一行三人，同朋友補祝生日飯，呢間收埋係諾士佛臺既樓上居酒屋，唔係朋友介紹都唔會搵到上嚟。 環境有驚喜，坐得唔迫，平日夜晚嚟好多都卜曬台。 睇menu價錢合理，食物超乎預期，尤其是個和牛sukiyaki真係入口即溶，同我係日本超市逐片買果啲差唔多咁高汁 天婦羅都唔錯，我地揀左南瓜，因為仲有個海膽醬炸蠔，不過就好重口味，老人定食唔慣 清酒店員同師傅會因應你食緊咩菜去幫你揀合適既酒，非常好 串燒都一人一隻生雞蛋點真係好闊佬 池魚刺身兩食 超新鮮，條魚骨可以揀炸/煮湯。 有機會會再嚟encore

吃魚嚕！ 行過路過，唔好錯過，竟然俾我見到河內道K11開左太～～二！ 即係要去搓搓佢，仲要唔！洗！等！！ 一條友又如何？一條友食酸菜魚也是條好漢 平日有午餐，1-2人既魚係明顯細啲，但都食得滯，兩個人食可能要加小食，跟餐既item無得更改。 同大陸比個味道都差唔多，好似無咁辣添，不過十就唔係寬粉，少少失望… 好彩個西瓜椰椰冰粉都好好食，好清爽，不錯！ 個飯有少少太濕，煮都煮唔切，餐內空間夠，位就唔多，今餐真係意外驚喜滿足滿足！

幫襯過兩次，兩次都係早餐時段，貪佢地點就腳又開得早。 早餐做得唔錯，份量夠，side dish個fruit salad有誠意，咖啡可以，比較多外國人幫襯。 如果口痕想食啲邪惡野配啤酒亦得，亦都見過有女士食唔曬成份nachos叫餐廳做半份走cheese，service嚟講無得彈，感覺呢種人性化既餐廳買少見少。 但今次個Fish N’ Chips真係要彈，雖然佢係即炸，但個皮太厚，食食下都唔想食，而且炸得唔夠乾爽，魚肉滑得嚟無味，薯條亦都一般，失望！ 下次再返嚟會叫返早餐算

孝順女#1就係隔一排要自動自覺同媽媽講不如今個weekend去飲茶吖？我請！ 因為唔洗理咩早茶優惠，訓醒就可以出發（當然又唔好太過份訓到太陽曬屁股） 媽媽話海之戀呢間酒樓坐得舒服，啲野食唔差，又就腳，一落車就到，又唔難搵位，咁 去到等左一陣佢安排位置，門口個阿姐係咁「水」人坐門口果枱，都傻傻地，呢一枱除左知客見到之外，點會有人無啦啦走出門口幫你收野加茶幾大都等！結果都有張海景 view 孝順女#2 母上話邊間好就好！佢話食咩就食咩啦！ 孝順女#3 通常老人家知你請食飯都唔係好敢叫野食，我都係出盡奶力，三催四請先揀到兩個孖寶再加多個灌湯餃自私食 要提一提怕蘇既朋友千祈千祈唔好點安格斯牛肉腸，好蘇！灌湯餃好正，個湯好清，好足料，啲餡唔會成pat漿蝦餃都好好，啲蝦又爽又大粒！上湯鮮竹卷個湯好好飲，但個餡唔得，又係果種食唔出乜野肉又一pat野咁薄飱中規中矩。 不過要提一提窗邊枱係好view ，但無風口，怕熱怕曬就唔好揀呢邊啦 要批評既地方係滾水唔夠熱 仲有就係想叫廚部/燒味要11點先有，早起的鳥兒無蟲吃…

同朋友係附近馬灣碼頭玩岸釣，之後近近地過嚟深井搵野食。今日同魚有仇，朝早食完炸魚薯條，夜晚就食烤魚 朋友好貪心想叫雞煲同烤魚，但3個人邊度食得曬… 就試試佢個烤魚先啦！ 叫多兩個小食，酥炸蠔仔同酥炸魷魚鬚，兩樣都係即炸，而且個炸粉做得好好！ 幾欣賞佢個炸蠔仔連埋啲芫荽一齊炸，正！ 烤魚都好大條，3個人食加兩碗白飯岩岩好，叫左小辣，微微係咀嘴邊feel到灼熱既辣感，係香辣又唔會死辣/死咸。條魚都夠肥美，無泥味，想過癮啲下次可以挑戰中辣。 睇佢都多人外賣自取返屋企食，多數幫襯粉麵，嚟緊會再去釣魚，相信可以慢慢試勻晒佢個餐牌！

