餐廳位於賭場，另一門口在酒店商場，所以呢個時候唔駛驗核酸，都聽住賭場嘅老虎機叮叮聲黎食飯。 環境，如果鍾意靜就一定唔鐘意呢度，即使宜家賭客少左但都充斥住叮叮聲。 服務，酒店餐廳服務絕對不會差。點菜後都好快已經上菜，唔駛等。 食物 皮蛋不過不失 成吉思汗骨，好香好林，下次再食會encore 木耳炒露旬，唔會太油，清清地，幾好 蒜炒菠菜苗，冇咩特別 水煮魚，叫左少🌶。我唔識得🌶嘅人都頂得順。食之前覺得係油浸魚，食落又唔覺油膩喎 琵琶鴨，類似燒鴨，好味 荔枝木叉燒，因為成枱人都食過樓上pearl dragon同樣餸嘅叉燒。感覺呢碟差啲。 ＃冇比較冇傷害 櫻花蝦海鮮炒飯，好乾身好足料，好味 蟹粥，又唔係話特別好味 和牛生煎包，好多肉汁，好味 仲要宜家澳門人有75折優惠，超柢呀！

疫情後大部分酒店都關閉自助餐，等左差唔多半年Urban Kitchen 終於開返，仲要澳門人75折，急不及待book枱。 坐低冇耐就有人送上海鮮併盤，椰子茶，片皮鴨。。海鮮併盤有2隻龍蝦，長腳蟹，幾隻蝦，青口等，但老公唔食海鮮而我淨係食龍蝦同長腳蟹，咁淨低嘅就嘥左啦～ 食完送上枱嘅海鮮拼盤，可以同侍應講要邊啲，包括生蠔，會送上枱。除左沙律飲品照舊1杯杯1支支放喺雪櫃內，其餘都係得display 再要同工作人員講要咩，佢地會遞俾你。感覺好唔似食buffet。 總括黎講，食物味道唔差但少左選擇，特別甜品，可能夜(last order 9:30我攞甜品時9:10)得返6，7款。

呢幾年都喺路氹酒店嘅米芝蓮餐廳慶祝，今年老公生就去返8餐廳慶祝，唔知係咪因為疫情關係，感覺差左少少，但都唔錯嘅。 環境 一樣以金魚為題嘅裝修，一樣華麗，不過多左人，比以前嘈左啲。 服務 如果10分滿分，以前服務會俾10分，宜家值8分。 食物 1. 免費餐前小食~比較鐘意之前嘅金魚餃，精緻好味啲 2. 化皮乳豬 ~ 無論乳豬同餅都好味，乳豬薄而脆 3. 京式燒羊腩 ~ 羊唔蘇，好林。連伴碟嘅蓮藕都好味 4. 新葡京東坡肉 ~ 唔油膩但好香，好味 5. 米皇雲腿浸時蔬 ~ 個米湯好清都好味 6. 桂瑤鮮蟹肉炒米粉 ~ 炒得好乾身，但已經太飽，所以食得唔多 7. 免費餐後飲品甜品 ~ 葡撻一般，奶茶好香好有香港水準 (住過澳門先知有水準嘅檸茶奶茶難搵)

2口子滯留喺澳門，酒樓飲茶又唔叫得多，最好就係到點心店，市面上嘅點心店質素參次而且坐得好迫，適逢威尼斯人做緊promotion 澳門身份証有7折，折左同街上嘅點心店差唔多。 位置 店舖有2個入口，1個喺賭場入易搵啲，另一個就非賭場入口，難搵啲啲，但就可以小朋友都入得去。 服務 真係令我意想不到，佢地可以做到，我飲完啖茶就有人黎倒返茶俾我。亦可能因為疫症期間冇乜客。 食物 2口子叫左6樣點心，份量都剛剛好 個粥好棉，食左1粒佢嘅油炸鬼，忍唔住叫成碟 當澳門市面賣嘅油炸鬼都要20蚊條仲要“UN”嘅，呢碟油炸鬼(原本3條)折左20幾蚊真係好柢 粥當然要配腸粉，啲醬好有澳門地道質素，但鼓油少左啲 生煎包用煲上，keep住溫度，入面係黑椒牛肉，好味 燒賣同茶樓一樣好味 雖然糯米雞變珍珠雞，但呢個點心值得推介，因為係糯米+紅米，口感一流，食完之後幾日又心思思想再食

