好朋友生日話想打邊爐，於是book定檯同佢去近期好興復古懷舊風嘅地方打邊爐慶生~裝修擺設懷舊有心思，整晚都播著經典懷舊金曲，氣氛好好。 我地次次都必叫沙嗲鍋，今次都唔例外~ 老港沙嗲鍋好大一鍋，厚而濃郁，滿滿嘅花生碎之餘仲有細細芋頭粒係面，正。 難得有日本飛驒牛，就order左細份試試，飛驒牛上盤嘅時候仲有少少煙增強仙氣感！店員問我地試唔試生食，我地比較保守，都係prefer熟dd，係沙嗲湯上涮幾下，真係入口即融好嫩滑，係高級嘅享受唷~ 桂花蚌同五香肉丁墨魚丸都係當晚比較出色嘅食材。桂花蚌份量唔多但鮮甜爽口，第一次食有五香肉丁做餡料嘅墨魚丸，感覺好特別。 田園拼盤有西洋菜、油蜜菜、娃娃菜、生菜、粟米、番茄、好足料！ 鴛鴦滑(黑松露墨魚滑+蟹籽蝦滑)爽口都唔錯。 芝士豆腐磚就一般，口感介乎較腍嘅魚旦於同較硬嘅豆腐之間，味道ok但我麻麻地個口感。 腐竹控朋友order左鮮腐竹，份量超多，滿足佢嘅慾望。仲有即炸響鈴超鬆脆，沾附上嘅醬汁即食都好ok~ 記住動作要快，等多陣就冇咁脆㗎啦~ 臨近尾聲當然一貫傳統整返個出前一丁，掛曬汁兼吸曬食材嘅精華，大滿足~ 飲品方面，order左杞子園肉菊花茶同山楂紫背天葵，樽裝大概500ml好快被我地KO~ 臨尾再order左大菠蘿冰同大檸茶，超大一杯，真係有d相逢恨晚嘅感覺~ 早知一早就order啦，超抵！   帶左個小蛋糕為好朋友慶生，店員好貼心咁幫忙雪蛋糕。不過原來仲有驚喜，播播下嘅懷舊金曲突然變成祝壽歌，店員仲送上抽獎卡同懷舊小禮物，完全冇expect過打邊爐嘅地方會咁，如果唔想under the spotlight嘅記住事先同店員溝通下~

係銅鑼灣做完野差唔多兩點半，就嚟到呢間西班牙餐廳試試，lunch hour就快完冇咩客所以可以霸曬成間餐廳。 Set Lunch $168+10%包餐湯/沙律、一款Tapas西班牙餐前小吃、主菜、甜品同餐飲。 洋蔥湯非常清甜，有月桂葉，香料十足。 Tapas揀左西班牙脆包配白銀魚柳，脆包鬆脆可口，上面嘅銀魚柳同sour creme非常濃郁creamy，好味好味~ 西班牙海鮮燴飯個邊有脆脆嘅飯焦，侍應提示飯焦和燴飯攪勻，口感會更佳。果然攪勻後香脆嘅飯焦融入燴飯更添口感，高湯唔錯，唯青口、魷魚等海鮮嘅雪藏味太重，冇咩味道。 廚師精選甜品係brownie，未試過雜果沙律配蜜糖乳酪泡沫所以試吓。賣相夠曬特別，蜜糖乳酪泡沫輕盈，可惜個汁連燕麥同雜果沙律甜到好似飲緊糖水咁，對我嚟講太甜啦。 餐飲加左$10 upgrade做cappuccino，咖啡豆好香，可惜有蒼蠅係奶泡上短暫停留，ruin左個mood。

早前係海港城買野換到d消費$300減$100嘅餐飲coupon，見粵藝館on the list而且可以訂座，啱曬兩老所以去試試。 可能早一個星期已經book左嘅關係，我地獲安排窗邊位置，爸爸媽媽不知幾開心。茗茶$25/位，小食$25，我地揀左桂花烏龍，茶葉用茶包包住，媽媽覺得茶唔夠香，一般般。 前菜涼子十八斬 · 話梅醉乳鴿好得意，乳鴿肉滑唔多肥膏，話梅酸酸甜甜好醒胃。 有唔少人推介嘅無花果蜜絲咕噜豚肉賣相好靚，夾起咕噜豚肉真係有拉絲，雖然唔係好長但已經令人興奮。咕噜豚配無花果幾特別創新，唔錯唔錯。 爸爸最愛蝦子海參泡星班球，班球唔多但肉質厚實，海參燜得好腍，係貴左少少。 我最期待邪惡嘅金沙鳳尾蝦鍋巴，鳳尾蝦沾滿鹹蛋黃，配脆脆嘅鍋巴，香口至極。不過食食下發覺鳳尾蝦唔知係咪比鹼水淹過，有一股鹼水味，打左折扣。 鮑汁花膠撈飯以$198嘅價錢不能expect會有好多花膠，鮑汁撈飯已有固定嘅鮮味，整體不過不失。 仲有燕麥紫心番薯，麥紫好粉的的骰骰，加燕麥係面令口感豐富，食埋甜品成餐飯更complete~ 最後用左四張coupon減$400埋單$1110，平均$278/位，有coupon不妨試試！

