經過平時大排長龍嘅阿閒泰，見到門口walk in隊得一個人就諗住試吓。就係咁就做咗個後悔嘅決定⋯ 等咗大半個鐘都未有位，遊客區多人我好明白、中途有啲訂咗位嘅嚟要俾位佢哋先我都好明白，但唔明點解三四張枱吉晒喺度幾個字都唔帶人入去。不過我仍然好耐心咁等佢。 好唔容易終於入座，餓到前胸貼後背所以即刻搵人落單，點知又係另一惡夢開始⋯落完單後等咗成25分鐘，等到隔離左右遲我幾分鐘叫果啲枱都嚟齊晒嘢食我枱面都係得份餐具同一杯水！搵個侍應追單嘢都未講完就轉身走咗去話幫我睇吓，我欣賞佢嘅速度但我都未講完嘢可唔可以尊重吓我？跟住幫我落單嘅黑衫侍應返嚟問我係咪仲未嚟問我叫咗咩？我問有無落到單ga？佢話有但可能甩咗單，電腦落單都會甩單咩？真係無落嘅咪坦白同個客講返句唔好意思即刻幫你做囉！又要話有幫我落單又要問返我叫咗咩！你估茶餐廳手寫單呀！定當我三歲細路？我唔即場發脾氣係我修養好，但咁嘅服務真係不能接受😡 追完單5分鐘都唔駛就嚟晒嘢食，廚房速度好值得稱讚👍🏻 香芒紅菜頭米紙卷伴碟嘅芒果好酸⋯好彩有紅菜頭嘅甜味中和吓。 泰式虎蝦炒金邊粉，唔知係廚房趕出貨定本身係咁。成碟嘢乾淨淨，啲金邊粉係癡埋一餅嘢咁⋯無金邊粉應有嘅味得個辣字（已經係撥走晒辣椒粉）兩隻蝦同青口就尚算新鮮 全碟都係咁乾到癡埋一齊 完全係失望嘅一餐，簡直係貼錢買難受😣又或者我太黑仔😢 總之就係無下次！

每年粉紅革命時候，市面都會出現一片粉紅色。 今次輪到Conrad Lobby Lounge~ 網上早鳥優惠33% off，可惜朋友唔得閒所以只好買tea set for 1 person. 提提大家記得要買tea set for 2 persons先有限量版粉紅色熊仔💕 套餐包杯嘢飲，粉紅色玫瑰造型冰粒打咭一流。 不過⋯味道就唔多討好⋯ 椰子水+梳打+玫瑰糖漿好似飲緊香精咁🤪 今次唔係三層架，係玻璃盤配鮮花裝飾～ 原味及紅莓味Scone一如既往出色，兩款jam果肉充足。特別係無花果jam，配埋clotted cream，好好味🤤 左邊三件鹹點由上至下：鵝肝慕絲配士多啤梨、蟹肉配西瓜及紅菜頭醃三文魚配辣根忌廉 右邊三件甜點由上至下：荔枝紅桑子玫瑰慕絲蛋糕、迷你紅桑子法式泡芙及雲呢拿士多啤梨蛋糕 先講鹹點，鵝肝慕絲配士多啤梨非常驚喜👍🏻鵝肝味十足配埋士多啤梨感覺唔會膩。幼滑嘅鵝肝慕絲加埋底層嘅脆餅，口感好豐富～ 蟹肉配西瓜相對比較失色，只係一件西瓜配少少蟹肉。 件三文魚好味但就無咩特色，側邊嘅raddish同佢幾夾～ 荔枝紅桑子玫瑰慕絲蛋糕，面頭切合返主題用粉紅色白朱古力整成粉紅革命嘅絲帶🎀本身諗住係平平無奇嘅慕絲蛋糕仔，但估唔到蛋糕底層撈咗啲脆片，即刻令件蛋糕口感昇華咗。 其餘兩件甜點法式泡芙同roll cake就好普通，無咩特別⋯ 白朱古力紅果杯，紅果酸味十足，好開胃。用嚟做甜品浪費咗，應該一開始就食佢🤣 紅桑子朱古力棒棒，粉紅色白朱古力包住流心milk chocolate。我覺得自己好似食緊kinder出奇蛋，用嚟氹小朋友啱晒😆 成個set我會覺得鹹點比較出色。女性通常都抗拒唔到粉紅色，所以呢個set應該都吸引唔少女士打咭～

