今餐真係抵到唔介紹唔得呀 呢間新蒲崗嘅老字號火鍋小店 主要做街坊生意 388二人餐 又牛又海鮮又椰子雞 野食嚟到一半忍唔住問多次係套餐價定人頭計 大佬呀 真係番大陸都冇咁平啦 我地揀左椰子雞煲 佢用老椰子 飲落特別甜 半隻雞煮完都幾滑 雞皮唔會太肥 手切封門柳 好大碟 出面叫一份都要二百幾啦 肉味濃又唔太肥 手切有一定厚度口感唔錯 套餐仲有幾款海鮮 鮑魚用雞汁滷過可以當冷盤食 厚肉彈牙 帶子新鮮即開 手板咁大隻 味道鮮甜 仲有廣島蠔同海蝦都好新鮮呀 水餃同雲吞飽滿足料 水餃有黑木耳夠爽口 手打黑松露丸大到乒乓波咁 口感好彈牙 仲有菜籃同出前一丁 真係飽到上心口 大食一族加18蚊仲可以無限追加一丁同菜籃添 除左呢個餐 其實仲有海鮮盤都好抵 下次要叫多啲朋友一齊嚟先！

越嚟越多大陸餐廳開到嚟香港 就算放假懶得同人迫過關 一樣可以食到啦 朋友想食辣野 我地就揀左農耕記食湖南土菜 其實佢嘅辣度都可以自選 我地多數揀小辣同中辣都夠晒惹味 擂辣椒皮蛋 呢個涼菜係成餐最辣嘅 會由職員幫手擂 煎過嘅青椒茄子同皮蛋一齊食 開胃惹味 湖藕龍骨湯 好足料嘅靚湯 蓮藕煲到好粉 第一次食到咁腍咁粉嘅蓮藕 正呀 鮑魚辣椒炒肉 辣椒炒肉都算係招牌菜 我地叫左有鮑魚版 原來啲鮑魚好似手指頭咁大 幾得意 都彈牙㗎 小筍炒臘肉 小筍清脆爽口 用有煙燻香味嘅臘肉嚟炒 幾香口 招牌蝴蝶魚 本身以為係酸菜魚嗰種嫩滑魚片咁 但呢個好爽彈 好似脆肉鯇嗰種口感 整體嚟講都唔錯 呢個菜系夠惹味 送飯一流

最近柞木炭家出左期間限定嘅牛舌menu 即刻約埋超鍾意食牛舌嘅朋友去試下 呢間全程都有職員幫手燒 坐定定等食就得喇 所有前菜同埋芝士粟米都係任食嘅 特別鍾意食呢間嘅泡菜 清爽又食到白菜嘅甜味 蔥蒜牛舌 薄切牛舌上面鋪滿蔥蒜 燒完再卷起嚟食 牛舌燒一陣就食得 蔥蒜仲係半生食落有啲辣 職員由第二片開始就減少蔥蒜 幾細心 檸檬鹽花牛舌 呢款厚身少少食落幾彈牙 檸檬鹽調味幾清新 燉牛舌 性價比超高 65蚊就食到 燉得好腍好入味 仲有蘿蔔都係好索汁 呢個值得encore 韓牛肉眼 真正韓國直送嘅韓牛 牛味好濃郁 肉眼油花真係勁靚 但食落又唔會油膩 生蠔牛肉石頭鍋飯 生蠔大大隻脹卜卜咁 鮮嫩爆汁 同牛肉都幾夾 石鍋飯有少少飯焦底 食落都幾香 舞動喵 其實已經食到好飽 但見呢個甜品好打卡就叫一個大家share 超動L嘅貓貓奶凍好得意 玩左勁耐先捨得食 奶味都幾重 仲有曲奇碎 整體偏甜少少

