雖然家下時興北上，去下啲批發式巨型超市，但喺我哋都唔喺咩購物控，更加唔會大批入貨咁買嘢，反而老婆就比較鍾意行吓Aeon，既然咁就順便食埋晚飯先返歸啦，因為Aeon裡面有個美食廣場，有唔少選擇。最後揀咗「牛響度」，貪佢有款熱拌嘅刀削麵。美食廣場嘅用餐區分兩個範圍，一個範圍比較細啲，但就近啲餐廳，另一個範圍就大好多，不過，就要行多幾十步腳程。哪邊都好，整體嚟講，地方闊落，座位又隔得開，加上今日喺閒日，客人唔算多，坐得更舒心。 基本上，麵食分為兩大類：湯麵同拌麵，而麵條可以揀上海麵或刀削麵，至於款式非常之多，此外，仲有多款惹味、酥炸小食，以及一啲手工冷泡茶同汽水。小店仲喺響應「絕膠」食店，減少使用即棄塑膠值得支持。見啲價錢又唔喺貴，所以，一人一碗麵，加個小食，再配支冷泡茶。食牛嘅嚮導，當然主食都揀番以牛為主嘅麵條啦。涼拌青瓜 $22 見啲小食都喺廿零蚊，所以，就試番兩款清爽少少嘅。青瓜唔喺咩貴價嘢，但俾到咁大碟，心理上就覺得好抵，青瓜咬落好爽脆多汁，咪睇佢一點點紅油，其實又唔喺好辣。麻油雲耳 $22 見個名，以為主要喺得雲耳，成品喺有好多青瓜絲，早知嘅話就可能唔點上述涼拌青瓜，慳番少少錢嘛，哈哈！呢碟雲耳都好好食，同樣喺口感爽脆，帶濃濃蒜香。鹵牛面頰熱伴刀削麵 $57 老婆之前晌一間西餐廳試過牛面頰肉，覺得好有驚喜，佢話估唔到呢度都有，所以，就一定揀鹵牛面肉，配刀削面，醬汁方面有3款選擇：拾香椒麻、招牌蔥油、焙煎胡麻，佢就揀咗後者，因為佢非常鍾意芝麻香。將所有配料（青瓜絲、蔥油酥、蔥花、芫荽）跟醬汁、麵條撈勻，的確好食，味道紛陳，口感豐富，而刀削麵食起嚟有韌性，暖暖哋更加啱佢，至於啲牛面頰肉口感鬆化，好有肉香，仲伴有一隻溏心蛋添！慢煮牛脷湯麵 $52 小弟就對牛脷有少少情有獨鍾，加上喺慢煮所以特別有興趣呢一款湯麵，而湯底可以揀牛骨湯、豬骨湯、椒麻蕃茄湯，既然嚟食牛梗係配番個牛骨湯，配料仲有溏心蛋、蔥花、芫荽、時菜，組成一碗非常豐富嘅麵食。啲牛脷入口好柔韌，好有嚼頭，而上海麵口感好好，咬落有韌勁，仲有個牛骨湯濃而不濁，好飲。洛神花樣、白桃果冷泡茶 @$12 啲飲品跟餐價會平1/3，揀咗當中嘅洛神花同白桃果冷泡茶，前者酸香清爽，後者就果甜香甜，相對而言，小弟就較鍾意後者，因為味道香濃啲。餐枱有溫馨提示，將餐盤放番去「返却口」，一人做多一步，啲姐姐都無咁辛苦！依家美食廣場內嘅餐廳不時都有驚喜，唔再喺劣食之地，下次再嚟Aeon，又可以試試其他店呢！

雖然行過好幾次大欖郊野公園，但民安隊圓墩營就未到過，因為要搞小組活動，所以，同老婆預行一次。咁起步前就梗喺食餐飽飽嘅早餐先起步啦，為方便搭車，就晌荃灣嘅「番茄18」搞掂。店內嘅裝修一睇就知打正懷舊旗號，當然，裝修新簇，喺偽懷舊，不過，睇番啲招牌呀、拉閘呀、霓虹燈呀……對我嚟講非常有感覺。不過始終喺茶記格局，座位喺有啲逼。早餐選擇非常多元化，由A至M共13款，定價$31到$43，正所謂豐儉由人，咁當然呢度主打就喺佢哋嘅蕃茄湯系列啦，餐牌更有一角列出蕃茄有咩好處，例如含有豐富嘅維他命、礦物質，又有抗氧化、降低高血壓……等等功效。B. 