話說上星期表姐們同表姐夫約食飯，建議去荃灣出名既三坡坊食大牌檔。求之不得添啦！因為一直都知嗰度有好多正野食。 約左喺一間裝潢幾靚既大排檔，有別於傳統坐街邊既。宜家天氣熱，又成日落雨，所以有得坐室內絕對係喜出望外！ 室內裝潢唔錯，幾有特色，寫曬菜名既牌掛曬喺牆。同埋原來有兩層，一大班人黎都夠位。 有位好熱情的伙記招呼我同家姐入去。表姐同表姐夫發板。前菜黎左一碟生腸魷魚雞腎。都幾好食，夠彈牙，汁都夠味。 叫左碟臭豆腐，細細件，一口一啖。唔記得影相，不過味道還好。 呢度係有新鮮既海鮮食既，聽嗰位熱情既伙記（原來佢係經理，叫DEE哥）講要預先講定佢地會留貨。佢今次幫我地預留左蟶子皇、鮑魚同埋蟹。我心諗：今次有口福了哈哈哈！ 蒜蓉粉絲蒸蟶子皇 實唔會伏既煮法。碟餸一上枱就已經聞到好香既蒜蓉味。不愧係蟶子皇，一望就知啲蟶子夠曬大隻！食落彈牙，將蒜蓉連同入曬味粉絲一齊食真係好滿足。 陳皮蒸鮑魚 本人一向麻麻地好蒸鮑魚，因為我總係覺得蒸既鮑魚冇味，唔係咁好食，好似食緊嚿冇味但有𡁻頭既東西。但今次呢碟蒸鮑魚有驚喜！首先嚿鮑魚好入味，啲汁沁到入去，所以𡁻緊都有味。其次個汁先係重點，令到嚿鮑魚提鮮左！ 海鮮一浪接一浪，之後送上避風塘炒大蟹。 我地五個人食兩隻大既，夠曬數。我本身都唔食得辣，但係呢個蟹真係炒得好香。連我同唔食得辣既表姐都食到舔舔脷！蟹腳啲肉又多又彈牙，味道夠惹味，連啲䓤都炒得好好食。 啫啫通菜煲 通菜夠新鮮好翠綠，炒得一啲都唔老，恰到好處所以食唔到菜渣。蝦乾大大隻，重要一啲都唔似平時食嗰啲咁乾，食落係有肉架！肉碎更加唔曬講，炒得好食，再加埋啲魷魚仔，一個字： 鳳梨炒黑豚肉 即係咕嚕肉，不過用黑豚肉整。咕嚕肉炸得剛剛好，有肉汁，唔會過火太乾。甜酸汁味道都剛剛好，唔會偏甜或酸。配菜洋蔥同菠蘿都好好味。 食到呢度再加上飲左啲酒同梳打水（係泰國象牌黎架）其實都好飽，點知重有一碟鼓油皇炒麪！ 開頭夾少少諗住試下，但係一食就愛上！佢地係用生麪炒，完全冇梘水味，而且好彈口。鼓油應該係廚房特製嘅，有少少甜味，令到成碟炒麪升左LV！有別於一般既炒麪，呢度用魷魚仔做伴菜，令碟麪更有口感。不得不讚既係側邊既芽菜同䓤同炒得好出色，芽菜冇草青味。全部食材連同啲麪一啖擺入口，真係令到原本已經好飽既我食唔停口。 呢度既豬油撈飯都出名架，唯有下次再試。 呢餐係表姐夫請客（多謝曬）所以我唔知幾錢。不過我諗價錢雖然應該唔平，但我真心覺得物超所值。因為呢度既每一碟小菜都畀我感覺師傅係用心烹調，而且用料上乘。從細微末節可以睇得出廚師同老闆既心思係想炮製真正美味既佳餚畀食客，所以我都特登想打篇長既食評去讚揚同介招呢間值得推介既大排檔！ 下次一定會再同一大班朋友黎試埋其他未食過既小菜！

琴日早放工，呢幾日睇新聞都心情低落就上去米珠連網搵下D優質小店幫襯下平衡下心理。
老二花廳一直都ON MY LIST，不過疫情前都一直難BOOK位，琴晚打電話去問下居然有位，就即刻同男友上去啦。

雖然店舖在舊唐樓，但一打開門卻是別有洞天。裝潢一如網上的圖片一樣，很有個性。店舖不大但樓底高，唔會俾人有壓迫感。有露台位，吧位，同埋我琴晚坐既靚靚矮枱位。
MENU食物不算多，意粉果D都係得三款，我反而被小食吸引。見有忌廉蟹餅，芝士魚柳等等，就叫左個小食拼盤。之後見MENU推介燒春雞，就叫一份(半隻)試下。燒春雞係拼薯角，見小食拼盤又係有薯角，就膽粗粗問下靚女侍應可唔可以轉其中一份做薯條XDDD