呢間位於soho區嘅意大利菜性價比真係好高 3 course set dinner分258同298兩種 仲有酒類都係39蚊杯 最啱放工飲番杯 唔怪得7點已經爆晒場啦 記得book定枱先 店主同一班店員都好熱情 成個用餐氣氛好好 Order完野食就會送上香脆嘅餐前麵包 蕃茄同蒜茸兩款都好香好好味 仲有原個焗蒜頭 Cozze Alla Marinara Appetizer嘅份量都好足 好似散叫一個dish咁 白酒藍青口細細隻 肉質好嫩好鮮甜 Salmone Affumicato E Avocado 煙三文魚配埋熟得啱啱好嘅牛油果 點少少檸檬牛油汁一齊食都幾正 Oven-baked US Pork Ribs 佢嘅bbq sauce同平時食開有啲唔同 加左蕃茄蒜頭味比較重 好似肉醬意粉醬咁 ribs一下就切開左 啲肉好嫩好腍 好好味 Parma Ham Pizza 薄薄嘅批底加上芝士蕃茄醬同parma ham 批底似餅乾口感 輕盈唔會太有負擔 Set嘅甜品可以揀Tiramisu同Panna Cotta 我地兩款各一個試下 唔錯呀唔會好甜 Tiramisu咖啡味好重 奶凍口感好rich好幼滑

慶祝生日梗係要搵間靚餐廳啦 揀左圓方嘅수라상食餐高質韓國菜先 呢期韓國櫻花季 所以餐廳出左幾道櫻花菜式 綻放的櫻花生牛肉 韓式生牛肉食得多 不外乎都係水梨蛋黃 呢款加入左櫻花漬 咸咸地之餘仲多左陣香氣 大邱櫻花蝦煎餅 煎到兩面香脆 煎餅帶少少煙韌口感 食到蔥香同大量櫻花蝦 幾香口 櫻花蝦蕈菇釜飯 粉紅色嘅櫻花釜飯真係好春天呀 好多蕈菇幾清新 想惹味啲就加啲韓式辣醬拌飯 韓牛大蔥卷配泡菜炒飯 呢道應該係招牌菜之一 我見好多枱都有叫 用韓牛包住大量蔥段 職員幫手煎到啱啱熟 牛肉味重之餘 油脂大蔥香氣都好重 留番少少牛肉同牛油嚟做泡菜炒飯 好香好正 呢度嘅cocktails都幾好味 柚子味嘅Snowing Night 杯邊加左海鹽 味道幾有層次幾豐富 酒味唔重啱晒女仔

佐敦永安附近呢間新開嘅居酒屋 小店環境幾舒服 店內掛滿日本風嘅壁畫 食物選擇都幾多 人均三百幾 價錢都合理 特選壽司盛-霜 198就食到八件壽司 刺身全部都好新鮮 當中包括海膽同穴子呢啲貴價野 海膽好鮮甜creamy 炙燒左口魚邊好油香 霜月卷 青瓜卷上面鋪滿拖羅蓉 海膽同三文魚籽 成個配搭口感好豐富 好鍾意呢個招牌卷物 牛小排半生燒 輕輕炙燒過牛小排嘅表面 多左陣香氣 牛小排肉質好軟嫩又香甜 加埋洋蔥絲同微酸嘅醬汁 好fresh好開胃 明太子玉子燒 甜甜地嘅玉子燒上面係咸香微辣嘅明太子醬 燒過之後更香更惹味 一人一件感覺唔夠喉 自家制雞團子 雞團子入面食到雞軟骨嘅爽脆口感 加埋月見醬汁甜甜地更好味 日本提燈串 本身見到有雞提燈好興奮 因為唔多餐廳有得食 但呢個明顯燒過左龍 第一次食到全熟嘅提燈🥲 整體嚟講我覺得呢間都幾好食又唔貴 係提燈扣左分 都有下次嘅

自從喺屋企附近食過一次好差嘅雞煲 以後想食雞煲我寧願早幾個站落車 喺石門京端廣場食埋先番屋企 呢間豐鍋食過好多次喇 水準一直都唔錯 招牌麻辣雞煲 可以自選辣度 對我嚟講bb辣已經夠晒惹味 鍾意呢度雞件大大件 餐廳職員幫手炒完先上枱 加左好多洋蔥芹菜芫荽 索晒辣雞汁又香又好味 加埋我食雞煲嘅必備索汁配料芋絲真係好正 食完雞煲就開始打邊爐喇 如果用番雞煲加湯打邊爐就免費 但我地想食菜又唔想咁油就另叫湯底 蕃茄薯仔雜菌鍋勁足料 等於叫少兩份火鍋料 半價左40幾蚊抵俾啦 頂級安格斯牛小排 打邊爐一定要食牛啦 呢度都有幾種牛選擇 我地揀左牛小排 油花都好靚 肉質嫩滑 手工四寶丸 墨魚丸 蝦丸 鯪魚丸 墨汁墨魚丸 粒粒都好大粒 除左鯪魚丸淋左啲之外 其餘幾款都好彈牙 整體嚟講呢間雞煲真係幾出色 推介俾所有沙田同馬鞍山友

