近排終於忙完手上嘅嘢，可以約朋友出街飲吓嘢。我自己比較鍾意飲嘢同晚餐係同一個地方，好怕轉場，但係無奈好多時飲嘢嘅地方食物質素都好一般，所以如果難得搵到有酒吧嘅嘢食係高質嘅話就好想再去。 呢間餐廳都符合我嘅想法，佢有好多Cocktail嘅選擇，我哋今次揀咗Butterfly同埋Free World，外型非常討好，打卡一流。最緊要係佢嘅食物質素都好高，我哋叫咗幾個dishes都非常好食，最鍾意係佢個避風塘風味墨魚麵，個蜆估唔到勁新鮮，意粉嘅調味適中，好食過真正嘅重口味避風塘，唔好諗住墨魚麵就會整到成口黑色，呢一款無呢種問題，同男仔去食都唔會核突。 另外都好欣賞佢個意式飯球，炸得夠脆，送酒一流。軟殼蟹沙律都唔錯，同埋黑松露意大利飯軟硬適中，仲有好多野菌。 坦白講呢到性價比都算幾高，仲要喺尖沙咀K11 Art Mall隔離，約人飲嘢真係一流，如果有朋友食煙，佢仲有室外位置，氣氛都好好，趁佢happy hour時間嚟飲品都會平少少，呢個價錢尖沙咀來講算係一個幾好嘅選擇！

近排因為一啲原因多咗選擇素食，然後先至發現香港嘅素食選擇真係好少，一係就好貴，一係就係好傳統嘅中式素食，再唔係就係沙律嗰啲。 今次嚟到工業區荔枝角，估唔到都有素食可以選擇，香港工業中心本來係批發為主，但原來地庫係有一個小型嘅美食廣場，雖然格局好似有啲奇怪，喺個小小嘅路口行落去，但係落到去發現都幾企理，素食嘅空間好乾淨整齊。 因為我係晚餐時間嚟，可以選擇食套餐，先有一個中式湯水，冇諗過唔用肉都可以煲得好鮮甜，然後選擇叉燒黑松露炒蛋，仲有一個係咕嚕肉，配襯紅米飯，成個餐份量啱啱好。千祈唔好覺得素食就一定好清淡，我好鍾意個蜜汁叉燒，佢係用咗柚子蜜，我覺得同豬肉叉燒去比較嘅話，其實呢個仲好食，起碼唔使擔心啲叉燒太肥有肥膏。 松露炒蛋都做得好，另外咕嚕肉我覺得真係唔講唔知佢係素，酸酸甜甜好開胃。幾十蚊一個晚餐，性價比都算唔錯，我見到午餐嘅兩餸飯仲吸引仲平，喺附近做嘢嘅人有機會過嚟試吓！

喺香港要搵好嘢食講真係唔難嘅，但係要搵好嘢食得來又有親切感嘅餐廳就好少。 我鍾意食鐵板燒嘅原因係如果坐吧枱可以睇到師傅煮嘢食，甚至可以同師傅交流，但當然有時啲師傅會比較cool一啲，不過今日嚟到呢間鐵板燒，師傅個個都好友善，除咗主動介紹用料食材之外，有陣時我有啲問題佢哋都會好耐心解答，師傅仲教我點樣炒一碟靚炒飯，真係好鬼Nice。講真有陣時食飯其實都唔係淨係食啲餸菜，更加重要嘅係成個過程嘅experience。 呢度嘅食物水準好高，淨係食日本生蠔已經覺得物超所值，第一次食長崎縣嘅生蠔，個鮮甜味真係一試難忘，最緊要係當個aftertaste留喺個味蕾度，我竟然唔捨得佢走。 仲有個巨型虎蝦令人難以忘懷，師傅將啲蝦腳都煎埋成為咗蝦餅，我選擇咗將蝦餅夾住紫蘇葉一齊食，真係非常好食！ 另外今日個甜品真係冇得輸，首先有兩粒黃豆粉蕨餅，然後仲有一個超級smooth嘅綠茶布甸，食完真係非常滿足。 仲有記得唔好Miss佢哋嘅漬物，係自家製嘅，我唔講咁多，大家細心試吓幾種漬物嘅味道，睇吓分唔分到甜酸苦辣？係好有趣嘅組合。 超級surprise嘅仲有佢地嘅吸物，奶白色嘅魚湯非常真材實料，嚟呢度唔係淨係食主菜嘅，配菜樣樣都精美細緻，不能忽視。 如果唔想坐吧枱，有張四人枱係270度全海景，儲夠四個人嘅話，可以考慮book呢張枱！

