呢間泰菜算係幾抵食，之前食過下午茶，今次去咗怡和大廈baseball嘅分店食晚餐，喺中環嚟講，性價比幾高，食物大份又好食！ 🔸菠蘿海鮮炒飯 $128 擺盤幾靚！而且份量多，海鮮有魷魚、蝦、青口，仲有腰果同肉鬆～魷魚切得好靚，幾有誠意！炒飯唔會好濕幾乾爽，有臘腸、提子乾、粟米等，十分豐富！調味適中，大人小朋友好啱食！伴碟新鮮菠蘿都一啲都唔hea，切好晒又輕輕燒過，又甜又開胃！ 🔸青咖喱牛肉飯 $82 見好耐無食過青咖喱想試吓～ 可以揀豬牛雞菜或加錢揀海鮮，我地揀咗牛肉，肉質都算嫩，但有啲有少少筋～ 青咖喱好香口，辣辣夠惹味，配飯食一流！咖喱入面仲有西蘭花，吸晒味！ 🔸炒通菜 $72 份量算多，炒得夠腍又有啲爽口！ 🔸炸蝦餅 +$38 有兩大件，非常爽口彈牙！又唔算好油膩～ 🔸芒果糯米飯 +$48 芒果好甜！應該有半個芒果👍🏻 糯米飯有兩款，整成一個🤍 幾特別！味道唔錯！ 🔸椰汁冰 +$35 呢杯有啲貴，但椰汁味幾濃幾香！

之前去過呢間山東餃子店旺角店，覺得食物質素唔錯，價錢合理！今次去大角咀店，叫咗唔同食物，終於食到羊肉餡餅，真係幾有驚喜，值得試吓～～ 🔸京蔥羊肉餡餅 $30 上次想食但無晒～ 今次終於食到啦！餡餅即叫即整要等一陣，都幾大個，上枱已經切開一半～外皮煎到脆脆地又有啲咬口，裡面嘅羊肉餡超多，仲要係勁爆汁，非常juicy😍 有羊肉味又唔會有羶味，一路食一路滴汁，一定要試吓！之前食過佢哋嘅韭菜餅都好味～ 🔸招牌墨魚餃擔擔麵 $62 晚市套餐嚟，送一杯自家製豆漿或山楂茶～ 馬蹄墨魚餃係呢度嘅招牌餃子，味道幾好幾特別，其他地方食唔到～ 今次加落擔擔麵度一齊食，都幾夾喎，多咗花生香味！擔擔麵麵質唔會太腍，有啲口感，湯底濃淡適中，完全唔辣～ 🔸鮮肉菠菜餃配蝦皮紫菜蛋花湯 $40 之前食過煎餃同灼餃，今次試埋湯餃～ 揀咗鮮肉菠菜餃，大大隻餡料幾飽滿，菠菜比例多，更加健康！餃子皮厚薄適中唔易爛，紫菜湯簡單純粹，味道唔會話好有驚喜，但就有啲家嘅味道～ 🔸老醋海蜇頭 $18 晚餐追加小食幾抵！海蜇頭幾爽口開胃！ 🔸自製山楂茶 🔸熱桂圓紅棗蜜 $10 山楂茶跟餐送，酸酸甜甜夠開胃～ 桂圓紅棗茶唔會太甜幾好飲，都幾大杯！

呢間上海菜最出名就係小籠包，有好多特色口味，今次係我第一次食，覺得味道好唔錯，有啲口味仲幾有驚喜，值得試吓～ 見到餐廳近排做緊10週年宣傳，30/4前消費滿$100就可以$10品嚐6粒叉燒小籠包，非常之抵！ 🔸皇朝小籠包（8色） $148 第一次嚟必食！一次過試晒8隻味嘅小籠包！啱晒選擇困難症人士😂 店員會畀張紙建議由原味開始食，之後順時針食，最後係川味～ 個人最推薦係原味、鵝肝同蟹粉！鵝肝味最有驚喜，一食落口就聞到好大浸鵝肝味，味道香濃又神奇地夾！蟹粉就一定好味！小籠包size唔算大，肉餡唔算好多，但就好juicy！皮厚薄適中，有啲咬口～ 🔸上海炒飯 $95 都多人推薦！炒飯炒得幾好，飯粒粒粒分明，粉料有蝦仁、蛋、肉粒等～ 望落好似偏鹹，但食落係完全唔鹹，調味適中，仲幾惹味😋 🔸蒜蓉清炒菠菜 $78 好健康！清清地唔油膩，菠菜新鮮幾嫩！

