來自北京嘅「羲和雅苑」設於海港城海運大樓新翼OTE 二樓，其以北京烤鴨馳名，獨創嘅烤鴨三食絕對能為食客帶來驚喜。 作為海運大廈新翼嘅頭一批Anchor Tenant，其裝修都係非常講究，雅緻中國風加入新式元素，善用其180度嘅維港海景，整體十分華麗。 羲和馳名烤鴨 （$388/半隻）：呢個八寶盒係羲和雅苑嘅Signature，由傳統中式醬料，至偏向西式嘅藍莓醬、甜芥末，以及爆炸糖都有。 烤鴨分成三碟，分別於鴨腿肉、鴨胸肉、鴨皮： 首先，烤鴨皮脆肉嫩，鴨皮酥脆多汁，但油而不膩，建議搭配爆炸糖享用，雖是嶄新食法，但兩者非常搭配，口感獨特；鴨腿肉較滑嫩，肉汁亦較豐富，我選擇直接搭配不同醬汁享用；而鴨胸肉較厚肉，肉質唔乾，搭配煙韌嘅烤餅及醬料享用較適合。 黑松露煙燻鵝肝（$308）：松露味道香濃突出，加上金箔更顯大氣，鵝肝飽滿嫩滑，肉汁豐富，非常鮮味，配上脆包及紫蘇葉能降低油膩感。 金湯海膽蟹肉滑豆腐（$168）：呢個拌白飯簡直一流，儘管係熱食，熟左都仲食得出海膽味，加上一絲絲蟹肉，連豆腐都顯得特別鮮味，大癲！ 酥皮酸辣湯（$118）：酥皮香酥脆口，且夠乾身，牛油香頗重；而酸辣湯比較濃郁稠密，味道偏重，帶微辣，湯料非常足，幾好飲。 燕窩紫薯蒸蛋白（$138）：燉蛋白加入金箔及燕窩，感覺奢華，紫薯微甜唔會太濃郁，而燉蛋白都幾香甜，唔會太膩，質感一般，唔係特別滑。

「正潮樓」本店設於灣仔謝斐道，走較大眾化路線，生意都唔錯。其近日於銅鑼灣利園旁嘅近新寧道8號開設分店，地點較隱閉，附近一帶基本無咩人流，靠嘅一定係自身名氣。銅鑼灣店走較高檔路線，除了私隱度較高，其裝潢、擺碟、服務等等也明顯比一般餐廳略高一籌。 晚市套餐每位$438起，另可選數款小菜，定位算是中高價，可謂潮洲菜的Fine Dining…… 進門先喝免費功夫茶，每人兩杯，雖然無謂扮識，但看擺盤就帶滿滿信心。 厚菇焗海蔘($438/套餐）：蠔皇醬汁濃郁香甜，質感夠稠密，海蔘炆煮時間足夠，軟腍之餘，亦帶點嚼勁。 厚菇焗鮑魚($488/套餐）：同款醬汁，鮑魚非常鮮甜入味，亦炆至非常軟腍，但不失口感。 滷水拼盤：四款食品分別為滷水鵝片、滷豬大腸、滷豆腐，以及鴨血/豬紅 （未能判斷，但幾滑身，無腥味）。滷鵝肉質幼嫩，滷汁入味；大腸爽滑，同樣惹味。 潮汕豬腳凍：豬腳凍呈長方形，晶瑩剔透，像是滿滿膠原的感覺，豬腳已熬至酥爛，帶點胡椒味。 方魚蠔仔粥：份量約有4-5小碗，足夠2人享用。蠔仔份量特別多，粒粒飽滿鮮甜，方魚具咸香，前菜小吃炸花生及酸菜甫我專登留到最後先拌粥食，幾夾。

得悉狗毛於尖沙咀寶勒巷開設左一間名為「九五至尊」嘅火鍋店，作為狗毛嘅粉絲當然要試試，門店嘅金碧輝煌中國風非常eye-catching，內裡非常寬敞舒適，座位空間亦較一般餐廳寬闊不少，整體舒適潔淨。

另外，想提下呢啲每個爐頭都設有抽風淨化器，基本上油煙不沾衫，著靚衫黎打邊爐都唔怕有味！

啤酒有來自愛爾蘭的黑啤Guinness Draught，基本上無乜火鍋店提供Guinness Draught，打邊爐黎講，Guinness Fans必來無異；另外目前仲有SAPPORO生啤買一送一優惠。

