早兩日訂咗位，今日下午4點幾，餐廳打嚟確認多次人數同時間。我哋訂咗第二輪8點，但我7:30就到咗，喺附近行多25分鐘就入座。 始終8個人要分開坐，唔想大家食唔同嘅嘢，所以叫咗兩份4人餐，結果瀨晒嘢，啲嘢食又多又大份，最大鑊係好好食，食到個肚脹晒都停唔到口。 頭盤清爽嘅青蘋果沙津同酥脆嘅酥盒配搭得好好，連嘴刁嘅大佬都話好食。 我最欣賞海鮮拼盤，款式多又好味，難得嘅係鮑魚都整得好淋。期間店員不停幫我哋換碟，辛苦晒。 成個電蚊拍咁大嘅斧頭扒，一份五成、一份七成，外層焦脆，裏面好淋好juicy，薯仔底吸晒啲牛脂肪，又香又軟。 煎三文魚生熟剛好，以為薯蓉伴碟，一食點知係芹菜蓉，還好，味道唔太搶。 大啡菇意粉有驚喜，一上枱已經好香蒜蓉味，齋食意粉已經好好味，仲煮得好彈牙。 甜品係自家製樹頭蛋糕，微甜略濕，老公話好啱佢口味，不過個人建議配多少少水果就好，因為成個晚餐份量都好勁，想要啲酸甜清新嘅中和吓。 聖誕節完咗可以叫返主餐牌食品，選擇唔多但又樣樣都有，一定搵到啱你食嘅，快啲去試吓啦！

下午四點，嚟到峰壽司食下午茶，原來佢仲有lunch set，不過選擇好少，想篤機叫其他嘢食，又篤唔到，想叫人幫手，又無人行過嚟，算啦，求其叫個A餐，追加三文魚刺身 刺身薄切，亦講唔上鮮味，$19/3片，算啦 套餐A有沙律、8件壽司+1件炸蝦手卷、味噌湯，沙律超hea，就係得椰菜「碎」，個湯好淡，只暖不熱，壽司感覺都好一般，真係唔太鮮味，成個餐最好食係個手卷，夠熱夠脆 要加一，感覺唔值，店員成日圍埋吹水，叫極都無人

今日去完op 就過嚟蠔灘，$10/隻預咗細細隻，但係好鮮、好重海水味嘅西班牙蠔，同老公一人一打 即刻點杯oreo 奶昔俾阿女補充體力先，另外叫咗個四式芝士薄餅，最初阿女話好鹹，我仲以為佢講錯，但我試咗啖真係好鹹，同店員反映，即刻再造一個 食完冷盤再叫一個溫泉蛋卡邦尼扁意粉中和吓，汁好香濃、creamy，菇同煙肉都好多 樓面得兩個店員，十幾張枱，佢哋一直提供快速友善嘅服務，仲好精準咁為客人介紹食物，好抵讚 加多罐可樂，埋單$6xx，淨係服務都抵啦，我臨走都特登行去同店員講聲「唔該晒拜拜」

喺v city 排隊等食晚餐時，阿女話想食雪糕，應承佢食完飯先食 大概9點嚟到，唔駛等位，但一坐低就好熱，頭上嘅燈太勁，曬到有啲出汗同頭痛，又無人抹枱 阿女揀咗心花怒放，可以揀5個迷你球，士多啤梨，雲呢拿，朱古力，曲奇，焦糖，有個脆窩夫，有粒士多啤梨，阿女見到勁興奮 可惜真係太熱，雪糕融得好快，唔好諗住慢慢嘆 窩夫其實唔係脆，係硬，用膠匙羹好難將佢解體，不過有啲位俾雪糕浸淋咗，先夾硬撳碎佢，味道唔錯，但口感差啲 用電話登記做會員有一張雪糕優惠卷，可惜今日唔啱用，下次先