大圍站附近都幾多抵食嘅餐廳，今次行入少少食咗間馬拉菜，主打肉骨茶，質素好唔錯，價錢合理，想試吓正宗馬拉菜，可以去try try😆 🔸細滲 $106 呢度有好多款肉骨茶，想每樣試吓揀細滲就啱晒！材料有一字骨、豬手、雞腳、三層肉、豬肚、豆卜、金菇等，都幾豐富！馬來西亞肉骨茶係黑湯，藥膳味明顯～ 呢度嘅肉骨茶湯頭濃厚，好易入喉，而且個湯仲係任添👍🏻 推介一字骨，肉質有咬口又唔嚡！ 🔸砂煲老鼠粉 $98 呢個老鼠粉好惹味好好食！而且份量好多！入面有魚乾仔增加口感，調味係偏濃，但又唔會太鹹，老鼠粉條條分明，少少煙韌口感，撈埋蛋一齊食好正！ 🔸咖央多士 $33 麵包烘到好脆好香口，咖央味稍為不足，多啲醬就好！ 🔸馬拉沙嗲串燒 （3串） $64 揀咗雞牛豬各一，即燒幾惹味，沙嗲醬好多，但唔會好鹹，有啲青瓜解吓膩，幾好！推介雞肉！ 🔸玻璃魷魚蕹茶 $58 又係要叫個菜食吓先得😂 應該係第一次食蕹菜，口感幾爽口！魷魚都幾彈牙！但個醬有啲辣，唔食得辣可以叫醬另上～ 🔸桔仔話梅水 $30 叫咗走冰，少少凍啱啱好！呢杯飲品有啲驚喜，好好飲，唔太酸又唔太甜，味道剛好！又解渴！

鍾意食餃子嘅餃控們可能都食過呢間餃子店，佢哋越開越多分店，近排發現屋企附近都就嚟開😍 今次去咗中環店，試咗兩款餃子，仲有雲吞，餃子大大隻，好有滿足感！ 🔸至尊松茸豬肉餃 $80（8隻） 呢度嘅招牌餃，必叫！雖然比其他款式餃子貴，但用料靚同好足料，都值呢個價！松茸餃湯餃跟咗一碗狀元九鼎湯，餃子係灼熟，湯另上，所以餃子皮仍然保留到個煙韌度，唔會腍晒！豬肉餡好多，食到啖啖松茸味，感覺好健康又夠飽！點埋松茸醬一齊食更加滋味！個湯感覺比另一間分店淡啲，濃啲更好飲～ 🔸香煎軟心芝士餃 $58 （7隻） 呢度嘅芝士煎餃都好好味！食到好多芝士🧀，入面仲有粟米增加口感！餃子皮煎得香脆，又唔算好油膩👍🏻 🔸重慶鮮肉雲吞 $44 （12隻） 揀咗小辣，雲吞係細細隻，餡有豬肉同木耳，加埋辣辣地嘅湯一齊食，幾惹味！ 🔸上湯松茸時蔬 $35 食得健康啲叫咗個菜，菜心大大條，幾鮮甜～ 🔸蜂蜜檸檬薏米水 $28/支 足料好飲，微甜，加咗檸檬幾開胃～

