放工同朋友去中環食飯，揀左呢間環境唔錯而且寧靜舒服嘅café~ 我地獲安排樓上一樓嘅座位，燈光柔和，好啱傾偈談心。 Scotch egg 係café setting好少見所以order左份試試，蛋黃流心非常吸引，稍微嫌麵包糠同蛋中間果層絞肉味道太淡。 Classic reuben sandwish 上嘅酸瓜仔好cute，厚厚烤三文治包著鹹牛肉同芝士、仲有香口薯條，非常飽肚~ Roasted half chicken 嘅賣相非常吸引，烤雞乾濕度調得唔錯，兩個人分啱啱好。烤粟米外層微燶，略嫌唔夠甜。 食甜品永遠都有第二個胃，Lemon early grey pancake伴上雲呢拿雪糕，仲散滿餅碎通加左食用花，勁靚~ Pancake有淡淡early grey清香，唔額外加糖漿已經好好味~ 好朋友仲好sweet咁同餐廳夾好，餐廳仲送上靚靚蠟燭同生日牌，Happy Menu-

好朋友一早book左朗屏嘅omakase同我慶生日，超幸福~ 小店雖然得十幾個位，日系簡單裝修好舒服，空間感亦非常唔錯。Lunch set有兩款，都有茶碗蒸、湯、甜品，$780 set就跟3款前菜、1款燒物、10貫壽司同卷物，$480 set就跟12貫壽司。 首先係茶碗蒸，非常幼滑鮮甜。接著就係3款前菜 - 鱈魚白子同兩款刺身。 白子係是魚類的精巢，話說好補同有營養。平時好少食，入口順滑有d似creme，一d都唔腥，係特別嘅，不過鐘唔鐘意就見仁見智~ 刺身有兩款，有我最係鐘意嘅赤貝，非常爽甜~ 接著就係10貫壽司，分別伊佐木、帆立貝、真鯛、縞鰺、池魚、鰆魚、甜蝦、鯖魚、中拖羅同海膽。 比較特別嘅係第一次食縞鰺，係上等嘅深海池魚王，肉質比池魚更有彈性而且肥美。款款食材都好新鮮，鍾愛三款非伊佐木、帆立貝、中拖羅莫熟。伊佐木顏色好靚白裡透紅，魚身鮮甜得嚟加埋柚子胡椒醬更加清香~ 一向都鍾情帆立貝，那豐厚肥美而白雪雪嘅帆立貝簡直令人想encore~ 中拖羅入口軟綿綿油香滿瀉嘅滿足感真係不得了！海膽都好出色。卷物干瓢卷唔常見，葫蘆瓜以醬油醃製，非常爽脆有咬口，簡單嘅食材亦能成一番美味。 燒物炸蝦天婦羅嘅麵衣非常薄，酥脆而不膩，連蝦尾都脆卜卜食得。仲有麵豉湯同勁香濃芝麻雪糕，食完超滿足。 食物高質，遺憾嘅地方係整個用餐體驗十分趕，十二點準時去到入座，坐左十分鐘都未夠只係食緊第一道茶碗蒸已經同我地講要食快少少因為個半鐘內要還台…其實仲有客都係啱啱到… 好趕客… 我地剛剛先開始咋喔~ 如果用餐時間長返d d會更佳~

