過親嚟炮台山、北角一帶，都喺換禮品，咁啱今晚老婆自己有飯局，一支公快靚正之選，就梗喺茶記啦。記得早前睇過食友嘅食評，介紹過一家就晌炮台山站對面嘅「大小姐冰室」，大讚其小炒幾出色，所以，趁機食埋個晚飯先返屋企。一出地鐵望過對面就見到店家蹤影，由於門面光猛，好易認。一室米白為主調，裝修簡約得嚟帶點時尚感，最好喺整潔明亮。以為一字長形睇晒成個鋪，原來餐廳呈L形，入到尾仲有好多卡位，而且，啲卡位好闊落，就算喺茶記，都讓人覺得舒服好坐。好多時餐具、紙巾、調味料都會預設放晌枱旁，但要讚嘅喺排列整齊，很有整潔感。主餐牌以一幅線條簡單嘅水彩彩繪作頁首，小弟幾鍾意，很有清爽感。而裡面有齊皇牌推介、焗飯、特色小菜、炒粉飯麵、有營素食、三文治、多士、各種飲品。有少少圖片輔助，仲中英對照，令啲外國遊客點餐方便好多，可大大推廣茶記文化。不過，食友就話唔好錯過佢哋嘅小菜，揀精選晚餐就最划算，因為已包燉湯（或例湯）及餐飲，而當中可以選一人餐$118、二人餐$228、三人餐$338，部份菜式需額外加錢。同樣有英文餐牌，唔喺間間茶記都會咁做。時下好多餐廳都用二維碼自助下單，呢度都喺，但值得讚喺介面分類比較清晰，易用，轉眼三兩下就落完單。是日燉湯（套餐） 我估大多數人都揀燉湯，多過揀例湯，點都覺得高檔啲。是日喺黨參赤肉雞肉燉湯，湯色濃而不濁，好清澈，入口清甜滋潤，撈兩嘢，足見真材實料無欺場。紅酒牛尾煲 $118 出得街食嘢，梗喺揀啲自己唔識煮，又難煮嘅菜式啦，呢個牛尾煲就合我心水喇。熱焫焫嘅牛尾煲好快就送到嚟，熱氣騰騰，未食都已有啲期待。先試試過汁底，非常香濃，撈飯真喺一流，而啲牛尾份量真喺唔少，睇相都見到堆到成個山咁，而且，炆得鬆化，又甚富肉香，非常好食，此外，仲有唔少洋蔥、青椒等杯配菜，食完成個煲同白飯，真喺非常之飽。大小姐紅豆奶茶 +$9 餐牌無寫明，但可以加錢轉特飲，問過只需加$9，絕對無殺價。而且，啲紅豆多到近半杯咁滯，煲到起晒沙，又綿又清甜；此外，個奶茶亦好夠香滑，揀咗少甜又少冰，真喺啱啱好。整體嚟講，環境比一般茶記舒服，服務方面，都OK啦，都唔會預期好似啲高級餐咁，但上菜速度就真喺好有效率，但最緊要啲嘢好食嘛！

平常都比較少嚟「大館」呢度食嘢，但最近約咗位舊舊舊同學食晏，呢位舊同學都算好老友，當然要好好招呼食餐好啦，又想搵個地方好坐啲，方便傾偈，所以，揀咗嚟「大館」嘅意大利餐廳「Cantina」。 唔使多介紹，都知「大館」喺以前中環警署活化後嘅歷史建築，裡面本身就充滿英式維多利亞設計，所以，走進入餐廳，猶如置身歐洲嘅宮廷式餐廳之內，裝修高雅有格調，天花嘅大吊燈夠晒氣派而不俗氣，如果晚上嚟嘅相信更具情調，氣氛更浪漫。 午市套餐就分為兩道菜（$278 ）、三道菜（$348）、四道菜（$428）嘅選擇，客人可以晌前菜、意粉、主食、甜品中自由組合，彈性頗大。 麵包籃
嚴格嚟講，呢個唔可以叫麵包籃，而喺麵包「袋」，哈哈！雖然無我最鍾意食嘅意大利香草包，不過，兩款麵包：酸種包同麵包條，都好啱食，沾上醇厚嘅意大利橄欖油同黑醋，食味份外地道。 卡布野生蘑菇湯
何謂「卡布」，其實你睇睇英文菜名就知，就喺用咗意大利泡沫咖啡嘅意思，打咗輕柔嘅泡泡喺蘑菇湯上面。舊同學就話個湯嘅菌香嚟得非常之濃郁，飲得出真材實料無欺場，而且，口感柔滑，絕對喺用心製作嘅出品。 Cantina雞肉凱撒沙律
小弟就健康啲，揀返個沙律食吓，開開胃。凱撒沙律一向喺意大利菜中嘅經典之一，看似簡單其實都好多功夫。入口羅馬生菜好爽脆，加咗啲櫻桃蘿蔔，睇起嚟就更靚仔。最正就梗喺加咗好多雞肉同埋刨咗好多大大片嘅巴馬臣芝士啦，令到味道更豐厚好食。 燒豬肉貝殼粉配意式牛肉茴香香腸肉醬