靚女即刻幫我問廚房，無問題!!
飲品到先，朱古力外表不錯，可惜奶味OVER左，得好少朱古力味。 LIME SODA，不過不失~欣賞杯野不會過甜。
等左15-20分鐘左右，春雞同小食拼盤到!!廚師很貼心，兩款食物一齊上，等我地可以一次過享用所有食物。

春雞熱辣辣，皮脆肉嫩，有驚喜!! 雞皮仲搽左蜜糖，好好味!!! 雖然唔算好大隻，但配菜既沙律菜、薯條同D黑松露沙律醬 (送埋醬好好)份量都OK，而且好味。
小食拼盤有忌廉蟹餅、芝士魚柳、雞翼同埋薯角。份量都幾多~雞翼同薯角好味，食得出係新鮮煎同炸，唔係煮左好耐果D。可能廚房太忙，蟹餅同芝士魚柳就未熱曬，入面係凍的。同左靚女侍應講，佢即刻幫我拎番成盤去廚房。

等左20分鐘左右，靚女拎番出黎。廚師從新俾過曬D蟹餅同芝士魚柳我地。因為本身我地都拎走左2件，以為會得番剩低的。好有人情味呀!!!果刻好感動!!  熱辣辣既忌廉蟹餅同芝士魚柳好好味!!炸皮唔厚，脆卜卜。魚柳唔係一夾就鬆，幾有口感。忌廉蟹餅夠味，唔會淡淡的。 不過小食拼盤剩係送茄汁，如果可以送埋他他醬或者其他醬配番蟹餅同芝士魚柳就更加好啦! 因為我地用黑松露沙律醬點芝士魚柳食更加好味。

提供咁好服務同埋咁好味既食物都不收加一!!! 唯有TIPS俾多少少啦!!係值得的 開心好味滿意的一頓晚餐!!

我當日係同朋友去食lunch，食食下見對面枱有員工同顧客發生爭執，都幾大聲下，全場都望住。

詳情就不太清楚，剩係聽到同碗湯有關。位男顧客係背對住我，所以我就清楚見到果位女侍應的樣子。嘩佢個樣惡，語氣同口吻仲惡。兩位都嘈交，嗰位阿叔就坐喺度同佢對罵，但位女侍應就手指住個呀叔，大鬧人地癡線。唔係佢身邊其他員工用手扯開佢，分分鐘佢想衝去人地度添呀。

另外一個男侍應就做調停的，不過我不見得佢處理得有幾好。剩係一味想大事化小，我聽唔到佢對果位俾人手指指被罵癡線的顧客道歉。

嗰位顧客亦都可能唔啱，但係我唔覺得一個餐廳侍應手指指指着客人，仲要鬧人係唔需要同人哋道歉囉。

其實呢間餐廳嘅服務態度已經一路都差到一個點，我朋友話如果唔係附近冇乜價錢相宜，食物質素又OK嘅餐廳，佢都唔想幫襯呢間井茶。一間茶餐廳獨大，就可以唔需要改善服務態度，真可悲。

之前都食過幾次，味道唔錯又足料，近排得閒D出去食LUNCH所以就再次幫襯。

買左一人餐轉拉麵，加左皮蛋，金菇同雞脾菇，要微辣。

可能事隔我上次黎食都有4-5個月，水準跌左。頭一兩啖都好味既，夠曬味嘛。但係慢慢食落唔對路，唔知係咪可能為左令D菇入味掛，成碗既味道過於濃郁，直頭係鹹!!  
皮蛋又硬又唔好食，冇皮蛋味，食落真係似咬橡皮。料係足，服務都唔錯(因為佢提我想食拉麵就食一人餐，唔使食貴D既皇牌餐)，可惜味道係濃過龍。

唔知係唔係我果碗D醬落重手左?? anyway，希望貴店會有改善，期待下次再黎食物會去番之前一貫水準。

晚餐特登同細佬兩個人去支持呢間新開的小店。裝潢不錯，侍應都有禮貌。

價錢還好，不算好貴。
叫左西冷牛扒 (medium) set同單叫香草醬虎蝦意粉，飲品凍奶茶少甜。

湯係南瓜湯，味道幾好，幾CREAMY。
之後上沙律，鴨胸肉沙律，鴨胸肉都幾大塊，煎得幾香。沙律菜值得一讚，係好食既。 主菜西冷到。
well……叫左medium，不過一D都唔係唔五成。又唔想浪費食物同怕被加料，所以只係同侍應講左，叫佢地留意番。
不過係失望既，話曬個餐都差唔多$200，同埋都對呢間餐廳有d expectation，但可能小店真的不適宜叫牛扒掛……?? 我唔係睇低/睇小d小店，而係因為我食過大部分小店同café的牛扒，叫親都中伏。唔係太熟就太生，再唔係就係肉太韌或者榎(鞋)。
凍奶茶少甜到，冇少甜，超甜。又冇茶味，超唔好飲。
香草醬虎蝦意粉，意粉幾好，唔林同幾彈口。不過我唔太欣賞個香草醬的味道。
Anyway，在美孚算係間幾靚既餐廳。近近地想轉下環境食下西餐咪黎下囉。不過冇咩特別我都唔會特登去。