Bookmark咗呢間拉麵店好耐，佢哋間唔中就推出期間限定拉麵，都幾吸引！今次去咗荃灣店，環境唔大，有bar枱望住廚房煮麵，都幾日式拉麵店風格～ 用OR code落單好方便～ 定價適中唔會太高，叫咗一碗沾麵一碗拉麵，加咗配料，仲有餃子、飲品，唔使加一，埋單唔使$300，算係幾抵食！ 🔸海老沾麵 $88 +慢熟豚叉燒 $20 呢款沾麵都多人推介，海老湯有勁多櫻花蝦，湯好濃好夠熱，唔會太鹹太油膩～ 麵條係粗麵，可以揀軟硬度，今次揀咗標準，鍾意爽麵可以揀較硬，應該會更鍾意個口感！粗麵幾香麵粉味，少少煙韌！本身有兩塊炙燒厚叉燒，幾香口唔會乾爭爭！另外加咗慢熟豚叉燒，有3塊，薄身軟腍！雖然唔算好大驚喜，但都算幾好食嘅沾麵！ 🔸雞白湯拉麵 $95 +加麵底 $15 雞白湯拉麵個湯好奶白綿密，味道幾好，唔會好淡或過濃～ 麵條係幼麵，同個湯幾夾！雞肉好軟滑，豚叉燒都好腍，有半隻半熟蛋，好流心！整體幾好味！ 🔸煎餃子 $29 有5件，味道正常發揮，無咩特別～ 🔸Sage蘋果桂花烏龍有氣茶 $22 🔸綠茶可樂 $20 呢度有得叫本地出嘅有氣茶，味道幾特別，唔甜，值得飲吓！綠茶可樂就日本出產，無咩可樂味，綠茶味甜甜地，都幾特別！

今次去呢間火鍋店位於太子花園街，附近好多車房，估唔到有間幾高質嘅火鍋店隱身喺度～ 餐廳環境幾中式，有卡位又有廂房，私隱度唔錯！食物鍋底選擇好多，有套餐幾抵食，單點有85折，價位屬於中價，食得出食物質素幾好，食材好新鮮！門口附近見到有好多明星相，好似都幾多藝人有幫襯過～ 🔸炸魚片頭 （關注小紅書送） 點甜酸醬食，一早炸好唔熱嘅，味道正常發揮～ 🔸鮮茄薯仔濃湯鍋 $68 呢個鍋又平又好味！有好多番茄、薯仔同粟米，超鮮甜！又唔會太油膩，用嚟打邊爐可以食到食物原味，好唔錯！ 🔸泰式生蝦 $238 呢度有刺身食，叫咗泰式生蝦試吓～ 個擺盤都幾打卡😂 有8隻生蝦大大隻，蝦肉爽口，配醬汁食開胃又好味！ 🔸招牌手打四寶丸 $138 必食！手打丸好高質好好食！有蝦丸、墨魚丸、牛丸、豬肉丸，4款都好食，爽口彈牙，好真材實料！蝦丸仲見到有蝦肉，好鮮味！墨魚丸同牛丸都幾濃味，好正！ 🔸本地手切鮮牛肉 （中） $268 都係必食！牛肉份量都算多，擺得好靚～ 切得算厚身，大大塊，淥熟咗都唔會得好少，仍然保留到口感！肉味濃又軟滑，一啲都唔會韌，唔點醬汁都好食！ 🔸新鮮肥鵝腸 $88 平時少機會食新鮮鵝腸，見到有就叫嚟試吓～ 都算大碟，雖然淥熟咗就會縮小好多😂 都算爽脆，本身無咩味，要點醬油食！ 🔸皇帝菜 $45 新鮮好食！同番茄薯仔湯好夾！ 🔸清熱雪梨茶(渣） $48 幾清甜，甜度啱啱好，幾好飲！ 想食一餐高質嘅火鍋，呢度係一個唔錯嘅選擇！