肉醬意粉又喺意大利菜嘅另一經典，所以，就揀咗呢一道貝殼粉，其實撈埋一齊之後，都分唔到邊啲係燒豬肉，邊啲喺牛肉，邊啲喺香腸肉醬，總之混埋一齊食，味道好濃香，又有唔同嘅口感，啖啖回味，而手工做嘅貝殼粉 煮得口感啱啱好 ，口感煙韌，咬落有韌勁，掛滿肉醬，味道一流。 香煎鱸魚柳配菠菜及藏紅花醬
另一道煎鱸魚柳又喺睇起上嚟好簡單，不過食得出大廚嘅手勢，因為魚柳煎到恰到好處，外皮非常之香脆，肉質嫩滑到不得了，老套啲講句，堅喺魚有魚味，魚味濃郁，而墊晌下面嘅菠菜，色澤翠綠，去走晒啲莖位，非常之柔嫩。 意大利芝士蛋糕
我哋兩個都鍾意食甜品，當然第三道菜嘅梗喺揀甜點啦，餐牌中啱啱好提供兩款甜點，正正可以試晒。雖然提拉米素可以揀開心果、榛子
，但我哋都喺想試番經典嘅原味。底層嘅蛋糕吸滿咖啡酒，濕潤芳香，中間嘅馬卡風芝士非常之柔滑，面頭灑滿唂咕粉，有濃濃朱古力香，果然喺經典。 特倫蒂諾蘇卷
另一款甜品真喺唔認識，所以，就更加有期待。捧到出嚟佢賣相好特別，面頭放滿好似「飛佬皮」嘅薄脆，撥開之後就見到蘋果、梨肉、葡萄乾，仲有松子仁砌成嘅果塔，面頭唧咗少少忌廉做點綴，令賣相更好睇。入口啲果肉暖暖哋，好清甜，又有陣陣肉桂香，好食。 Cantina店名原來晌意大利文意思喺「食堂」，而據店員介紹，餐廳嘅位置正正就喺以前中環警署嘅食堂，相信喺指俾啲高級警官用餐嗰啲。講到服務，不得不大讚，真喺好熨貼，好有禮，好多細節位都做到一絲不苟。

過去三年嘅疫情，有啲餐廳捱唔住無奈結業，有啲餐廳就選擇休業，養精蓄銳，到復常時候東山再起，而今晚同朋友到訪嘅「Supergiant Social Dining & Cocktail Bar」屬後者，更推出一系列新菜式及雞尾酒，確喺幾令人期待。餐廳位處酒店三樓，一出電梯就見到餐廳嘅酒吧枱，餐廳唔算好大，一室以黑白為主調，最特別喺白色牆身其實喺雕花嘅磁磚，令到整體感覺好型格、摩登！對住酒吧檯嘅位置有數張餐枱，再轉個彎屈入少少，入面有另一個用餐區，數張餐枱一字長形排列，典雅嘅天花吊燈，再加上燈效都幾有氣氛。先睇睇餐牌有咩選擇，其實款式唔算好多，但務求貴精不貴多，以類別而言，包括滋味小吃、亞洲風味沙律、主菜、配菜及甜點，所有菜式都詳細列明所包含嘅食材，睇落好多款嘅配搭都幾有特色，更加入不少亞洲元素，侍應更話啲食材取自本地一啲高質素嘅供應商，融入咗東南亞口味嘅全新菜單。此外，除咗食物有特色，雞尾酒一環更有啲新搞作，晌枱上棟起個雞尾酒餐牌，就介紹到一系列原創手工雞尾酒喺由雞尾酒專家Lorenzo Antinori以古老中國神話「月神」為題所特製，5款雞尾酒除咗名字有趣之外，更有少少背後故事。第二章（日之燃燒）$128 對於品酒小弟就喺門外漢，等啲朋友品評吓啦。從餐牌所見，呢杯由威士忌、中國黃酒（紹興酒）、糖漿、苦精雞尾酒調酒溝成，朋友就話個味道好特別，風味獨特，幾種酒溝埋好有一種衝擊感。 第三章（長身生不老仙丹）$128 另一杯飲咗肯定唔會長生不老，但卻有一種全新嘅感受，以龍舌蘭酒、青檸汁、接骨木花酒、羅勒、辣椒汁溝成，有份清新，有份香氣，酒精濃度唔高，非常之易入口，感覺十分清新。 風味酸汁醃鮪魚 $158 呢度菜睇嚟似一道魚生沙律，但其實可以話喺一道小食，因為可以搭住啲脆口嘅炸蝦片一同食，一脆一柔，效果喺幾得意。而啲黃鰭鮪魚加咗四季橘嘅汁、意大利香醋，以及少少芫茜、辣椒、黑芝麻嚟調味，口感輕怡清新，確係令人越食越開胃。香烤沙嗲串 $128 講起東南亞美食，又點少得沙嗲串燒吖。呢一道沙嗲串喺以烤雞肉為主角，雖然無講明咩部位，但喺食起嚟雞肉肉質有彈性，口感算幾嫩滑，配以自家製嘅沙爹醬，非常之香濃惹味；此外，仲有啲酸蘿蔔、酸青瓜俾你間吓場，隔住食，當然底下嗰塊炸魚脆片都唔好錯過，我就直頭夾埋啲沙嗲醬一齊食，正呀餵！ 