蓮香樓終於重開🥹
一放工就同朋友約嚟食晚飯



加開 #手搖茶 店喺樓下，夏天熱辣辣行過真係會忍唔住叫番杯

店員用心推介，於是無視「一陣就喺樓上食飯」
樓下買杯「三千紅塵」先，
（英文係「the grand earl grey with milk form」)

店員問我要咩甜度同埋冰量，「乜都唔使變！正常就得啦！我想試吓正常係啲咩味道」

冇幾耐之後店員就拎咗我杯嘢出嚟
然後喺我面前加泡同肉桂粉

佢推介先插飲管品嘗底部茶香，不同於一般手搖茶
蓮香對其茶底有著不一樣嘅堅持，一口入口
「真係好香茶香！入口相當清新，甜度適中」好彩冇叫少甜！
然後佢再推介我吸啜泡沫，個奶泡比我想像中輕盈，完全唔漏

然後再嚐茶底，「嗯？又另一種味！」

頭先我仲諗「飲咗呢杯嘢唔使食嘢啦！」
但係呢個泡比我好大嘅驚喜，輕盈得來又唔係話食咗空氣咁空虛
又唔會話齋落糖水死甜嗰隻！

朋友果杯冇泡，就會有個好似茶杯蓋嘅蓋，設計好特別

搦住杯嘢上去坐返去我哋個位，然後就開始開餐啦

我哋叫咗個蒜蓉炒豆苗

招牌煎鯪魚

炸子雞

蒸魚

雞同魚都整得好滑同好鮮甜多汁！
個雞外脆內滑！口感豐富！

西蘭花炒魚


係人都知我係一個水怪
一路食飯，我會飲好多水，好多時唔係因為口渴
而係因為出面嘅嘢食味精多
但係今次我真係冇乜點飲水
而且雖然都係一啲聽落好油膩嘅餸菜
但係完全感覺唔到油膩嘅感覺

但係比較奇怪嘅係
因為上咗兩味魚，有比較就有傷害
食完野生蒸魚之後，再食西蘭花炒魚，後者就顯得有啲失色🤫

本身想叫個乾炒牛河，但係竟然賣晒河粉
而聽聞呢呢個大廚出名嘅就係乾炒牛河
咁冇辦法啦，就叫個海鮮炒麵，結果個海鮮炒麵俾我清咗底🤭


有人會問「咁 #服務 呢？」
講真，真心驚
啲夥計唔該前，唔該後
就算傾偈傾耐咗都冇催我哋
香港今時今日咁嘅服務態度，邊度搵呀？

一般去酒樓，我都好驚去廁所
多數地下都濕𣲷𣲷
啲廁紙就堆晒喺度咁

朋友去完 #廁所 之後，話廁所好靚
本身唔急嘅我都要去一去廁所
仲要咁啱冇人

真係唔好講笑，個廁所勁soho feel
入面主打綠色，個冷氣機都係綠色
四周圍係中西合璧嘅設計，望真啲天花板係一朵朵蓮花咁嘅設計
如果啲門口嘅牌可以有啲玩味就更加Perfect

美中不足嘅係
食完之後如果有紅豆沙就正到爆啦🤫

下次要再試下叫乾炒牛河！聽廚師講係限量🤔

同朋友兩條友潛完水經過鑽石山 見好耐冇食過台灣嘢就嚟食 見到食評好壞參半早就有心理準備「唔好有期望」 去到5點半左右，其實都唔係好洗排隊 服務態度我覺得冇問題，仲幾好咁比我地放好兩個行李入座 本身想叫兩個牛肉餡餅食點知冇哂 咁嚟到梗係要叫個牛肉麵 話哂佢地店名叫牛肉麵，即係應該係招牌菜啦 當然，首先嚟嘅都係牛肉麵 我同朋友各自都叫咗碗半筋半肉麵。 筋同肉嘅數量麵唔少 我習慣會飲幾啖個湯底先 嗯？！ 冇傳聞中咁難飲/鹹喎，反而有少少藥同蘿蔔嘅味道，有少少回甘，好好味，飲落好想追飲果隻！非常開胃！ 至於啲筋，淋得滯，唔太識回彈！ 牛肉唔太入味，煮到老哂、有少少散！ 到到個麵，係我同朋友都覺得難食，太硬 個湯幫碗麵拉高分，但其實主角唔係麵咩？ 不過我都食哂嘅！因為湯真係好好飲！ 鹽酥柯仔 太鹹⋯ 而柯仔太乾身⋯ 呢個精彩，叫鹹蛋肉鬆豆腐（咁上下） 豆腐其實理應好夾肉鬆 但對唔住，個醬汁出哂事，酸酸地，又甜甜地，成件事好唔夾！ 叫咗個果汁茶，茶嘅部份你見到啦 就係咁 不過最終都飲哂同食哂啲果肉！ 裡面有橙、酸梅、青檸、蘋果等等。 兩個人埋單$239 不過真係可一不可再 試過就算喇 臨走仲比我見到有隻曱甴🪳 不過食肆有都正常，我都接受咗。

