金沙美腿（$35）
即係咸蛋黃炸雞脾，即叫即製，需時十數分鐘。
雞脾算大隻，切肉離骨炸，有少少炸過龍，雞皮有丁丁硬，但可接受，雞肉軟嫩，咸蛋黃醬不少，超邪惡，連埋肉一齊食，咸香味十足。
另外送咗一碗蕃茄湯，仲要幾大碗添，蕃茄、紅蘿蔔、洋蔥、肉絲，勁足料。

呢間餐廳其實都幾雜，除咗燒肉，又有火鍋，仲有定食。但之前一直都諗住試試，咁啱係附近，就去食個午飯。
一心諗住試燒肉，所以無考慮其他，而燒肉套餐都有十數款，牛豬雞，不同部位，不同組合，不同份量，悉隨專便。
牛胸腹 Karubl 精選牛（200g）套餐（$86）
套餐除咗牛，仲有白飯（可加錢轉特色飯）、麵豉湯、前菜（中華沙律），另外加送一款食物，我揀咗牛胸腹（50g）。
200g 精選牛胸腹，即係有兩盤，但目測兩盤都唔似樣，放面有label嗰盤明顯比較靚啲，燒起肉質唔算軟嫩，牛味都有少少嘅，點埋枱上面嘅燒肉醬汁，配埋白飯一齊食都OK。另外送嗰50g 普通牛胸腹，就真係十分普通了（同埋都幾肥，唯有燒耐啲逼哂啲油出嚟）。
但又公平啲講，唔使一百蚊（不用加一服務費），其實都尚算抵食。

呢間係旺角好巴閉嘅滷味店「肥姐」嘅大新抱開嘅新店。
老實講，次次經過旺角排隊條龍都勁長，我就唔排嘞，呢度人少少唔使排，又話同一味道，咁就可以試吓。

大皇牌（$40）
有三串滷味，墨魚、大生腸、火雞腎，配上醬汁、甜醬、芥末醬。
先試火雞腎，有五件，軟身得嚟又幾彈牙；
跟住試大生腸，同樣有五件，爽口，有好些微生腸獨有嘅腥味（可接受）；
最後食墨魚，有六件，由一條頗粗嘅墨魚鬚切件，唔韌，彈牙，好𡁻口。
真心講，三樣嘅底味（原味）就無乜，但醬汁味的確唔錯，味道好夾呢啲滷味，所以整體係幾好食嘅。

下午茶餐：巴東牛肉 配 斑蘭椰香飯（$62）
份量不少，巴東牛肉有七至八件，煮得入味兼且夠腍，辣辣哋十分惹味。醬汁都夠撈哂成碟飯。
斑蘭椰香飯唔算好濃椰香味，味道普普通通。
仲有幾款小食配菜，大片蝦片夠脆、花生、青瓜粒、車厘茄、炸豬皮。

追加小食：娘惹五香雞卷（$22）
炸得過咗少少火，味道夠濃味。

熱馬來手工拉茶（$0）
香滑，但茶味唔濃，算OK啦。

午餐：越式慢煮豬手飯（$66）

豬手份量適中，有皮有肉無骨唔多肥膏，肉質夠腍，味道不錯唔會太鹹，點酸辣醬汁可以中和肥膩感。
包熱飲，鹹桔水夠濃味唔稀。
不收加一服務費。

午市超值套餐：秘製杭州骨（$54）
類似黑醋骨，味道酸酸甜甜，十分開胃。排骨大粒而且份量不少，另外仲有菠蘿。跟一配大白飯。

追加小食：千層醬豬耳（$18）
豬耳爽脆彈牙，而且唔多肥膏位，滿滿的骨膠原。多蒜多蔥，加上醬汁濃厚，喜歡重口味的（如本人）一定鍾意。

掙扎緊揀雞排定雞腿排，最後揀咗後者。
派值套餐 #2 脆皮雞腿排套餐（$62）
套餐有無骨雞腿排、薯條、飲品。調味粉可選：原味（椒鹽）、香辣、海苔、梅子、芝士、咖哩、麻辣、芥末，而且可揀兩款，雞腿排選了原味，薯條選了芝士+麻辣（少辣）。
因為即叫即炸，而且都有幾組客人在前，結果等咗差唔多廿分鐘。
無骨雞腿排大大塊，拎上手隔住紙袋都少少熱。外層炸粉係可接受嘅厚度，咬落超脆口，但不是鬆化的那款脆，而是偏向實身的（有少少似英式炸魚，溝咗啲啤酒落炸漿嗰種口感，但再實多丁丁），唔算太過油淋淋；裡面雞腿排仍然軟嫩，仲有些少肉汁，但雞肉偏向薄，欠缺口感；原味（椒鹽）調味恰到好處，唔會太過咸。整體而言，是好食的，但好似本地嘅「生炸雞脾」吸引啲，因為感覺六成食炸粉四成食雞排。
薯條都係即炸，粗身，唔算脆，芝士麻辣味粉幾香，但只洒咗係面，唔夠多，食到底就無咩味了。
結論：可以去試吓，但唔好抱太大期望。

繼上次發現海之戀Donki出口旁原來有個小型美食廣場後，今次又去試另一間。

銀だこSet A（$55）
原味正宗章魚小丸子（四粒），雖然唔係即整，都算熱的，外層微脆，裡面微熱，章魚腿大粒有咬口。沙律醬、照燒醬味道正常。
築地銀炒麵，即炒夠熱，份量唔算好多，除咗幾條椰菜絲就無咩配料。麵條可以，唔糊口有些少口感。味道唔太濃。
飲品，除咗汽水，還可以選原味抺茶及抺茶牛奶。

海之戀Donki出口旁原來有個小型美食廣場，大約有五/六間食店，見到呢間炸雞好似唔錯，叫咗個五件炸雞定食（$65）。
買完見到員工即炸，大概十分鐘左右有得拎。
定食有炸雞、椰菜絲、醬汁（可選兩款）、白飯、麵豉湯。
炸雞外觀不錯，咬落去外脆內嫩，而已仲有肉汁，不錯。

午後輕食 S4 乾炒什菜河（$46） 套餐有例湯、涼菜小碟（香辣魚片、泡椒鳳爪、拍青瓜）、輕食、餐飲，堅抵食。 例湯正常唔過咸；涼菜要咗拍青瓜，多蒜，微辣，清爽開胃；乾炒什菜河有鑊氣，雖然唔係勁乾身，但微濕嘅情況下亦都唔錯，醬汁濃，味道足，什菜份量不少，河粉唔會碎濕濕。