蟹春肉卷 $168 幼身長長嘅蟹肉春卷貴就貴在裡面塞滿晒蟹肉，嗰份蟹肉鮮味都幾突出，而最緊要就喺炸得脆口，又唔油膩，再沾上甜辣醬，其實都幾夠辣勁，甜甜辣辣確又喺幾好食，食住啲炸嘢，再飲吓啲凍飲，或者雞尾酒，喺幾爽嘅。 安格斯小漢堡 $198 當然呢個小漢堡嘅賣點就喺用上安格斯牛，仲要用到最頂級級數，自家手打，一食你就知堅喺真材實料，嗰陣牛肉味好濃郁，充滿脂油香味，配車打芝士、蕃茄、生菜固然預咗，另一亮點就喺塗上韓式燒烤醬，並伴以青瓜漬，所以頗有特色。 香蘭葉鱸魚 $238 呢一款烤爐魚一睇就好覺得充滿泰式風情，以香蘭葉包住鱸魚去烤，鱸魚自然微微多咗份香蘭葉嘅香氣，講到條鱸魚都幾大件，又厚身，出嚟嘅效果魚肉非常之嫩滑，質感細緻，唧啲青檸汁落去，魚嘅鮮味更突出。安格斯牛面頰 $278 牛面頰肉本身都幾有特色，呢一份牛面頰肉以瑪沙拉咖哩去製作，有種印度色彩，而牛肉採用安格斯貨色，當然有一定嘅保證，肉質的確喺好鬆化，已經被炆到好軟腍，睇見有咁多咖喱汁喺碟底，唔使擔心，呢道菜會跟碗白飯，等你可以食盡啲咖喱汁而唔好嘥。烤澳洲羊架 $158 睇過小弟食評都知我都幾鍾意食羊架，有人就話佢羶，其實喺味道獨特。餐牌寫明一客有兩支羊架，羊架都幾大件好厚身，夾咗好些香料醃製，所以燒出嚟好靚仔，由於覺得火候啱啱好，肉質軟淋，騷味唔重；沾上少少薄荷醬，風味更佳，而啲北非小米，非常之細粒，裡面混有提子乾同松子仁，食落又幾唔錯。 烤黑毛豬扒肉 $298 呢一道喺餐牌以外嘅新菜式，用上西班牙黑毛豬，外層烤得焦香，但切開一睇，色澤呈淡粉紅，烤得恰到好處。入口外層有陣陣焦脆感，而肉質卻有點爽爽脆嘅口感，帶點脂香，再佐以味噌牛油，食味更喺一流；此外，唔喺普通通嘅薯菜，而喺做咗啲特色泡菜，令到整道菜色有畫龍點睛之效。 “Moonana” 香蕉船 $118 初頭諗住簡簡單單香蕉船一個，點知單講賣相已經夠晒驚喜，好有禪意嘅大石碗，中間喺雲呢拿雪糕，左右兩邊有焦糖化嘅香蕉肉，然後再加上新鮮士多啤梨、杏仁片、紅莓乾、白朱古力豆，並伴以雜莓漿同糖漿，成件事就唔同晒，分外美觀。味道都好唔錯，尤其香蕉面嘅焦糖做得又薄、又脆口，而將所有食材放入口，口感豐富，味道紛陳。 成晚用餐嘅速度啱啱好，不急不緩，而且，前菜類、主菜類同類別嘅都會做到同步出菜，招呼亦都好熨貼，確喺有酒店該有嘅水準。同啲老友記聚下餐，談吓天，說吓地，懷緬一舊事下，前瞻一下未來，喺一個愉快嘅晚上。

麻甩佬食嘢最鍾意嘅一喺茶記，一喺就大排檔，貪啲小炒夠鑊氣，又平靚正，當然依家仲有少少冬菇亭形式嘅大排檔，但真真正正嘅大排檔真喺賣少見少。今晚同老死出嚟尖沙咀搞個小飯局聚舊，專登揀咗走大排檔路線嘅「港久新街」（取其諧音：港九新界），當然，呢度環境就舒服啲，嘆住冷氣食小炒。餐廳位置好方便，一出地鐵行幾步就到。裡面嘅裝修好有型，尤其天花啲彩色版最搶眼，仲有天花嘅斜板模仿大排檔嘅元素。除咗靠窗一排大卡位之外，裡面仲有好多張細圓檯，啱曬三五知己嚟食飯、吹水。 晌依家搵錢嘅年代，啲餐廳為提高翻枱量，都會設有時限，我就最鍾意呢度棟個牌話俾你聽，唔限時，仲要無開瓶費，無切餅費，唔會同你計到盡，淨係呢樣服務一環我都一定加佢分啦！ 上文都講過，店家定位喺大排檔路線，所以，當然有好多傳統嘅大排檔懷舊小菜、10大招牌菜，此外，仲有啲冷盤小食、潮州滷水、川辣菜式、串燒、炒粉麵飯……等等，非常多元化。 懷舊玉泉 $12
過到嚟大排檔飲飲食食，點可以唔叫支汽水，難得呢度有啲懷舊嘅樽裝汽水，真喺估唔到呢支玉泉嗰樽真喺懷舊到小弟都未見過，淨喺呢點未食呢餐已經充滿情懷！烤生蠔 $10 / 隻
講開抵，相信無乜邊枱唔點呢個，原價$28，依家只喺十蚊隻，見唔少客用盡個優惠成盤烤蠔咁上。好老實真喺抵到無朋友，大隻飽滿，鋪滿大量香蒜、蔥粒，入口蠔肉嫩滑鮮甜，蒜香滿溢。 羊肉串 $28、豬大腸 $28、牛脷芯 $38
