佐敦 糖水檔1987 好啱作為宵夜或飯後食甜品 睇咗餐牌介紹，糖水店自1987年創立 前老闆因為年大又有腳患，無法親自經營 幸運地有一對食客情侶(現老闆）接手 老鋪得以承傳，好喜歡有故事嘅食店 本土美食值得支持🫶 🔅XO醬炒蘿蔔糕（$36） XO醬由小店自家調製，真係見到粒粒蝦米 佢嘅辣度, 初初入口算正常，而後勁非常強 用嚟炒蘿蔔糕，香口惹味 🔅鴨腎菜乾豬骨粥（$38） 豬骨粥係小店招牌之一，傳承老配方 用上長時間熬製，所以味道濃郁 粥入面嘅豬骨同鴨腎都唔算少，真材實料 而且呢幾款食料有養胃健脾功效，食完好舒服 🔅韓式泡菜麵 $43 份量飽肚，正常發揮 最可愛係兩條腸仔企係麵上面 🔅白雪女皇 $49 佢係腐竹桃膠糖水配燉蛋白 桃膠Q彈、腐竹煮融入味，配上燉蛋白 滋潤又養顏，糖水可以加配芋圓、湯丸等等 小編就加咗最喜愛嘅芝麻湯丸 (兩粒$12) 佢重有少少流心架 🔅椰汁芒果西米燉蛋白$48 用上新鮮芒果配搭西米露，蛋白又香又滑 同樣加配芝麻湯丸兩粒 ($12)，裝得滿滿，豐富又滿足 呢度大多數糖水都喺一架傳統糖水車調製 最初重以為係噱頭 🔅擂沙湯丸 (6粒) $29 小編同朋友係芝麻湯圓fans，所以擂沙湯丸必叫 湯丸鋪上擂沙，外層煙韌，內裡流心 食落再多一份黃豆香味

近日先發現 沙田友同丸記清湯腩王合拼重新開張 食店變得大咗好多 裝潢亦變得有趣，牆上有霓紅燈擺設 最特別係有模仿屯馬線嘅路線裝飾 懷舊又好有本地情懷 🔅清湯牛腩撈麵 $58 丸記馳名清湯腩，係家傳手藝延續至今 至今已經係第3代 牛腩入口香腍，肥瘦適中，撈麵爽口 附送嘅湯底清甜 加埋杯涷奶茶就係傳統味道 🔅公司三文治 $49 (下午茶) 一啖咬落去，係厚切甜蛋、厚切午餐肉 重有半溶芝士，加埋生菜同蕃茄又會變得爽口無咁膩，而麵包再烘得濃少少應該會更香口 🔅半熟芝士撻 $14 芝士味香濃，而且非常流心，小編唯有獨食成隻 🔅酥皮斑蘭蛋撻 $11 有淡淡嘅斑蘭香味，酥皮鬆化，原來每日限量100隻

Mama Mia! Pizzeria 裝潢好有活力 睇到心情都輕鬆晒 每個位置都有不同嘅打卡設計 要影晒就要好似小編咁，留到最後😆 🔅二人餐 $188 包括一個12“吋pizza，一份小食，同兩罐汽水 🔹羅馬辣味煙肉pizza Pizza係小編偏好嘅薄底，批邊烘得脆 餅身依舊鬆軟，餡料同醬汁唔會過多，食得輕鬆 第一次食pizza點蒜蓉香草醬 原來加醬後嘅味道係會更加香，推介 🔹水牛芝士條 喜歡芝士嘅必點，記得趁熱食 🔅卡邦尼扁意粉 $98 醬汁足夠，creamy得嚟唔算膩 粒粒嘅煙肉就稍稍可以細翻少少，應該會易咬啲啲

被金色不如帰嘅搶眼招牌吸引住，原來佢曾經榮獲東京米芝蓮必比登推介、連續三年勇奪米芝蓮一星拉麵殊榮🎖️ 🔅牡蠣白湯拉麵 $138 🔅配自家製豚肉煎餃 （三隻）、 白桃焙茶 +$38 呢款係今期推介嘅拉麵，整碗充滿牡蠣香味 湯底由牡蠣調製，加入鮮牡蠣油、牡蠣醬 同重要嘅醬漬牡蠣，特別之處加入火箭菜 少少苦味令整碗拉麵唔會食得太膩 加配嘅豚肉煎餃煎得香口又鮮甜，食落亦唔覺好油 🔅燻製黑胡椒豚骨拉麵 $115 湯頭無傳統一般嘅咁油膩 帶點肉碎，充滿胡椒辣味，好醒神 經過慢煮嘅叉燒軟嫩，入口香滑； 而拉麵係用特製小麥粉自家製成，比一般嘅扁身啲 🔅一口芝士脆豚 $70 炸得酥脆，入面係一捲捲嘅豚肉，並唔係漢堡肉做法。中間夾住流心芝士，趁熱食一流，推介👍

丸作食茶係小編常幫襯嘅茶飲店之一，因為除咗珍珠奶茶，佢其他嘅茶都唔錯💕 今次直接跟排行榜選擇，帶走第3名嘅丸作水果茶同第4名嘅宇治抹茶白玉。 🔅宇治抹茶白玉 $40 賣相靚靚，真系同圖片一樣，做到綠白相隔🤩 抹茶香濃，微苦微甘；白玉Q彈，咬落煙韌，佢嘅微甜剛好補充返抹茶嘅微澀 🔅丸作水果茶 $41 入面有蘋果、青檸、波蘿等等，材料豐富，飲落清新。建議揀少甜，茶飲如果帶點生果嘅自然少酸味道，感覺會更清爽👍