招牌蕃茄叉燒湯通粉 $40 小弟就梗喺揀佢哋嘅招牌蕃茄湯通粉啦，招牌即喺招牌，單喺睇個蕃茄湯底嘅色澤已感覺好對辦，飲落真喺酸香鮮活，嗰陣蕃茄味香濃得嚟好自然，絕對唔似喺搵茄膏開沖嗰一類，另外啲叉燒都唔錯，幾鬆化；牛乳炒蛋夠嫩滑，有蛋香；牛油厚多士送嚟仲喺熱烘烘，已經收貨啦。佢哋嘅熱奶茶，飲落都算唔錯，茶底幾芳香，茶奶比例亦都啱啱好。E. 雪菜雞扒煎蛋上海麵 $40 老婆就揀過上海麵，佢話好一段日子都無食過上海麵。無論個通粉，還是上海麵，都非常之大碗。啲雪菜無過山鹹，雞扒亦都好大件，又厚身，咬落肉質嫩滑，不過佢就略嫌煎得較燶，但佢佢本身都唔食雞皮，所以無乜所謂，啲上海麵亦都好滑溜，雖然唔肯定個湯底喺乜，但似乎似喺清雞湯，頗香濃，配埋一杯濃郁嘅熱杏霜，佢話呢個早餐好滿足。因為今餐都喺快閃早餐，所以，影相方面無乜特別預備，求其搵手機影幾張，故此，比平常嘅食評寫得簡單啲，無咁詳盡！

又喺大時大節同一大班親戚食嘅家族飯，一向都有親戚做搞手，約時間、揀酒樓，我哋呢啲後輩嘅到時去到就喺食同俾錢。而今次揀嚟呢間「漁灣海港」其實就喺之前曾經食過嘅「百匯軒」，格局完全無變，似乎又喺中式酒樓慣上嘅手法，執咗又開返，大多數都喺逃避下啲債項之類。環境就唔多講喇，都喺一貫中式酒樓格局，雖然有啲逼，但都光猛整潔。而我哋今日揀嘅係叫「喜氣洋洋宴」全包$3,888，菜式好豐富，同埋呢類全包宴一個價定晒，唔使煩兼且比散叫碟頭大。鴻運乳豬大拼盤 個人嚟講我就喜歡大拼盤多個乳豬全體，因為可以試到多啲嘢食，況且唔喺個個人都鍾意食乳豬，大拼盤就俾佢哋有得揀，呢個拼盤除咗乳豬，就仲有叉燒、油雞、豬腳仔、海蜇，高質素又唔算，叫喺樣樣都唔錯。上湯大蝦球伊麵 雖然唔喺龍蝦，但啲大蝦堅大隻，都好有睇頭，況且，大蝦都有好處，就喺唔使剝殼，可以大大啖肉放入口，爽甜彈牙；啲伊麵亦煮得恰到好處，唔會過腍，又碎濕濕。黃金百花球 無炸蟹鉗，都有百花球，其實即喺炸蝦丸，跟大蝦球伊麵有少少重複，但炸嘅始終味道唔同，加上炸得金黃，夠香口，咬落唔油，又爽彈，沾上甜酸醬，食味更好。碧綠蚌片伴彩鳳 個名就改得好靚，簡單嚟講就即喺西芹雞柳，再夾啲蚌片炒埋一大碟，味道OK嘅，食起嚟啲西芹同蚌片都好爽口，而啲雞柳都幾嫩滑。紅燒竹笙雞絲燴燕窩 一圍圍菜通常都有魚翅，不過呢度就有得俾你揀燴燕窩，小弟都戒咗食翅多年，所以，燴燕窩就更加啱我啲，個羹都幾足料，質感亦都唔錯，唔會過稀，亦都唔會過「杰」。蠔皇金錢鮑螺片 過時過節啲菜式當然改名覺得好意頭，甚麼金錢即喺大花菇，啲花菇真喺幾靚、幾大隻，好有菇香，而且咬落爽口；至於啲螺片，亦都炆得都好軟滑，有少少軔勁，個蠔皇茨勾得幾唔錯。清蒸沙巴龍躉 正所謂年年有餘，蒸魚菜式又點可以無呀，呢一條清蒸龍躉睇落去已經覺得好足斤兩，不過，大家都覺得有少少蒸過籠，肉質未夠滑，反而有少少實肉。蒜香脆皮燒雞 雖然炸得比較色深，總之未燶都OK，外皮確喺好香脆，咬落肉質嫩滑，有鮮雞味，一啲都唔失禮，而且，切得夠俐落，唔會食到有咩碎骨。福建炒飯  接近尾聲又喺炒麵飯登場嘅時間，呢一個福建炒飯食落口個飯底覺得炒得未夠散，幸好啲飯粒都喺爽口，不過，略嫌個芡汁太餬，少少影響個口感，餸料亦都算相對少。桃包 啲桃包做得幾好喎，大大個擺滿整個蒸籠，而且包身好軟熟，亦唔太黏牙，內裏喺白蓮蓉餡，唔喺好甜，味道唔錯。如果裏面加埋鹹蛋黃就喺加分位喇。鴻運慶年年 跟桃包同時登場就喺紅豆沙，我哋枱面仲食剩好多嘢，所以，阿姐就幫我哋分好晒一碗碗先上枱，啲紅豆沙煮得幾綿，仲起晒沙，此外，啲紅豆味道亦頗清甜。如果酒家嘅班底無轉嘅話，咁啲食物質素保持到上一次嚟嘅水準，至於招呼方面，雖然今晚好旺，但啲侍應嘅招呼都算唔錯，上菜嘅速度亦都OK，最緊要一班親戚食得開心。