再落嚟試下佢哋嘅串燒，最抵死喺每一串都插咗支旗仔，表明佢嘅「身份」，好搞嘢。羊肉切得比較細粒，但燒得保持嫩滑，入口軟腍，有陣陣羊羶香；我呢班老死真喺膽固醇敢死隊，所以，點都話要試一試豬大腸，燒得甘香充滿油脂，唔健康還唔健康，但真喺好食；牛脷食過唔少次，但牛脷芯就比較少，先喺一種爽彈感，再咬落去就有種煙韌咁，加上獨特嘅牛脷香味，呢個真喺無揀錯。懷舊雞蛋焗魚腸 $98
呢道菜真喺好耐無見過，功夫多好多都有做，老死同我異口同聲都話一定要叫。一大砵淨喺賣相都已經好吸引啦，一面烘得金黃，入口表面喺脆脆哋嘅焗蛋皮，裡面喺好嫩滑嘅蛋漿同魚腸，魚腸食落無咩腥味，反而有啲甘腴嘅香味。秘製菠蘿黑醋骨 $108
經典嘅小炒「生炒骨」相信大家都食唔少，呢個有啲相類似嘅黑醋骨，亦喺好想試試佢。比起生炒骨，黑醋骨同樣酸酸甜甜，但就多咗一份醋嘅醇厚感，更大減油膩度，加埋啲新鮮菠蘿，睇都知唔喺罐頭貨，食落令人好開胃。個人覺得送飯一流！ 潮式蠔仔餅 $98
今日真喺麻甩佬作反嘅日子，再嚟一道好食但唔健康嘅煎蠔餅，蠔餅新鮮煎起，自然份外甘脆，唔使多講一眼就知脆到咔咔聲，食落亦唔算油膩，裡面混和唔少蠔仔肉，飽滿肥美，沾上少少魚露更具風味。今餐飯老友大讚好食又抵食，的確價錢唔算好貴，但份量好十足，有相你睇，比起去茶記食小炒還要大碟，加上招呼唔錯，地方夠大，涼住冷氣夠晒爽。

早前同位舊同學傾開近況，原來，我哋呢3年都無出嚟食過飯，是夜就趁老婆返學，得自己一支公，就搵佢出嚟陪小弟食餐飯，兩個中佬撐撐枱腳，就一就我，就揀咗尖沙咀嘅「炯記燒味」，因為舊同學話未試過鵝油撈麵。店內嘅環境就一字長形，好深吓，如好多本地嘅粥麵鋪咁嘅格局，以光猛簡潔為主，配以木枱木櫈。全場大多數喺4人枱，走到最入，就有幾張二人卡位。由於中間通道好闊落，所以，唔會感到好逼。枱上有少少調味料供自由取用，而餐具、紙巾就好似茶記咁，放晌枱下嘅「機關」抽櫃內。揭頁式餐牌，翻幾翻就睇晒有咩選擇，包括：小食、手撕雞腸粉、燒味粉麵飯、招牌太子鵝油撈麵及各類燒味。一般而言，主食類基本上五、六十蚊就有交易，送是日例湯，飲品就另外加錢。烔記三皇盤 $58 我哋一早就已打定喺嗌鵝油撈麵，另外，都想試試佢哋嘅小食，就揀呢款「拼盤」，一次過可以試到蒜香雲耳、蒜辣鳳爪、鹽焗鷄腎。雲耳好爽脆，蒜香味十足；鳳爪辣勁比預期強，帶點微酸，夠刺激；雞腎以鹽焗，鹹香好食。是日靚湯 其實，我哋甫坐低無耐，單都未落，阿哥仔就擺低兩碗例湯落嚟，哈哈。是晚喺煲蓮藕，當然，高質就唔會架啦，但大大碗，亦夠晒老火，天氣涼涼哋，有碗熱湯飲吓喺幾暖和舒服。煙燻燒鵝撈麵 $62 既然食鵝油撈麵，同學就話一於鵝到底，所以，揀咁煙燻燒鵝。鵝油撈麵一大碗，而燒鵝亦一大碟，交足貨，啲鵝睇落幾靚，表皮有光澤，咬落都算脆，肉唔太肥，皮下肥膏唔多，食落既有油香，又有煙燻香，而麵條條條都上晒色，夠均勻，所以，每口都油香滿溢。手撕雞拼豬手撈麵 $56 上次食過醬皇豬手，覺得正，今次就翻兜，拼多個手撕雞，同樣麵就大大碗，餸又大大碟，雖則話我哋各自叫，但啲餸料就一齊共享。手撕雞果然喺招牌嘢，鹹香嫩滑，而豬手炆得極之入味，皮下骨膠原強勁，入口即化嘅感覺，咬落有少少啜口感，層皮又好滑。充滿油香嘅麵條，當然「脂」味無窮啦。熱奶茶、熱華田 +$5 餐牌已講明麵食只送是日例湯，唔包飲品，不過加配都好平，冷熱飲+$5，特飲+$8，小弟就例牌試試熱奶茶，老同學就要熱華田，夠傳統。呢度啲奶茶OK啦，茶底就未叫好醇厚，但至於茶奶比例都唔錯。兩個舊同學，東南地北傾咗成晚，真喺十年人事幾翻身，諗返讀書年代，真喺變化咗好多，猶好嘅喺，大家都算行得食得，身體無恙，小小病痛就梗有，小病是福嘛。