早排朋友Whatsapp裡面講起熱狗🌭️，佢推介咗齊柏林呢款熱狗比我試！ 仲要喺屋企附近，放工就即刻去買！
其實之前都已經試過佢薯餅(果陣做promote $5塊)，但熱狗真係第一次！仲一嚟就打孖……
講緊孖腸 一去到好害羞咁同收銀講「我想要...任性紐約...果個......連埋combo...套餐」...
係有少少老尷嘅！可能店員都睇得出我老尷，所以唔洗我講哂全名就覆單落埋單。
等左10分鐘到就拎得，仲check下有冇小禮品！ 🌭️  任性紐約辣味熱狗 試食價 $50  🌭️
Combo精選>> +菊9汽汽水= $65 送 限量齊柏林鎖匙扣 特別鐘意個匙扣嘅呢一面

佢個盒都設計到岩岩好，就算拎番屋企食都唔會走位走樣！
熱狗即叫即整、拎到番屋企仲熱架！ 材料包括炒洋蒽、煙肉、酸瓜、匈牙利膠、紐綸堡腸
醬料有 茄汁、辣黃芥末 佢呢個醬有少少辣，唔食得辣可以揀其他醬
但如果食得辣（其實我唔係好食得辣）而又頂到，超級推薦唔好轉！！！
配埋酸瓜+佢個醬，係辣得好過癮!!!!個包軟熟，唔乾身，條粗腸好大條仲要打孖上，真係好難一啖咬哂！ 拿上手就一定會整污糟，不過食熱狗係咁架啦成到我連手指上面ｄ醬都要lam埋!!! 菊９汽，味道唔太甜，淡淡嘅菊花茶版既汽水！味道幾新鮮！熱狗配汽水果然無敵！

有間齊柏林o係度真係好幸福啊!!!!!!!!!!!!!!!!!!!

之前去過附近想食雞煲，但因為即日冇哂位 於是今次神咁早book定，又咁啱今日打風幾驚冇得食 點知職員打比我地話，食到佢掛為止啦！🤣 準時去到，咁我地揀左個B餐 4揀1（雞煲、烤魚、酸菜魚、卜卜蜆） 我地揀咗雞煲 以任食雞煲嚟講雞量算豐富！我地揀咗BB辣，麻香得嚟岩哂我呢啲唔食得辣嘅人 另外想讚讚佢出面任拎嘅水煮牛肉，好好味😋 我地就冇揀到個好出名嘅酥皮麻辣芝士雞煲，因為驚比佢打爆個肚🤣 三個人食一個都好滿足，跟住佢就會問你想要咩湯底，其他可能係直接倒落去，但人和月係直頭幫你換個新煲 我地揀咗胡椒豬肚湯🤣 由於同行朋友唔食茜，就夾番哂出嚟 *建議店鋪可以考慮分開上 隨餐送美國牛肉大滿貫 豬肚湯嚟打邊爐其實對我嚟講好新穎（鄉下妹嘛） 豬肚煲到好淋，個湯都好香！ 牛肉方面好新鮮，肉味香濃 我鐘意食比較生嘅，淥一淥就上果隻 牛胸爽如其名食落好爽，有啲咬口 另外台式飲品任飲、台式甜品醬料同配菜都ok多👍 但我主攻肉已經夠飽🤣真係棒住個肚爭啲飽到上頸 店內環境都好寬敞，坐得幾舒服 但唔知係落雨天定唔知點，地下好濕好跣⋯ 係咁拖地都搞唔掂😅