重慶大廈俾人嘅印象就南亞、印度人嘅大熔爐，不過，原來側邊地庫層卻有個大反轉，變成一個好新簇嘅商場「慶坊」，裡面開咗好多唔同特色嘅餐廳。半個月前先同老婆短短地自由行去咗一轉越南芽莊，感覺非常之好，今晚嚟到「Ha Noi」再重溫越式湯河撈檬嘅「味」力。餐廳門面嘅裝修顯得幾骨子，入到裡邊，地方都幾大，好闊落吓，一室光猛整潔，而入門口右邊嘅牆畫，盡顯越南風情，喺焦點所在，此外，仲有少少越南相關嘅裝飾物作點綴，感覺幾唔錯。翻一翻餐牌，選擇都有幾多吓，夠多元化，由越式湯粉、撈檬、飯類、越式法包、米紙卷、沙律、濱海、小食，以及廚師推介嘅精選菜式，仲有啲非常抵食嘅2、4人套餐，轉特飲都唔使加錢，正呀！總之選擇非常之多元化，見啲套餐咁抵我哋就揀咗個平平地只賣$198嘅二人套餐。飲品方面，亦有好多嘢揀，越式特飲啦，沙冰啦，暖意風情熱飲啦，顧及大眾需要，都有啲基本嘅港式飲品。而點咗主食，都可以以優惠價加配飲品。枱面就放咗一啲特色嘅調味醬料，而餐具、餐紙、牙簽等就放晌枱側拉櫃中，排列整齊，自由取用。越式手打炸蝦餅（細）$33 雖然點咗套餐，都有一份米紙卷，但見佢可以追加小食，價錢又唔貴，就好想試埋呢個手打炸蝦餅。炸得一身色澤金黃，咬落唔油膩，外層非常之脆口，裡面就彈牙並充滿蝦嘅鮮甜味，沾上少少甜酸醬，食起嚟感覺更加清爽。安南鮮蝦紙米卷、田園灼時蔬（套餐） 一向對越式米紙卷有少少偏好，尤其晌夏天食，貪佢入口清新，感覺更加涼快。米紙卷十分薄透，捲住生菜、米粉、青瓜、甘筍同大蝦，紥得夠實淨，更撒上白芝麻，入口口感煙韌而清爽，食味豐富，再沾少少魚露，添加少少鹹香味就更正。最鍾意喺伴住啲酸醃菜，令人更加開胃！豬肉卷撈檬（套餐） 主食方面，一客就揀撈檬，另一下就揀湯河，先登場喺豬肉卷撈檬，睇見啲檬粉份量十足。啲豬肉卷嘅賣相，睇落就無乜特別，但食落味道真喺唔錯，香口唔油膩，富肉香喎，非常好食；檬粉之上有大量甘筍絲、青瓜絲同花生碎，再到埋魚露撈埋一齊食，實在清爽美味透心涼。生牛肉湯河（套餐） 講到越南生牛肉湯河，就喺既經典、又傳統嘅湯粉之一。個牛骨湯濃香不膩，清香不渴喉，而河粉份量勁多，好似食極都有，口感夠晒滑溜；生牛肉啱啱好浸熟，所以，入口口感嫩滑到不得了，卻不失肉香。熱蜜糖柑桔（套餐） 老友就揀咗健健康康嘅蜜糖柑桔，雖然我無試，都聞到淡淡嘅柑橘香氣，因為睇都睇得見落咗好多柑桔片，佢就話味道酸酸甜甜，感覺清新又清甜。鮮芒果西米露（套餐） 小弟就想飲啲凍飲，芒果類嘅嘢飲就合晒我心水，所以，揀咗呢杯椰汁底、加入西米、再鋪上芒果粒粒嘅特飲。入口好冰涼，椰子味濃，西米添加少少口感，而啲芒果就好清甜。食咁多嘢都喺二百鬆啲，真喺好抵，啲姐姐又好招呼喎，最緊要嘢食有質素嘛！

舊年就到訪過「萬麗咖啡室」，睇番啲食評，原來剛好一年前嘅事，當時就為通番關嚟食餐好嘅。今次見到餐廳由依家到4月尾做緊西班牙主題自助餐，西班牙一向都頗有特色，加上又做緊啲優惠，所以，同老友嚟嘆番吓。