學左法文有好一段日子，好鐘意法國嘅文化，今年生日就同屋企人去食法國大餐~ Bouillon位於小斜巷嘅角落，由法國廚師打理，侍應生都係法國人，亦有唔少法國人嚟呢度覓食，地方唔大座位比較密，牆身仲有黑白投影片播放昔日法國新聞/專題特輯，好有feel~ 一坐低就為我地送上一籃法包同牛油，法包仲有微溫，外皮微脆而不硬，唔錯~ 首先上係Entrée頭盤嘅經典之作Escargot à la Bourguignonne，Escargot係法國蝸牛，六隻都嚟自Burgundy話說體質比較大，伴蒜蓉、牛油、香芹parsley真係香氣十足，超入味~ 媽媽超鐘意個牛油蒜香芹醬，話咁快就KO左籃法包要encore~ 我試過係citxsxper買過法國蝸牛返屋企焗發覺真係完全兩回事，蝸牛嘅質感同牛油蒜香完全比唔上！Bouillon escargots真係必試~ 接著上嘅Os à moelle法式香烤牛骨髓仲令人驚豔，一條牛骨撥開兩邊超大，離遠已經香到暈，牛骨髓好滑，油脂係個口內蕩漾，好味到上天堂，全家都嘩嘩聲~ 伴法包食簡直係人間美味，感覺冇咁膩~ 份量超巨，兩個人食有d多，四個人食啱啱好！法包控媽媽當然又encore多次包點汁啦hahah　(Bouillon唔少菜色嘅醬汁都好吸引，同法包簡直係絕配，奉勸各位包/sauce控唔好一開頭就食太多，可留肚) Les choses sérieuses照字面解係 serious things，其實就係mains。Mains當然唔少得油封鴨Cuisse de canard 啦，係法國西南部嘅signature dish。鴨肉先用鹽醃製，再封存係油內，既可保存得耐，肉質和味道亦更嫩更香。鴨肉係我食過幾間duck confit裡面最腍嘅，出奇地唔算太鹹/乾，但我最鐘意反而係個伴碟嘅野莓醬，點鴨肉酸酸地好fresh~ Side dish加$78有薯條過過口癮~ Main course to share我地揀左嚟自法國800g嘅小牛肉架Côte de veau ，雖然承惠一千蚊，但絕對物有所值，分量好多每人食到至少4大塊，最難得除左小牛肉外，個sauce同菇都超好味，食到我地捧住個肚~ 小牛肉比較粉嫩同滑，完全冇筋、超級tender！而且yellow wine做嘅醬非常濃郁，我地又再次抵擋唔到，法包又要出動！ 哈哈~ 餐廳最impress我嘅地方係除左主菜，其他配菜同醬汁都採用多種少見嘅法國食材，一d都唔馬虎。配菜嘅morel mushroom令人驚嘆~ 網狀嘅羊肚菌口感同竹笙有幾分相似，同yellow wine sauce超夾，第一次食就愛上！ 最後當然唔少得甜品啦，第一次食用熱情果盛住Crème brûlée，酸酸地好特別，一人一粒啱啱好~ 餐廳仲好貼心咁寫左birthday message，呢個birthday cake 夠哂特別~ Crème citron 用玻璃杯上，檸檬吉士好醒胃，蛋白霜入口即融！C’est parfait~ 雖然坐得有d迫，同tap water要每位承惠$30，但新鮮同特別嘅食材，正宗法國菜真係超高質，性價比高，必定encore~ Menu-

睇完戲係尖沙咀嚟個early dinner~ 6:30pm到室內已經差唔多full，聽聞室外風景更靚更chill不過有d凍都係下次先，好好彩有booking安排左我地坐最近窗邊嘅位置，望住個靚靚維港景心情都靚d~ Early dinner嘅好處係可以catch到Happy Hour，cocktail mocktail等飲品都有discount！我想要 fresh d 嘅所以揀左Mandalay，濃厚嘅芒果蓉，加菠蘿、檸檬汁同soda water，酸酸地又gur又爽，仲用椰子形狀嘅陶瓷杯加班蘭葉同泰國蘭花點綴，正！ 朋友見個Kaboom 好得意有奶茶所以try try~ 賣相非常精緻，勁有度假feel~ 我地都係軟殼蟹fans所以見到Crab bao bao 即刻心心眼！軟綿綿嘅刈包包住啖啖肉嘅軟殼蟹，加幾分嚟自墨西哥辣椒嘅辣勁，呢個combo創新又美味~ Corn on cob in 3 ways 擺盤非常colourful搶鏡，但同Crab bao bao相比之下，味道比較失色。避風塘、香草、香辣玉米脆片三款味嘅醬coat滿烤粟米，除左成口粉同濃味之外冇咩特別~ 哈哈~   Tom yum gong risotto with seafood galore有驚喜~ 冬蔭公risotto酸辣creamy得嚟米粒有咬勁，除左心心眼軟殼蟹外，帶子同大蝦都好出色，推介！ 環境舒服又chill~ 下次可以試試室外~  Menu-

