牛油果軟殼蟹漢堡，因為聽人話好正！ 再配埋套餐，同埋加咗個肉醬Nachos，肥仔餐無誤 一嚟到個burger都好高身好足料咁，有成隻軟殼蟹喺入面，咬落勁juicy！牛油果又好綿滑，再配埋漢堡，勁豐富，其實女仔淨係食一個burger都好夠，而薯條就正常發揮啦～ 肉醬Nachos都出色，即使淋上肉醬都仲好脆身，味道加上好大份，其實要多啲人分 總結係好值得一試嘅burger絕對會再試～

上網見到唔同人讚佢哋個黑松露炒蛋bagel好出色，話啲蛋多到爆出嚟咁🤣 作為bagel加蛋嘅fans就決定新一年嚟一試究竟!! 餐廳位置喺少少半山，所以要喺上環行條馬樓梯先到，佢有一部分室外位置，不過得一張枱，睇嚟貫徹餐廳名字，保留適當嘅Space比客人～室內枱唔多，所以假日去都要等一陣 入到去一望到餐牌，就已經決定要嗌黑松露炒蛋bagel，佢哋都仲有其他cafe食物，好似toast, all day breakfast 同pasta，同有少量蛋糕喺甜品櫃。最後我哋決定嗌多一個蟹肉Guacamole bagel，中和返黑松露嘅重口味 兩個bagel嚟到都有少少驚訝，份量真係好大!! 炒蛋完全cover哂成個bagel，佢嘅bagel都唔係細隻嗰啲 食落好滑好香黑松露味，bagel包體都好好，有咬口又唔乾 另一個蟹肉都好好味，滿滿嘅蟹肉好清新，揀得好現場仲有見到人食牛油果🥑 bagel都好靚，下次再戰！

作為pizza鬼的我一直bookmark咗呢間pizza店，網上見到啲人話佢有款藍芝士蘋果pizza呢個聽落奇怪嘅combination好味～ 所以一直都好想去試試，唔洗次次都係食蕃茄底 / 肉腸 / 千島海鮮 咁鬼悶 佢位置就係上環地鐵站出口隔離，如果搭鐵就好方便，佢店內都算寬敞，可以容納10多張枱 今次同朋友兩個食，佢唔係食得多，平時又唔係太食pizza，所以都擔心我要食哂成個pizza 餐點就唔敢嗌太多，嗌咗最想試嘅藍芝士蘋果pizza同埋一份啤酒煮青口 一嚟到pizza已經好香～ 餅底都好軟熟唔太厚又唔太乾，藍芝士都係我可接受嘅「臭」特別在佢鋪上蘋果薄片，甜甜哋又唔漏喎，我見朋友一塊接一塊，轉眼就食哂四塊仲快過我。佢話呢款pizza唔膩易入口，所以唔覺唔覺食哂，哈哈 反而青口我哋都覺得一般，相對較細隻，同埋底部有汁浸住嘅青口特別鹹，可以試其他小食或者沙律🥗 呢間💛店絕對值得讚，服務態度好好，不停加水同好好禮貌

之前去blue bottle見到對面呢間綠色嘅店，感覺好artistic，完全估唔到係賣飲品，不過佢嘅飲品都唔係一般台式飲品或者果汁，而係主打全天然健康嘅飲品，啱晒我呢啲步入中女嘅女生 個日天氣凍就想飲啲熱野，所以就嗌咗Pots of Gold，入面有薑黃粉，飲咗實更暖 因為熱飲杯睇唔到佢嘅漸層，只係見到佢頂層嘅奶蓋，佢唔係普通奶蓋，而係椰子奶蓋，淡淡嘅椰子香味又唔會太稠杰同太甜，已經好正！ 再飲落去就係燕麥奶，飲飲下就有好重嘅薑味滲出，我好鍾意薑味所以好滿足，甜度都剛剛好，佢哋係用羅漢果糖，無再落加工糖，所以都無得揀甜度，但我覺得好中我平時嘅口味！唔會過甜 最值得讚就係佢嘅自製珍珠！用上活性炭同薑黃去調味，超煙韌，我比100分 呢間絕對有下次，可以健康啲又可以止吓口痕，唔洗成日飲台式飲品或者咖啡啦～

好耐好耐之前食過一次元朗店，但實在多年前已無乜印象，今晚喺西環做完嘢要覓食，突然諗起附近有間彩，就決定一試！ 佢位置好隱蔽，平日係唔會經過，所以都搵咗一陣，我哋大約8點左右到達，前面只係要等2個人如果假日應該就大排長龍嚕～ 佢主打有三款湯底，每款都有包溏心蛋、叉燒同筍，再可以揀自掣麵底，有正常小麥麵、黑胡椒同埋是日柚子，最後我揀咗黑蒜湯加黑胡椒麵好期待 嚟到有一碗湯加一碟麵，麵望落份量好足！條條粗幼分明 黑蒜湯香濃，又唔會太攻喉配埋好有咬口嘅麵底好出色！叉燒係薄身嘅，偏瘦但份量都幾多，溏心蛋同樣正！而我一向覺得筍係拉麵沾麵嘅朋友，配埋就更加好 整體沾麵好味！員工同師傅好有禮貌 一定有下次！

