1. 預約
想book19:30必需要whatsapp，佢响OP平台獨獨skip咗呢個時段, 事實又明明有位。

2. 環境
裝修不錯，但高腳櫈並不舒適，當日所坐的位置無得置物。枱有點細，趕快吃完收走才可上下一道菜。
餐廳附近僅此商場，地點不算就腳。

3. 服務
個別店員極具個性，對話不喜正面面向人；明明聽到你，又好似聽唔到你講嘢咁。然後語氣比較倔，服務不算好。（英語店員服務較佳）

4. 食物
4.1 唯一推薦 蟹肉奄列($168)
網評話蛋皮太乾，我覺得可以接受，蟹肉餡料豐富，配合是拉差醬，相當惹味。作為前菜，兩個人分，份量剛剛好。

4.2 肉碎生菜包($118)
唔係好食得出酸辣口味，
配的生菜量極少，有薄荷葉和九層塔之類的Herbs。
但Herbs不太乾淨，面頭食落有層嘢，不肯定有冇洗過。
肉碎較腍，洋葱帶甜，整體咬口、香口略嫌不足。
(如果佢Herbs係炒埋落去應該好好多)
朋友負評，我覺得合格。

4.3 冬蔭功($78 x 2)
一嗌必需叫兩碗起，朋友唔太愛都變相迫住嗌，user-unfriendly。
而一碗要$78細碗，性價比低。
用料:量ok、質唔ok，蝦冇記錯有3隻細size，但不太新鮮。
煲出黎不過不失，不夠濃厚。

4.4 泰北咖哩金麵($128)，多人熱門推介
一半炸脆一半淋汁，淋汁那一半口感似伊麵，但又不算太好食，
咖喱汁同個麵不算太夾，雞扒又有點乾。個驚艷位响邊？
純粹係本地較少見有此菜式選擇。

總結
本身喜愛食泰菜，以其他店為benchmark的話，此店食物水平僅為中等。
尤其是一些需要真功夫的基本款就即時見新章，比如泰菜靈魂冬蔭功。
打卡一試是可以的，推薦人地山長水遠特登去食就大可不必。

帶父母食西餐，呢間屬於區內好評較多的餐廳，
環境比門口睇闊落得多
燈火通明，暖色調＋紅棕色佈局，感覺復古溫馨，
有餐巾仲有飾環，响細節睇得出肯花心思。

服務方面亦貼心，入座已問是否需要飲熱水。
店員態度算殷勤，訓練有素。
雖有限時1.5小時，但上菜速度頗快，足矣。

紫薯湯，微甜，餐包配以黑醋和橄欖油
前菜＋小食＋意粉／飯＋主菜
但是唔包飲品

煙三文魚凱撒沙律
食落去比外觀好，
沙律醬不重手，剛剛好
生菜爽脆，配上脆煙肉粒，可口

炸洋葱圈
沙律菜伴碟，外脆內嫩，
熱乎乎，表皮不過硬但又不鬆散。
調味合適，無乜毛病可挑剔。

額外加錢叫咗個吞拿魚牛油果他他($88)
以$88黎講份量有點細。
但入口味道幾好，牛油果融融地，加上吞拿魚，
以及黑醋調味，
富油脂香但不膩。

黑松露野菌意大利飯
蒜香味突出，黑松露亦毫不吝嗇。
濕潤而不至於水汪汪，
好味。

最後係主菜美國燒排骨
附有一把小刀，需要自行將之切開。
份量頗大，都切出10根骨。
佐以黑椒汁。頗為入味。
(有得揀蘑菇汁, 燒汁)
美中不足是燒的火喉未夠，
表皮未夠crispy。

總結
是次光顧感觀出乎預期，
首先食物味道佳，份量足，二人餐甚為抵食。
然後環境、服務也不錯。
與同區之前食過的Good Day比較，
呢間更值得推薦。

西九龍中心皇帝雞响呢度都算出名
而且生意好好。
上次黎到摸門釘, 冇開門冇得食。
今次離遠見到有開門，即時幫襯。

老細姜老師在裡面一個人做晒收銀、炸雞工作。
不斷拎起粉紅色蘸滿炸漿既雞肉落油炸，再拎上黎收汁。忙出忙進。
點解會知佢叫姜老師呢, 因為佢心口有名牌, 頭頂帽上仲有皇帝雞牌