小編之前去過銅鑼灣分店，由於肚皮有限，係同等搶眼惹味嘅燒雞同火山排骨之間，只可忍痛二選一。 今次到訪尖沙咀分店，一於試試上次未食到嘅火山排骨。店內畫滿海洋感覺嘅壁畫，加上紅磚牆，有點型格。 🔅火山排骨 $228 份量好震撼，成個火山咁，啱晒食肉獸。排骨啖啖肉，肉亦煮得軟嫩，好容易搣落嚟食。醬汁方面，小編就揀咗甜酸醬，甜甜酸酸，夠開胃 🔅青咖喱軟殼蟹 $168 軟殼蟹肥嘟嘟，浸落濃郁嘅青咖喱度，有啲辣，但又好惹味。附送嘅蒜蓉包充滿牛油酥香，即使就咁食都已經好好味。最喜歡佢用小火爐慶住，保持熱度，保持辣感 🔅小食拼盤 $188 拼盤已經包括蝦餅、魚餅、春卷、香葉紙包雞同脆卜卜蝦片。偏好魚餅，帶獨特泰式香草味；蝦餅夠熱又彈牙；香葉紙包雞啖啖肉，吸收晒香葉香氣 🔅炭燒豬頸肉 $98 燒得好香口，邊位微微焦香，咬落鬆軟又香嫩

位於尖東海旁附近，餐廳主打越泰fusion菜式，裝潢好優雅，開放式設計好有外國café感覺。所以小編揀咗 “outdoor”位置，同朋友肩並肩坐，望住繁忙街道好chill咁用餐。 🔅越式軟殼蟹米紙卷 $138 喜歡佢加入咗牛油果，同軟殼蟹一齊食好夾 而伴碟嘅醬料係芥末沙律醬，wasabi微微地攻鼻，好有趣嘅組合 🔅串燒沙嗲 (六串) $128 豬、牛、雞肉每款各兩串，串燒燒得香口，啖啖肉 本身已充滿沙嗲香甜味道，再點上醬汁就更惹味 🔅泰式蝦河粉 $158 河粉炒得爽口，重帶有甜甜酸酸味道，好開胃 雖然餐牌上有隻辣椒仔，但係辣粉同花生粒粒係放碟邊，可以自由加減。小編當然全加，香辣得嚟又多份咬口 🔅蟹肉奄列 $168 奄列原來會經油炸，外層脆卜卜，好特別，蛋同蟹肉都份量十足。不過就預有少少油膩，好在底層加有青瓜，可以平衡一下

坐落佐敦橫街的二八火鍋 ，兩層高嘅小店，提供任食火鍋 （$228/位），價錢好優惠，而整體嘅火煱配菜都好有水準，性價比高。小編建議，想試就要快啦，呢個咁抵價真係唔知做到幾時🙈 火鍋配料牛、豬、魚同雞肉都齊備。肉質新鮮，色澤吸引。小編同朋友都食咗唔少碟肉 🐮手切本地吊龍肉油脂充足，入口香滑；安格斯牛小排同封門柳相對油花較少，但牛味濃郁，又有少見嘅牛骨髓 🐷豬肉方面，鹿兒島黑豚肉滑嫩，橡果黑毛豬肉就好爽口，有嚼勁 🦐鮮蝦滑、墨魚滑同各種丸類，爽口彈牙，尤其胡椒豬肉丸，胡椒辣味慢慢滲出，好過癮 🥓重有午餐肉係煎香上枱，佢嘅肥膏少，外層焦香，放落火鍋或者就咁食都得 🥘湯底方面，由常見嘅莞茜皮蛋湯、咸豬骨湯底，到竹笙椰子鷄鍋，同好少見嘅川弓白芷魚頭鍋都有

成日都想試試Gram Cafe & Pancake ，路過發現有兩款迷你版可以外賣，今次就帶走rocky road，同屋企人一齊食。 🔅石板街班戟 (迷你版) 面層鋪上生果同埋焦糖脆脆，撒上朱古力醬，五層layers，賣相有啲似蛋糕。其實佢係三層嘅pancake，夾住一層吉士同一層忌廉。Pancake帶微微朱古力香，口感綿軟，但質感就比一般嘅厚實，所以食完會有飽肚感 而佢嘅包裝，中間係一張卡紙兜住pancake，完好保護五層高嘅甜品，唔會因為左搖右擺而變型，亦好方便咁拎佢岀嚟

餐廳位置唔近大街，但係平日晚上，估唔到都差唔多全場滿座，好熱鬧，幸好小編有預早訂枱 ✌️ 🔅15%黑松露帶子蘑菇燴飯 $128 每一啖飯都充滿黑松露香味，濃而不膩。加入鮮甜帶子，食落無咁單調，推介 🔅牛油果軟殼蟹意粉$138 軟殼蟹香脆，而用牛油果肉混成醬汁，夠creamy亦帶青草香味 🔅伯爵茶珍珠梳乎厘班戟 $118 超大份，伯爵茶醬好似瀑布咁掛滿梳乎厘 上枱時有被驚艷到 。伯爵茶醬唔會太甜，珍珠同oreo碎碎啱啱好補充甜度。梳乎厘入口綿密，帶蛋香味，稍為多返少少空氣感就會更好 🔅山政小山園槙之白宇治抹茶 +$42 🔅Oreo 朱古力沙冰 +$41 前者清香，抹茶嘅苦澀度剛好，配上靚靚拉花； 後者味道濃郁超級多cream，飲完就預咗月巴