晏晝去食，叫左2 set A5極上和牛牛肋肉，同埋一個普通set。 普通牛上先，都係瘦既，冇咩特別。 之後和牛送到，一睇，都係瘦既？肥瘦唔均勻。不過心諗可能食落唔係咁呢，所以就燒左先。 食完頭幾塊，覺得唔對路，又韌又鞋，完全冇牛既肥膏香。 男友醒，叫我唔好食第二碟，同侍應講「呢碟咁瘦，都唔似A5和牛」個侍應就問即係要肥d，就幫我哋換。 頂呀，一睇就嬲，同之前果2碟完全冇得比。燒完放入口仲嬲，根本之後果d唔係咩A5和牛！ 蝦我少食牛！同經理講，當然佢話全部都係A5啦，之不過係唔同部位喎。我問咁都會差咁遠吧？兩碟都俾瘦既我地？佢就話，可以request 要肥d既部位喎。 所以，緊記！大家以後想去牛角食真正同正既A5和牛，記得一定要出聲問，唔係就會恰你俾d 瘦同cheap d 既部位你地架啦！

同男友在SSP附近行，SEARCH下OPEN RICE，見呢間小店食評很不錯，就去試下，幫襯小店。

西九龍蘋果商場入面，要好似日本咁，撳機買左飛先。全部都係沾麵，黑白赤，所以就揀左黑同白，再加左筍。差唔多$100一份，都唔算平，所以真係要試下咩料同值唔值啦。

之前去過MK另一間價錢頗相宜的黃沾麵小店，味道可以，但可惜未如理想。所以今次對呢間店的沾麵都抱有頗大期望。職員都很有禮貌，因為見之前有食家批評過某一女店員的惡劣服務態度，所以都有特別觀察。食家所講的「趕客倒米嘅黑面神」，我見佢人在廚房冇出店面幫手。
食物都幾快送上，見湯底濃郁，材料十足，就知道今餐應該十分可以。旁邊有指示牌教大家食麵的正確方法同建議可以加既調味料，很貼心。

隱世白伝  豬骨湯底好香，而且湯底濃郁得黎又唔會勁咸，連埋麵食D味道係岩岩好。麵很值得一讚，QQ有口感，掛湯能力好好，完全唔似出面果D麵咁，完全掛唔到湯，搞到要好似食湯麵咁，用羹「筆」起少少湯去送麵食。將麵點湯，之後一啖放入口真係正。

叉燒雖然得兩塊，但係都唔算細塊架，而且有少少肥，好惹味~ 蛋係真正既溏心蛋，醃得又咁味，加分加分!
隱世黑伝 份量堅夠，我地8點食完到夜晚10點幾仲飽緊哈哈~回頭率高的餐廳!!值得推薦!!

因為和男友想食日本菜，一早就卜左呢間餐廳。都好好，可以俾我地早半個小時入坐。職員態度十分良好，很有禮貌。餐廳環境不錯，舒適寬敞。

7時入坐，睇MENU同睇下食評有咩推介啦。得兩個人好難叫好多海鮮果D，所以就叫左個SET同埋壽司。見可以加錢有PANCAKE，諗住食完先叫，侍應提我地因為預備需時，所以建議我地落單果陣就叫埋，咁就叫定加甜品。

野食都好快到，可能都早左DD到。

上沙律，加錢要左魚生沙津。唔錯，魚生份量都頗足。 磯燒鮑魚加鴨肝醬
好食，鮑魚夠稔，又入味，點埋鴨肝醬真伙好惹味。

味噌湯都幾好味，有隻大大隻既蜆，雖然應該煮左好耐，但未至於超韌。
壽司，帶子夠份量，幾新鮮。
唔記得左咩卷，有我既至岩吞拿魚同海膽，好味。 招牌菜龍蝦焗飯 好香，係D龍蝦冇咩肉。不過飯真係好食，D汁味道剛剛好，飯既軟硬度適中，夠曬惹味。