食完個晏晝飯，打算晌「鮮芋仙」食埋個台式糖水先返歸，原本就打算輕輕鬆鬆坐低堂食，嘩！多人到呢……所以，都喺外帶拎返屋企慢慢嘆。 雖然無晌度堂食，但都晌近門口位影咗張室內環境相，想堂食都喺貪佢一大片落地大玻璃窗，感覺夠開揚。照舊，掃描張外賣紙，有咩嘢食，一目了然。芋圓就喺小弟心水，而老婆就鍾情豆腐花。冰芋圓1號 $45
冰芋圓有6款，其配搭都喺大同小異，小弟就揀由芋圓、綠豆、蓮子、珍珠組合成嘅1號。大大兜，打開盒蓋，確喺好足料，而叫得冰芋圓，梗喺要夠凍，裡面有一大嚿冰，天熱時食真喺爽；而芋圓、地瓜圓好咬口，加埋起沙嘅綠豆、鬆化嘅蓮子、QQ嘅珍珠，真喺多重口感，食完涼透心之餘，仲好飽肚。 豆花4號 $42
經典豆花系列可以揀糖水底或豆漿底，心態上後者抵啲，再者老婆鍾意小甜，就更加選擇後者豆漿底啦！打開蓋，一片雪白，無論豆漿，抑或豆花，都好有豆香，豆花口感更喺好嫩滑，而底下有唔少清甜嘅紅豆、粉香嘅芋頭，兩者都喺老婆至愛，所以，佢啲呢個4號仔好滿意。 第一次食「鮮芋仙」唔喺晌香港，而喺晌台中，不過都已經喺十幾年前嘅事。近幾年出唔到遠門，期望下年可以過台灣走一轉。

小弟細過晌石硤尾邨長大，雖然，依家搬離咗多年，但屋企人仲住晌度，所以，一年都有三幾次過嚟。今日，就仲更加晌南山邨、大坑東邨、大坑西邨兜個大圈緬懷吓，因為，中學就晌大坑東讀書，睇到變化咗好多。嚟到南山邨嘅「冬菇亭」，就想起中學放飯時過嚟食車仔麵，不過，今次就無晌「冬菇亭」度食，天氣熱嘛，而喺落咗下面街市旁嘅「一茗堂」（Casa Kitchen），喺老友推介嘅小店。 其實餐廳所在嘅位置都頗為隱蔽，不過，話晒都曾經晌南山邨打滾多年，所以，唔難搵到。而入到餐廳，又好似走進另一空間，你唔會想像到出面喺個傳統屋邨街市仔。餐廳內部就無話過多裝修，都喺簡約平實，然而，樓底特高，又有一邊喺落地大玻璃，所以，空間感強。 餐廳尾嘅一角，放咗啲冷熱清水、調味料，喺以自助形式自由取用。而餐具則放晒晌枱上嘅小藤籃，有餐布冚住，感覺會衛生啲，午市主要都喺以套餐為主，由A到J共有10款選擇，已包餐湯或田園沙律及幾款指定飲品，定價$58-$89，此外，仲有啲加配、轉飲品優惠，最正喺全日都無加一嘛，店員就話餐牌每兩星期轉一次，最有趣喺呢度剔完紙仔，晌近門口嘅櫃枱落單、俾錢，之後等送嘢食嚟，剔紙仔就可以減少口述嘅錯誤。 手打蕃茄湯
我哋兩公婆，最好就一個要湯，一個要沙律，咁就兩樣都試晒。是日餐湯喺手打蕃茄湯，要強調一點，佢唔喺忌廉湯，所以，質感唔會太厚身，但超濃郁，蕃茄嘅香味酸香鮮活，好啱我老婆口味。田園沙律
喺簡簡單單嘅沙律菜加啲車厘茄，再淋上油醋，啲意大利醋頗香醇，啲沙律菜亦都好新鮮爽脆。 柚子汁鮮蝦雜菜沙律 $58
老婆想食得輕盈嘅，所以，揀咗一道沙律作主菜，估唔到都好大份吓，而且，色彩繽紛，還加咗啲櫻桃蘿蔔，並伴有一片自家製酸種麵包。啲沙律菜好鮮爽，個柚子汁亦好清新，柚子味極為突出，而鮮蝦都香煎過，質感爽彈，片麵包邊位好脆口，咬落有柔韌感，微微酸，有個性。 紐西蘭肉眼牛扒 $89
紐西蘭嘅肉眼一向都具質素，雖然無標明幾多安士，但睇落都厚身大份，仲配埋薯條、原粒燒蒜頭、炒洋蔥伴紅酒汁，賣相已好有檔次。先講講主角肉眼，要5乘熟，但感覺已接近7乘，還好喺肉質都仲保持到軟腍，而且，好有肉香，個紅酒汁亦好出色；薯條較粗身，但極之香脆，唔油膩，有驚喜，原粒燒蒜頭唔喺咩新奇嘢，但唔喺家家餐廳願意做，燒過蒜頭粉腍且寧捨香。 水果茶
雖然只喺簡單嘅水果茶，但底幽香，入口確有陣陣水果嘅果香味，再放入半片橙肉，靚仔晒啦。 即磨咖啡
