一直都聽好耐，呢間自助餐好抵食，終於嚟咗試結果有啲失望，食完覺得比上不足比下有餘，其實唔係差，只係價錢同食物都吸引唔到再返嚟 以折扣後人均$5xx 確實唔算好抵食，可能今次我食嘅主題係潮州港式美食，冇乜貴價食材，熱食選擇比較較少，熱食龍蝦開邊半隻每人只限一份，刺身質素亦都只係一般 ，甜品方面自製雪糕比較吸引，其他都好一般。 如果要我揀比較值得食嘅會係燉湯同埋雪糕只係得呢兩樣 另外服務方面，可能因為人手比較少，將大部份客人集中坐得密密麻麻，餐廳係會比較易啲控制，但係對客人周餐體驗就麻麻，另外一邊只係得兩三台，我哋人多嗰邊想搵人收碟同埋單都有啲困難 😓

英國人氣餐廳Burger & Lobster 之前登陸Ritz-croton 118樓的Ozone Bar , 開頭太難book，隔咗幾個月終於搵到時間去試！ 去到太多嘢想試於是叫咗份 COMBO-THE SHARING , 已經有原隻龍蝦🦞開邊、一個burger 、一個roll , 同埋兩份side dish 原隻龍蝦唔係好大隻，但都幾新鮮，用叉已經好易起晒D肉，龍蝦肉爽彈帶少少juicy 👍🏽 roll 梗係揀Lobster roll🤭 外面麵包軟熟，中間啖啖龍蝦肉，加埋啲蛋黃醬真係不得了😋 Burger由於我唔食牛肉，朋友揀咗CRISPY CHICKEN BURGER, 等我都可以試到少少，不過尼個雞burger就一般般，如果食牛嘅建議可以試返牛肉漢堡應該比較好 😅 另外side 必叫TRUFFLE FRIES ，好香口，配啤酒一齊食好爽😁 反而見好多人推介嘅SAUTEED MUSHROOM 我自己覺得一般，可能已經食到太飽，覺得尼道side太滯 整體嚟講，人均$600 ，可以喺香港最高地方食到呢個質素，絕對超值👍🏽，食飽可以再出戶外酒吧再飲兩杯 😏

回頭率超高嘅一間自助餐，買二送一後人均六百已包加一！不過如果你食自助餐一定要有生蠔，咁就未必啱你。 特別推薦千禧新世界自助餐係因為性價比真係好高，大前提係用買二送一優惠 ，晚餐自助餐平均每位$600 ，真係冇乜五星級酒店做到呢個價錢同有呢個質素！ 必食芝士焗龍蝦、燉湯、雲吞、串燒、鐵板燒，最最最重點推介係尼度嘅甜品！👍🏽 每一款都好用心機，有賣相又好食，呢啲先至真係五星級酒店出品甜品！再加上尼度係有任飲，有汽水果汁，連啤酒都任飲！ $600 尼個價錢真係物超所值

一如以往總結放最頭：如果你係好鍾意食自助餐嘅，真係值得一試嘅，但因為價錢偏貴暫時未吸引到我去第二次 我係同朋友平日去食晚餐自助餐，所以得一輪，可以食到夜晚十點 , 我哋七點前開始食，一路食一路傾，真係食到最尾差唔多十點，如果係假期前或者星期六日分兩輪，每輪得兩個半鐘都係收$1000，就真係攞苦嚟辛，自行決定🫣 整體上食物都對得住個價錢，最多人熱門推介嘅拖羅，真係睇運氣，我嗰晚攞咗幾轉，大部份都係有根，唔算十分靚嘅，但有其中兩轉，真係入口即溶，一啲根都feel唔到，自助餐任食拖羅算係咁架啦！ 反而我自己會推介中式食物，大部份都好高質👍🏽有海參、蒸蛋白鮑魚、花雕鵝肝 、蝦球等等😋 甜品就推介雪糕，另外佢啲蛋糕太大件如果一開三會好啲，始終自助餐想試多幾種味道 服務都算唔錯，收碟都快，唯一就係啲枱同通道太窄，好彩我哋唔係坐起攞嘢食側邊嗰幾張枱，如果唔係就不停有人喺身邊經過

食物正常，但服務奇差，諗唔到幫襯原因 幾個朋友諗住搵個地方食吓燒肉飲酒傾吓計 諗住搵個唔限時嘅地方食飯，呢間餐廳嘢食正正常常，但係就係服務特別差，同傳統韓國餐廳一樣，有好多小碟嘅前菜，我哋一路食飯亦食完一輪請菜，於事問佢係咪可以再添，佢話可以，於是我哋加咗其中三款，再過咗一陣，我哋今次只係要求加泡菜，店員就話我哋已經加咗好多次唔可以再加，我哋幾個都呆咗，問佢會唔會認錯枱？ 佢話喺入面啲同事同佢講 🤔 於是冇得再加，真心係第一次遇到 ！ 另外成間店舖雖然好似好多人手，但永遠落單一個推一個 ，成餐飯冇人加過茶，好彩我哋係飲啤酒多，最後買單嗰時先叫人加咗一次茶！ 埋單仲搞笑，嗰時九點半末夠，我哋雖然食晒枱面啲嘢，但仲有一支啤酒飲緊，而同埸亦有其他客人，唔係得我哋一台，唔知點解突然之間拎張單過嚟叫我哋買單，夾夾埋埋幾樣嘢，我哋索性唔飲埋單走人 四個人，計埋四支啤酒，每人食咗$400左右，雖然我哋唔算高消費，但係食到一肚氣，尖沙咀咁多韓國餐廳真係諗唔到會再去呢一間嘅原因