燒鱔串 ($38) & 燒牛脷 ($20): 串燒高質，白鱔肉質爽彈，肥美多汁，美常鮮甜；燒牛脷十分爽嫩有嚼勁，加鹽和黑椒調味已很鮮味。

冬蔭功湯鍋拼蕃茄薯仔湯鍋 （免費）：目前以ig打卡post story即享免費湯底，大癲！狗毛本身作為泰國餐廳，冬蔭功出曬名唔錯，有大/中/小辣可選，中辣酸辣並重，唔會太辣但好香濃惹味；蕃茄薯仔湯都幾濃郁，蕃茄味幾突出，唔係假甜果種罐頭味。

美國特級牛小排($238/中): 含豐富脂肪，油香突出，肉質細嫩，牛味仲幾濃郁，而且中份嘅份量頗多。

金錢腱 ($68/中): 肉質結實爽脆有嚼勁，脂肪較少，肉味較重。

可是牛肉普遍切得太細塊，口感一般。

大蜆 （$88): 大蜆新鮮無沙，蜆肉飽滿肥美，仲幾鮮甜，配冬蔭功湯底幾夾。

鮮海蝦 ($68/半份): 海蝦同樣新鮮，肉質爽彈，吸埋冬蔭功湯汁更鮮味。

蜂巢豆腐 ($20/半份): 埋單先知原來暫時蜂巢豆腐 & 鴨血免費添加，食得一碟蝕底左添。豆腐綿滑，層次感極高，非常吸湯！

外賣左一份百幾蚊嘅肉骨茶，簡直差到就算免費都唔想食： - 油炸鬼：有3-4小塊，硬到成舊石咁咬唔開，浸完湯好辛苦咬得開仲要痴牙…… - 飲品：凍話梅桃膠羅漢果茶（少甜），味道奇怪，難飲到喊出黎，飲一啖就掉左。 - 馬來西亞肉骨茶：無藥材香，個湯你睇相都知非常淡口，似係有咸味嘅水，個醬似係蒜蓉定沙嗲，奇奇怪怪咁，又係食一啖就掉左。所謂肉骨，部分採用左豬軟骨，完全唔夾，肉無肉香，湯無藥材香，唔係太明呢碗野想點。 睇見其他用專業相機影相+讚到飛起嘅食評，睇見都嬲嬲地…… 由於係delivery外賣，環境/服務/衛生未能評價，中立少少Default比3分。

餐廳位於尖沙咀漆咸道南，位置都算就腳，除左一般嘅雞煲火鍋放題外，餐廳最近仲推出左名為「任你魚肉烤魚雞煲火鍋放題」，除左任食雞煲/牛尾/黑椒豬手煲外，仲可以任食烤魚，星期日至四，成人價錢$298，胃口比較大嘅朋友的確抵食，因為香港地單點火鍋，慳住食都最少人頭$400落樓。 優惠價每位+$50，仲有紅白酒放題，共有三款分別係Shiraz, Chardonnay及甜白酒Moscato 秘製火焰牛尾煲：上菜時會即場加冧酒，然後點火燒一燒，拍片都幾靚，牛尾有十多件，肉質爽嫩且容易撕開，唔會太實但又唔係炆到散開果種，質感唔錯。醬汁濃郁，微辣惹味，牛尾掛曬汁幾入味。 烤海鱸魚：一般烤魚只提供較平嘅魽魚，但呢度居然提供海鱸魚，即係泰國餐廳收你$298/條果種，條鱸魚仲要大大條，夠3-4人享用。口味可選麻辣/香辣/酸辣/醬香，普通人點選小辣都已經夠味，湯汁亦會愈煮愈辣，我揀左香辣，辣辣地都幾惹味。鱸魚新鮮，先煎後煮，魚皮酥香，魚肉肉質結實爽滑，且味道鮮甜，比一般烤魚好食。 二人戰鬥力較薄弱，食完烤魚都飽飽地，之後點左個鴛鴦鍋（唔洗額外加錢）隨便打個邊爐食多少少野，免費湯底有約十款，都係港式火鍋嘅湯底。 任食牛肉有牛腹肉、安格斯牛板腱及本地鮮滑牛等，選擇唔算豐富。其中，牛腹肉脂肪比例較高，油香較重，口感較滑，牛味適中；安格斯牛板腱脂肪較少，較有嚼勁，但肉味稍重。 其他任食食品仲有豚肉片、羊肉卷、海蝦、沙白、魷魚、吊桶等，QR CODE落單。而自助區設各式肉類、時蔬金針菇，以及甜品，包含中價位嘅EKSELENCE雪條。