姜老師識講流利普通話, 落單用廣東話佢都識對答. 
而且非常好禮貌。
假如你識講韓文，佢仲會好開心地用韓文同你交流。

揀咗韓辣味中SIZE($48)
包裝已由碗裝變成盒裝連蓋, 
外賣就加1蚊多個膠袋, 其實直接拎盒走都得, 膠袋冇乜必要

目測8成都係女顧客, 多數揀甜辣, 
等落單都等咗3個客, 响西九龍中心黎講算係旺場。
落單已講明要等15分鐘, 是日生意好, 我等咗約莫20分鐘先有得攞。

我係外賣, 炸雞香味透盒而出, 真係全LIFT都聞到.
食落亦好香脆, 調味好正宗。蒜香誘人。
落咗花生口感再好d, 一定要落!
炸漿厚度適中, 唔會食到一口都係粉。仲跟咗幾條年糕。
勉強要說有咩可以改善的話, 應該係雞肉的質素吧，雞肉偏細粒。
不過這個價錢黎講, 佢CP值已經算好高。
中Size一個人食有點多, 兩個人食差不多。

總結
幫襯一次完全感受到呢位姜老師的熱誠，
而且係充滿幹勁同好有heart。
簡直令我回想起初出社會工作既自己…(淚T^T)
食物性價比高，味道亦正宗。
下次可以試埋甜辣味。

有人話Five Guys既shake係must try.
我今日試完，應該唔會再嗌第2次。
由於小妹最憎士多啤梨，嗌咗朱古力、oreo碎同salted caramel. 
佢既朱古力醬exactly係老麥新地杯既朱古力醬，而Five guys落咗大量呢種醬，可以見到仍黏住杯身。

飲咗第一啖已經覺得大檸樂，好＿甜！
係近5年黎我記憶中進食最甜既食物
佢既甜度估計有全糖珍奶既一倍
佢甜既程度，係令一直對「浪廢食物」深惡痛絕既我，感到飲唔落，剩低1/3。
已經冇加whipped cream。冇乜caramel味，oreo碎就好味既，但塞住枝飲管。 見到唔少人寧願揀飲汽水，可能係中過奶昔的伏，汽水仲可以自己refill。 最慘飲呢杯shake係唔解渴，愈飲愈口渴。
由於深感不安，我回家後用屋企既血糖機測咗餐後兩小時血糖
响淨係食咗呢餐冇再食其他嘢＋食完有郁動＋冇飲晒杯嘢既情況下，仍爆到8.9(正常水平＜7.8)
換句話講: 我自己簡直付出咗健康代價黎食呢一餐，而且就味道而言一點都不值得。 (利申：每人體質不同，或者係我虧啫)

burger我揀咗cheese burger，揀咗All the way配A1 sauce。
all the way係黑色字嗰D配料俾晒你，紅色只揀一項。
餡料足，尤其係Grilled Onions 好食，
份量好大，大食如我，食到一半都覺得好飽。
而且嘴巴張大牙骹痠軟，又流汁流到一手都係，極度狼狽。
建議大家千祈咪坐對住門口，以免嚇親途人。




服務方面，店員基本全英語，但order枱面有中英餐單，冇咩係身體語言解決唔到。

環境方面，有兩個卡位係特別闊落，其他有高枱同普通4人枱，是日都基本枱枱滿座，生意不錯。 總結 個Burger 90蚊呢個質素同份量我覺得合理既，屬於好食但不至於驚艷難忘。
杯奶昔對我黎講係惡夢黎， 由於一個人黎，冇咁大胃口試埋薯條了。
今次黎旨在到此一試，應該唔會再黎。