食西餐，嘆杯即磨咖啡就最好不過，加上見到有啲特色甜品，就更要搵杯咖啡嚟襯一襯。咖啡本身都幾香，伴上嘅牛奶亦已經預熱咗，見到啲細節位都唔「馬虎」。 餐牌都有寫+$15可配是日跟餐甜品，而今日可選嘅都喺啲奶凍，反而，近門口有個凍櫃，擺放咗數款甜撻，賣相幾吸引，原來，都只喺+$20就可以加配，平常呢啲甜撻出面啲咖啡店賣到$30、$40蚊件，依家只需$20，更加值得一試。 熱情果芒果撻 +$20
外觀堅有埋啲熱情果籽，撻殼較厚，但都算鬆化，而鮮黃嘅餡心，唔單止富有熱情果及芒果嘅香味，而且，兩者都好平衡，無過邊個搶邊個，當中，清甜香味中又滲出微微酸香，感覺清爽。唯一挑剔位喺個人覺得雪得稍稍過凍，否則，餡心更柔滑。 臨走見門口擺咗啲到會單張，見定價都唔貴，既然堂食都有水準，到會應該都唔差得去邊，順手攞張睇門口。 呢餐「晏仔」，無論餐湯、主菜、甜品都有啲驚喜，尤其呢個價錢，而有咁嘅質素，的確性價比高，果然無介紹錯。

依家都仲未有機會出國去吓旅行，就只好玩吓啲本地遊解吓悶，早前就喺抽到旅發局搞嘅「賞你遊」，呢日就喺跟個本地團遊吓港九，而最吸引喺午餐安排晌酒店食個半自助午餐，比起食啲一圍圍嘅團餐安心少少。而用餐地點就喺「海景嘉福酒店」嘅「海景咖啡廊」（Cafe on M），無諗過佢哋會做團客，聽導遊講，都喺疫情關係作出嘅嚐試，而小弟好多年前就曾經嚟食過下午茶，印象喺唔錯嘅，話晒都喺5星酒店嘛。咪睇啲環境相好似好爆場，話晒淨喺我哋嘅團都成60幾人啦，不過，旅行團安排得幾好，同行嘅團友嘅會坐埋一枱，唔理你一個人報，定兩個、四個報，總之就唔會跟陌生人搭枱，而且，編好晒枱號，對號入座就得喇。其實，餐廳嘅用餐區分好多個區域，我就覺得近酒店大堂嘅一邊就最好，因為夠晒開揚。如果有得揀，我都想坐出嚟，既人少啲，無咁聚埋一齊，空間感又強啲。我哋就叫免費嚟食一餐，如果一般客人嚟食又點計呢？沙律、凍肉、餐湯、麵包、甜品及飲品全自助，主菜就5揀1，有肉、有魚、亦有素食，均一價$208 + 10%，酒店嚟講都算唔貴喇。到周六、日、公眾假，就做番全自助餐！因為只喺沙律、凍肉、餐湯、麵包、甜品喺自助，加上又喺午餐，所以，唔好期望會有太多。席間聽到有啲團友話唔多嘢食，多少喺好主觀，老實講，俾100樣嘢你揀，都食唔到咁多架啦，只喺滿足個貪念而已，小弟就覺得好足夠喇。 沙律、凍肉
先介紹呢部份，半圓形嘅食物枱就放有兩款沙律菜、近10款配料，以及5款醬汁，後面就有啲生果，唔想煩嘅，餐廳提供4款預拌好嘅沙律：薯仔沙律、意粉沙律、藜麥沙律、蘋果乳酪沙律。凍肉部份就有煙三文魚、巴馬火腿、雜錦凍肉拼盤，所以，樣樣都執啲，可以砌出份極豐富嘅頭盤。 呢一道就喺小弟嘅大滿貫頭盤，應該樣樣都有啲，拌沙律菜就揀啲黑醋搭柚子沙律汁，夠酸活清新，又灑咗好多煙肉碎同芝士粉，夾埋啲煙三文，當然鹹香好食啦。而其他食材，都一樣唔錯，好似啲巴馬火腿呀、蘋果乳酪沙律呀，都好好味，加埋啲藜麥沙律，有營兼。 餐湯、麵包
餐湯方面，就只有一款：意大利雜菜湯，麵包就有兩款，都喺比較歐陸式嘅，而晌另一邊甜品枱附近，就有多款甜嘅丹麥酥，所以，又夾咗啲一齊跟雜菜湯享用。 當然，你睇見呢個餐湯配麵包嘅組合，唔喺得我一個人食，而喺同老婆共享。佢就大讚個餐湯好飲，得確用料豐富，湯味酸香鮮活，掂喎；而歐陸式麵包夠咬口，富麥香，丹麥酥亦好酥脆，甚富牛油香，伴湯一樣唔錯。 香煎海鱸配蒜蓉檸檬牛油汁
老婆一眼就相中海鱸，因為佢喺偏食紅肉者，魚類或海鮮就啱晒佢。碟煎海鱸賣相簡單，但勝在做得有水準，外皮勁香脆，魚肉卻嫩滑細緻，甚有魚味，配上呢個香滑嘅蒜蓉檸檬牛油汁，更能提升魚嘅鮮甜味，老婆食完真喺讚不絕口。每道主菜都伴有扒蕃茄、法邊豆、薯蓉，其實，淨食道主菜都好夠飽。煎羊扒配青蔥迷迭香汁