收工攰攰哋想搵間餐廳坐低一個人慢慢食吓嘢。 由裕民坊行到apm都未諗到想食咩，突然醒起好似好耐無食拉麵。即刻走去神山，好好彩唔駛等位～帶位嘅姨姨好好服務👍🏻 睇完menu決定食新嘅猿侍拉麵～ $138再加一，跟餐包嘢飲仲有小食。 小食可以揀武藏餃子或者武藏炸雞。 我就揀咗餃子😋 一嚟上咗武藏餃子先，無咩驚喜，頗為普通嘅餃子一碟⋯ 跟住到跟餐嘢飲𥌓光，其實係醬油果凍柑橘特飲。 帶位姨姨再次發揮好服務，教我要攪勻個底嘅果凍飲會好味啲。 飲落口柑橘味微酸幾好飲，不過個果凍就唔覺有醬油味，可能俾柑橘味掩蓋咗。 重頭戲猿侍拉麵嚟啦 一上枱好色彩繽紛好靚。 學吓日本人食法，第一啖飲咗湯底先。 哇！好有驚喜呀😆 蝦油發揮咗佢嘅功效，勁香蝦味！仲有成堆櫻花蝦，真係食到成口蝦味😋 麵底保持到神山一貫水準彈牙好味。 個慢煮伊利比亞豬好淋，我諗連老人家都食到🤣 再嚟隻紅酒漬溏心蛋，無咩紅酒味但夠晒流心～ 不過湯底真係比較濃郁，食到尾有少許咸。 建議唔好飲太多個湯。

搬舖後第一次嚟幫襯，閒日過咗午餐時間，舖頭唔算多人。 門外一大片空地有各式玩意，見小朋友玩三輪車玩得好開心。 餐廳設計及餐牌維持港式懷舊風味～ 本身想食花膠撈丁可惜賣晒，叫咗個索女餐一嚐做索女嘅滋味 一嚟招牌鮮奶黑松露炒蛋，好香黑松露味但略嫌過油⋯ 多士好重牛油味，今次脂肪應該爆標 杞子紅棗茶好香好足料，即刻覺得養顏咗，怪唔之得要叫索女餐。 之後上埋個通心粉，湯底好濃不過無咩驚喜，感覺好似飲緊金寶湯咁，有少少失色⋯

一人午餐，太古城食物花多眼亂最後揀咗呢間和洋式cafe。 位置有少少偏僻，唔係特登去搵應該未必知。 叫咗個黑松露野菌扁意粉同蝶豆花香芋latte 先嚟咗個蝶豆花香芋latte 拉花不算漂亮但飲落口好重香芋味，鍾意香芋嘅人應該大愛。但我純粹係俾佢嘅藍色吸引所以感覺就一般。 之後就嚟埋個黑松露野菌扁意粉，一上枱已經勁香黑松露味，食落口啖啖係野菌嘅香味。 好香好好味 扁意粉煮得剛剛好，帶點煙韌但又唔好過火～ 食完都滿口黑松露嘅香味～

早餐時間經過觀塘舊區中發現一間cafe，同周圍環境有點格格不入。見menu材料又帶點港式茶餐廳feel，例如鹹牛肉、餐肉等，價錢不貴抱住好奇心決定一試～ 叫咗個雲朵鹹牛肉蛋多士另外跟食物優惠價+$19試埋焙茶latte。 上枱有驚喜，蛋黃帶點流心，蛋白真係整到好似雲嘅鬆軟口感。 多士烤得香脆，配合鬆軟雲朵及鹹香嘅鹹牛肉，好食👍🏻 焙茶latte極濃焙茶味，略帶點苦味。鍾意焙茶嘅應該覺得好飲，不過我個人就覺得有啲偏苦。 埋單先係$67，對比普通cafe嚟講算好平。 不過佢又唔似平時cafe嘅menu，感覺好似帶點港式口味～呢個價錢算好抵食～

星期日行完山搭車出返西貢市中心正好肚餓，喺市場街來回行咗幾次決定試吓呢間新開嘅cafe。 望住個餐牌三心兩意揀咗好耐最後決定要無Black Truffle Toast。 飲品選擇頗多。天氣熱本身想飲杯iced latte但見好似好細杯應該唔夠我消暑 最後叫咗杯Berries Yogurt Smoothie，價錢稍為偏貴，唔知味道點呢～ 等嘢食期間突然一陣機器聲劃破寧靜，心諗應該係打緊我杯smoothie🤣 不過聲音實在同氣氛有啲格格不入⋯ 果然轉頭就送到杯Smoothie ，坦白講以呢個價錢嚟講份量可以再多啲⋯ 不過好彩味道唔錯都好足料，食到好多berries籽😂 飲住杯Smoothie 一路欣賞吓cafe環境。 等咗一陣，主菜嚟啦～一上枱滑蛋仍在冒煙，而且轉嚟陣陣黑松露香味，令人食指大動👍🏻 熱辣辣嘅滑蛋，配合黑松露香，再加上烘烤得外脆內軟嘅多士，真係令人食完一啖忍唔再食多幾啖。 杯飲品雖然有少少平凡，但呢個多士真係令我好有驚喜！ 因為呢個多士，即刻覺得今餐好滿足😋 總括嚟講嘢食好食但嘢杯就價錢稍貴。