細佬傾心葡萄牙，揀左Casa Lisbao Gastronomia Portuguesa同佢慶生，24/25號淨係serve Christmas Menu，一於食豪dd~ 我地獲安排到偏廊近窗邊嘅位置，牆上掛滿葡萄牙瓷磚碟同馬賽克拼湊成嘅馬介休mackerel畫，十分地道有氣氛~ Aperitivo 餐前開胃菜點少得麵包同橄欖House marinated olives and rustic bread ~ 麵包仲熱嘅非常鬆軟，除左配橄欖，我比較鐘意點Chicken pate with truffle oil，雞肝醬非常香滑。Gambas Rosa tartare with pepper and citrus 蝦他他配橙紅椒牛油果醬加少少酸酸嘅橘子汁非常醒胃。 Entradas/ starter預左每人一小份，完全唔洗爭。六款裡面有好幾款都有令人想再添嘅意欲，款色多，賣相精緻，色香味俱全。個人認為Entradas完全係當晚嘅highlight，甚至比Main更出色~ 六款裡面最愛當然係Codfish cakes with parsley and garlic mayonnaise，一絲絲馬介休同薯仔完美混合，每一啖都食到絲質嘅馬介休，一粒粒波炸得十分香口，正！食完終於明點解細佬去完葡萄牙返嚟成日都話要食馬介休波波，一試愛上。細佬都話Casa Lisbao嘅馬介休波波勁似佢係葡萄牙食嘅味道同質感~ Perfeito~ 我覺得Garlic octopus, chili olive oil and Vinho Verde 同Scallops cured in orange and honey sauce, brioche croutons, sea urchin foam同樣impressive，分唔出高下~ Garlic octopus用傳統葡萄牙啡色陶瓷砵端上，由於高溫橄欖油仲瘋狂咁出氣泡兼咕噜咕噜聲候超震撼，八爪魚爽口而且蒜味濃郁，感覺超爽。Scallops cured in orange and honey sauce嘅帶子刺身非常新鮮，第一次試橙、蜜糖sauce呢個配搭，清新兼帶微微甜味，唔錯唔錯~ 四個人share兩碟，每人有五片非常闊綽~ 第一次試Pork cheeks cabbage “Trouxa” in a red pot and truffle sauce 覺得好特別，係一個比較重口味嘅starter。椰菜包著啖啖豬臉頰肉絲啱哂我呢d懶人，黑松露醬汁非常濃郁~ Salted cod and smoked cod roe pate係classic之作，Clams with Murganheira sauce就略嫌d蜆有少少沙。 有五款Main course我地除左seafood juicy rice (兩人份)外order曬其餘四款，以Slow braised USDA beef short ribs, spinach Esparregado, grass potatoes, caramelized shallots最為出色。牛小排一根粗但肉質好腍，輕輕用刀一切就骨肉分離，四個人份都食到唔少。Salad旁嘅綠色醬原來係spinach Esparregado，用菠菜製成嘅蓉，伴牛小排肉食都唔錯~ Traditional roasted suckling pig “bairrada” style就算唔係即刻食放涼左一陣個外皮都仲超脆，實在難得~ 當晚冇cod fish鱈魚要以seabass代替有少少失望Oven baked Seabass with roasted cauliflower puree and grill baby asparagus and sea urchin and olive sauce，海鱸魚煎得都脆身，不過不失。 慢煮羊Cabrito, baby goat slow roasted, roasted sweet potato puree, sautéed wild mushrooms, kale相對其他main course就有d失色，肉好乾好硬有d overcooked。 三款甜品每款各一加多一個portion葡撻(total 4個)，最出色兼最具備聖誕氣氛非Pastel de Nata, Portuguese mini egg tarts莫屬，玉桂加raspberry超christmassy~ 葡撻酥化，配雪糕一流~ Pera Bebeda, port wine drunken pear with cheesecake texture and port wine reduction用肉桂、葡萄牙砵酒、砂糖汁慢煮成嘅梨超軟超入味~ 餐廳仲為每位客人送上一杯小葡萄牙砵酒port wine，超貼心~ 餐廳仲好貼心幫忙係Christmas Serradura – macerated peach in muscatel and nuts寫上birthday message，仲唱埋生日歌~ 有氣氛，食物尤其starter有質素，雖然Xmas Menu 有固定餐單冇得a la carte揀最想試嘅菜，都物有所值~ 最緊要壽星仔同兩老食得開心~