今日同班老友睇完明日戰記嚟食飯 本身約咗8:10，但早咗 都可以照入（入去之前發現隔離有人係紅碼，即刻勁驚） 入到去就已經係飲品櫃、醬料區同自助配料櫃 特別先得個醬料區方便至極 因為分兩邊，360度咁 多人都唔洗慢慢排 Book位果陣已經confirm叫爵爺套餐 一嚟就上咗個錦繡前菜，然後叫酸菜魚時特別叫BB辣 因為同行有朋友超級唔食得辣，於是已經準備埋碗比佢拖一拖湯先食 點知當佢試咗一啖之後話唔洗（其實有時食到啲胡椒粒係幾辣），朋友居然話唔洗！而且仲話酸味蓋過辣味好正，而我地有啲鐘意食辣嘅朋友都滿足到，個湯好香，又唔會太鹹，啲魚都好滑好易入口！個個都讚不絕口 佢同時上埋刺身 所有嘢都好新鮮，好滑口！ 食哂之後就正式食火鍋 我地揀咗花膠美人鍋，入面花膠都好足，絕對唔係一人一條就算 我好突破地係咁落粉絲同薯粉，因為個湯底真係好好味😋 隨餐附送安格斯牛小排同海鮮併盤 除左海蝦之外其他都食哂😅對唔住海蝦 真係食唔落/有朋友敏感，下次都應該要走蝦 咁但係講到甜品哈根大師，我地梗係食得落😂 最正係唔同出面食一吉落去勁硬 佢一嚟已經開始軟軟地，可以唔洗等即食 埋單2000左右，都真係飲飽食醉咁走 而且冇催我地交台 成班開開心心吹水飲嘢無壓力 但竹蔗茅根真係好受歡迎，因為唔算太甜又好夾火鍋，而另外一款洛神花茶冇味，另一款茶又太重茶味（朋友話試過飲瞓唔著） 所以竹蔗茅根都係最好嘅選擇！

朋友有日突然講話原來有樣拉麵叫雪糕拉麵🍦🍜 當下以為佢講錯我聽錯@「なに⁉️」 然後佢比個圖我睇 又真係拉麵上面有舊雪糕喎 都唔平要1舊水，但望望下又真係好吸引 於是好奇心驅使下，我地決定去試下 朋友11:45去到，但因為我遲到搞到佢都冇得入😅 唯有等第二round （基本上最安全係11:45去到等佢開鋪） 食客都非常合作，預咗唔會坐得耐，飲完食完就拿拿林比錢走人，所以排round 2第一嘅我地 都好快入得去（12:20pm🥹) 佢每日都有限量 所以都怕會冇哂，但好彩限得嚟都算多 由於聽講花生醬味已經賣哂 今次一心試柚子味 但原來花生醬味仲有就決定要花生醬味 好快就嚟到 而我地都有跟佢指引去食 首先飲咗一兩啖湯試咗個湯底先 個湯底少少辣，好香好濃郁 再食一兩啖雪糕🍦 咦？ 硬嘅？ 不過諗諗吓又係 如果軟雪糕嘅話，一上到枱就溶哂啦🤣🤣🤣 分量唔多，唔會影響到個湯嘅溫度，但溶埋落湯之後 成個湯結身咗，飲落咁辣，變成擔擔湯麵咁 但又唔算好甜，好正好creamy，仲配埋啲花生碎粒，成件事唔會太漏 至於個筒，就由佢「融入」個湯入面，最後變成「腐皮」質地即可，不過係甜甜地嘅腐皮咁 蛋同燒過嘅叉燒都好高質，唔太肥同好香口 我食量算係大，但呢個麵食食下都覺得好飽 值得一試，比想像中有新意！ 下次會試柚子味！ #留意只收現金同八達通