估唔到一個人嚟食，平日Lunch都要等足足20分鐘有多。
門口擺咗個名單，自己填寫稱呼，同埋前四個位嘅電話號碼，
到你嘅時候就嗌你，非常方便。今日嚟到門口已經好多人， 我 直頭帶埋本書去睇，善用時間。
入到去之後安排坐響自閉位面壁進食。座位放有菜單、鎮江香醋和蟹醋一支，之後蟹醋仲要係未開蓋。
未黎之前已諗定，要食煎餃同飯團，同埋蛋糕。 研究吓個餐牌，其實即是【S2套餐】，以$42加$16嘅價錢，食到餃子同飯糰之餘仲有一杯嘢飲。
比起散叫抵好多。
另外再叫件蛋糕， 由於未食過決定試咗原味先。
蛋糕可以後上。是日其他味仲有開心果、焙茶等等。響落咗單之後，觀察吓周圍嘅環境，除咗門口嘅位置之外，佢仲有一條長長嘅走廊，走廊盡頭係有一間房。周圍都擺放左唔少雜物，喺食嘢嘅期間，廚房甚至係整跌咗嘢 搞到一地都係，感覺有少少混亂。
不過服務係親切嘅， 老細好醒目＋反應快， 仲有啲幽默感 。煎餃(洋葱豬肉餃)有八隻，煎到金黃色，外表睇上嚟好完美下。
多一分 則太燶， 依家食落去啱啱好，脆而香口。 佢冇【甜記餃子】嘅餃子咁飽滿到凸起，肉汁亦都唔算太多， 未去到一咬即刻必出嚟。
但係整體嚟講係餡料均勻，平衡得來係好食嘅。 佢隻隻都煎到差唔多，冇咩個體差異。尤其係紅洋蔥同豬肉嘅配搭，本身都冇乜得輸。好惹味，用料亦食得出咁新鮮。
我揀咗蟹醋 黎蘸， 感覺會甜啲香的。跟住個日本飯團都上枱啦，溫度係暖暖地嘅， 用保鮮紙包住。
裏面有牛蒡、雞粒，用料實實在在，感覺健康好食，而且米飯粒粒飽滿，包裹住醬汁，香甜味美。
比華御結嗰啲好食得多。最令我有驚喜係個
日式手俾芝士蛋糕(原味)($28）巴斯克蛋糕，表面係焦糖色
香甜而不死甜，中間既芝士綿滑半融，感覺輕盈含在口中怕佢化～ 慢慢感受芝士香氣～ 透過舌尖滲入味蕾。
實在太正！估唔到一間餃子店既蛋糕可以咁出色。食完真係大滿足，感嘆：不枉我排隊排咗廿分鐘，同時Share相俾好友，大力推介。
豈料朋友齋睇食物相，已認到係呢間。更表示食過，仲激發到自己學整佢個Cake。
$86食呢3樣嘢我都覺得高質而滿意，唯一係到走先發現原來有菜莆，我張枱俾隔板擋住，得隔離位有，Sad。
唯有當俾個藉口自己下次再黎幫襯。

去到西九龍中心食完兩間舖，轉戰旁邊呢間雪糕達人當食甜品。
掙扎於窩夫碗定雪糕球，貴精不貴多，要咗雪糕球特別味。(勁後悔)

唔好食特別味！唔好食特別味！唔好食特別味！

話說呢間舖餐牌真係貼滿兩邊牆都係，睇到眼花， 玩法又真係幾複雜。 幸而店員解釋都算清晰。
以下內容要有耐性才可閱覽 ＝＝＝＝＝＝＝＝＝＝＝＝＝＝＝＝
普通味分大細球，然後見到特別味+$4，又唔係普通味直接+$4的意思
係窩夫碗要轉特別味先+$4
現在返黎Study下個menu，所謂特別味＝頂級雪糕系列 (但係榴槤同乳酪又冇放入頂級雪糕系列Menu)
＝＝＝＝＝＝＝＝＝＝＝＝＝＝＝＝
海鹽焦糖曲奇（大球$20）

一咬落去係皺眉，乜嘢古怪味黎？
Movenpick海鹽焦糖曲奇係小妹最愛，海鹽焦糖曲奇大概咩味，無出其右唔會差好遠。
當然呢度質感上冇得同Movenpick比，明既。
但係個味…個味真係離開海鹽焦糖曲奇有點遠。
好難形容，冇乜焦糖味，用既曲奇望落似Oreo但食落又怪怪地，
中間有白色結塊懷疑係海鹽黎？
夾硬擺3樣嘢响一齊……勉強真係冇幸福。
估計：奶脂肪唔夠，鹽太重手，令到雪糕甜味不足。