難得有羊扒菜式，就梗喺揀佢啦，由於喺「團餐」關係，一下子要出大量主菜，所以，侍應送上菜式時都講明一致先做到五乘熟，有需要先再幫忙「加煎」。五乘熟就啱晒我啦，一客有兩大件羊扒，份量非常之夠，落刀已感受到啲肉質有幾軟腍，煎得啱啱好，外層有微微焦脆，裡面色澤保持嫩紅，卻唔會滲出半滴血水，而羶味唔太重，沾上青蔥迷迭香汁，食味一流。 甜品
甜品嘅選項唔太多，可以一次過講晒出嚟：泡芙、美式芝士蛋糕、桂花糕、迷你杯子蛋糕、紅棗桂圓糖水、麵包布甸、豆腐花，款式唔算有特色，叫做樣樣都有啲。然而，亮點就晌轉角另一邊，因為餐廳有供應「哈根大師」雪糕，放得滿滿嘅一冰櫃內。 飲品
如所有自助餐，餐飲都喺自助，就放晒晌入門口位，不過，就無咩選擇，咖啡、紅茶、檸茶、檸水，喺咁多。有杯咖啡俾我，伴吓甜品，我都OK架啦。 雖然話甜品唔喺咁多款式，亦喺比較大路嘢，但試得幾多得幾多，先嚟第一碟喺5款小蛋糕。當然最鍾意喺朱古力芝士蛋糕同桂花糕，因為前者晌濃郁嘅朱古力味之下滲出芝士嘅鹹香味，有啲層次，而後者則帶有好清香嘅桂花味，質感夠挺唔會太削，入口清涼。 最後一擊，就梗喺進擊「哈根大師」雪糕啦，揀咗兩款口味：蜜糖香桃及抹茶，兩者都好正，尤其前者，甚具桃香，質感柔滑，再伴一伴少少麵包布甸，夾埋啲雪糕一齊食，確喺令今餐完美作結。 今餐基本上都差唔多試勻所有嘢，其實，我自己就比較鍾意食半自助餐多過全自助餐，因為，始終都食唔得晒所有嘢，半自助嘅話就比較啱啱好，相對價錢又會平好多。

依家飲茶食點心梗喺無時間限制啦，梗一包晌屋企，再唔喺，便利店大把即食點心，當然，想有質素少少，梗喺去啲點心專門店啦，況且，依家真喺開到梗有一間晌左近。近來疫情叫緩和咗，但都未喺可以掉以輕心，故此約食飯都只喺約番啲相熟嘅老友。今回同友人嚟到「點心到」飲餐夜茶，仲揀早少少避咗晚市，快上快落食完就閃。餐廳裝修簡約，木地板、木枱椅，特色嘅吊燈，予人感覺光猛潔淨，主要都喺四人枱，不過放咗唔少隔板鎅為兩張二人枱。此時都喺兩、三乘客，所以，大家都各自走位，坐得隔開啲。枱上已放好餐具、洗碗兜、一大壺熱茶，自己招呼自己。而茶位收$3位，唔算貴，不過，點心紙顯示有飲品提供，不過，就唔知嗌咗飲品，茶位有無得豁免啫。一張點心紙底面兩版，就羅列晒所有點心款式，大部分會喺見慣見熟嘅款式，數數吓，原來都有成50款之多，睇落定價都算相宜。嚟點心專門店最划算喺唔收加一，慳番嘅加一真喺夠食多一款點心。晶瑩鮮蝦餃（2粒）$15 蝦餃同燒賣最好喺可以嗌半份，蝦餃喺點心嘅經典，點都要叫番一客。外皮摺紋清晰，薄透晶瑩，而且，咬落唔黏牙，裡面塞滿蝦肉，重點喺啲蝦肉非常鮮爽彈牙，有水準。原隻蝦燒賣（2粒）$15 仲記得以前燒賣嘅升級版喺加啲蟹籽上面，已經靚仔咗好多，依家仲加晒原隻蝦，又再升一級，兼且爽彈為整粒燒賣加分。而中間嘅豬肉餡打得爽身，亦食得出無溝粉，有豬肉嘅鮮味，真材實料。醬皇金錢肚 $24 金錢肚又喺點心中另一經典，唔喺鳳爪就金錢肚架喇。金錢肚軟腍帶點點爽口，非常入味，充滿柱候醬香，下面就例牌墊咗少少蘿蔔，索晒汁，同樣惹味，而且，嫩滑無渣。黑金流沙包 $25 無論叉燒包、奶皇包、抑或流沙包……熱焫焫嘅蒸包就特別好食。個流沙包拎上手已感受到非常軟熟，咬一口啲流沙餡已澎湃湧出嚟，帶點鹹鹹嘅蛋黃香，確喺好食，不愧喺推薦嘅點心之一。蜜汁叉燒腸 $25 無嗌叉燒包，就嗌番碟叉燒腸。腸粉加多炷菜俾客，都幾搞嘢，雖然啲腸粉皮睇落就未至於話薄到透光，但拉得都算嫩滑，亦有米香，而裡面嘅叉燒就落得無手緊，件件都塞滿瘦叉，啱我口味。普遍上，點心嘅定價比去酒樓平，款式亦算多，雖然無話搞好多古靈精怪、好花巧嘅菜式，但師傅嘅功夫都算紮實，質素都叫穩定。服務亦唔錯，啲店員頗有禮貌，亦好勤快幫忙收籠收碟。