難得公眾假期，想自己可以食好啲，就嚟到糖街呢度位於26樓嘅鐵板燒。一入到嚟已經俾佢窗外景觀吸引住，位於26樓望出去係成個維多利亞公園嘅景，仲有少少海景睇添，淨係望到個靚景都舒服。 食鐵板燒我一定會揀坐吧枱，因為最鍾意欣賞師傅嘅廚藝，見到今日嘅Tasting Menu有折扣優惠， $880一位，價錢公道，二話不說就要呢個。 成個Menu有咁多個course，但成件事非常流暢，唔會太急趕，但又唔會需要等好耐，睇得出幾位師傅中間嗰個默契同合作程度好高。 菜單之中有幾樣嘢我係非常之欣賞嘅，第一就係佢個汁煮鮑魚，個鮑魚爽口入味，連下面墊底個蘿蔔都又甜又多汁。另外就係個龍蝦，我諗我真係有十幾年未食過咁好食嘅龍蝦，師傅完全冇浪費到龍蝦本身嘅鮮味，剛剛好唔會太熟又唔會太生，外面輕輕燒香，再加埋少少龍蝦膏，真係回味無窮。其實食完隻龍蝦同鮑魚我已經覺得值回票價。 牛肉嘅話我會鍾意薄燒，因為個口感會清新啲，鵝肝其實都好食嘅，而且配黑醋呢個配搭都幾新鮮，不過我竟然更加欣賞佢自家醃製嘅漬物，啲醃蘿蔔同醃青瓜超級好食，估唔到連配菜都咁有心機做。 仲有一樣我嘆為觀止嘅就係師傅炒嘅炒飯，睇佢炒飯真係睇到出神入化，擺埋落口食就知道好有功架，飯粒超乾身，又勁有蛋香，味道唔算好鹹，但係配埋煙肉就剛剛好，雖然炒飯係好普通嘅嘢，但係呢一個炒飯我覺得好高質。 順帶提一提啲師傅都好有禮貌好有笑容，有賓至如歸嘅感覺，基本上呢度嘅食物、環境、招呼各樣嘢都好全面，講緊$880一位其實性價比幾高，想好好食一餐下次知要去邊啦！

除咗酒吧，喺蘭桂坊一帶其實都有不同嘅小店好值得去。 今次呢間小店主打係法國藍青口，我就好勇敢咁試咗一個藍芝士法國藍青口配薯條，本身我自己都鍾意食藍芝士嘅，但係就未試過配青口，點知忌廉汁處理得非常好，藍芝士味係淡淡咁襯托住個忌廉味，完全冇搶走青口同忌廉嘅鮮味，食到最後真係好想飲晒啲湯佢。 食埋個蒜香大蝦火山扁意粉，我就知道佢處理醬汁真係有一手，個意粉蝦油味好出，加埋個立面層次感一流，意粉嘅質地剛剛好唔會太淋，真係食到舔舔脷，唔係誇張。 今日仲食埋個Apple crumble，要有心理準備呢度嘅款式同出面會有少少唔同，個crumble面薄薄地，蘋果肉同玉桂味夾得好好，熱辣辣配埋雪糕球係好食嘅。 呢度係open kitchen，仔細睇，其實你會睇到廚師好細心咁處理食物，我係好欣賞嘅，食佢哋嘅嘢係食到有心機，有層次，唔馬虎，所以我自己覺得呢間小店係好值得支持！

