好味burger，足料，漢堡厚厚的，味道啱啱好，個包亦有烘過的！意粉亦不錯，即點即做，新鮮熱辣！抵食，小店經營 入店前會量體温及提供消毒潔手液，員工禮貌有禮，下次會再幫襯

呢度係小店經營，全店只有16個位，所以遇著weekend啊，晚飯午餐時間排隊真係在所不免，但我上星期遇著一件好奇怪的事，我排第二，有一家四口在我前面，已入座啦，跟住又有一家三口排係我後面，理應排隊的話，係我哋先，但唔知點解，阿老板娘竟然先比佢地入先，然後我聽到話係有一枱家庭係裡面食緊，幫佢留咗位，咁我哋就算數啦！你咁講，我冇辦法啦，因為我哋第一次食，唔知係咪真係有留位服務，但突然之間，阿老板娘又唔知點解係外面開咗張枱，佢哋嗰家又奇奇怪怪出曬去嗰張枱度，然後就叫我哋入座啦！

咁然後嗰家人就發爛咋，話咁樣叫咗佢哋出去，個感覺好差！又話我哋三個人(兩個係小朋友)，要我叫三毎個餐都算啦！不停強調個感覺好差就走咗去啦！其實想講，人人排隊之際，你唔駛排不特止，仲可以優先？咩道理？！但我又唔太明，點解阿老闆娘初初又比佢入座，但之後又要佢離開番張枱呢？呢個情況真係有點耐人尋味！其實我真心建議店主，係門口大大隻字寫清楚：用餐請排隊，不設留位服務，另小店經營，必須每人一個餐(包括小朋友)。

講完我上星期的所見所聞後，就講番食物啦，真心覺得佢d嘢好食，面屎湯好足料啊，好好飲，招牌和風自家制咖哩漢堡扒飯，真係超正！吉豬炸得好鬆脆！另外+15蚊可以有嚿芝士蛋糕做飯後甜品也不錯啊！下次會再幫襯！

一入到去，外國人嚟GA，有點驚，因為自己係有限公司，但勁親切！又提我earl grey要在室温放一陣先好食！
包裝超精美！  - Double espresso，咖啡味真係好濃，但係甜咗少少  - Earl grey orange，伯爵茶味香濃，感覺好fresh  - Lemon gianduja，酸酸甜甜好開胃  三款餅底真係做得唔錯，好香脆，最愛earl grey orange！不解釋！

佢一直開係我公司隔離街，但一直覺得佢毫不起眼，只覺得佢係一間麵包舖，但前幾見果籽有報導過專訪，小妹今日都忍唔住買咗盒牛油酥曲奇(hkd168)嚟試，價錢係有少少偏貴，但一年一次送比親朋好友，仲要全人手香港製(因為我買時，見到阿C父係後面密密地整緊餅)！冇得計啦！

 一開盒，曲奇排到密密的，都有大約40塊！呢款曲奇係有四種味：杏仁、腰果、紅苺及杏仁咖啡，一食落口，牛油味真係好濃！餅亦好鬆化(鬆化得嚟，但又唔係話超易碎嗰隻)，唔太甜！我鐘意！
初初都驚會係紅苺係最唔好食嗰款，但點知紅苺個口感都唔錯，唔會痴牙！食落同nuts嗰d款差不多！四隻口味都好食，唯獨最愛咖啡，有著濃濃的咖啡味！正正！

大家有機會可以去上環支持吓呢間小店啦！真真正正hand made in HK！

小店驚喜，好好吃嘅沾麵，見佢開咗一排，每次經過都想食gala，今晚終於的起心肝一試，真係超驚喜，好濃味好好吃，哈子餅話見佢d麵係自家整㗎！我超喜歡食呢d麵嘅質地，勁煙un啊！流心蛋同叉燒都超正啊！無咩嘢可挑剔！
呢度有三個湯底，今晚試咗魚介同黑蒜，兩款都超推介，黑蒜食完嗰陣after taste真係超堅啊！下次試埋蕃茄湯先！ 同埋食完係超飽肚，咁嘅價錢嚟講，唔貴啦，下次可以再番啅！