前幾日去荃灣睇戲前，食咗呢間新開嘅米線店，份量好大碗，仲有幾特別嘅新疆湯底！餐廳仲係試業當中，配料選擇唔算多，湯底幾好，食物味道正常，有啲餸幾好，有啲餸就不過不失，去開附近可以try try~ 🔸自選小鍋米線 $33 ▫️豬潤 $10 ▫️墨魚頭 $12 揀咗酸辣湯底小辣，個湯夠酸帶少少甜辣味，唔會好油膩，幾開胃！米線份量好多，好大一碗！本身個湯已經帶辣肉碎，米線夠滑，口感唔錯！配料份量都多，墨魚頭幾好味，夠爽口！豬潤厚切，但口感偏硬，有少少失望～ 🔸過橋米線 $58 ▫️菜肉雲吞 $10 ▫️豬肚 $12 呢碗叫咗新疆湯底少辣，新疆湯底充滿孜然味，第一次飲幾特別！但就無酸辣咁開胃！過橋米線本身寫有蟹柳、腐竹、火腿，雞翼尖，食食吓發現仲有3粒丸😂 火腿比平時食開嘅厚切，雞翼尖好腍好入味～ 豬肚絲份量多又腍，菜肉雲吞普通啦～ 🔸香脆雞球 $32 有6舊左右，大大舊！望落有啲乾，但食落去又唔會喎，雞球仲有肉汁，點甜酸醬食，唔錯！ 🔸豆卜釀豬肉 $28 幾香脆，豬肉碎幾嫩唔會太乾爭爭，不過豆卜食落有啲鞋口，個汁又有少少鹹～

之前行圍方，見到Tera開新分店，有啲期待～ 今次就去試吓！呢間分店比佐敦店大好多，木系裝潢都幾舒適，仲有好多綠色植物元素～ 服務態度都幾好！ 今次叫咗意粉、雞翼同梳乎厘pancake，整體質素唔錯嘅，但唔算好大驚喜，感覺佐敦店嘅質素好啲～ 呢度就坐得舒服啲！ 🔸水牛城雞翼 $58 一客有6隻，雞翼大大隻，肉質幾滑嫩有肉汁！但個水牛城汁太鹹，平時食開重口味嘅我哋都覺得鹹咗啲！同咗職員講，佢哋話個汁係廚師自己調，之前有客人反映過話唔夠味，可能呢日整得重手咗啦🤣 🔸明太子蟹肉意粉 $158 之前食過覺得幾好味，今次再encore！意粉份量都幾多，而且明太子醬超足，蟹肉亦唔少，意粉軟硬度適中～ 個醬有明太子嘅鹹香，又有啲洋蔥嘅甜味，好味！ 🔸提拉米蘇布朗尼梳乎厘班戟 $148 見到係大圍店限定，就一於試吓～ 仲有黑糖珍珠奶茶味～一份有3件soufflé pancake，口感輕盈空氣感重，十分軟綿綿，蛋味都幾香，質素唔錯！tiramisu醬幾香滑唔肥膩，但食到最後個醬略為唔多夠～ brownie個樣一般，但味道唔錯～

食過麻辣風雲好幾次啦～ 今次去返旺角店，環境舒適多卡位，坐得比較舒服～ 今次食咗幾款第一次叫嘅菜式，荔枝蝦球超打卡able！仲有炸饅頭都係必食！ 🔸荔枝蝦球 $108 見到係推介即刻試吓～ 一出場已經好震撼，忙住影相拍片😂 荔枝樹嘅造型，加上乾冰效果，超級打卡呀！而且呢道菜好睇又好食！蝦球外型似荔枝，外面脆米幾脆身，裡面係蝦膠咁，幾爽口！配甜酸醬食，開胃好味！ 🔸酸辣土豆絲 $88 呢道菜就無咁驚喜，正常味道～ 揀咗小辣，土豆絲夠爽口，酸味唔重，個人鍾意再酸多少少！ 🔸黃金粟米 $78 粟米外面包住少少粉漿，再掛滿鹹蛋黃😍 好邪惡但好好食！ 🔸胡椒豬肚雞(半隻) $168 個湯有好多胡椒粒，夠哂味！豬肚煮得唔錯，腍中帶爽口！雞肉份量好多，亦都幾軟滑～ 🔸炸饅頭 $58 每次嚟食必叫！又係好睇又好食！炸饅頭炸到金黃色，外脆裡面熱辣辣，配煉奶食一流！