如果講燒肉，大家可能即刻會諗到大型連鎖店X角，我都食過好幾次，就覺得其實性價比唔算好高，所以有時都想Explore一下有冇其他小店都可以食到精緻又抵食燒肉。同埋有時講食燒肉好似一定係要好重量級好肥好飽，但今日去呢間御石燒就畀我一種小店輕鬆感覺，裏面嘅座位唔算多，平日夜晚坐滿晒人，每人一個石燒爐，其實都幾過癮。 因為用石燒嘅關係，啲肉其實係用一個比較平均嘅溫度去烤熟，每次放一至兩小片，慢慢品嘗，輕鬆精細。 我哋嗌咗牛小排同埋黑松露吉列牛，如果鍾意試吓新口味我覺得吉列牛係幾好嘅選擇，出面真係較少食到，同埋估唔到拎吉列牛去燒再配燒肉汁其實都幾襯。另外仲嗌咗個雜菜鍋，用壽喜燒嘅汁去煮，食完肉食返啲菜啱晒數。 最後一定要講嘅係，只要你出post tag埋間餐廳，佢就會送你一杯細嘅Häagen-Dazs ，食到熱熱地之後食返杯雪糕就非常Perfect！ 最後溫馨提示個石燒爐係用真火㗎，所以如果帶小朋友嚟記得要小心啲！

一直知道呢排係好興一啲韓式包車餐廳，但係因為自己唔算太追韓國文化，所以都因為有啲陌生而唔敢試，不過今次就諗住都去體驗一下，追返個潮流先。 餐廳成個氛圍都好年輕，裝潢好特別，聽聞都係依照韓國特色餐廳藍本去裝修，有一種韓國大排檔嘅感覺。當然裏面播嘅音樂都係K-Pop啦！ 選擇嘅食物都係年輕有趣嘅，例如我哋揀咗芝士泡菜五花肉，用鐵板上，有火爐熱住去食，芝士溶化嘅時候撈埋五花肉去食，雖然係好Heavy，但係一班人share食就唔怕啦！另外點左個好似必食嘅蕃茄韓式辣海鮮湯配中華麵，我幾鍾意個中華麵嘅口感，有啲似烏冬，裏面海鮮材料都算幾多，一個份量都真係夠三個人食，尤其冬天食完暖笠笠好舒服。仲有嗌咗個煎餅，調味唔錯，都係用鐵板上，倍加風味！值得一提當然係呢度嘅飲品啦，我覺得嚟呢度一定要飲嘢！因為全部食物都係好適合飲酒，我就叫咗個Tiki Taka，青檸口味好清新，唔會太濃烈，好適合女仔飲！ 總括嚟講呢個場地真係好適合一班friend嚟飲酒，所有食物都好適合酒精飲品，就算有朋友唔飲酒，都有啲調配飲品可以選擇，就算你唔後生，都可以嚟感受一下而家好時興嘅韓式文化，食咗就當去咗韓國啦！

銅鑼灣食物選擇雖然好多，不過近年食肆都不停加價，想簡簡單單食個西餐，每個人可能都要五六百蚊，但今次我發掘到樓上小店，有驚喜仲要好抵食！ 望一望個餐牌，啲嘢都好美式，選擇好多，今次就揀咗七個course嘅Testing Menu，貪佢唔使諗， $398究竟可以食到邊七樣嘢呢？真係好豐富，包括雜菜湯，大蝦沙律，海鮮拼盤，穀飼阿根廷牛扒，意大利雲吞，仲有cream brûlée 同埋餐茶(可以加錢轉飲酒）。咁樣嘅價錢食到咁多嘢真係好難得，仲要每一道菜都係有心機嘅，淨係飲佢個雜菜湯已經知道，裏面材料非常豐富，調味剛好唔會太鹹，就連旁邊嘅小餐包都特別烤過，呢啲細節位就見到心思。海鮮拼盤每一樣海鮮都有兩件，淨係呢個已經回番本啦，Cajun汁煮得好，襯到鮮味唔會太搶fo，牛扒我揀medium剛剛好，肉質好嫩。 不嬲對意大利雲吞都一般嘅我，今次食呢個黑松露口味我覺得好正喎，細細份但好滿足。而自家甜品甜度都調校得好好，口味係酒店級數，真係絕不欺場。 另外仲叫咗個燒雞漢堡配薯條，大份到嚇親我都係收緊$128，呢啲價錢喺銅鑼灣仲可以喺邊度搵？ 我想講成個餐廳嘅裝潢都非常Decent，仲要其實餐廳都有好多promotion，例如呢Ladies’ night，逢星期三女士order Main course可以免費free flow，然後星期一至三7:30前賣單有七折， OpenRice book枱又有七五折，計計埋埋$300左右已經可以食到好得體嘅美國菜！性價比咁高，真係值得再去再支持，一班朋友唔一定要幫襯連鎖店嘅！