眨吓眼又一年，個環境當然無乜點變啦，柔和燈光加寬敞空間，依然予人感覺舒適，所以，整體感覺幾舒服。而食物區都喺二字左右排開，集中晌一個範圍，唔使左兜右轉，亦都比較方便。上文都講，今次自助餐以「西班牙」為主題，四周嘅牆上都貼有唔少西班牙嘅裝飾，而菜式方面就有唔少西班牙特色菜。星期一至四晚計，成人收$808，星期五至日及公眾假期成人收$848，另收10%服務費，晌官網網上商店預訂有75折優惠。如果想再食平啲，可以考慮自助午餐，同樣供應西班牙主題自助餐。冷盤
先講講冷盤同沙律，就晌食物區嘅頭位，選擇夠多喎，唔喺一般嘅凍切肉腸、莎樂美腸。有好多款都喺主題菜式，包括西班牙蕃茄凍湯、數款西班牙醃肉腸、一款牛奶芝士及一款羊奶芝士、西班牙沙甸魚、醋漬鯷魚、西班牙蕃茄麵包、煙三文魚，仲有啲橄欖呀、酸瓜……等配料。Joselito西班牙火腿
而一入門口就見到有侍肉師傅即場將西班牙火腿切片（限星期五、六先即場為客人切片），薄薄一片，仲要砌到好靚仔。唔講真喺唔知，原來「Joselito」呢個西班牙品牌已有150年歷史，單喺呢點，啲火腿理應已夠晒質素啦。沙律
沙律吧陣容夠晒鼎盛呀，4款沙律菜、大大少少近20款配料，如鮮蝦、煙肉碎、露筍仔，配以4款自家調製醬汁，唔鍾意嘅，可以簡簡單單淋啲油醋，但我就鍾情蜜糖芥末汁同牛油果醬。此外，仲有款預製好沙律，包括意粉沙律、煙鴨胸沙律、蕃茄水牛芝士沙律、烤和牛沙律、海鮮沙律，喺唔想煩嘅懶人之選。將最心水、最精選嘅沙律同冷盤放埋一齊，造就小弟呢碟超豐富頭盤，樣樣都有啲，夠晒多元化，色彩又夠繽紛，睇見都已經好醒神。幾款主題西班牙食材，果然有質素，尤其啲火腿，唔好見大片白色「肥膏」，出奇地無乜油膩感，反而有陣陣脂香，鹹鹹哋嘅味道，正呀喂！幾款預製好嘅沙律亦都好食，食完胃納大開。海鮮
食自助餐最回本嘅一定喺啲冰鎮海鮮啦，今次所見，就有法國麵包蟹、澳洲青口、長蟹腳、翡翠螺同凍海蝦，佐以幾款醬汁，如雞尾汁、辣芫荽汁、紅酒醋同蜜糖蕃茄汁，都幾特別。就目測所見，呢啲回本嘢好搶手，但成晚都見補貨甚快，完全無間斷供應。刺身、壽司、卷物
就晌近門口，凍海鮮傍，小弟平常比較少晌自助餐度食壽司，因為自助餐所提供嘅一般都喺啲大路貨色，但偶爾見到質素高嘅都會試試。今次就見啲帆立貝同八爪魚好靚，仲有一款炙燒和牛壽司好有興趣。冰鎮海鮮又喺樣樣試啲，拎滿一大碟，再加埋刺身嘅帆立貝同八爪魚，做成一份海鮮拼盤咁。每一款都有其獨特嘅鮮甜味，麵包蟹好多膏喎，蟹腳鹹鮮味十足，蝦肉同螺肉又爽，啲帆立貝果然喺刺身級，又大件，柔嫩鮮甜，真喺「鮮」入為主。老友原來都幾鍾意刺身、壽司，趁佢拎時我就搭單，再食啲帆立貝同八爪魚，但重點喺想試件炙燒和牛壽司，的確好正，壽司飯捏得緊致卻唔死實，燒和牛既有肉味，又帶點油香，正呀喂！湯品
呢度嘅湯品喺亮點，因為佢哋有提供是日燉湯，名稱就無講，但湯內睇得出有好多料，加上上次飲過確喺正，今回就當然翻兜。此外，仲有1中1西嘅「例湯」，前者寫住龍蝦菜湯，其實似喺加咗龍蝦肉嘅碗仔翅咁，後者就喺南瓜忌廉湯。覇氣咁一次過試咗3款湯，包括西班牙蕃茄凍湯、南瓜忌廉湯同燉湯，可謂各有賣點。凍湯好少飲，入口清爽感極強；個南瓜忌廉湯亦都打得好滑溜，滿滿南瓜香味，等至於個燉湯，絕對喺高質量出品，飲落非常之清潤，味道醇和，可以講喺飲得出真材實料無欺場。即煮粉麵