琴晚同哈子餅結婚5週年紀念，就去咗灣仔分域碼頭 QUAYSIDE 食法國菜，如果即場叫呢款二人4 course set dinner(包括餐前法包、餐湯、前菜、五揀二主菜、二揀一甜品和飲品兩杯)，就hkd599，但我之前在 HKTV MALL 買咗coupon呢就hkd480，而埋單時要比hkd48加一服務費，上枱其實有d似西餐😂😂，但係又幾好味喎，仲勁飽，個甜品有d似火焰雪山，會在您枱前倒杯火酒落去個雪山度，勁正啊！整體嚟講，以咁嘅價錢食到咁嘅環境同質素嘅晚餐，係勁抵！我幾鐘意佢個環境，幾舒服，我們食呢餐食咗兩個鐘，幾耐未試過兩個人可以食飯食咁耐，慢食傾吓計，幾浪漫！
可以講話回購CP值超高，食物好味，環境一流，價錢中價，但法國餐嚟講，抵食夾大件！
服務很好，非常細心！
好適合兩個人浪漫談心的好地方！
老公非常懷念steak，超有水準！
會再光顧！
如果用作紀念日晚餐，呢度真係不錯嘅選擇！

昨晚經過開定食8，見唔太多人排隊，就諗住試吓，等咗10分鐘唔駛，就可以入座了！

呢度一個定食餐都真係好平吓，最貴嗰個都只係hkd58，就已經有前菜、主食湯同飯了，其中飯、湯及沙律，仲可以有無限refill的！係邊度揾啊？難怪成日見親都要大排長龍！

點咗特上盛海景丼hkd58 + 黃金魚配炸蝦烏冬hkd58 + 醬燒魷魚hkd20，初初以為咁嘅價錢，份量唔會好多，點知原來絶不欺場，全部嘢都相當有份量！雖然幾廿蚊貨仔，但味道又唔差喎，豈碼個丼食落去d魚生，是新鮮的！一定好食過爭鮮先啦！而個烏冬，又唔似嗰d噹噹嗰d cheap cheap烏冬味，食落是彈牙好味的！d炸物亦炸得唔錯，勁脆勁香口！個魷魚初初食，覺得好好味，但當食到8成飽時再食，就覺得有點heavy，因為兩個人食，實在太飽了！連refill的東西，也不用加！

呢間嘢下次可以再番啅！我想試過牛丼！

好耐冇去過旺角食嘢，咁啱嗰日同閏密去睇完戲，諗住係旺角食埋飯先回家，咁又未係香港食過韓式炸雞，咁就試吓呢間，原來即日係冇得book位的，只能walk in，咁當晚上到去，都要大約等咗15分鐘以上先有位。

當晚我地4個人，叫咗4樣食品，其中一個雞肉沙律唔記得影，雞肉沙律一般啦，個蛋卷味道係得意嘅，但188貴咗D，另外排骨好多芝士，而肉都好腍！入口即溶嗰隻，味道唔錯，而主角炸雞呢，比我想像中冇咁好味，因為係韓國弘大嗰D炸雞店度食過，真係好味好多，同埋佢質感較硬！呢度飲品先最貴，嗰支somersby apple加埋一，成100元超貴啊，但你又吹佢唔脹，又真係好飲！

最後埋單，4條友食咗800多元！

上幾星期又去咗深水埗揾食，行過劉森記見唔駛排隊，就入去食啦！

叫咗一個牛腩黑栢業蝦子撈同水餃蝦子撈，一上枱，嘩！d蝦子好似唔駛錢咁，灑滿咗個麪，不過原來食落去，蝦子原來係冇味ga！得個香字！

不過整體嚟講，係同個麫係夾的，個麫d質感又真係幾彈牙喎！竹昇麪果然名不虛傳啊！而牛腩好味夠腍，黑栢業勁爽口，水餃足料(但得2隻，會否太少呢？)，湯好甜好好飲，最讚有任食酸蘿蔔，正！唔會酸到標眼水，酸甜度啱啱好！唔錯唔錯！

前星期大帽山一日遊，晏晝先去川龍村端記茶樓嘆咗一盅兩件，呢度係自助形式嘅茶居，由沖茶到攞嘢食都係自己一手一腳攪，至於食物味道，我覺得比起一般去開嘅酒樓味道係爭d，但估唔到最有驚喜係蝦餃，雖然皮厚，但好滑，裡面亦好足料，有成3隻蝦，仲勁彈牙。大包亦好足料，雞扎好傳統，竟然仲有豬肚，好耐冇食過有豬肚嘅雞扎！郊外油菜幾鮮甜，山水荳腐花好滑！9個食物埋單計埋茶位$186，唔算貴，因為未去過呢d咁有風味嘅酒樓飲茶！同埋係呢度飲茶記住慢慢嘆，因為雖然發現佢初初食物唔算多，但間唔中會有新嘢推出，老闆就會叫咪通知大家有咩新嘢食，d人就會衝落去攞食物，好鬼攪笑！

 食飽飽後，仲可以係川龍村度散咗一陣間步，吸吓新鮮空氣，之後再搭51巴士遊大帽山至石崗，睇吓沿途風景，都幾唔錯！