Mercury Recalls位於銅鑼灣百德新街，Fashion Walk附近，由位於大角咀的Lost Stars餐廳團隊打造，餐廳中央位置展示左唔少唱片封套，當然亦會播放唔同類型嘅音樂，有著濃烈嘅音樂氣息。 White Rose Lemonade ($98): 擁有淡淡嘅玫瑰清香，結合埋酸酸甜甜嘅檸檬味，幾refreshing… 蒜香白酒煮青口（$188）：湯汁帶濃郁蒜香及白酒香，白酒味重得黎唔會澀，採用了藍青口，烹煮時間適中，肉質仍保持鮮嫩，亦夠入味，幾好食。 灸烤雜錦香腸拼盤（$148）：香腸共有三款，分別係韓國雜肉腸、台式豬肉腸、糯米腸：韓國雜肉腸香脆微辣，而台式豬肉腸及糯米腸加埋就好似mini版嘅台式大腸包小腸，係幾香口惹味，但糯米腸有啲太飽肚嘅感覺，配德國酸菜絲食可稍為解膩。 燒美國黑安格斯肉眼扒 (10安士) ($368): 熟度只有Medium、Medium Well、Well Done 三個熟度，令食開Medium Rare嘅我稍為唔習慣，儘管如此，揀選Medium，仍帶點血水，切開後亦見肉呈嫩紅色，仍符合期望。配菜有燒南瓜、薑黃椰菜花、法邊豆，配法西伯那西醬，醬汁幾特別。

自助區有甜品、飲品、前菜、小食、炸物，以及幾款海鮮，包括凍蝦及青口。點餐方面，以QR Code自行落單，大部分食物可點低至一件，想試下味又唔想食咁多就岩曬，上菜速度快，所以無需心急，可邊食邊點，否則成枱都係，擺到凍曬。紅燒乳鴿即點即燒，外皮有光澤，內含適量肉汁，香脆肉嫩，都幾惹味。燒物當中，牛舌唔錯，厚度適中，爽口而具肉汁，調味以鹽和黑椒為主。天婦羅正常發揮，唔好期望好似日式高級食府咁鮮味，想食點黎過下口癮就okay⋯⋯刺身方面，選擇有三文魚、大赤蝦、甜蝦、油甘魚、北寄貝、厚切池魚王、帶子、赤貝、希靈魚等等：刺身普遍非常厚切，食起上黎啖啖肉，的確唔錯。

三文魚點兩次都係比魚腩，肉質爽實，帶油香，幾新鮮；池魚王肉質爽實，魚味鮮甜濃郁，好少放題可以任食；油甘魚與池魚相約，油香脂較豐富，但肉質相對無咁爽實；大赤蝦肉質爽滑，味道鮮甜，但蝦線清唔乾淨。甜品比較吸引嘅係幾款口味嘅Haagen Dazs雪糕杯，包括朱古力味，以及中價嘅雪條EKSELENCE等等，$298都有得任食呢啲牌子，算幾大方。