晌自助餐嘅即煮粉麵、即煮意大利麵……等等，都一律少試，因為太易飽肚，不過，偶有例外，就好似今晚咁，供應嘅喺馬來喇沙，仲要配半隻龍蝦，夠晒豪氣，又合晒小弟心水，就算易飽肚都想試試，好彩老友都鍾意，嗌一客兩個人「些牙」。個喇沙湯底入口真喺唔失禮，比一啲主打賣東南亞菜嘅餐廳所出品唔差得遠，香味四溢，而麵底可以揀油麵或米粉，識食當然梗喺揀摻摻啦，至於隻龍蝦啲蝦肉好爽口，充滿鮮甜味，加上成嚿蝦肉好易起出嚟，啖啖肉，食得超爽；此外仲有啲豆卜、芽菜同雞蛋作為配料，製作絕對唔馬虎。咖喱、熱盤、烤肉
另一個「長區」就喺擺放多種熱食嘅食物區，晌呢度有好多精彩美食，先講重點，就喺多款西班牙主題熱盤，包括最大亮點嘅西班牙乳豬、西班牙海鮮炒飯，以及西班牙香菇炸丸子、西班牙薯仔蛋餅、西班牙欖油蒜香蝦、香烤西班牙腸、香烤豬肉串，淨喺呢幾樣已好精彩，仲有新鮮蒸焗波士頓龍蝦。以其餘嘅 熱盤，一口氣介紹埋先，計有印度咖喱雞肉、印度皇飯、鑊炒和牛粒、烤爐魚、炒蜆、咕嚕肉、煙肉芝士焗蠔、紅燒鮑魚、烤牛肋排、焗薯、炒野菜、龍蝦茶碗蒸、海南雞、蒸大鱔……等等，都喺睇相寫返出嚟，可能都有遺漏，總之，可以講喺種類繁多。講真， 邊可能試得曬所有嘢， 所以去到呢個大類都喺重點出擊，揀3、5、7款心水嘢嚟試。雖然喺咁，都砌咗成大碟「主菜」，蒸龍蝦當然喺以回本心態拎嚟食，不過，啲龍蝦好食就值得再回味；而西班牙乳豬非常之脆口，肉質好爽，香菇丸子咬落唔油膩，外脆內軟，味道幾特別，蒜香蝦充滿香蒜味，自然惹味十足，西班牙炒飯都做得有水準，至於其他嘅熱盤，就都樣樣拎少少嚟試下。慢煮牛柳
晌熱盤類嘅篤篤最尾，仲有一個即做慢煮牛柳嘅檔口，點解要特別分開嚟講呢，因為，師傅會直頭好似啲高級餐廳咁做成一道主菜咁，墊上甘筍蓉再配烤青椒，賣相非常精緻。的而且確，牛柳入口肉質細緻嫩滑，肉味不俗，
而墊底嘅甘筍容 亦都打得柔滑非常，清甜好食。生果、甜品
食得幾飽都好，點都要留返10%空間進擊甜品嘅，呢度嘅甜品都好有亮點，擺到琳琅滿目，尤其今次更加咗數款西班牙主題甜品：西班牙油條、香橙米布甸、聖地牙哥杏仁蛋糕、巴斯克芝士蛋糕，此外，其他款式如朱古力紅莓慕絲蛋糕、天使蛋糕、香桃批、焦糖牛油蛋糕、桂花啫喱、意大利芝士餅、紅棗雪耳糖水、曲奇、蝴蝶酥、朱古力噴泉、糖果……等等，絕對滿足到所有甜魔嘅喜好。挑戰甜品時段就一口氣揀咗9款，砌成一大碟甜品大拼盤，老友睇見都覺得我瘋狂，唔喺講笑，小弟堅喺食得晒。好難逐一評價，但整體而言絕對無令人失望，滿足晒嗜甜嘅心癮。而個人最推薦就喺巴斯克芝士蛋糕、朱古力紅莓慕絲蛋糕、天使蛋糕、香桃批、意大利芝士餅，真心正呀！XTC Gelato、即做迷你窩夫
XTC呢個品牌嘅雪糕比較少接觸，進擊完個「甜品拼盤」，真喺差唔多到頂，但點都貪心哋想試埋個窩夫拼雪糕，再搭啲生果。窩夫雖然攤涼咗，但新鮮製作關係，仲好脆口，仲喺綠茶口味添。雪糕就揀咗芒果雪葩、港式奶茶同開心果，個人覺得奶味無咁重，但3款嘅本身味道都好突出。飲品
