久仰大名一間幾出名嘅台灣菜餐廳 假日夜晚嚟到可見人龍排隊 派左大約二十分鐘左右就有位 一入到餐廳俾佢嘅裝修所吸引 成個格調都好似入左一個戲棚咁 有好多唔同嘅場景有車站有戲院 幾有特色同氣氛 不過食物同飲品方面呢就冇好想像中咁出色 可能我係香港都算食咗好多間台灣菜餐廳 有比較之下所以依間唔算話係好好味會encore類別 魯肉飯味道其實都OK 如果多D肉汁撈飯就咁好 柯仔麵線 蠔漲卜卜 幾大隻 湯底同台北阿宗比嘅話 台北阿宗真的好味好多 鹽酥雞冇乜味 如果有啲調味粉可以比客人落會好D 蝦捲冇乜特別 甜品叫咗芋圓 佢個糖水底都係好淡味 不過芋圓肉食到蕃薯粒架 都算真材實料 飲品珍珠奶茶茶味就唔夠濃 環境氣氛： ★★★☆☆ 食物質素： ★★★☆☆ 服務態度： ★★★☆☆

身為海綿寶寶粉絲嘅我 見到近排點心代表做緊海綿寶寶主題 於是就去左幫襯 我去嘅係尖沙咀The One分店 平日夜晚要搭枱 被夾係長枱之中嘅中間 距離太近 所以被左右聲音嘈住 所以環境麻麻地 即使店入面有D海棉寶寶掛飾 影相亦唔會有好多位 叫左幾款有海綿寶寶圖案嘅食物 菠蘿炒飯其實唔係平時泰式食開個D味道 只係一個菠蘿裝住炒飯 但炒飯冇乜料同淡味 千層馬拉糕印有海綿寶寶個樣係上面 係幾可愛 但又係比較淡味 香芋流沙包味道就正正常常 不過一D都唔流心 所以玩唔到由海綿寶寶個口流出來 原個菠蘿特飲 味道較酸 另外仲叫左兩款唔屬於公仔系列嘅 粟米花枝丸同白胡椒豬肚雲吞湯 依兩個味道都正常 整體食物味道麻麻 最重要係性價比非常低 茶位仲要收$10位 咁樣已經食咗三百幾近四百蚊 我會寧願用依個價錢去正宗酒樓飲茶 環境氣氛： ★★★☆☆ 食物質素： ★★☆☆☆ 服務態度： ★★★☆☆ #點心代表 #隨意美尖沙咀 #隨意美點心 #隨意美中式 #隨意美港式 #隨意美飲茶

「請坐」岩岩獲得2018米芝蓮推介 餐廳位於西營盤港鐵站附近 行過去唔算遠五分鐘之內就到 不過要有心理準備成日都會大排長龍 星期六兩點幾去到都要等位 依度嘅蛋餅真係必食！ 蛋餅有好多種口味可以選擇 本身想叫肉鬆蛋餅 不過售罄 所以唯有轉叫起司蛋餅 熱辣辣 芝士半融狀態 成個蛋餅口感非常好 另外滷肉飯同牛肉麵都好好味 滷肉飯啖啖都有汁 肉嘅肥瘦比例岩岩 旁邊仲配埋辣菜脯 好好餸飯 不過份量唔算好大碗 牛肉麵亦都係呢度招牌菜 伴菜有酸菜同蔥粒 牛肉肉質夠腍 麵質彈牙有咬口 湯底好夠味 有少少油喺面 但飲左幾啖又唔會話之後好口渴 綜合甜不辣就普普通通 唔算好特別 飲品方面叫咗阿薩姆奶茶加珍珠 同埋梅子綠茶 阿薩姆奶茶茶味唔點好濃 不過啲珍珠幾好咬口 梅子綠茶酸酸甜甜幾開胃 不過飲到底就略嫌甜左少少 環境氣氛： ★★★☆☆ 食物質素： ★★★★★ 服務態度： ★★★☆☆