總結
呢個$20枝既特別味，完全中伏。海鹽焦糖曲奇呢個味真係好很難食！
我寧願再俾貴小小，落樓下［華］食，質素好好多。

假如呢間仲有下次，都係食落cheap cheap普通味算。
伏都冇咁痛。

全家上海人，平日外出食上海菜食得多，有對比有傷害。 呢間價錢的確便宜，然而將貨就價。 家母食完竟直言：好失望 真係令人黯然神傷。

地理位置顯眼，位處彌敦道九龍行，加上玻璃門面，行過經常見到有人食 座位闊落，內櫳裝修風格獨特，貼了些假裝loft風裂紋的牆紙(但低清起格)，以及一些仿印象派油畫。
此等藝術碰撞，恕鄙人唔識欣賞…

入座之後有玄米茶，上菜都快
午市套餐都好扺食，叫咗個餐同散嗌咗d餸。 質素就……

最失望既當數：醃篤鮮($90) 正常醃篤鮮鹹肉、五花肉、百頁結、小棠菜，同埋重中之重的筍,  好小小既應該要有金華火腿
正常醃篤鮮裡面的筍仍會爽脆。
然而呢度既筍量極少之餘，而且一咬下去已知是罐頭貨色，質感已不對 五花肉也不是新鮮豬肉 鹹肉一窩只見一小片，
90蚊一窩想點丫？但其實唔介意份量可以少d, 但用料唔應該將就成咁。 尤其以咁既材料，理論上好難煲得出醃篤鮮既咸鮮味，
但係個湯仍然好乳白色, 仲仍有一陣「鮮」味， 除非……真係細思極恐。 唯一慶幸係裡面有小棠菜可以食吓。

蒜泥白肉(跟餐) 跟餐揀咗蒜泥白肉
上檯竟同759急凍豬腩片一模一樣。 調味唔差。蒜味同糖味明顯。

特色鳳尾魚($65) 全餐比較好食已經係呢味餸。
雖然賣相不佳，但脆炸香口， 底有甜豉油，連骨都可嚼。

醉雞(跟餐+$33) 作為醉雞lover，呢度既醉雞算中間偏下。 用的酒唔靚，差少少冰糖既甜味同潤澤感。

鮮肉小籠包($40) 合格，多汁，皮唔算厚，稍稍蒸過龍以致賣相不佳(可接受)
回鍋肉炒粗麵($80餐價) 由係同蒜泥白肉一樣的肉片，
粗炒火喉差少少，麵中心仍應覺到小小粉。 調味就夠，都算唔錯。

總結 呢間價錢真係平，午市套餐好抵食。 但定位真係好尷尬，貪平又唔會食佢，想食精緻更加唔會揀佢，不宜待客， 旨在果腹而已矣。

睇完米紙介紹，黎試下呢間西九龍中心8樓既蕃廚， 咁啱門口部電視就播緊條片，
門口貼咗好多野食，
店員忙於處理外賣，好似好忙咁，完全冇發現收銀有人，直至我出聲。

芝士蛋松露熱狗($38)，俾咗個電子感應器，話要等8至10分鐘， 等待期間，我已幫襯埋隔離泰家，點完食完，個感應器都冇响過
由於睇食評有人話實際要等廿分鐘，我以為係常態黎。 索性坐到去佢門口前張枱慢慢等，一步之遙出餐總會知啩。 望入去也不見有出餐，店員又好滋悠，一路玩電話一路煮餸。
我困惑望實收銀，良久佢先反應過黎，叫我過去，
我話我等咗半個鐘喇喎，仲未有咩？
佢先指指旁邊，話Click咗個感應器好耐都冇人黎，個餐擺埋咗一邊。 我當下Ｏ晒嘴
心諗：我就坐响你門口，感應器冇反應你係咪可以嗌下number？ 不過店員態度良好，連忙道歉，食嘢要緊，算了。
係時候認真品嚐我既食物 但唔知是否影响到食物水準
個熱狗完全唔熱，連暖都唔係，中間掂住青瓜的部分仲有啲凍，sad
最慘係，茄汁同黑松露的配搭真係好古怪。 蛋如果只配黑松露會好食好多，配上茄汁帶酸，真係好唔夾。 終於知點解坊間黑松露意粉多數係白汁底，唔係茄底。
如果茄汁係放响條熱狗腸上面, 而唔係蛋上面, 應該會好食好多。

同埋，唔知係咪青瓜出水，中間非常濕 整體黎講水準唔係差，價錢又唔係貴。 炒蛋、青瓜配搭都係好食既，只係個醬汁唔夾同溫度問題
只能安慰自己，可能係放置時間耐影响咗啫。