今朝想去建生做檢測，但原來開10點，所以去食個早餐先 8點半去到，剛好唔駛等，店內原來唔係好多位，我一直以為係一間好大嘅餐廳😅 叫咗個早餐F（多士、薯餅、芝士磨菇奄列）同鮮奶咖啡，好快就上齊食物 咖啡不過不失，強烈推薦芝士磨菇奄列，好足料，爆菇，加埋芝士嘅鹹香真係好正，又唔會太漏，薯餅味道好，但略嫌太薄，應該係因為我留到最後先食先唔夠脆😅 店舖細細已經少座位，食飽休息夠就走啦，電話幾時玩都得，門口不停有客人等位，生意難做唔好阻住翻枱

尋日食完謝謝儂，好似吊起咗老公同阿女條癮，今日去yoho 明明講好食pepper lunch ，點知佢哋一見到堅信號就轉軚，仲要等位，人微言輕，個肚餓到咕咕聲都無得反對😭😭

等咗20分鐘左右入得，店員會大叫「堅信號歡迎你！」有啲日本料理店feel☺️可以坐低先賣安心紙仔，順手落埋單，略嫌枱面污糟，抹完都好油

為咗食更多嘅小籠包，老公放棄主食，直接order兩份小籠包，一份生煎包😳😳然後我哋再叫兩碗麵，三人share，另外某網上飲食平台會員送多一隻生煎包，正！

首先上菜嘅係生煎包，只係一兩分鐘嘅事，以為佢係整定晒所以會淋、凍？錯晒！老公一咬即刻話熱，啲湯汁仲噴到成枱都係！


我都唔執輸試返一隻先，先咬開層皮，滿滿嘅湯汁，比小籠包更多，而且仲出緊煙，先飲咗湯汁，再咬個包，包底好香脆，絕唔係燶、硬嗰種，每一隻都煎得好靚，果然係招牌菜，好出色！🤤🤤


再嚟就係小籠包，兩籠疊住蒸籠上，睇到都興奮


同樣食法，小籠包湯汁比生煎包少啲啲，但都好足夠，而且個皮好薄，食多兩隻都唔會滯，不過比較快凍，建議先食



再來係豬扒湯麵，麵嘅份量一般，但豬扒就好多，老公話似叉燒多過豬扒，仲要好好食𠻹，有蜜汁味，鍾意食豬肉嘅朋友可以一試


跟住就到我嘅雪菜黃魚拉麵，一上菜時，侍應同我講無晒拉麵，所以轉咗幼麵，吓？你唔問吓我先嘅？老實講我真係唔鍾意食幼麵，侍應就過一係轉返做普通湯麵底，我有啲唔願意，但又唔想再等，所以就轉普通湯麵底

以為佢會就咁換過個麵底俾我就算，點知佢又重新煮一個（我諗我唔要嗰碗已經俾另一位客人食緊），所以又要等，但等到嘅只係失望........

煎黃魚好似無調味咁，略腥，麵就正常發揮，雪菜亦少，店外海報大大隻字叫人記得飲埋個湯，以為有驚喜，跟本就係普通湯底，最多只係有啲雪菜味，一啲特色都無，唯一欣賞嘅就係伴菜係菜芯，唔係生菜🥬


服務一般，有個短髮女侍應好多廢話，舉一反三🙄🙄3人埋單$254，建議留肚食生煎包，價錢合理

同阿女去探亞玉，可能天氣熱，一入去覺得好焗 叫咗兩份下午茶，吉列魚柳🐟薯條🍟同埋卡邦尼燴意粉🍝 本身我都想食焗意粉，但見隔離枱哥哥嗰兜意粉實在太巨喇，唔想做大嘥鬼👻👻，所以叫下午茶就好了，上枱後見到覺得自己實在係太醒，呢個份量再加上濃香嘅芝士汁🧀🧀，我有信心挑戰成功🤤🤤 至於吉列魚柳薯條就有啲失望🥴，吉列魚又熱又脆，可惜無味嘅，薯條竟然係凍🥴，仲以為係一齊新鮮炸😩😩 天氣好熱☀️，30°C🔥，各位見字飲水💧💧

