Winnie loo的个人专页

好多謝男朋友知我中意食法國菜帶我黎依度食生日飯🥰8道餸，每道份量都好足夠，而且由starter到dessert都令我同男朋友都讚不絕口：首先sourdough登場，基本上都外硬內軟，暖暖地再加牛油食口感一流。starter係個撻咁既野，食落酸酸地好開胃！食材感覺新鮮！之後十分十分要讚既係佢個mussels+蜜瓜冰既配搭，好食到痴晒線，成件事好match，口感非常豐富，超級開胃，係我最鍾意既一道餸！再黎蘑菇湯，蘑菇味非常濃郁，佢仲有個包可以一路沾啲湯一路食，好鬆脆同埋口感都非常好。本身我唔太鍾意黑松露，覺得佢浸味太過濃烈，但佢既黑松露配薯仔粒依道餸又係令我嘩出聲，因為佢地黑松露味一啲都唔勁，而且感覺棉棉的，入口即化咁，非常唔錯！魚都好好食，個汁好開胃，魚無骨，質感都好腍，煎完都唔會話好乾身！跟住個龍蝦酥皮真係好有驚喜，入面好多龍蝦肉，酥皮好薄身好脆溝埋一齊勁好食。不過另外個main日本和牛牛柳有小小失望，staff推介3成熟咁我就試下啦，男朋友都係穩陣派叫番5成。對比之下5成好食好多，入口即化，反而3成就嚼唔爛，嚼左好耐都好似吞唔落去咁。去到尾聲就有個好開胃既撻比你消下滯，真係恰到好處！完全開到我個胃食埋之後既petit fours，不過最後都係食剩左幾粒，因為實在太飽了🐷總括黎講我非常滿意依餐生日飯，雖然地方細左啲，張梳化又坐得唔太舒服，而且枱與枱之間好近食食下好似茶記咁嘈，不過服務好不在話下，而且每樣份量都好足夠，由頭到尾都感受到chef既用心安排，震撼到我味蕾！米芝蓮當之無愧！…查看更多

Happy Friday就試下依間台灣野～無訂枱，7點左右去到被安排係門口隔離啲枱，想睇海景就早啲訂位啦～2個人叫咗4樣嘢：肉燥A菜（油麥菜），黑松露芝士粟米蛋餅，招牌牛肉手工刀削麵同埋海皇手抓餅。最impressive係刀削麵！口感好煙靭！每啖都好享受！牛肉都好林好好味！佢碗邊仲會有一Pat牛脂油，我無落到啦感覺好肥，男朋友就落左話食落好滯，大家有興趣就撈少少試下先啦～我仲叫咗杯熱嘅荔枝烏龍茶$38，無荔枝肉，就咁一杯茶～海皇手抓餅個樣好似pizza（我開頭以為台灣嘢都有Pizza就諗住試吓🤣）都幾好食，蝦大大隻，仲有啲蜆肉，再配芝士，唔會話好咸，我食左3件都唔會話好滯，都好幾食既。黑松露粟米蛋餅係超多粟米，拉絲夾雜粟米果隻，口感好豐富。感覺呢間嘢都多人，我哋食咗一個鐘左右就比人吹埋單，成餐飯食左500幾蚊覺得有少少貴，碟菜$89我覺得唔太值，除左碗麵應該唔會特別話想encore。…查看更多

約左星期三晚同朋友慶生。兩個女仔食佢dinner set都好夠份量！前菜沙律大大份，龍蝦湯又大碗，仲有一小舊麵包。沙律都乾淨新鮮，龍蝦湯夠味唔會話好咸，主菜揀左大蝦手工意粉同火焰牛扒（5成）～手工意粉好粗身，有口感，蝦食落去唔霉，感覺食材質素都唔差，牛扒叫5成但唔知係咪淋咗白蘭地火焰就熟左啲，切開都8/9成熟，但都唔錯既都咬得爛。牛扒配有一個好大個既薯菜，薯仔原隻上，勁飽肚！最後甜品係basque cheese cake，依個就麻麻哋，因為放咗落雪櫃雪到冰凍，入口係凍冰冰嘅，遮晒佢嘅芝士蛋糕味～總括嚟講都好滿意，平日夜晚唔多人，Staff冇咁忙可以提供到好好嘅service，環境絕對係打卡嘅好地方…查看更多