中咗旅發局嘅賞你食，要8月27日平日星期一至四食，仲要7:30前離座 於是就特登放早一粒鐘然後趕去食 一去到已經有人排隊，而且個個都係旅發局coupon咁滯 咁成件事就冇咁尷尬喇😅 入座前已經要揀定咩湯底，所以一坐低就已經有人拎湯底同肉比你 再出去夾少少菜，開餐 其實一個人食兩個鐘時間都幾充裕，慢慢靜靜地享受都幾正 湯底都幾濃，牛肉都好新鮮，而且上餐速度好快 最後一個人食左6碟！ 佢啲日本紅茶都好好味😋消滯一流 係一個人出出入入拎嘢食有啲唔方便 又唔放心放個袋喺度 飲品選擇都算多，又有沙律冷麵果啲 不過今日一個人就主攻肉食😅 甜品有雪糕仲有啲嘢咬下都幾正 埋單100蚊左右！因為72蚊仲要以正價加一 So far 一個人食唔錯嘅，悶就悶啲有啲啲老尷 但都係個唔錯嘅體驗 係廁所要行好遠，所以食食下要去廁所都唔係咁好意思 要埋單先廢事以為我走左去

今次同同事約咗去食雞煲
事前同事已經講話都好full booking
我地book咗6點，8:30前交台。

6點未到已經見到入面有好幾台人
西環分店分兩個鋪位，今次我地食樓上果個鋪位

入面環境唔大，三個人其實張台都唔多夠，同隔離台距離都好近
不過講真，我係嚟食嘢，夠用就得！

最開心係一嚟就有碟茜喺度，如果唔夠仲可以問佢拎，絕對適合食茜人士

一嚟梗係食雞煲，今次我地嘗試咗唔辣先

其實雞量唔多，不過係任食，唔夠食咪再叫囉
佢嚟個煲時會比埋個鐘仔你
你任務係要每隔兩分鐘炒一次，total 炒4次

第一煲 唔辣
雞好滑，而且啲汁好好味，夾埋啲配料好match，係食食下覺得都有啲漏

第二煲 BB辣

今次我地加咗兩兜茜落去，BB辣其實唔算太辣（聞落以為好辣）
但佢可以令個煲更惹味，但又唔會太辣
少少辣令成件事冇咁「漏」，同事都好驚訝可以食到第二煲😂😂

你食食下果陣佢會問你上唔上海鮮
佢會計定時間幫你蒸定
上到嚟係咁

摸個殼以為係凍，食落係熱辣辣，而且蒸煮時間把握得好好👍食落好滑口，唔靭
海鮮都好新鮮，有海水味得嚟又唔會成口沙
中間有啲粉，食哂啲海鮮同荷葉香味！好好味！



喺社交平台 Like兼comment 就可以獲得無限任食牛肉片

再加埋其他放題配菜
食到8點半岩岩好
我地三個都好滿意好滿足
下次可以再encore

第一次去，本身同朋友住港島 見今日地鐵半價所以去遠啲飲茶，決定去元朗 一上Google另一間但朋友力阻，之後就搵到老馮，見啲食評同裝潢相幾得意就去下！ 地方唔算難搵，等位等左一陣就入得 門口亦都有位有風扇，唔洗企喺度乾等 入到去到走果陣員工唔該前唔該後好有禮貌 裝修都好有特色 食氣氛我都覺得抵 蝦膏腩肉飯超好味，一來到已經有陣蝦膏味 雖然同朋友hea住食但冇趕我地走比我地慢慢傾計同嘆杯靚茶 午餐時段仲有免茶芥或送凍飲！極推薦！

服務態度極度差劣 送餐時員工態度ok 但比錢埋單果陣就咁對張單埋來手指指個銀碼！ 員工唔識講廣東話？數字咋喎！ 核對好數目後就咁目口目面收走啲錢同張單一句多謝哂都冇？我唔係來求你供應食物比我地 我係真金白銀，亦唔係齋飲！ 作為一間日資企業咁既服務態度！真係連酒樓都不如（利申：我喺日本既日本餐廳做過，我唔係要求香港都要一樣，但至少食客係真金白銀唔係來乞食，乞食都唔係咁樣對食客掛？如果MUJI真係要做到日資既感覺，麻煩做得徹底啲！唔好文具日用品一種態度，CAFE又另一種！）