自助餐本身已包一杯果汁或汽水，然而，晌肉品自助區，就放置兩大部咖啡機，有多款意式咖啡供選擇，另一邊就放有檸檬片、鮮牛奶、數款茶包供自由取用。此外，另加$188 就可以無限暢飲果汁、汽水、精選啤酒、氣泡酒及紅白酒。由頭食到尾，食吓傾吓，抖吓又再食吓，今日狀態唔錯，夠持久力，所以，真喺食咗唔少嘢，可謂大滿足。順帶一提，呢度啲招呼幾好，侍應有禮，服務殷勤，收碗碟都好快手，補充食物又足。

都好耐無同老死發哥出嚟食飯聚舊，就啱佢抱恙初癒，話點都要食番餐好嘅嚟安慰下自己，所以，揀咗過嚟「荃灣廣場」嘅「Homeland」，因為住晌荃灣嘅在地老友推介，故對餐廳吧嘅質素胸有成竹，加上出咗個薄餅二人套餐非常抵食。餐廳門口好大，入到裡面，唔止環境闊落，樓底亦高，裝修摩登，走色澤鮮明氛圍。最吸晴就喺一面牆身嘅彩繪，以及中庭位置嘅乾花天花板。雖然只喺周三晚，卻喺有9乘滿入座率，幾時都話，只要食物做得有水準，就唔愁無客路。餐牌印刷精美，採用二維碼落單自然唔喺新鮮事，但亦有高低分野。喺介面上設計比較清晰，而裡面選項亦做得細緻、多元化，就以甜品為例
，可以揀後上，喺一個貼心嘅選項，唔使啲嘢一次過堆晒嚟。上文都提過我哋嚟食個個薄餅套餐「PiPi Pizza套餐」（$388/2位），除此之外仲有「新奧爾良海鮮拼盤套餐」（$628/2位及$1,180/4位）、「招牌惹味啤酒雞套餐」（$788/4位）。每款套餐都包埋餐湯、沙律、主食、飲品，亦提供升級及追加優惠。如果套餐唔啱食，散點都有好多選擇，所以順便介紹埋散點嘅主餐牌，包括沙律、湯品、前菜、拼盤、薄餅、飯品、意粉、主菜、兒童餐、甜品……等等大類。而飲品方面有另一個餐牌，同樣選擇非常之多，包括港式飲品、果汁、汽水、特色咖啡、活乳酸、梳打、花茶、特色朱古力、果茶、芝士奶蓋系列……等等。睇得見飲品選擇都非常有特色，所以，我都升級配咗一杯芝士奶蓋飲品。順帶一提，如果想食得抵啲，除咗套餐之外，仲可以考慮下早鳥時段或者貓頭鷹時段嚟幫襯，不過，個八折優惠應該只限於散點餐牌。餐碟、餐具、餐紙、清水就放在枱邊一傍，最鍾意喺啲餐碟，碟面嘅圖案非常精美。餐湯配蒜蓉包
餐湯可以揀廚師精選濃湯或法式鮮打龍蝦湯（+$18），香港人一向多心，所以，就梗喺每款要一客試試啦。前者今日喺蕃茄濃湯，質感啱啱好，蕃茄味好香濃，但又唔會話得個酸字，確喺唔錯；而後者龍蝦湯入口鮮蝦未突出，而且裡面有少少龍蝦肉，堅真材實料，無欺場，加上質感滑溜，絕對值得加錢升級。蒜蓉包都好食，有蒜香，包身鬆軟，沾一沾啲湯嚟食，別有一番滋味。慢煮雞胸日式胡麻沙律
特色沙律方面，有4款選擇，慢煮雞胸始終喺最穩陣，所以就揀佢。先講講啲沙律菜，可以講用料新鮮，入口爽脆，淋上胡麻醬，芳香好味，啲慢煮雞胸處理得非常好，咬落好腍好滑，再者啲雞肉夠新夠鮮甜，唔會有一陣陣雪味。秘製北京填鴨薄餅
薄餅又喺有4個選擇，其實各有特色，都有啲難落手，不過，老友就覺得中西合璧有趣啲，就揀咗北京填鴨，面面鋪咗好多青瓜絲及大蔥絲，甚有食北京填鴨感，再者，批面確有唔少鴨絲，配合埋鹹香嘅芝士，個配搭又幾唔錯喎，此外，睇到芝士有兩隻色，可見應該喺用上車打加莫沙里拉芝士，有誠意呀，而個批底亦脆得嚟有咬口。香煎澳洲安格斯肉眼扒配薯菜 +$88