見每次去disney都食快餐，臨近Halloween嘅weekend去四處都係人，咩game都要等個幾鐘而仲有排都未放煙花，反正點都要排隊所以我地就決定去大街餐廳食個proper嘅Halloween dinner~ 厲害啦，由五點九排左差唔多一個半鐘先入到去。大街餐廳係Coca Cola嘅主題餐廳，menu上唔少菜色都會添加Coca Cola旗下品牌飲品嘅元素，都幾特別。 Set dinner包前菜/湯、$290 - $340主菜、汽水。前菜/湯我地揀左蘑菇忌廉湯同香煎鮮蝦 ·蒸魷魚卷配芒果莎莎及雪碧青檸醬。蒸魷魚卷裡面釀左類似魚肉嘅野口感好特別，鮮蝦則似蒸多過煎，但加淺綠色嘅海綿蛋糕碎做伴碟未免太搞笑，心唸係咪甜品師傅落錯手~ 主菜order左海鮮燴飯配本菇及番茄同香烤牛柳配豌豆蓉、炒雜菜及可口可樂百里香汁。海鮮燴飯份量唔多但味道唔錯。網上食評對香烤牛柳嘅評語好極端，話好睇運氣彩數，今次比想像中好，牛柳唔會硬繃繃。 加$45可配甜品，我地order左Duffy and Friends Waffles 配雜錦草莓及雲呢拿雪糕同大街特色甜品。Waffles雖然烘得有d燶，但都見到Duffy and Friends圖案，佢嘅fans應該會好開心。大街特色甜品有朱古力慕絲、檸檬蛋糕乳酪燕麥慕絲、雪碧蛋黃醬，賣相100分好精緻，味道就見仁見智啦~ 食物未至於難食，畢竟主題樂園餐廳菜式都以賣相同gimmick為主，一次半次貴唔貴豐儉由人，只希望係peak hours時候改善operation flow令吉檯可以快d入客。 Menu-

秋風開始起，又係時候食煲仔飯啦~ 見到米芝蓮嘅嚐囍煲仔小菜可以打電話預約，就一早book定等食。六點準時到達已經見到長長人龍好跨張，好彩book左如果唔係唔知道要等幾耐~ 嚐囍係傳統舊式食市，師傅係廚房對住多個火爐密密煲，樓面姐姐同街坊熟客吹水噓寒問暖，唔需要華麗嘅裝修，就係為左體驗原始嘅味道。 兩個煲仔飯等左十幾分鐘就到啦~ 平時好少食白鱔，特等order左白鱔滑雞飯，白鱔肉質滑嫩，滑雞唔多肥膏但淡淡雞油滲坐落個飯到好正。煲仔飯一大重點係個飯焦，嚐囍個飯焦真係世界級，師傅功力十足火喉控制得恰到好處，飯焦範圍廣而脆口，又唔會太燶咬落去黐牙，加鼓油食正到呢，米芝蓮煲仔飯果然名不虛全！油鴨排骨飯嘅油鴨為煲仔飯曾添唔少香氣，油鴨嘅油比滑雞嘅雞油更香，每一啖都香氣撲鼻！ 再叫左椒鹽九肚魚，非常滿足。 試過幾間網民大力推介嘅煲仔飯之後，嚐囍煲仔飯配料未必係最頂級，但飯焦應該係number 1！大推介~ Menu-

終於有機會試到呢一間喺K11嘅型格餐廳啦！平日lunch去到唔係好多人，以黑同太空銀色為主嘅設計簡約型格，樓底高空間感十足。 Set Lunch 包餐湯、主菜、餐飲。心血來潮嚟個冬陰功主題lunch，主菜揀左冬陰功奶油鳳尾蝦意大利粉，另加 $48試試小食冬蔭公烤粟米(半份)。 冬陰功奶油鳳尾蝦意大利粉嘅冬陰功汁酸辣啱啱好，al dente意粉掛汁，可惜鳳尾蝦雪藏味比較重。 我好鐘意食粟米而冬蔭公烤粟米呢個配搭我未試過所以有d期待，個人喜歡爽口嘅粟米但呢款粟米雖然烤左但比較腍，個冬蔭公醬同意粉醬有唔同，比較甜同杰身，第一塊還好，第二塊開始因為醬太多有點漿口，有d失望。 幸好有杯咖啡refresh下~ Menu-