仲叫左杯荔枝疏打，少少甜，不過有荔枝肉，幾好飲。 成餐飯都很滿意，就係差個甜品未食。

食完果陣7:45左右，都即刻同侍應講我地可以上得甜點，因為都知PANCAKE要等。

等等等，等到8:10，都差唔多半個鐘，pancake仲未到，又冇人同我地講幾時到，我地就問要等幾耐。佢地就話岩岩打起左個漿，整緊架啦。好，我地又等，等呀等，等到8:40，再問其實個PANCAKE幾耐到，剩係識答「整緊、整緊」。真係火到黎，半個鐘前你話打起左個漿，宜家又未到，又答唔到客人幾旳有。我地就白白等左1個鐘。又係你地話要時間整所以建議我地落單叫定甜品，好啦一早叫定原來都要客人等成個鐘都未有既。
果日我見到係有幾圍大客，但都唔代表你要其他客人等咁耐。你忙做唔切可以一早講定話要我地等幾耐，而我地去決定等唔等你個甜品。宜家就局左我地等成粒鐘之後先慢慢整，完全係浪費大家時間。
原本好地地既一餐飯就因為咁而SPOIL左，亦都令我對呢間餐廳卻步。

突然想食炸雞，行開葵芳就揀呢間。話曬都係咩香港五大推介之一，咪同男友黎食。男友一早拎左飛，因為有飛兩個人可以不用搭枱。咁就等啦，等左一陣有位女士walk-in，話兩個人，侍應同佢講兩個人walk-in要搭枱ok唔ok，客人話OK，咁就安排佢入座。但我眼利的男友見到個侍應係諗住安排女士去一張不用搭枱的二人座位，我男友即係出聲同佢講我地係拎左飛既，佢先即刻安排我地去坐，安排walk-in的客人去第二張要搭枱既座位……

Sorry第一印象已經不好，唔係我地留意住情況，張枱就俾左冇拎飛唔使等即入得既walk-in客啦…..對我地呢D乖乖地拎飛既好唔公平
睇menu，揀左兩款自選雞，韓式甜辣炸雞冇；揀脆炸紫菜蝦卷，又冇；飲品揀pink ade，又冇，得藍色……百無
最後揀左蒜蓉醬油炸雞同初雪，加龍蝦沙律蛋卷，再加杯lychee blueberry soda? << sth like that

有小菜，kimchi同酸蘿蔔。前者麻麻，後者OK。蛋卷黎先，OK，不過龍蝦沙律勁少，over $100唔抵。
之後上飲品，完全唔值$5X……外表又普通，味道偏甜，勁後悔叫左呢杯野，早知叫番$3X既SODA冇咁嬲。你賣$5X喎，整靚少少我都接受呀。
之後炸雞黎，OK熱既，不過蒜蓉醬油D皮炸得太硬，初雪上面D味精粉多左。肉唔榎(鞋)既，不過味道同份量始終不及Goobne Chicken。
待應服務有一兩個幾好既，可惜serve我呢枱的麻麻，執野又粗魯，差D將D垃圾掃左落我條褲上
呢餐$400以咁既質素同服務係超‧級‧唔‧抵! 呢間炸雞不值再去，反正有其他更好的選擇!!!!

呢間素食餐廳我已經幫襯過4次，雖然menu都一樣，但每次食都係唔會厭，食物水準都是維持良好。
今次和家人一齊黎食晚餐，真係每樣都值得推薦。出名既吉列豬扒飯同未來漢堡(連同碟邊既番薯薯條)就不用再多介紹啦，真係超好味。今次想推介下其他既菜式。
冬陰意大利飯，可惜唔記得影相。好好味，佢地D意大利飯既口感好岩我，軟硬真係適中。夠曬入味，係冬陰公既味LOL辣辣地好惹味。


忌廉菠菜闊條麵 又係正，青醬好好味，夠creamy，麵條煮得不會過軟。 本人覺得有D口感既意粉先至好味。

牛肝菌意大利飯 D汁同冬陰唔同，但同樣好味，都好入味，意大利飯一樣煮得好好。

泰式香辣不可能肉碎意粉 呢碟炒意粉辣得黎好惹味，雖然我只食到少少辣，但都忍唔住食左好多。麵條都係彈牙的，不會過軟。

日式定食 每樣小菜都很不錯，尤其是個南瓜薯餅!!! 一食再食~ 如果碗烏冬係用另一款口感煙韌D既烏冬就更好啦~ (個人感想)

飲品方面最推薦香蕉火龍果! 藍莓都很好味。花茶就未試過，不過下次會試。

提提大家，番薯薯條同南瓜薯餅呢D小食可以散叫架，所以大家想食唔一定要叫果個餐都可以食到。係我爸爸好醒咁主動問人得出黎的開心發現!其他既就要你地再問問啦。