第一次去汀角路開餐，本身想試食泰國菜，但啲indoor位full曬（俾人卜左），適逢風暴前夕，坐outdoor感覺窄窄地，所以專食西餐。 間餐廳好有特式，可能大家驚打風返曬屋企，所以假期前夕都係得1、2枱客，雖然伙記唔多，不過上菜既速度同show up都唔錯，又無食評講到咁差喎！紅白湯有講清楚白湯係豆湯。 我地叫左兩個dinner set，本身想試燒春雞，但老細話驚麻麻，最後就點左一份rib eye一份羊架，都係7成熟。 嚟到個湯合格，老細幾欣賞個豆湯，佢飲曬，跟湯個包仔有啲硬，都合格啦！沙有驚喜用料好足，係用左紫色同黃色蕃薯，再加啲哈密瓜定西瓜，夏天用瓜好牙煙呀，有變壞既風險，不過都照食啦⋯⋯ 份牛就真係過曬火，叫5成應該好少少，質素一般，羊架係有啲蘇味，不過份量好夠，燒得唔錯。甜品佢俾左兩款我地，預左我地share，我就一般啦。 薯蓉有啲搞笑，佢個味令我唸起即沖果啲，不過佢真係用薯仔整既，係實的的唔係滑身果種，都ok啦，翠玉瓜都好甜！ 如果夏天日頭嚟應該都夠涼，因為餐廳加左好多部冷風機，而且侍應都好貼心幫我地係枱底點蚊香，不過可能疫情無live band，希望下次老細日頭可以帶我過嚟chill下！架車我地係泊附近咪表位，無泊入嚟，另一點要提係老細好欣賞佢套音響個聲唔錯

趁住腦細放假同同事三缺一出去食十三姨，每次都鼓唔起勇氣試其他野食，見人地隔離枱嗌口水雞飯同冒粉都好似唔錯，但我永遠都唔捨得佢個酸菜魚encore 佢個湯無論係麻定係香都做得好出色，酸菜無噏味，魚好滑，但稍嫌多碎骨仔。唔想食到洗曬鼻水咁辛苦我擇小辣算啦，本身跟白飯，但強烈建議加錢轉水晶寬粉，好滑身，索汁又煙韌

之前食過明明好好食㗎，但係今日唔知係咪放工去，夜晚八點鐘，個櫃已經淨返伶仃幾舊壽司。已經係即場KO佢，可能雪左成日，啲飯超級硬，風味都OK嘅，但啲飯真係超級硬 等我仲貪心豬嗌左兩舊添 呢個價錢其實都幾貴，雖然個黑芝麻都幾香，但感覺個三文魚唔係好新鮮今次GG了…

裝修好台式，係台灣既古早夜市風格，可以棟係度食/買走。價錢少貴啦，不過話晒青衣都無乜選擇， 試一次啦。揀左粟米仔同豬耳，味道唔錯喎！夠香，夠味，係無得揀辣，佢都無提供呢個選項俾我。豬耳都唔會太硬，有時台灣啲滷味硬到會un胃，但佢無。 係有一種好獨特既調味，形容唔到，但睇個色水你應該會get到我講咩（掛？😅 總之好食到清晒！

京都勝牛（銅鑼灣） 元祖炸牛扒套餐$158 終於都放監，同閨密補食牛一飯，揀左呢間勝牛，係因為係秋葉原食過又好食又抵食😋 雖然香港食就貴好多，但只係食到個感覺，味道都係差啲😞 牛扒過熟，佢話3成但我唸7成都有，而且個程度不一。我呢份已經好啲，閨密果份再熟啲🤦🏻‍♀️ 椰菜絲沙律、蕎麥飯同麵鼓湯都係任添，呢三樣野就唔錯。卑微地希望佢地可以提供麥茶，因為食炸野唔多唔少都會有啲油膩感同熱氣，希望有啖茶飲下🍵