之前朋友大力推薦呢一間餐廳，咁啱平日有事去將軍澳，一於book枱同屋企人試下。 一早用openrice book咗枱，平日午市時間唔算多人，到達時餐廳只有兩組客人，但之後越嚟越多客人入嚟，到食完離開時餐廳接近7成客滿。座位及枱與枱之間嘅距離足夠，就算人多都唔會覺得好擠擁，服務員有禮，迅速既照顧唔同客人需要👍🏻 平日嘅午市套餐，前菜有餐湯或沙律，主菜有一系列既選擇，最後就係甜品或者餐飲任擇其一。當日嘅沙律為凱撒沙律🥗，啲沙律菜好新鮮份量又好大碟。爸媽就叫左餐湯試吓，佢地都讚個蕃茄湯🍅好飲。主菜方面分別嗌咗個意粉🍝朋友大力推介嘅青口以及一份牛扒🥩。份牛扒叫左5成熟，出到嚟啱啱好，切開每一口都充滿肉汁，諗起都想再食🤤青口大大份又新鮮好味，連塊麵包都好正。甜品方面就相對失色，當日係香橙薄餅，塊餅皮過厚太多粉，有啲失望。下次應該嗌番杯咖啡☕會好啲。 總括黎講，呢間餐廳坐得舒服，食物質素高，服務員招呼又好，仲要有靚靚海景，非常適合慢慢坐低享受一個靚靚午餐👍🏻

與朋友相約食飯，挑選了呢間位於銅鑼灣附近既餐廳。 經openrice 訂了1800，當日呢個時段用餐人數不多，可以慢慢享受餐點。先講一下餐廳裝修偏日式簡約風，內部整潔明亮，第一印象非常之好👍🏻餐品方面，選擇唔算多，每人只需係三款湯底與四款肉類之中做選擇。 當晚揀左食壽喜燒湯底配極上黑毛和牛，另外再加配多碟梅花肉及蝦滑。先講個黑毛和牛，好大碟，分量完全足夠，淥幾秒之後再配埋個日本雞蛋，真係入口即溶，好味道😋。跟餐既綜合時蔬夠新鮮🥬，吸埋啲湯汁，真係好正。再加支日本啤酒🍺，爽。

平日到康城午餐，上 openrice 睇完後決定試一試呢間咖啡店。 先講店內裝修，裝修風格簡單明亮，大部分座位都有梳化，枱與枱之間距離充足，另外亦都設有室外座位，坐得好舒服。午餐 set包一個是日餐湯，主菜同埋飲品。當日嘅餐湯係馬鈴薯湯🥔🥣，呢個湯有驚喜，用料足味道豐富👍🏻😋主菜揀咗瑪格麗特pizza🍕再額外追加咗意大利辣肉腸，身為pizza 控嘅我覺得呢間餐廳嘅pizza🍕好好味，佢個餅底煙韌有咬口，薄薄地配埋熱辣辣嘅餡料，真係好好食🤤個份量仲要好大份，一個人完全係冇可能食得哂。另外，亦加錢叫咗杯macchiato, 可以選擇唔同咖啡豆，真係好高質素。 午餐價錢唔可以話好抵但係食物質素好高，環境舒適，閒時嚟一嚟都唔錯👍🏻

有一個多小時先到與朋友約定的見面時間，剛好有張agnes b cafe既cake set coupon, 就到時代廣場分店坐下消磨時間。 當日星期六，客人唔多，雖然餐廳細細，座位大約有7-8枱，但空間充足，唔會有好逼既感覺。自助形式，先到order counter同職員點選左一杯榛子咖啡☕再加左一件栗子🌰撻。榛子咖啡有驚喜，唔會好甜，榛子味都夠突出，好飲。栗子撻非常好味，層次豐富。 食物飲品出色，坐得又舒服。下次係銅鑼灣行街行到攰或者想搵間cafe坐下，呢間絕對值得選擇。

與朋友相約於澳南食午餐，係一眾西餐廳林立嘅地方我哋挑選咗呢一間日本菜餐廳。 餐廳喺二樓位置，有一枱室外座位同室內用餐，室內設計精緻，有中高級居酒屋的感覺，令人十分舒服。午市套餐選擇多，套餐有齊沙律，前菜，湯，茶碗蒸同主菜，抵食又好味。 串燒質素高 ，餐廳職員友善。絕對值得encore

週末相約中學同學於銅鑼灣午餐，呢間餐廳一直係bucket list 入面，即時用openrice 訂檯。 餐廳位於食肆林立嘅L Square，距離銅鑼灣地鐵站只需要步行三至四分鐘非常方便。餐廳比想像中細，但裝修幾特別，有唔少打卡位。星期日都有午餐set，一碟主菜包飲品亦都可以加錢嗌小食，主菜選項超過十款，有啲眼花撩亂選擇困難症。因為同朋友都好想飲冬陰功湯，所以除咗嗌咗三個主菜之外亦都另外加錢嗌咗main menu入面嘅冬陰功湯。主菜分別嗌左蝦醬肉碎炒飯，泰式大蝦金邊粉同醉貓炒河，用QR code落單，可以仔細到揀走蔥走芫茜少飯少麵小辣，差唔多10位選項，確實抵讚。每碟分量大，外貌同餐牌一模一樣，仲要熱辣辣，真係每碟都好好味。另外加錢嗌左份青木瓜沙律，真係好地道既泰式風味。冬陰功湯一大煲，入面材料非常豐富大蝦🦐蘑菇等，三個人每人起碼飲左三碗。 飲品方面，檸茶檸水都係正宗泰式飲品，唔係用港式沖制方法，凍飲都唔使加錢。最重要既係星期日都唔收加一，呢個價錢呢個質素呢個份量，絕對絕對係值得大推既銅鑼灣午餐地點。