本來就想試意大利飯，因為最考師傅手藝，不過，老友就話好想食扒，所以，升級試試店家嘅肉眼。外觀燒得幾靚仔，甚具焦香感，選上7乘熟，切開睇睇，幾唔錯，仲帶有粉嫩嘅紅色，咬落唔及牛柳咁腍，但好有肉味。配碟嘅薯菜，薯蓉打得柔滑，內裡卻保留少少粒粒口感，而蔬菜用上意大利黃瓜，又喺誠意嚟。蜂蜜紅棗茶
老友就好想整杯凍飲，但剛好番又未叫足，穩陣啲飲杯熱飲之餘，仲揀咗杯好潤嘅紅棗茶，佢就話好清潤，而且，幾濃紅棗味，滲出淡淡蜂蜜香，唔錯唔錯。玫瑰荔枝果肉芝士奶蓋 +$24
小弟一向都幾喜歡台式飲品，就梗喺要試試芝士奶蓋啦，大大杯一身艷紅。先啜吓上層奶蓋，絲滑而淡淡鹹香，再啜下層，玫瑰味好出，其實有少少偏甜，不過，混埋啲芝士奶蓋，又幾平衡，底下仲有少少清甜嘅荔枝果肉，啱晒我。芒果荔枝手工芝士蛋糕 $48
從甜品類所見，如果散點要$68，依家就算喺慳少少。賣相幾唔錯，花咗啲心思，加咗啲點綴，但最緊要喺味道，餅底夠薄，而質感非常之軟滑，荔枝味嘅芝士蛋糕好食，鹹鹹甜甜咁，餅面仲加咗少少芒果軟漿。整體而言，食物、環境都稱心，招呼又好，店員有禮又細心，定價都親民，若非升級呢樣，升級嗰樣，連埋加一，每人二百鬆啲就可以落樓。

正準備由「寶萊街」行去黃埔港鐵站，偶然望入條巷仔見到呢一家小店「覓•甜」，除因為晌條巷仔中佢顯得燈火通明之外，更寫住手工甜品，就幫襯吓買咗兩客糖水返屋企食。雖然無入到鋪內，但從外面都睇到入面喺點，鋪內好細，望落都喺得幾張枱仔，而外面有啲立食位，因為明顯啲櫈點都唔啱高度俾人坐晌度食。而所以食物選項，就晌晒鋪外嘅磚牆之上，一眼睇晒，仲圖文並茂。芋圓陳皮紅豆沙 $26 呢一款甜品喺本期特價，不過，都只喺比正價平兩蚊。拎上手時，已覺得好足秤，揭開撈兩嘢，絕對喺真材實料，碗內好多紅豆，唔會得啲糖水，加上有微微陳皮香，而啲紅豆好清甜，且煲得好軟綿，再者，啲芋圓軟糯煙韌，每樣嘢都好食。花生麥米粥 $20 麥米粥呢款懷舊糖水，依家都好少鋪有做，真喺賣少見少。成碗糖水都顯得一片金黃，同樣真材實料，睇都睇得見有好多麥米，而且，啲麥米好有咬口，加埋混有唔少花生粒，整體確喺唔錯。呢個價我都覺得抵食，點知臨行到去黃埔站時，有家「一豆花」，所有特色豆花賣$8，其他傳統港式糖水都喺$9-$13，真喺平到唔信，下次再嚟點都買碗豆腐花走。

呢間茶記極之隱蔽，一來佢位處工廠區尾，出咗地鐵嘅人都極少向呢個方向行，二來一睇就知喺攞廠廈食堂牌，所以，門面無名無姓，好易行過都唔知。都喺街坊通報，先知有間早餐只喺賣$22嘅茶記，應該算數一數二平通港九新界。睇格局唔似茶記，較為似家西餐廳，一來啲櫈比較西化，二來好少茶記啲位排得咁疏，所以坐起嚟比一般茶記嘅感覺舒服好多，招呼方面，朋友就話麻麻地，不過今次我就覺得無乜太多特別問題，況且出面啲茶記，一般嘅招呼都喺普普通通。早餐選擇可以講喺分為4大款式，最平嘅$22，最貴都喺$30，一張餐牌仔睇晒，而B款喺日日都唔同，當日就喺雪菜火鴨絲通粉 / 米粉，配多士煎蛋。仿鮑絲米粉配煎蛋、多士 $22 初入去無為意仲有火鴨絲選擇，否則，老婆話會要佢。至於碟米粉，睇啲湯頭色澤，味道絕對唔會淡茂茂，仿鮑絲就唔喺好多架喇，但米粉份量就絕對唔少，加埋一整片多士、炒蛋，肯定夠晒飽。火腿絲通粉配滑蛋、多士 $22 小弟就要火眼絲，一心嚟都喺求求其其，填飽肚為本啫，咁嘅價一早無預太高期望。不過，算喺唔錯，至少通粉唔會煮過籠，炒蛋都算滑，份量夠晒足。熱奶茶、熱檸水 呢兩樣喺我哋晌茶記嘅慣常選擇，小弟杯奶茶OK啦，唔叫好好，亦唔太差嘅，只喺未叫好滑咁啫。老實講，咁嘅價真喺無咩要求啦，嚟得嘅都志在天飽肚啫。