上次同同事嚟過食下午茶，覺得唔錯，而且老公鍾意食小籠包，所以今日一家三口睇完戲就過嚟食 **門口有紙仔可填 店員帶我哋坐最入嘅卡位，然後幫我哋斟完茶就行開，因為我哋坐最入，樓面兩三個侍應根本睇唔到我哋舉手，不過亦因為呢張檯就喺收銀前面，所以個收銀員一見我哋舉手佢就幫手叫walkie ，樓面好快就過嚟幫我哋落單 口淡淡嘅我叫咗個酸辣湯麵，好開胃，配料亦足，但因為湯底係杰身，所以一用力夾麵就碎，不過味道係唔錯嘅 欣賞佢個蔥唔直接落湯，因為一定有客人唔食蔥嘅，而我係好鍾意食😍 叫咗個嫩雞煨麵俾阿女，諗住清清地一定啱佢食，好大碗，佢盡力地食咗2/3，呢個麵就比較正常，湯亦好重嘅菜味，清甜 一籠小籠包有4件，阿女第一次食，教佢咬一細啖先，先飲咗裏面嘅湯汁先再食，佢話好好食，真係有衝動想叫多籠，但碗麵都食唔晒，唔想咁浪費 老公叫咗碟上海粗炒，都幾大碟，賣相亦吸引，早知叫佢同阿女兩份啦，佢話估唔到咁好食，但我覺得麵太淋，原諒我當時已經食緊麵所以無影相 叫咗罐可樂$15，埋單$27x，可接受

聽聞長期排隊，今日11點到，兩位直入坐高枱，除咗無位放袋，都無咩唔好。 熱愛蕃茄嘅我一定係食北の極番茄蝦湯拉麵，仲可以半價（$17.5）加一份餃子。 其實佢有餐嘅，就係一碗麵+配菜+飲品，可惜我哋唔飲汽水，就算加錢轉飲都只有凍飲，所以都係散叫。 7-8分鐘後拉麵就上枱，立即試啖湯，係好濃嘅蝦湯，淡淡嘅蕃茄味唔係平時食三哥嗰種蕃茄湯底嘅酸甜，但足以提鮮開胃解膩，至少我食到底都唔覺得頸渴。 麵份量極多，掛湯，我同女兩個食啱啱好，好在無再加麵（$15）。蛋就太熟，同埋上枱已爛，略為失望。加咗麵酥，有啲脆香嘅口感，令成碗麵更有層次。 好快就連餃子都上枱，外皮焦化好吸引，可惜一咬發現只係微暖又淋，好失望，浸落啲湯度連湯食就算。 整體：麵係好食嘅，其他可忽略。

同事之前話今日陪我食俺流拉麵，到我今日問佢時，佢話尋日已經食咗，不如去味千啦 吓！？😱反差會唔會太大？😰正想拒絕之際，另一位同事踴躍和議，唉，去啦去啦⋯⋯🤦🏻‍♀️🤦🏻‍♀️🤦🏻‍♀️ 我都唔知有幾多年無食過味千，記憶中仲係為咗塊忌廉蟹肉薯餅先會入去食，但原來而家已經無咗！！！😭😭😭 有得寫紙仔入座，用電話嘟QR code點餐，有下午茶餐，叫個大路嘅「餃子🥟拉麵🍜」保平安，$33，可選軟硬度，老人家揀咗軟麵，跟罐裝汽水🥤/杯裝橙汁唔駛加錢 拉麵上枱，份量適中，有幾塊荀，豬骨湯底浸餃子，飲一啖湯，令我聯想到出前一丁，飲多一啖，我懷疑自己味覺障礙，好似咩味都再食唔到👅軟麵都偏硬，結果都係要用湯送服，愈食愈口渴💦餃子嘅肉係完全無味，我食咗一隻就放棄 埋單$33無加一，我就覺得不可一不可再，但同事話個醬油炒飯好食喎🥴🥴