同朋友約咗鶴嘴，出發前緊係要搵間餐廳食個豐富早餐先啦唔熟東區，但咁啱見到呢間話💛，一於就揀你啦 我哋一行6人所以坐咗大枱加隔板，難得食一次茶記早餐，唔嘆返個沙牛麵我覺得對唔住自己，所以無視一日卡路里啦～嗌咗沙牛麵、雙太陽蛋，水準又ok喎，沙牛濃，麵又無煮得過淋，蛋都煎得剛好，熱奶茶都好香滑，多士正常脆口，整體合哂格有突啦 而朋友食歐陸早餐，塊雞扒都幾靚仔，睇落幾滑，好過食某集團野啦～ 姐姐仲好細心提咗幾次我哋早餐就快last order，可以幫未到嘅朋友嗌咗先～

自問係煙韌有咬口嘅野嘅fans，麵包、年糕、糯米糍等等，總之可以訓練咬功嘅食物我都鍾意，自從上次朋友帶我嚟食呢間刀削麵之後，我就愛上咗刀削麵嘅口感 上次朋友推介食冷撈，夏天食就啱哂；呢排天氣涼返啲，我就揀返食熱撈，上次食口水雞，今次就試牛𦟌！再加多份鹵水雞翼同樽仔奶茶，相信係完美嘅晚餐 嚟到又係大碗，配上5大塊牛𦟌同2隻雞翼，同埋四川擔擔醬，撈埋食好出色，唯一可惜在擔擔醬唔辣，如果可以揀辣度就好啦～ 麵即叫即削，唔洗驚會煮淋咗好有咬口，粗幼厚薄都好平均，見到師傅強而有力嘅臂彎就係信心保證 長期覺得麵食係一人晚餐之選，如果下間喺港島開就好喇順帶一提，佢枝樽仔奶茶都好正，好濃厚

咁啱同事last day食飯就搵咗呢間新開嘅泰式fusion菜，呢間係中環享慢煮意嘅分店，所以我都有少少期待餐廳樓底幾高，坐落都幾舒服 餐廳仲係新開，佢餐牌仲係用緊soft opening menu，可以任揀2/3/4 courses，中庸嘅我就揀咗3 courses，包括前菜、主菜同甜品，餐牌好多款式都好吸引！我哋人多就可以試多啲款 先嚟就係前菜，我揀咗冬蔭龍蝦牛角包🥐，不過佢落錯咗普通龍蝦湯牛角包，廢事人哋再整過就照要啦，由中間切開，入面已經流哂啲湯，湯都濃厚，酥皮牛角包配埋湯底原來咁夾，意想不到呢～ 之後試朋友嘅小食：泰式酸辣蠔，但偏細隻同埋暖嘅有啲怪不過味道都幾好嘅；再試埋花生沙嗲雞串，但雞好嚡，我覺得一般 到主食方面，我嗌咗咖喱牛面頰，超級好味，佢係有少少甜唔算好辣，但我好鍾意！牛肉好淋好入味！仲要有成7大塊，再配埋白飯好正！滿分💯 其他主食我無試喇。。包括冬蔭燴海鮮、咖喱雞同埋豬頸肉，疫情下廢事分嚟分去，所以食返自己個主食就算但聽同事評價都幾好，下次再試～ 最後到甜品，我試Crème brûlé，佢係加咗少少泰元素，有塊菠蘿乾同埋菠蘿醬底，整體味道再豐富咗，幾特別 整體我覺得高質！下次有機會會返嚟再試

一條保德街已經有好幾間cafe，雖然住附近但都係第一次嚟呢度 今次就揀咗喺街角嘅Brew Bros cafe，佢一身粉藍色牆好sharp醒 店內環境都尚算寬敞，枱與枱之間都有一定距離，唔會好壓迫，感覺平日下午可以坐一陣子 佢有早餐、午餐同all day menu提供，都有一啲甜點包括scone同cheese cake等，今次就嗌咗一個egg benedict 同一份出哂名嘅french toast，提醒french toast都預咗要等20分鐘左右架～ 再嗌咗杯熱cappacccino 同 Iced chocolate，佢現場都有咖啡豆出售，亦都好細心列哂佢嘅產地同口味 先嚟主食，初初以為egg benedict佢係配muffin包底，但原來係配sourdough，包好鬆軟，仲有牛油果、菠菜蓉同脆煙肉，好match 再等咗陣french toast都嚟到，有兩大塊厚身toast配上果物，有香蕉、士多啤梨同藍莓，好豐富同滿足 煎得鬆軟外皮香脆，加上忌廉一流 飲品方面，cappaccino係高水準！啡味厚而唔酸，我鍾意！而Iced chocolate就相對失色啲，味道淡左啲