星期日出完街去食飯，晚市有個二人$688 set都有半隻烤北京填鴨，但對鴨絲羮同四季豆唔太有興趣所以決定a la carte咁order~  烤北京填鴨(半隻)好快就送到，皮肉分開。鴨皮酥脆而不膩，鴨肉唔算好肥有d韌，以薄餅配京蔥、青瓜、哈密瓜、紫蘿蔔、甜醬卷住食特別有風味~ 紫蘿蔔係比較少見嘅配菜，幾特別~ 鴨皮同薄餅果然係趁熱食好，天氣開始涼隔左陣薄餅已經開始變硬，早食早享受~ 江南松子魚嘅分量驚人，松子魚炸得外皮酥脆，三色椒加菠蘿嘅酸甜醬好開胃，倘若松子多番d d就perfect~ 叫嘅前菜水鄉紅瑪瑙反而最後先到，主要係口痕想吃海蜇。海蜇頭索索聲但感覺有d膠，反而陳醋青瓜好啱解膩，酸酸地好醒胃，以$148嘅價錢有些少overpriced。 兩個人三款餸食到我地捧住個肚，仲pack埋食剩嘅松子魚返屋企再食過～

想試呢間餐廳嘅手工意粉一段時間，見唔少人嘅留言都話餐廳係走fine dining路線所以dinner都唔平，今次就趁平日出開尖沙咀去試試性價比較高嘅set lunch~ 餐廳走優雅路線，L型面積唔大，近大玻璃嘅位置serve比較大group嘅客，感覺chill d。近正門走廊則為一/兩位客人而設，冇咩景觀但靜靜食飯都ok~ Set Lunch 嘅Main揀左卡邦尼手打意粉 $138，包餐湯同飲品，另+$60就有 starter 同 dessert，好豐盛都幾划算。 先嚟餐包配牛油海鹽，小法包超乎想像地硬，有d失望，甜包則不過不失。餐湯係南瓜湯，好有質感加好香嘅牛油味，唔錯唔錯。 Starter 揀左香煎帶子伴牛油果醬，擺盤精美，唯獨帶子係處理上可以再加d工夫，出水有d誇張。 Main 卡邦尼手打意粉 $138嘅手打意粉質感特別，好煙韌有咬口，係出色嘅。採用煙肉粒，一層厚厚嘅油脂令鹹香更突出，更香口。煙肉粒自身已經重鹹味，所用嘅芝士如果可以淡口返少少會更好，整體感覺有d太鹹。 Dessert 伯爵茶意式奶凍真係好重奶味，好滑而且伯爵茶味慢慢散發出嚟，甜度適中，perfect~ Latte都唔錯~ 個人覺得手工意粉有其可取嘅地方，但綜合味道、環境、service離fine dining 仲有一段路，但lunch set $2xx絕對值得一試！晚餐menu應該更不一樣，只係試過lunch後暫時未令我有好大嘅衝動去試dinner~ Menu-