錦麗越南牛肉粉專門店 自1970年越南胡志明市開業 依家喺香港 觀塘同九龍灣都有分店 之前聽朋友講佢啲嘢幾好味 所以有一晚咁啱經過APM 就去錦麗食個晚餐先 繁忙時間需要排隊等候 餐廳算係速食型 食完就會被收碗餐具 唔會坐得耐嘅一種 所以等位都算快 等左十分鐘就有位 依度馳名嘅越南河粉 基本上湯底同河粉都一樣 所以只係需要揀餸 有牛丸/熟牛肉/生牛肉或者綜合咩都有 第一次黎食梗係揀綜合 可以試晒所有 三款餸裏面牛丸最好味 好有牛味又彈牙 超鍾意 下次黎食一定會叫全牛丸粉 食河粉前先飲左啖湯底 幾濃郁嘅牛湯味 配料例如九層塔等香菜丶芽菜會分開上 自行添加 小食類叫左蝦餅丶牛油雞翼丶春卷 蝦餅有芫茜味 個人唔食芫茜所以就不太喜歡 牛油雞翼炸得過火左 春卷就正常 飲品叫左推介嘅凍椰青崩大碗 崩大碗係越南特式飲品 可以清熱解毒 崩大碗屬性寒涼 孕婦同體質弱都不易飲用 我覺得味道好似飲緊D芹菜汁帶少少甜 環境氣氛： ★★★☆☆ 食物質素： ★★★★☆ 服務態度： ★★★☆☆

la famille 於 2014 年創立 係一間戚風蛋糕專門店 早前在大坑店及黃埔開店後 最近進駐尖沙咀海港城港威商場 la famille 為慶祝新店開幕 海港城港威分店加推 4 款限定口味 香檳、玫瑰、法栗、醉梨 除限定口味 一般較受歡迎嘅口味有 英國伯爵茶、朱古黑森林、香濃開心果、沖繩黑糖栗子、極上宇治抹茶、日本柚子等 戚風蛋糕軟綿綿 而且唔會好甜 中間嘅牛奶cream超好味 好香濃嘅牛奶味 戚風蛋糕的中空位置 填滿左北海道中沢牧場直送的新鮮忌廉 忌廉嘅味道所以奶味好濃厚 鮮甜軟滑 我就試咗英國伯爵茶丶柚子同仲夏草莓 最鍾意係英國伯爵茶 蛋糕真係有伯爵茶嘅香味 配合埋個鮮奶忌廉真係意想不到咁夾 蛋糕size兩個人食仲剛剛好 約10cm 最緊要係價錢唔貴 平時去啲高級西餅店 一件西餅都成40幾蚊 而呢個戚風蛋糕睇落仲大過啲 價錢亦都只係$46 仲有多款特別口味揀

之前聽到口碑番本好似都唔太差 一路都想試好耐終於最近有機會 平日夜晚 上到去竟然發覺幾冷清下 心諗可能會係因為平日啦 但係食過之後再覺得有原因 啲嘢食質數真係有啲差 去食放題刺身通常都係第一道必食嘅 第一道已經係非常失望 刺身底下通常都會有啲冰塊墊住嘅 但係佢用嘅係一啲碎冰 所以基本上啲魚生係黐住晒啲碎冰 令到你食緊刺身嘅時候 同時都要被迫食埋啲碎冰嘅感覺 熟食方面印象中真係冇乜邊樣令我覺得好味 鹽燒雞翼一啲鹹尾都冇 稻庭烏冬但係啲烏冬"林"到阿媽都唔認得 食咗幾啖已經停口 雪糕選擇亦都好少 而且啲口味都係好普通 雲呢拿同朱古力 冇回頭嘅一間放題 backlisted 平日夜晚$218再加一 我寧願俾貴少少去食返大喜屋系列 有質素好多 環境氣氛： ★★☆☆☆ 食物質素： ★☆☆☆☆ 服務態度： ★★★☆☆

今次要介紹嘅係位於觀塘工廈入面嘅西餐聽 依間西餐廳比我嘅感覺係好有heart 每一道食物都係用心烹調 環境方面我覺得可能因為地方唔算太大 所以星期五晚座無虛席之下就比較嘈 如果除左食野又想靜靜地傾吓計嘅話 旺日黎講可能未必係好嘅選擇 講返令我覺得讚賞嘅食物方面 佼度嘅每一道菜 都結合藝術嘅成份 因為廚師會係碟邊上繪畫或者裝飾 令到賣相非常靚 而個D所謂嘅顏料都係用食材整出嚟嘅醬汁 所以係食得又睇得 黎食晚飯可以考慮Set Dinner Set Dinner跟沙律或焗生蠔+餐湯+精選甜品+飲品 價錢$188-$298 咁岩我地想叫嘅主菜又都有係Set Dinner選擇之中 所以就叫左兩份 餐湯嘅帶子海膽湯幾特別 飲落真係有海膽味 菠蘿沙律嘅菠蘿好清甜 好fresh 主菜方面慢煮牛仔肋骨真係好好味 侍應冇介紹錯 好有牛味而且肉質保持嫩滑 刺身帶子黑松露意粉 個人非常鍾意 極力推介比大家 因為佢嘅黑松露味好香濃 醬汁好creamy 帶子大大粒 有鮮味 鱸魚菠菜枝豆意大利飯幾特別 一粒粒嘅枝豆混入去埋意大利飯裏面 成個感覺健康左 鱸魚唔腥 不過意大利飯始終比我感覺有啲膩 除此之外仲加左＄68 叫咗個青口 當日嘅青口係嚟自澳洲 size細細隻 廚師煮嗰個醬汁係非常之好味 加埋切粒細粒洋蔥粒 更加香 至於小食拼盤就不過不失 因為當日係慶祝朋友生日 所以book枱時已經安排上甜品時寫埋壽星女個名係個碟度 另外一題店員嘅服務態度都好好 會主動介紹menu推介嘅食物 解釋仲幾詳盡㖭 環境氣氛： ★★★☆☆ 食物質素： ★★★★★ 服務態度： ★★★★☆