為朋友慶生，特別挑選咗呢一間喺尖沙咀嘅火鍋店。一早用openrice訂位，上到去已經預留咗窗邊可以望到維港夜景既檯👍🏻 一坐低，熱心嘅職員已經送上咗餐前糖水，等我哋潤一潤先開始食重慶火鍋。採用QR code點單，非常方便。湯底方面揀選咗鴛鴦鍋，一邊係普通辣，一邊係大骨湯。火鍋配料選擇非常非常之多，最好嘅係可以有半份既選項，可以每樣都嗌少少試下。同朋友不停嘅加單試咗好多嘢，肉類方面牛小排，牛板腱，羊肉片同豬肉嘅水準都唔錯，羊肉片最有驚喜。內臟方面有嗌到牛骨髓，鮮鵝腸，每樣都好新鮮，跟足菜單所講嘅時間淥，好味😋墨魚滑同蝦滑都非常高質數，爽口又彈牙。其餘嘅火鍋配料，例如炸豆皮，萵筍片，海帶苗，鴨血，炸芋頭同武隆苕粉全部都好高水準。 飲品方面除咗有酒精類飲品之外，啲特飲都好大杯。仲有特色甜品可以嗌。絕對絕對會encore. 打完邊爐，門口仲有一部智能火鍋除味機，唔怕食到成身邊爐味。

係將軍澳廣場，諗住去食個快速午餐。12點左右經過堅信號，見到餐廳唔算多人，裝修光猛座位舒適，有唔少卡位可以選擇，決定入去試一試。 一坐低，員工已經好快手將餐具熱水拎上枱，掃QR code 自助落單方便快捷。午市套餐包前菜主菜同餐飲仲可以追加小食。同朋友各自嗌咗一個四川擔擔麵同京蔥牛肉菜飯，前菜就分別嗌咗酸辣湯同灌湯小籠包，再追加咗堅信號嘅招牌菜生煎包。所有食物熱辣辣，上枱速度都好快，生煎包不愧是招牌菜，皮薄脆底，咬落口又充滿著肉汁😋其他食物水準都唔錯。 如果想食個平靚正午餐，呢間係一個唔錯既選擇

呢間餐廳位於銅鑼灣sogo隔離既澳門逸園中心，非常就腳，呢棟大廈超多唔同食肆選擇，今次就試下食越南菜。一早用openrice book 好枱，實在非常方便。 餐廳可以scan QR code自助落單👍🏻，簡單方便，電子落單除左可以睇到每款食物既相（佢提供個實體版menu冇相）之外，佢連多芫茜走唔同材料，轉麵底既各個選項都有齊，實在抵讚。週末同朋友黎午餐，冇set lunch，要散嗌。同朋友各嗌左一個飯麵，再加兩個小食。 我試左火車頭骨湯河，份量大，材料多，飲左個湯都唔覺口渴。朋友試左海鮮炒飯，大大份，熱辣辣😋。小食方面，分別嗌左河內脆炸春卷及牛油果香芒🥑🥭米紙卷，個人鍾意食個春卷多啲，入面包左啲蔬菜再加檬粉，炸到好脆口，好味道🤤宜家餐廳做緊，非酒精類飲品第二杯半價，嗌左杯椰奶亞答子冰試，都幾特別。 餐廳就腳，坐位都幾舒服，再加上職員都非常友善，可以再到訪試下其他菜色。

經openrice 訂座非常方便，唔使排隊輪候。午餐同朋友去試呢間台式火鍋，最鍾意一人一鍋，可以揀自己喜愛的湯底之餘，感覺亦衛生乾淨啲。入座前要先選好湯底同火鍋套餐，可供選擇的湯底非常豐富亦各具特色，好多都想試，淨係揀湯底都心大心細。今次揀左美國SRF極黑和牛肩脊肉放題套餐，有三款牛肉同兩款豬肉可以叫職員拎俾你，另外仲有三款其他肉類可以出去自己夾。 設有醬料吧，熱飲櫃，凍飲櫃，蔬菜區，火鍋料區同甜品區。全部都整齊乾淨排放好👍🏻個人覺得湯底已經夠味，可以唔使另加醬料。火鍋配料區選擇非常豐富，款式應有盡有，台灣腸，燕餃，甜不辣等等，再一次選擇困難症🙈 菜有羽衣甘藍較特別。飲品有冷飲櫃同熱飲櫃，滿足唔同需求嘅人士。雪糕選擇超過十款，有movenpick, Dryers, 雀巢等，真係好正😋啲肉類質素亦都好高，三款牛肉都試過，全部都好好味。另外個西班牙伊比利亞黑毛豬都好好食🤤最值得讚賞嘅係每次追加肉類，每一碟嘅質素都維持到，唔會話淨係得第一碟既肉靚。絕對會推介大家去試下👍🏻