澳門比較少美式熱狗店(可能我唔知啩)，唔知幾時bookmark左，今日趁得閒就試下。 位置處於好旺嘅官也街唔當眼嘅小巷入面，但門口掛左隻大龍蝦，好易認，營業時間唔長12noon~8pm,跟據店內通告last order好似係6pm 食物選擇唔多:龍蝦包，帶子包，蝦包同混合包，小食有薯條薯角，飲品有樽裝茶，支裝汽水同啤酒。我就選左龍蝦包+$22配薯條/薯角同汽水/茶 龍蝦包啲龍蝦係即叫即驚，雖然雪藏嘅，不過加埋醬料都唔錯，唯獨是個包底可以改善，由宜家餐包改做熱狗包;薯條就即叫即炸再曬上鹽，好味，不過太多食唔哂 2位老闆係後生仔，非常有禮貌同親切，空閒時會走出黎傾下計

3個女人一個墟，3個女仔約食飯最需要可以坐得耐又靜嘅地方。 Cafe Zense位於銅鑼灣廣場後面某大廈樓上並不顯眼，但勝在有室外室內座位方便吸煙人士食住煙傾計。 飲品多啲選擇，有酒，有茶，有咖啡，有沙冰;食物少啲選擇，但都足夠有前菜，主菜同甜品，味道都比得上大型餐廳。特別推薦蜜糖雞翼同埋西班牙海鮮飯，呢2樣都好食 服務態度簡直一流，服務員好有禮貌，又唔會催促要攞返張枱，見我地啲水飲哂又會補返唔怕我地繼續坐落去

呢間爐端燒其實唔錯，第一次試佢個放題。 價錢方面: 午餐百幾，非常超值，因為平時一個set lunch 都要百幾200蚊，但要星期六，日先有。晚餐300幾，就唔可以話好柢，叫做中等啦～因為冇乜貴價食材。 食物方面:選擇唔算多，有前菜沙律,sashimi, 壽司卷物，湯飯麵，天婦羅，當然有串燒啦～另外可以加錢追加一啲貴價魚同sake but depends on 當日供應量。最後加送豆腐雪糕 服務態度:酒店餐廳，服務當然唔會太差亦唔算話非常好。

今日落大雨又想食沙律，所以去左新葡京嘅cafe lunch。 餐廳位置卡新葡京B2,出一邊是中式嘅粥麵，一邊是西式Cafe。入座時8成滿，唔駛等位，侍應直帶入坐。 叫左個 Caesar salad+latte. 首先，侍應會攞住籃餐包供選擇，我選左呢款啡色外表古怪嘅餐包。點知食落係好軟好味 之後再上嘅係Latte跟一壺焦糖，好貼心，因為本身叫嘅係普通Latte,但會附上焦糖。 最後就係沙律，菜好新鮮，沙律汁亦好味。 埋單用AE有9折，仲多過會員卡

南灣區屬於澳門商業區，多幢商業大廈及賭場包圍住，所以呢區中午搵食亦唔難。 今日忽然想食日式午餐，所以去左和花亭。 和花亭有10多款午餐選擇，其中3款係壽司~2壽$78，1款$88。由於今日唔想食卷物同魚生，所以叫左呢set $78。 首先黎嘅係前菜 ~ 醋浸燒三文魚，唔錯，幾開胃；麵豉湯~本身都唔鐘意飲，所以no comment ;烏冬~食哂壽司同前菜先食，所以好淡亦都好飽，所以食淨一半。 之後再上壽司，5件壽司都燒過，都新鮮幾好食，另外3件三文魚刺生附一片檸檬，都新鮮好味。 再上多杯咖啡 （咖啡，奶茶，檸茶，檸水任選其一），都濃郁，唔錯。 埋單$78+10%=$85.8，以呢個價錢黎講都算柢食嘅。 服務方面，我食時2：30午餐時間到3點，所以啲工作人員都準備中場休息或清潔，冇乜服務可言。

食完飯忍唔住返轉頭去呢間好出名嘅豆腐花，舖頭名並不顯眼，裝修係傳統豆腐舖。 成間舖得3款食品~豆腐花，豆漿，豆腐。 叫左個豆腐花加奶，自己再加啲糖水。好滑，略帶豆味。。好食，$8.5，論價錢，味道同回憶都值得一試。 （可惜，豆腐花相upload 唔到）