總結
今次體驗唔算愉快，改善空間不少。
確保感應器有冇反應/有冇電，都係店家責任。
其次，如果門口長期冇人，可以參考有啲舖，門口加返個鐘仔俾客人按 假如店家自己有試菜，應該試到茄汁同黑松露之間係錯配黎。
期待佢地改進。

食完Try my bread 我會形容係： 「假如佢執粒，我會唔開心」既一間小店 (頭盔:唔係咒佢) 點解咁講呢？ 1) 因為佢生意確實不好 經常路過門面都冇乜人 是日下午5點幾黎到，停留咗近廿分鐘，得我一個客。 1個店員已經夠server，內櫳堂食位置少，我去當日得1個位可以坐。 （睇相suppose應該有4個位?) 2) 佢用料都幾足 是日諗都唔洗諗，嗌最Signature既脆炸軟殼蟹滑蛋吐司 套餐$60, 單價$55 見到佢仲有bagel/法包同蛋糕，但覺得不甚吸引，pass。 (事後先知, 呢間店既法包係老細其中一個「招牌」，又話飛去越南為求口味正宗云云…　反正看Menu不覺得吸引。） 首先即嗌即整，等咗約8分鐘，店員用膠膜包好先入袋 我外賣拎到返屋企影埋相都仲係熱既。 成隻軟殼蟹橫切面齊全，估唔到入面仲有蟹肉 沙律醬配厚多士，滿滿的油脂+碳水化合物，好難唔好食 正正係呢陣沙律醬味，令我回憶起韓國Isaac toast(有人話似韓國另一間叫Egg drop, 但我未食過)。都係嗰種飽滿得黎帶油脂同香甜味既多士。 多士本身已是用牛油多士，加牛油再烘，又香又脆。 炒蛋都好厚好smooth，加上生菜碎， 軟殼蟹既脆同蛋既軟，加上沙律醬融合，同多士既留白奶油香 好正，比我預期中仲要好食。(減肥/生酮不宜。) 其實佢呢份多士，攤返d料出黎已經成個all day breakfast咁， 有d食評嫌佢貴，我覺得物有所值。 套餐另加$20叫咗杯牛油果沙冰，我問有冇得走甜， 店員話本身冇額外加糖，淨係有d煉奶調味。 實際上佢似牛油果奶昔多過似沙冰， 飲落與同區越菜［第一郡］嗰杯不能算完全一樣，只能說九成相似。 值得加錢飲。 總結 Try my bread比我想像中仲好食，甚有驚喜！ 可惜店家貌似不擅經營，例如店內尚貼有2021年聖誕到會海報。 聖誕都過咗成年都不換。 菜單比較雜亂，似是諗到咩就加張貼紙，完全挑唔起人加配小食的意欲。 一眼望去，店內櫳擺放了不少雜物，對客人黎講感觀有待改善。 店員態度友善，製作仔細用心，讚！ 希望佢可以長做長有，大家多d支持，請勿執粒。

呢間水戶日本料理在粉嶺中心的位置相對偏僻, 遠離其他食肆舖位, 响C座自成一角。 生意算唔錯, 6點幾入去都七成full。 畢竟呢區的選擇唔多。 嘢食選擇豐富, 可惜的是佢既丼飯唔係套餐, 如果可以加錢upgrade之類會更加好。 我嗌咗個三文魚親子丼, 三文魚籽份量不少, 亦夠新鮮。 三文魚只有5片，份量有點小，另有玉子和少量蟹柳絲。 三文魚尚算厚切肥美。 滑蛋豬扒丼賣相一般，豬扒食落有啲酒味？ 肉質唔錯，軟硬適中，表面略被蛋汁浸軟，唔係行鬆脆路線。 牛油果軟殼蟹卷（＄94） 呢個份量黎講少貴，味道不過不失。食完有衝動食壽司郎，類似既野27蚊碟。 日式炒野菜($60) 反而幾好食, 有芽菜、洋葱、椰菜、木魚絲，甘筍絲，菇。 幾有鑊氣，相當入味。 總結 是次光顧係同屋企長輩，冇嗌太多生嘢， 整體黎講係合符預期，CP值合理，如住附近可以一試，專程黎食就大可不必。