旺角波鞋街冇人唔識 重建計劃之下 波鞋鋪將會逐步移入新建嘅商場 形式舒適室內shopping環境 依個商場在原來的波鞋街十字路口 好容易發現到 因為為繁囂急速嘅旺角帶來新景象 商場外形時尚現代化 走天然同綠化風格 今次介紹係首家喺依個商場開業嘅食肆 青花 佢係人氣甜品店ATUM最新分支 主打新派東南亞菜 相信賣點之一 一定係依度裝修 依度裝修走綠化自然風 雖然植物唔係真 但加上自然光嘅透入 令人有好清新好舒服感覺 枱係我最鍾意嘅雲石pattern 平日lunch來到 叫左一個喇沙雞湯麵同埋 木魚花燒汁豬面青飯 喇沙雞湯麵味道幾好 辣辣地 但木魚花燒汁豬面青飯賣相好hea咁 味道亦都好普通 +$25轉特式飲品 泰國奶茶奶蓋 桔仔酸梅汁 泰國嘅奶茶茶味重D 加左層奶蓋溝埋一齊飲 甜甜地幾好味 桔仔酸梅汁有D酸 但就好開胃 環境氣氛： ★★★★☆ 食物質素： ★★★★☆ 服務態度： ★★★☆☆

有一晚係葵芳新都會廣場搵食 見到有間日式拉麵店大排長龍 人群心態之下 排埋一份試下 排左半個鐘左右就有位 拉麵店叫俺流塩らーめん 位於商場open area間出黎嘅地方 所以唔算大 枱與枱之間較近同迫窄 分別叫左一碗鹽湯拉麵同一碗濃湯拉麵 餃子同一碟餃子 拉麵麵質揀咗普通 但係我同另一半都覺得好硬 由於我本身唔鍾意硬身嘅拉麵 成個味道會好影響左 塊叉燒又比較乾 所以我覺得唔好食 湯底係正常嘅 鹽湯就會清啲 另外餃子賣相都幾hea下 形狀唔似餃子 皮又厚 味道亦都唔好味 真係越食越覺得點解出面會咁多人排隊 係咪啲人都係見到人排我排嘅心理咋 比較特別係依度有三款調味料可以自己任落 梅子醬丶柚子胡椒丶黑蒜蓉 不過我自己就覺得唔算係同啲拉麵小食味道夾 環境氣氛： ★★★☆☆ 食物質素： ★★☆☆☆ 服務態度： ★★★☆☆

今次介紹嘅Paper Stone 係我近期幾鍾意嘅一間麵包店 因為佢有好多特別款式嘅麵包 Paper Stone 上環丶將軍澳丶葵芳同元朗都有分店 而我去過元朗同葵芳分店 葵芳個間分店 麵包仲有得試食㖭 比較特別嘅係海盬牛油卷 除左原味 仲有紅菜頭丶羽耳甘藍同黑松露口味 依家啲人追求健康 紅菜頭同羽耳甘藍所以都幾多人揀 亦都係幾新穎嘅選擇 我買左黑松露口味 真係幾香架 唔止表面 入面都有黑松露 不過我最想介紹同推介嘅係我最鍾意嘅 蜂蜜橘子麥法包 叫得法包 麵包口感係硬硬地 表面有蜂蜜糖漿 入面充滿橘子肉 好香橙香味 價錢$21 麵包黎講係貴左少少 不過款式特別 而且份量都幾多 可以分兩次食或者同人share食都可以