帶啲朋友去石硤尾嘅「美荷樓」參觀，了解下香港第一代公屋嘅變遷，跟住順路過嚟「公和」食過輕怡下午茶。逢喺星期六、日，呢度都好旺，不論正鋪，還是隔離新鋪，都坐滿晒人，加埋啲外賣，賓墟咁嘅場面。我哋見巷仔嘅露天位有空枱，「嗱嗱林」掗番張，反正都喺旋風式咁食完就走。餐牌，一版紙睇晒，依定賣嘅食品非常之多，除豆品類，仲有好多小食，連炒麵、烏冬、粥品都有。豆腐花 $13
豆腐花始終喺公和嘅熱賣，相信寫嘅人都唔少，所以，我就唔特別多講。總之，質素保持到，基本都唔會令人失望。枱上已經放咗黃糖，再由客人自由添加。叁拼 18$/6件
一客有齊豆腐、豆卜、魚腐，各兩件，個人覺得釀豆腐比較好食，一來豆腐滑，二來魚肉彈牙味鮮；豆卜、魚腐都OK啦，前者香口酥脆，後者外脆內軟，喺入口比較油咗少少。瑞士汁豬手 $22
一客標明有4件豬手，賣22蚊，價錢都OK，隔離枱個阿姐都推介我哋試吓，所以，就即管一試。啲豬手炆到好化，輕輕一咬就開晒，皮下都有幾多骨膠原，個瑞士汁味道都幾濃，甜甜酸酸咁。豆腐奶凍 $18
初頭諗住十零蚊碗豆腐花都有成大碗，咁賣到18蚊嘅奶凍應該有返咁上下，但原來喺好細樽，真喺兩、三啖就食晒。老實講，食落我就覺得奶味重過豆味，質感方面都算OK，嫩滑並且夠挺身。嚟呢度都喺食情懷多過食物嘅質素，咁當然佢哋嘅嘢食又唔喺差嘅，屬中間啦，不過，揀奶凍就不如食番豆腐花，性價比高啲。而全場都好爆，招呼就無乜架啦，食嘅人都喺快上快落，我哋都喺一食完就閃。

早前挑戰完鳳凰山，今次就輕鬆啲、短啲，由美孚起步上馬騮山，再沿引水道直剷到去大圍，輕鬆行到落大圍剛好喺放飯時間，由地膽朋友帶路過嚟「田心村」嘅「榮發」，喺一間村屋茶記，「快閃」食個午餐。餐廳佔上村屋兩個單位，有室內，有室外，不過，室外位全喺啲吸煙區。走到入裏邊，其實，睇落一啲都唔似村屋，裝修都算幾骨子，不過，喺逼啲。阿姐叫我哋用二維碼落單，所以，初時唔知餐牌就攝咗晌枱邊暗格，不過，都做咗啲截圖出嚟俾大家參考下。但就無影晒所有人食嘅嘢，只喺影 側邊兩位啫。鮮蝦腸 $22 睇樣都幾OK架，拉出嚟嘅腸粉皮唔算話好厚，口感幾滑溜，都透透哋睇到裏面嘅鮮蝦，啲蝦好大隻，又非常鮮甜，質素真喺唔錯。燒肉油雞米粉 $55 睇店名就知燒臘喺佢哋嘅賣點之一，所以，朋友醒目揀咗呢個午餐，又試到燒肉，又試到油雞。我都夾咗嚿燒肉試試，卜卜脆，鹹香，又唔太肥，而佢就話啲油雞都做得好好味，淡淡豉油香，皮爽肉滑。豉汁蒸鯇魚飯 $60 我都喺揀食午餐，不過，就揀咗個蒸鯇魚，件鯇魚都幾大嚿，而且，煎嘅火喉啱啱好，好嫩滑，又無過籠，惹味嘅豉汁基本喺無得輸，此外，啲飯多到成座山咁，差啲食唔晒。不過題外話，喺度食蒸餸嘅話，最好問一問要等幾耐，因為如果啱啱要等新一輪整出嚟嘅蒸餸，就好似我咁等足20分鐘，當時侍應無交待吓，知咁耐就改食其他嘢。由於今次無打算寫食評，所以啲想影得hea，連餐飲都無影，不過，呢度啲奶茶唔喺好得，茶味有少少澀，無咗份醇厚感，同埋茶奶唔平衡。招呼方面，一般般咁啦，喺上菜一環有啲亂！原本諗住呢餐快閃，結果快閃唔得去邊。