朋友介紹嚟呢間食私房菜，聽講話係同大同酒家有關，我自己孤陋寡聞，都唔知乜嘢係大同酒家，原來喺香港同埋廣州都係好出名嘅，不過大同酒家一早已經冇咗，而呢一度就係後人開嘅私房菜餐廳。 呢一晚食咗好多道菜，想講其實每一味都非常出色，如果叫我揀最驚為天人嘅，一定係蝦子節瓜脯，因為本人非常鍾意食蝦子碌柚皮，但係呢度竟然換咗做節瓜，而且個配合都非常啱數，食落清爽蝦味濃，正！ 另外佢處理海鮮都係好用心嘅，包括個蟹粉甘筍啦，仲有佢嘅避風塘炒蟹絕對唔係平時食開嗰啲，反而係用豆豉同埋蔥油去做個底，我會鍾意食呢一種多啲，唔會死辣。而我嘅另一半就對咖喱羊腩讚不絕口，我見到佢係用好多香料去炮製，目測有用桂皮，唔怪之得嗰個香味同平時食港式咖喱有少少相近，不過因為佢用料上乘，羊肉鮮甜，成件事升級晒。 其實荷葉飯都好正，仲有個燕窩湯羹，唔係用生粉開嗰種，係用咗冬瓜蓉做底，絕對唔求其。佢個蜜汁火方都好得意，用咗菠蘿配搭方包，傳統得來幾fusion，我就食得好滿意。 私房菜就當然係要預約啦，嚟呢度最少要六位先至可以預約，佢哋會因應你嘅想法幫你設計好菜譜，大家有商有量，而且房間都係非常私密，仲有獨立廁所，地點好近海港城，係一個好適合家庭朋友聚會嘅地方！

呢排鍾意去吓唔同嘅日本居酒屋，今日上到嚟旺角商業大廈呢一間，估唔到裏面嘅裝潢都算幾高級，同埋都可以食到法國生蠔，如果要Cambo嘅話仲幾抵添，平均$35隻，送埋酒精飲品。今日食呢隻法國蠔係爽甜，水準都算幾高。 呢度嘅刺身類食物都好新鮮，特別欣賞佢嘅海膽，叫咗個海鮮杯，雖然細細杯，但係都好豐富滋味，另外有一個好有創意嘅食物就係海膽拖羅蓉最中餅，加埋玉子，估唔到海膽同埋拖羅可以有咁樣嘅配合，有趣！ 呢度嘅燒雞翼都係出名嘅，店員介紹係有煙熏味，食落口我覺得除咗煙熏味仲有少少炭香味，個辣粉唔算好辣，剛剛好調出雞翼嘅油香味，我覺得係必食，大啡菇都係水準之上，熟透之餘唔會太縮水。 其他燒物同埋天婦羅都係水準以上，望埋個價錢，真係都好公道，覺得性價比都真係幾高，同埋店員都serve得好好，有賓至如歸嘅感覺。 整體嚟講都幾適合幾個朋友飲酒加傾偈食嘢，仲聽到附近有人點omagase，估計刺身來到上等貨，等我下次都嚟試吓先！