話說今日一早去灣仔做完野，之後就諗住去試下呢間聞名已久嘅Coffee Shop。當時落緊微微雨，去到暫時未有位，要等大約兩張枱左右。好野梗係要預埋好女友，就叫佢由屋企坐地鐵過海來加入。

排到我嘅時候，女店員表示未齊人唔能夠安排座位，無奈只好接受。打電話俾女友，原來仲有兩個站就到，於是就搏搏問下可唔可以坐住先。埋去問女店員，佢繼續話未齊人唔會安排入座，但我見場內明明有空位，就好奇怪點解唔可以入去叫住咖啡等，我地兩個人又唔係佔好多地方，再加上成條隊佢都唔安排其他人入，究竟點做生意？

坐低望下餐牌，嗯... 對面海價位仲要收加一，安排入座已經感覺唔良好，到決定叫住杯咖啡飲住等… 點知一落單係冇單品咖啡嘅，而全場亦唔見有任何告示通知顧客。作為一間叫做有名少少嘅咖啡店，咁樣情何以堪，服務何在？如是者，只好叫左杯Cappuccino… 十分失望。另外，全場計埋廚房哥哥、「咖啡師」、樓面得三個人咁大把，咁樣嘅服務好極有限，仲有佢地都唔係幾friendly，同出面個天一樣咁灰... （另外我把餐刀係把「彎刀」，叫個樓面姐姐換，佢仲問返我要換乜野，真係唔該晒…）

於是乎，飲完杯啡而女友又未到，諗下唔對路，都係轉場食餐好啲，嗱嗱臨埋單鬆人讓個位更多「有（打卡）需要」人士。

 

事緣去Ninetys 中伏之後，就帶咗女朋友來星街呢邊揾食。行咗日街同星街之後，覺得呢間幾大幾光猛之後，就決定等位。 疫情關係，室內座位減少，需要等兩張枱。好在人客食完都唔hea 咁耐，約莫等左15分鐘就入得。 Menu 比較近英美式早餐，另外有啲澳洲牛油果🥑食品，咖啡方面仲有啲比較特別嘅recipe，例如Dirty、Black Tie、Bulletproof等等。 我哋點咗4樣嘢：Avocado Toast、Egg Benedict、Masala Chai Latte、Bullet Proof Coffee。Bullet Proof Coffee係椰子油加牛油咖啡(右下角)，味道好香，幾特別。 兩樣食物都唔錯，好適合牛油果控🥑。Egg Benedict 個蛋更流心更好。價錢方面好過大道東Ninetys 好多。整體感覺幾好，下次可以再encore，人唔多嘅話，得閒都可以坐耐啲，員工都好easy 同helpful。