因為酒鬼朋友生日，上網搵過任飲啤酒任食嘅打邊爐都多但如果冇限時間真係唔太多好嘅選擇，最後揀咗101 手工涮涮鍋，最後冇失過👍🏽 任食火鍋配料質素算中上，所有我哋試過嘅手工配料都幾好食👍🏽朋友話墨魚滑特別出色！扣分地方係任食牛質素稍為普通咗少少🤏不過佢第一輪會手切牛頸脊先，如果都係任食就滿分🤭 任飲方面滿分💯👍🏽 有自家手工生啤，沖繩Orion 生啤之餘 ，仲有紅白酒、cocktail都係任飲 👍🏽 更加好嘅係，非酒精飲品選擇都非常多，珍珠奶茶都有 👍🏽 服務亦都唔錯，我哋10位坐VIP房，上嘢飲速度好快，少少扣分醬料每位再收$30

十一月仲係咁熱，星期日食完晏晝行過見比夏天人龍短好多，得四五個人，於是就終於第一試氷屋，排咗十五分鐘左右有位。 由於第一次黎，太多味道想試，於是同朋友一人叫咗一個刨冰黎試，分別係伯爵奶茶同抹茶忌廉 。刨冰份量好大下次再去會選擇兩個人share 一份刨冰就夠。七、八月夏天應該真係好消暑，不過伯爵奶茶嗰味唔係好多，抹茶相對好啲，夠味而且食到最底都仲有抹茶糖漿 但係人龍大長同唔可以加單等等都減少再去嘅吸引力😅

牛魔王朋友生日，搵咗尼間任食和牛嘅「大將」，因為我自己已經戒左牛肉半年，揀「大將」一黎朋友可以任食和牛，二黎「大將」嘅任食豬肉係俾沖繩嘅阿古豬 😍 仲要係一人一鍋，啱晒我哋心水 我哋揀咗$428 日本黑毛和牛餐 ，仲發現原來可以加$68 任飲 Orion 啤酒 🍻咁緊係要加埋啦 😍 朋友揀咗芫荽湯底 (+$10）佢話正常可以再重啲芫荽味，於是佢係調味區攞咗啲芫荽再加落去👍🏽 愛荽必試，我就揀咗麻辣湯底 ，比想像好仲要夠麻😋 黑毛和牛每次order質素一樣, 雪花分布均勻，一睇已經肯定真係和牛級數 👍🏽 阿古豬梅肉片好正，真材實料，外表唔講可能會以為係牛，最後連牛魔王朋友都食咗幾份阿古豬 😋 另外我會推介黑魚片好新鮮，薄切入口爽脆 昆布漬雞肉，淥幾耐都係咁滑👍🏽 甜品必食自製窩夫零失敗率 😁 跟足指示做，窩夫熱辣辣微脆加雲呢拿雪糕 😋 不得了 自助吧令我最驚喜，係有日本蛋 👍🏽 打邊爐當然要飲支裝可樂 😍

之前有朋友食過之後介紹我去試下，由於好近公司於是約埋同事一齊去試吓，估唔到公司附近有間環境咁靚嘅餐廳 ，一入到去已經比環境吸引 ，坐低冇耐，就有位妹妹埋嚟介紹餐牌，禮貌加晒分👍🏽 兩個人唔使諗叫咗個$688 二人set dinner 頭盤可以揀四個，當中我會推介薄切吞拿同輕煎醃製劍魚 湯我哋揀咗椰菜花忌廉湯同法式洋蔥湯，湯嘅份量都幾大份，椰菜花忌廉湯夠滑身creamy , 法式洋蔥湯，高湯底清甜，洋蔥湯上擺片麵包，味道香濃 ，鍾意洋蔥嘅朋友真係要試 主菜我哋揀咗烤鱈魚同油封烤鴨，試咗同事少少烤鱈魚，表面微脆，好有魚油香 而我嘅油封烤鴨，份量好大，原隻鴨腿，肉淋且嫩香鴨味，唯一係配菜薯角好似烚薯仔可以改善下 最後甜品我哋叫咗法式焦糖燉蛋，蛋香味足，滑身👌🏻略嫌面層焦糖厚咗少少🤏 單係主菜嘅份量同味道 ，如果喺出邊好多cafe 都起碼收百零二百蚊份，唔好話係西餐廳，會更貴，所以呢度環境服務我覺得$688 值

餐廳位置都唔算難搵，一上樓梯, 一邊係二至三人枱同卡位，另一面係房 ，我哋一行六人，早一個星期訂定枱，餐廳安排咗間房俾我哋👍🏽 一班朋友自成一角
我哋叫咗兩轉大概六、七樣嘢， 最好食會係免治雞肉軟骨👍🏽 我地之後加單都再叫！另外荔枝豬肉卷都唔錯，由於我戎咗牛，朋友分享話厚切牛脷都幾好👌🏻
返而甲羅燒可以唔使叫，味道真係麻麻，六過人share 兩個甲羅燒都食唔曬🫣
另外唔知係唔係我哋坐房，雖然入邊有個服務鐘，但要搵人落單加茶都好難，另外亦都有漏單同第二轉加單等好耐嘅情況出現，呢啲都可以再改善下