母親節飯去呢間食，晚市有兩個時段：6pm同8pm，我哋揀咗8pm，去到基本上都坐滿晒，幾好生意。 呢間餐廳出名裝修好有心思，以舊式香港做主題，牆身有好多經典嘅香港電影，擺設都係用舊式香港嘅用具，包括有以前阿嫲年代用嘅圓桶形熱水壺，一路食飯一路打卡都好適合。 避風塘炒肉蟹 話明肉蟹，啲肉真係好多好實淨，而且炒得好入味，連平時唔食蟹嘅小朋友都話好味。 白灼海蝦 隻隻蝦都好大隻，啲肉又爽又彈牙，點埋甜豉油真係非常好味。 小神燈小炒皇+海鮮粉絲雜菜煲 呢兩款就比較普通，冇咩特別好評論。 菠蘿咕嚕肉 咕嚕肉炸得外脆內軟，啲醬甜酸度校得啱啱好，非常開胃。 宮廷濃湯豬肚雞 雞湯底極之濃郁，濃到有少少偏鹹，但係我好鍾意飲，加埋啲豬肚、雞肉、魚腐都好好味。 魚香茄子煲 味道唔錯，不過份量有啲少。 小神燈一品炒飯 超大碟，而且啲料好足，好多蝦仁。

下午茶時段，餐廳好鬆動，坐得好舒服。 越式三寶撈檬 天氣熱熱地，食個撈檬甜甜酸酸好開胃，不過嗰汁可以再辣少少，扎肉同埋雞翼都好味，不過豬扒炸得有啲太硬。 沙嗲牛肉飯飯 沙嗲醬好香濃好夠味，牛肉好腍好入味，雖然偏鹹少少，但係撈飯一流。

本來想去食Slow Cow，但係今晚有private gathering，所以冇開放俾公眾，唯有搵其他餐廳，最後去咗食祥仔。 南瓜湯好滑好香濃，非常好飲。 巨型吉列魚柳滑蛋飯配青咖喱汁，名副其實塊吉列魚柳真係超級無敵大，炸粉唔算厚，外層炸得好脆口，而裏面嘅魚仲好滑，一啲都冇炸過龍，青咖喱汁香得來唔太辣，配埋啲白飯啱啱好。 泰式大蝦煎蛋辣肉碎飯，辣椒都幾多，適合鍾意食辣嘅人，最抵死係可以揀免費加多一隻煎蛋，非常食客友善！

帶台灣嚟嘅朋友食吓香港地道菜式，一行7人揀咗呢間地點方便佢嘅餐廳。 懷舊椒鹽炸鮮魷 炸得好香口好脆，裏面嘅鮮魷仲好嫩滑，不過椒鹽味可以再重少少會更加惹味。 秘製薑葱蠔煲 味道都唔錯，蠔既份量係超級超級，多到食極都食唔晒嘅感覺。 星洲炒米粉 味道有啲奇怪，唔知係唔係落錯咗調味料，有一種好重嘅香料味，同平時食嘅星洲炒米味道好唔同。 雙拼 滷水鵝肝拼鵝片 味道唔錯，份量適中。 乾炒豬頸肉河 其中一個台灣朋友唔食牛肉，問侍應可唔可以轉其他肉，佢話可以轉肉片或者豬頸肉，我哋揀咗豬頸肉，味道唔錯，火候夠，炒得好味！ 椒腐通菜 正常發揮 秘製沙律醬燒骨 呢個係全餐最好味嘅菜式，外面嘅醬甜甜酸酸好開胃，排骨外面炸得脆卜卜，裏面嘅肉仲係好嫩滑，建議一上枱要即刻食晒。 沙嗲金菇肥牛粉絲煲 味道一般，沙嗲味唔夠，肥牛偏細塊

食物味道其實整體係唔錯，不過平時路過好少會入去試。 星洲炒米幾足料，可以稍為在濃味少少就更好。 叉燒腸粉好滑，叉燒夠多，個人其鍾意食。 豉油王炒麵同埋豆漿正常發揮，冇乜嘢好comment。

沙薑雞飯，啲雞幾嫩滑，砂薑嘅味夠鹹，撈埋白飯一齊食啱啱好。 乾鍋雞粒炒飯，少少辣，有啲似鹹魚雞粒炒飯嘅感覺，但係稍為鹹咗少少。 個冬瓜排骨例湯幾好飲，大大嚿排骨，幾足料。

只能夠話價錢好平好平，$168食兩個鐘，可以揀鱸魚或者雞，如果一張枱又食魚又食雞要另外加$20。 我哋四個人食，叫咗兩煲都係雞，一煲辣一煲唔辣，唔辣嘅真係唔辣，辣嘅都係唔辣。食完雞煲打邊爐，配料自助，認真選擇唔係好多，質素亦都唔高，但係睇返個價錢，仲可以點。 食完兩個鐘個場未滿客，所以阿姐冇趕我哋走，叫我哋可以繼續坐，嘢飲都可以繼續飲，呢個先係服務質素。

泰式酸辣無骨鳳爪 作為前菜，辣辣地好開胃，加上啲青檸味幾清新，下面係青瓜同埋洋蔥，份量冇想像中咁多。 泰式金不換冬陰功蝦球粉絲煲 呢個係今餐最推薦嘅食物，好多隻大蝦，每一隻都好爽口彈牙，加埋個汁好濃好惹味，少少辣，撈埋啲索晒汁嘅粉絲一齊食，真係冇得頂！ 泰式金不換炒金邊粉 味道合格，甜甜酸酸幾好味。 芒椰西米露 西米露唔太甜，加埋啲芒果汁酸酸地，絕佳配搭。

午餐同屋企人食，叫左個壽喜燒雞扒飯、一個吉列豬扒蕃茄烏冬。 壽喜燒雞扒飯既雞扒夠厚身，汁既甜度適中，面頭仲有少少脆既紫菜絲，呢個配搭非常好。 吉列豬扒蕃茄烏冬都好味，烏冬爽口，吉列豬扒炸到脆卜卜，好香口，唯一可惜係炸得有點太乾，冇乜肉汁。

今次去大快活試吓佢嘅海陸空鐵板餐，份量都幾多：炸魚扒、豬扒、雞扒、芝士司華力腸、酥皮忌廉湯、牛油包、粟米肉粒飯、柚子檸檬梳打特飲。 特飲餐基本$75 ，奇就奇在係冇跟飯或者意粉，要另外加$4先有個粟米肉粒飯，埋單$79。 味道算係幾好，啲扒同腸仔夠大份，食落裏面都有肉汁，唔會乾柴柴，個炸魚扒都好味，配菜椰菜花仲係爽口，感覺幾新鮮，整體好味過大家樂。 個酥皮忌廉湯係用紙碗焗，焗完出嚟本身個碗已經軟腍腍，食酥皮嗰陣分唔到究竟係搣梗個酥皮定係個紙碗，感覺好奇怪。