呢排成日都去觀塘做野 無意中發現呢間由前泰皇御廚主理嘅泰國菜 又平又好味 食左幾次忍唔住要寫嚟紀錄下 首先呢度嘅串燒真係必食 見到串燒區嘅廚師燒到冇停手 叫左幾款都係咁出色 仲要48蚊有4串 平到爆 沙嗲雞肉串燒 本身醃過嘅雞肉串就咁食都好好味 配埋個好香花生味嘅沙嗲醬仲正 泰式豬肉丸串 大份到呆左 四串豬肉丸勁大粒堆到成座山咁 加埋個汁真係好有泰國掃街feel 烤香茅豬頸肉 燒到外層有少少焦香 豬頸肉好爽口 仲有酸酸辣辣嘅泰式醬汁 好惹味 冬陰功 點會估到48蚊碗嘅冬陰功可以咁正咁足料 兩隻大蝦爽口彈牙酸辣開胃 唔怕辣嘅一定要試 乾炒雞肉河粉 好夠鑊氣好惹味 食到落底都唔油膩 馬拉盞炒通菜 通菜炒得好翠綠爽口 馬拉盞惹味愈食愈想食 香蕉朱古力煎餅 即叫即煎 入面夾住香蕉同淋上大量朱古力醬 外層酥脆入面口感軟糯煙韌 味道唔會太甜 唔錯

之前都食過尖沙咀Beefar’s幾次 今次再嚟發現出左個超抵食嘅set 每人268已經可以食到幾款靚牛 雖然呢個set係澳洲和牛 但係性價比已經贏晒 仲有19款食材可以用優惠價加配 當中餐廳最出名嘅日本奇蹟之牛都有優惠 先食個日式薯絲胡麻沙律開開胃先 每人一件蟹膏蟹肉味噌海膽多士 加拿大海膽又大又厚 口感creamy又鮮甜 下面仲有好多蟹膏蟹肉 真係超正值回票價 燒肉拼盤就有三筋肉薄燒 牛後腿肉 牛腹肉 澳洲和牛三角腩 澳洲和牛西冷 我就鍾意油花比較重嘅三筋肉同和牛三角腩 另外三款就肉味比較濃 都係好正 三筋肉薄燒由職員幫手 燒得啱啱好 點埋蛋漿口感更嫩滑 仲好食呀 套餐仲有昆布蛋花湯同白飯 唔加野都夠飽 飯後甜品係任食日本雪糕 好高質呀 麻糬雪糕口感煙韌 抹茶紅豆味最正 呢度仲免開瓶費 可以自己帶支大吟釀嚟嘆下

呢個真係超級邪惡！！鍾意芝士嘅一定要試！ 平時食雞煲都係惹味麻辣為主 但呢間有另一款更加吸引我 間唔中就要去食下 黃金芝士雞煲 首先雞肉可以揀原隻雞或者啖啖肉版 我呢啲食肉獸梗係揀全雞髀啖啖肉啦 芝士仲可以加量/減量 我揀原版已經鋪到滿晒 仲有鹹蛋黃醬同洋蔥 食落香甜惹味 唔會好滯 酸辣無骨鳳爪 充滿泰式風味 酸酸辣辣又爽口 好開胃 特級雪花肥牛 食完雞煲就可以打邊爐 打邊爐又點可以冇牛呢 淥幾秒就食得 肥牛幾嫩滑牛味都幾濃 手打五寶拼盤 叫左半份 粒粒手打丸都乒乓波咁大粒 最正墨魚丸超彈牙 仲食到墨魚粒粒 好想encore 鮮製五拼餃 雲吞好大隻蝦好爽甜 菜苗餃清清地幾好味 每隻餃都包到漲卜卜勁多餡 抵食嘅！