替朋友慶生揀左Intercontinental Grand Stanford Moët & Chandon主題嘅staycation package，enjoy完Moët & Chandon主題嘅外帶下午茶，影左一大輪相又游完水，就去Club InterContinental享用我地嘅3-course Set Dinner。 我地揀左第一輪晚餐時段 (18:00-19:45)，遲左少少18:15到仲可獲安排窗邊位置，如果再遲多10分鐘就冇曬窗邊位啦，真係好好彩！迎賓嘅Moët & Chandon迷你香檳一枝(200ml)早已預備好放係檯上，落地大玻璃嘅景觀真係好正，望住個靚海景食堅chill~ 頭盤香檳啫喱鮮蝦沙律配芒果汁特別在於個香檳啫喱，個人唔覺得特別好味但幾過隱嘅！香檳啫喱為個沙律加添左一dd苦澀同酒味，有d似西柚。 燒紐西蘭西冷伴法式烤蕃茄、蒜香烟肉薯角配芥末籽香檳汁好高質，西冷扒有厚度，七成熟冇overcooked，粉嫩多汁又唔黐牙，bravo！烤番茄同四季豆伴芥末籽香檳汁又幾夾，略嫌薯角乾左d。 嘆完個西冷原來已經差唔多夠鐘還檯，個半鍾多d真係有d趕，快快食埋個香檳柚子撻就還檯去散步。呢個3-course Set Dinner真係唔錯，餐廳有情調兼海景一流，如果用餐時間長d會更好~ Menu-

考試之前好想食餐好嘅，見好耐冇食過丼飯就嚟到有好多好評嘅嵐橋。 午市套餐有好多款，款款都好吸引。對海膽同帆立貝情有獨鍾，所以叫左北海道丼，跟餐仲有沙律、茶碗蒸、麵豉湯同前菜，非常豐富。丼飯嘅珍珠米已經加左日本赤醋，粒粒分明得來夠黏口，有驚喜。丼飯嘅刺身都好新鮮，海膽同帆立貝鮮甜冇得頂，油甘魚同三文魚有厚度兼肥美、牡丹蝦大大隻好滑溜、松葉蟹肉蟹膏令到丼飯味道更豐，十分高質！ 一路食緊飯已經聽到隔籬枱不停咁讚雪糕好食，可以喺黑芝麻同豆腐之間揀。我當然揀咗黑芝麻啦，味道超香濃又唔甜，冇得彈！食埋呢個甜品簡直大滿足，叉足電可以去考試啦！So yummy and I’ll be back!

去完M+肚仔餓，就順道去渡船街附近覓食。四點幾五點呢個尷尬時段唔少餐廳都落左場又未做晚市，行行下見到星星仲開就random入去試試，點知有驚喜。 先登場嘅係LA 牛排骨，鐵板上吱吱聲，牛排骨脂肪比例剛剛好，唔算太多骨，份量多四個人每人都食到3-4大塊，加蒜頭泡菜整生菜包食超惹味，一下子就撫慰左空洞嘅肚仔。配Hite 韓國啤酒好爽～ 芝士海鮮炒飯超邪惡，芝士一路撈一路可以拉絲，係視覺享受。章魚粒為海鮮炒飯增添左不少口感，食下食下已經有八成飽。 好耐冇食過人蔘雞湯(半隻)所以order嚟過下口癮，半隻雞唔多但個湯係重點，明明有d飽而且仲有個年糕鍋都覺得要加碗白飯+ $10撈雞湯先心熄。人蔘雞湯仲可以count做午市套餐，+ $5就有樂他咖啡，好抵。 星星現做辣炒年糕 (細)一d都唔細，一上碟就知道一定食唔曬，炒年糕走甜辣風，而且有好多魚糕，最後我地KO左3/4好叻，飽到dinner都skip左~ 環境雖然比較迫但性價比高，非local侍應姐姐態度好好，係個唔錯嘅選擇。 (P.S. 我朋友一個星期之後encore左一次)

見到After You Dessert Cafe嘅泰式奶茶刨冰心心眼左一段時間，但都比長長嘅人龍嚇怕。今次早左dinner 7:30pm嚟到等左10分鐘成功入座～ 二話不說要左泰式奶茶刨冰，望到一層厚厚嘅creme 做topping已經好幸福，再嚟一大啖刨冰…嘩！係好香而自身帶雲呢拿味嘅泰式奶茶味啊～面頭嘅烤杏片增添左刨冰嘅口感，就算唔額外添加泰式奶茶醬都已經夠曬味，加完顏色更靚打卡一流！唔怪得咁多人慕名而來，好似飛左轉泰國咁，食完幸福感level up！ 我地見到seasonal menu有牛油焦糖脆餅吐司就忍唔住order左。嘩！不得了！牛油焦糖香到呢…就係你明知好肥要跑好多個鍾先燒到食落去嘅脂肪但你不能抗拒嘅味道！吐司烤得熱焫焫外層鬆脆，每一寸都沾滿牛油焦糖醬同Lotus餅碎，再加雲呢拿雪糕…WoW完全被佢征服！估唔到手痕加嘅toast比泰式奶茶刨冰更出色～