優點： - 環境寬敞潔淨，裝潢時尚，予人舒適感覺 缺點： - Reception欠缺人手，我們站在門口等了一分鐘，最終還要主動入內尋求侍應協助安排座位 - 侍應欠缺菜單知識，未能向我們推介菜式。沒有覆單，最終點漏一份串燒，及將椰汁雞湯點錯成冬蔭功 - 價錢屬中高價格，七折後價錢中等，對比環境相對合理，但部份菜式單價及份量不成正比，令人失望。例如，$58印度薄餅只有一塊；$158冬蔭功湯只是一人份量（一半湯壺份量被收走入廚房）；$98椰汁雞湯只是一小個椰子的份量 - 食物質素令人相當失望，在我近年用餐經驗當中，這算是低於25%: - 椰汁雞湯：與泰式椰汁雞湯差天共地，係微咸嘅雞湯帶有淡椰汁味，感覺味精之餘，又唔拖唔水，入面嘅蕃茄仲係生嘅，$98只用個小椰子裝，睇見都嚇親，建議你地去九龍城學習下 - 冬蔭功湯：湯仲要唔熱嘅，暖都唔夠暖，接近凍添，椰汁份量過多，蕃茄又係生嘅，點食？你地收$158，唔係$58，呢碗湯非常失敗 - 角切三文魚沙律：講明三文魚沙律，只有四小塊三文魚，沙律菜配搭混亂，沙律汁又少又唔香，$138換來就係一堆乾嘅菜絲 - 唯一 okay嘅係$498嘅澳洲M5和牛西冷 (250g)，塊扒靚就好難唔好食，medium rare熟度，火候掌控okay。可惜，醬汁過甜，簡簡單單用返個紅酒燒汁咪算，蘸料破壞左塊扒；另外，擺碟核突，用個長方形碟加芽菜墊住塊扒，中西fusion咩 ，成Pat野咁，睇見都唔開胃 -_- 教埋你喇，搵個大嘅圓形陶瓷碟裝，加幾條元朗農場有機露荀，再灑啲蕃茜碎，最後係旁邊用濃縮黑醋汁畫個S字，有個性之餘，賣貴兩舊水都無問題 - 甜品得個樣，難食 多謝你們給我家人一個 ‘難忘’ 的生日回憶

餐廳位於天后金輪天地，天后地鐵站A2出口直行1-2分鐘即達，附近人流唔多，但食客卻不少，無Book枱的我等左30分鐘先有位，建議大家預早訂座…… 裝潢幾有舊香港嘅感覺，舊係扮出黎姐，整體衛生Okay，唯一係座椅無椅背，容易坐到攰。 今晚卜卜蜆鍋（$198）：湯底呈奶白色，味道清甜，唔會太濃太搶味，卜卜蜆起碼有一斤，無沙，肉質爽嫩，味鮮甜，鍋內仲有唔少娃娃菜及芽菜，可以連時蔬都慳返唔洗點。 草蝦（$88/半份）& 南非鮑魚（$118/2隻）：草蝦新鮮，肉質爽實；南非鮑魚會預先起曬內臟，灼3-4分鐘即可享用，其肉質爽嫩帶嚼勁，幾有鮮味。 頂級安格斯牛頸脊（$328/大）：肉色紅潤，滿佈雪白油花，油香口感十分豐富，肉質香滑而具彈性，牛味濃郁，牛肉仲大大塊，非常厚切，因此份量明顯比一般火鍋店多。 手打五寶丸（$98）：五款丸分別有蝦丸、牛丸、墨魚丸、豬肉丸及鯪魚丸：本人喜愛程度如上述排名，全部手打丸都非常爽滑彈牙，其中，蝦丸鮮味，仲帶有粒粒蝦肉，好足料；牛丸爽得黎仲爆曬汁，油香十足；墨魚丸富有彈性，帶點煙韌口感；豬肉丸及鯪魚丸較一般，口感係非常彈牙，但味道一度。 蜂巢豆腐（$42）：豆腐內部呈蜂巢狀，口感軟綿多層次，仲非常吸湯。

餐廳位於尖沙咀赫德道The Hart地庫，有兩個獨立房間，入面仲可以一邊唱K，一邊打邊爐。另外，大廳亦分兩邊，其中一邊亦都可以唱K，但就唔係獨立空間。整體價錢與普通火鍋店相約，食物質素okay 金沙炸魚皮（$88）：份量頗多，魚皮超級酥脆且不油膩，鹹蛋黃金沙幾惹味。 海南椰子文昌雞鍋（$168/半隻）：原隻真·椰子水，連果肉都挖埋出黎餚製湯底，連湯底都可以飲，味道非常清甜。文昌雞皮薄肉嫩，帶清甜椰子香。 本地牛頸脊 （$208）：肉色鮮紅幼嫩，滿佈油花，油脂帶來豐富油香口感，肉質香滑富彈性，牛味濃郁。 脆鯇片（$88）：肉質鮮嫩爽脆，非常有嚼勁，灼十零秒就足夠。 香茜鮮蝦餃（$68）：餡料豐富，分別有荽茜及鮮蝦粒，味道正常，但餃子皮稍厚唔夠滑。