一個人經過堅尼地城本身想去誠記食邪惡三文治，點知上到去無開。於是上OpenRice 睇吓附近有咩好食😋搜尋下俾呢間小店店名吸引，啱晒自己一個人去食～ 小店在路旁偶然聽到汽車駛過嘅聲音，但室內播放輕柔音樂，俾人感覺好似兩個截然不同嘅世界。 甚有一種逃避煩囂嘅感覺～ Day Menu主要有咖啡、包類、甜品等。 Night Menu有埋酒飲 一坐低店員好貼心自動遞上清水 三心兩意之下決定試吓較少見用三文魚籽配搭嘅Eggado，可以㨂cheese & onion bagel或者sourdough。另外伴碟會有沙律菜 Bagel烘得微脆、蛋炒得夠滑，配埋粒粒晶瑩剔透嘅三文魚籽，味道實在非常不錯 席間見其他客人落單咖啡時，店員都耐心了解客人口味並建議客人選擇。上枱時都會非常詳細介紹飲用方法。不過由於今日唔想飲咖啡所以就試咗杯Green tea latte。少少失望嘅係green tea latte偏甜，甜味稍為蓋過抹茶香味⋯ 最後有尐意猶未盡叫咗個apple pie 味道唔太甜又好香肉桂味～ 不過自己一廂情願以為係熱pie原來係凍嘅🤣 店舖甚有特色，絕對值得再試～

同朋友預約咗喺觀塘做facial，於是搜尋吓有咩好食。呢區工廈多穩世小店，不過有啲就名過其實、有啲就價錢貴。因為朋友想食台式所以最後就㨂咗小伊甸～ 午餐選擇好多仲有好抵嘅是日午餐。 跟餐本身已經包大大杯賞茶嘅飲品，四款揀一款另可以加錢轉其他台式飲品。 飲品選擇超多，啱晒又想食嘢又想飲台式飲品嘅朋友～ 藥膳排骨新竹米粉配屏東櫻花蝦燙青菜$73，另加$10改做蒟蒻麵。完全切合low carbs嘅朋友～ 一上枱已經聞到好大陣藥膳味，好似肉骨茶嘅香味。食落口更加係濃郁嘅藥材味，即刻覺得好補身 用料十分充電，排骨好食又淋。食完忍唔住飲埋佢個湯，十足十食完一餐補品👍🏻 台式肉燥飯拼三杯雞、流心蛋$64再另加$15要小食：蒜泥手拍青瓜。 印象中三杯雞應該係辣？係呢碗就完全唔辣。不過味道惹味配飯食一流。流心蛋睇menu以為係瑭心蛋/滷水蛋，上枱先發現原來係好似溫泉蛋。雖然有少少失望但隻蛋都好好食～成碗飯超級大碗，朋友都食唔晒～ 呢間店唔似其他工廈店咁座位逼迫，反而好大地方好多位。 而且整體性價比非常高。平時一杯波霸奶茶出面都要三、四十蚊，而家加多少少錢就有埋主食。食物份量用料都非常足夠，味道亦不錯。同朋友決定下次再encore！

同朋友去信和順手喺呢區搵嘢食，睇食評呢間cafe嘅相好似唔錯就決定一試。 Cafe位置幾偏僻如果唔係睇食評應該唔會發現佢。 座位比較少同埋環境有少許擠逼。 天氣熱叫咗個梅子素麵配吉列蝦， 朋友叫咗個味噌蟹醬蟹籽蟹肉扁意粉。 味道普通同包裝買返嚟自己煮嘅無咩分別，以呢個價錢嚟講真係唔值，無咩驚喜。 扁意粉食落幾彈牙配埋個醬好夠味，蟹肉份量就較少。 櫃面有檸檬水自己serve自己。 總括嚟講，味道還可以但性價比偏低。