上次嚟摸門丁今次lunch終於成功到訪，粉色嘅外牆勁少女，入面裝修好chic，啱哂打卡~ 小店有上下兩層，往上層必經嘅樓梯三面都用左鏡面，好靚好特別，不過行過時有d暈同怕撞牆，如果要打卡嘅要留意~ Set lunch有頭盤同主菜。頭盤嘅碗仔翅蒟蒻麵好特別，同傳統街邊碗仔翅嘅味一模一樣，係原本嘅粉絲換成健康嘅蒟蒻麵，啱哂上班一族~ 賣相超高級，仲有紫菜天婦羅伴碗仔翅，靚靚有gimmick又好味~ 主菜揀左慢煮美國封門牛柳沙茶天使麵，個presentation好靚，封門牛柳生熟程度啱啱好，好冧有牛味相當唔錯。天使麵捲得好靚，份量唔多但沙茶醬好濃好好味，係重口味之選！ 加$18配是日小調餐飲 - 柚子蜜梳打，幾refreshing 。甜品幾特別，可惜lunch 太趕冇試。 靚靚裝修同食物打卡一流，食完個lunch心情即刻靚晒～ Menu-

對上一次book信記已經係一月嘅事，之後就因為疫情禁堂食所以擱置，差唔多成年之後終於成事💃🏻 晚市分6-8pm / 8-10pm 兩個時段，我地放咗工去所以揀後者。套餐唔包飲品，可以自攜飲品唔收開瓶費，我地一行四人預早少少約左去買嘢飲之後就去到銅鑼灣避風塘碼頭等接駁艇家載我地去信記～短短幾分鐘嘅船程我哋已經雀躍萬分，好似去旅行咁，海風吹埋好chill好舒服，相都未影完就已經到左信記。 我地一早已經預訂咗四人餐$1680，首先登場嘅就係白灼基圍蝦同白灼東風螺，正常發揮，冇乜大驚喜。 跟住就係蒜蓉蒸蟶子王，另外加蒜蓉粉絲蒸大扇貝。蟶子王同大扇貝個size其實唔係好大，蟶子王有少少沙，扇貝未完全離殼，不過蒜蓉豉油熟油同粉絲夠晒香，都OK。 跟住灼油菜一碟，清清味蕾再食濃味嘢唔錯。 壓軸嘅係避風塘炒肉蟹、避風塘豉椒炒蜆、招牌蟹油炒麵，係成餐飯嘅highlight。避風塘炒肉蟹有水準，叫咗小辣唔係好辣，蟹肉滑嫩又多，重點係佢d炸蒜好正，真係可以空口食佢d邪惡脆脆，攞嚟撈蟹油炒麵簡直一流！避風塘豉椒炒蜆比炒肉蟹辣，豉椒汁比較濃味，係重口味之選，不過嚟到船上食就係食呢種風味！ 食物一般，炒肉蟹比較出色，但係有幾可會去船上邊食晚飯，適逢就嚟聖誕節沿岸有好多聖誕燈飾，望住個海同好朋友吹吓水敘舊係好chill好過癮嘅體驗，值得一試！姐姐喺船頭逐隻逐隻船跨過將d餸送到去唔同船都幾特別，每經過一次船身都會搖晃，有時都幾暈😂不過都係一個有趣嘅體驗～夏天應該會幾熱，開始入秋呢段時間嚟係一個唔錯嘅選擇！ 同行有朋友生日，喺船上食蛋糕慶祝生日真係一個特別而難忘嘅經歷💃🏻💃🏻

  小店十二點開，位置不多，唸住一點去到第一輪客應該食完可以唔洗排咁耐，前面有5個客都等左40分鐘先成功入座。 招牌牛柳牛丸粉等左十分鐘就到，羅勒香葉等已經整碎，香氣更出並融入河粉。牛骨湯好清澈，入口唔渴。牛柳非常新鮮，係熱湯裡慢慢燙熟，肉質尤其嫩滑有牛味！牛丸juicy彈牙，河粉比較挺身煙韌，仲跟埋油炸鬼，相當唔錯！ 再嚟杯越南滴漏咖啡，等咖啡慢慢滴漏到練奶底再攪勻，好有越南嘅感覺~ 小店強調用餐experience，並冇設下用餐時限，不過店外都張貼溫馨提示，希望顧客食完就唔好掛住玩電話以讓排隊嘅客人都可以享用，不過真係控制唔到，如果想試、唔趕時間又唔介意排隊嘅可以一戰~ Menu-