都好耐無食過啲High Tea Set，正所謂偷得浮生半日閒，趁有空就同老友嚟到「Lassana Coffee」嘆一嘆，享受一下悠閒嘅下午茶。其實點解揀呢度，因為定價唔貴就可以過吓High Tea癮，另一亮點喺個套餐可以Free Flow。 餐廳位處摩登傢俬店「Tom Dixon」 旗艦店嘅一樓，經傢俬店有樓梯上餐廳，亦有另一個門口開晌大斜路「嘉咸街」一邊。 走進餐廳，環境簡約，以黑白為主調，襯以唔同嘅藝術燈飾。最正位置喺兩邊對窗嘅座位，大大片玻璃窗，不過，一邊喺吧枱位，唔太方便食High Tea Set，但另一邊喺茶几枱，就啱晒喇。 此外，仲有另一個亮點喺近門口處掛咗好多色彩繽紛嘅乾花，令環境充滿詩情畫意，閒適舒服。 The Grand Feast High Tea Set $398
下午茶套餐為二人用，每日2:30-5:30pm供應，限時90min，但溫馨提示，想試呢個下午茶，喺需要預約。提供6款鹹點、4款甜點及從餐牌中自選任何飲品。而個餐嘅最大賣點喺食物及飲品都喺可以任添，所以，絕對可以當一餐咁食，飲多幾杯嘢都已經抵番晒啦。 成品轉眼送上，型格嘅多陣架擺滿食物，又五顏六色，再加上兩杯拉花得咁靚嘅飲品，實在打卡感十足。食嘢嘅次序就悉隨尊便，不過，小弟就慣先食鹹，後食甜嘅。雜菌鮑魚酥
擺得上High Tea嘅，當然喺迷你版，的的骰骰嘅鮑魚酥，睇起嚟頗趣緻。一口咬落去，鮑魚仔味道意外地濃郁，而個酥皮殼做得好脆口，富牛油香，認真唔錯。 黑松露蟹肉酥
小弟一向都鍾意食蟹，不過，就唔願拆蟹肉，麻煩嘛！所以，鹹點中有呢一款蟹肉酥就啱晒我啦，仲要加埋黑松露醬，真喺無得輸。酥皮殼內蟹肉填得滿滿，鹹鮮味盡出，而黑松露有昇華之效，好食，已諗住一陣再添食。 牛油果鮮蝦撻
近幾年牛油果大熱，自己都有買嚟整三文治，不過，要焗到佢熟成有時都唔易。撻殼好香脆，裡面放滿牛油果粒粒，綿滑如牛油般，而放面嘅鮮蝦既大隻，又爽彈，用料不賴。 煙三文魚多士
多士變咗酥盒，對我嚟講都無乜所謂，雖然煙三文鹹香油潤，本身嘅質素喺唔錯，只不過晌咁多款鹹點中，就相對顯得普通咗少少而已。 巴馬火腿撻
呢個有驚喜呀，巴馬火腿配牛油皮撻殼，喺唔錯嘅配搭，加上啲火月腿幾夠鹹香，口感柔韌;而驚喜位喺撻中加咗一片清甜嘅柑肉，帶微酸，正和平衡番火腿嘅油脂味。 英式鬆餅
鬆餅伴以忌廉及雜莓醬，喺種經典嘅設定。提子鬆餅焗出嚟嘅效果唔錯，外表金黃，有陣陣麵粉香氣，搽上輕盈軟滑嘅忌廉及酸香鮮活嘅果醬一齊食，喺下午茶嘅情趣。 鮮芒果撻
甜點方面，次序就有少少要求，就喺先食啲酸酸哋5咪嘅，之後再食啲濃味、偏甜嘅。先分享呢件芒果撻，雖然款式平凡，但啲芒果又甜又多汁，以質取勝。 雜莓蛋糕
做成半球狀嘅雜莓蛋糕，一身艷紅，非常搶眼，墊底嘅仲有一片富牛油香嘅軟餅。面層嘅雜莓軟漿酸甜醒胃，而裡面嘅慕絲做得非常柔滑，味道富層次。 松露朱古力蛋糕
另一半球狀甜點喺松露朱古力蛋糕，餡料換成外層朱古力軟漿配朱古力慕絲，鍾意朱古力嘅客人就一定喜歡，因為朱古力味超濃郁，帶微微甘苦，值得再添食。 焦糖蛋糕
小弟就一向好鍾意焦糖、拖肥一類嘅甜食，所以，留番呢件焦糖蛋糕做壓軸。面層喺焦糖軟漿，軟滑而甚具焦糖嘅濃香，中間喺焦糖味嘅慕絲，同樣口感柔滑，偏甜就一定架啦，但配咖啡就好合拍。 鮮奶咖啡、朱古力咖啡
友人嘅朱古力咖啡就唔多講喇，總之佢就讚好飲；至於小弟杯鮮奶咖啡呢？同樣都喺出色嘅出品，杯面平滑，拉花線紋細緻，圖案又對稱，再呷一啖，唔需要攪，都感受到奶泡跟濃縮咖啡撞出嚟嗰種均勻，而且，咖啡味醇厚帶果仁香，完全合晒小弟心水。 食完一輪，當然再添食、添飲多少少啦，唔好蝕底嘛，但其實，有部份鹹點、甜點確喺做得出色，又或好啱自己心水，添食就變成必然。雖然，環境唔及啲大酒店般好，但勝在氣氛輕鬆，招呼用心，價位又平一大截，仲可以無限添飲、添食，性價比確喺高。