好朋友請我係度食生日飯表示開心，因為見到啲嘢食好靚，打卡一流🥰2個比較大食嘅女仔叫左6樣野，個壽喜燒再追加烏冬，超級滿足！呢間好多嘢食都有海膽，我哋叫咗其中三樣嘢都有海膽，不過印象中有兩個海膽都有少少臭味，但係應該係品種唔同？個人就接受到嘅。佢個牛肉壽喜燒超級好食，雖然價錢比較貴，$480係壽喜燒鍋連4塊牛，但係十分高質，大大塊而且入口即溶！另外個和牛串燒都好好食，燒完又係好易入口，食兩舊都真係飽飽地。另外想感謝staff幫我地影即影即有相同埋預備左個好靚既碟裝起我地個蛋糕，餐廳無限時可以慢慢同朋友傾計！係間唔錯既慶生餐廳🐥…查看更多

喺度預訂咗一晚房玩下，附近無咩野食，但有依間餐廳見價錢可以就試試佢啦🐷講真，一晚$3xx港紙既海景套房真係已經抵到爛，本身無expect依間酒店既餐廳會有幾好食，因為啲設施都比較舊同埋人又唔太多，但係每樣餸真係又無揸流攤hea你。叫左兩個main：咖喱豬扒飯同埋西冷牛扒（5成）。咖喱豬扒飯塊豬扒係厚切，肉質唔嚡，又冇冰鮮臭味，配搭埋佢有少少辣嘅咖喱都真係幾好食，薯仔就老左啲～塊西冷其實都做到五成，肉質都好嫩，不過好多筋仲攝埋牙罅。另外每個main +$40可以轉set：有蘑菇湯，餐茶同埋甜品。蘑菇湯都幾好飲，好滑同埋蘑菇味夠濃，蛋糕本身問左Staff話係New York cheesecake ，之後又話變咗朱古力mousse 但最後變咗士多啤梨mousse，好彩唔係啲咩戚風/海棉蛋糕就算啦😂總括而言，成個體驗都比我想像中好，價錢公道而且食物質素都唔錯👍🏼…查看更多

舊同事揀咗呢度同我Farewell，又估唔到成件事感覺都幾好喎！我地book左枱，大概6:30到，餐廳仲未洗排隊，不過大概7點幾就開始多人排隊啦。餐前小菜係泡菜，個人認為應該係就返香港口味所以唔太辣，鍾意辣嘅朋友可能會失望。5個女仔叫咗牛骨湯4人份加1個炒飯同1碗冷麵，因為有兩個女仔比較細食，所以整體都夠大家嘅份量。牛骨啲肉好腍，湯非常唔錯，我地幾個女仔爭湯飲，飲完唔會口渴應該係冇味精嘅如果唔夠湯， 可以refill湯，唔係熱水不過炒飯份量比較少，炒完每人得一啖，因為好多都黐住個鑊變咗飯焦，我哋又唔太好飯焦。最後好想讚嘅係員工服務，我哋諗住幫其中一個舊同事慶祝生日所以買咗蛋糕，餐廳冇收切餅費，一入門口就已經好樂意幫我放入雪櫃。食完餐飯之後，我舉手門口個Staff已經知道我想點，即時安排其他Staff幫我哋執枱同埋拎蛋糕出嚟，成功比到舊同事surprise…查看更多

好朋友生日想同佢慶生，佢鍾意有儀式感嘅餐廳，我又鍾意法國菜，加上地點又就到大家腳，仲要咁岩見到OpenRice有買一送一優惠，就盡情試試佢啦話說我早一個星期喺OpenRice訂咗位，備注咗慶生同埋想寫嘅字句，去到餐廳安排咗一個窗邊位，非常適合我哋打卡買一送一嘅晚飯優惠係冇包嘢飲，但就可以半價happy hour點啲Cocktail嗰啲飲品，不過我同朋友都唔飲得酒，所以冇享用到優惠。成餐飯係走Fine Dining路線，staff會為你介紹每一碟餸，亦都會耐心等候你食完一道餸就上第二道餸。我同朋友都食咗差唔多三個鐘，因為我哋太耐冇見太多嘢講啦！呢度真係一個好好同三五知己傾偈嘅好地方，坐得舒服，而且又冇限時，亦都服務好好，最緊要嘢食都好好味！牛無筋又好淋，5成拿捏得好好。魚肉又好滑好香！完全係冇expect過5百幾蚊食到呢一個水準，真心推介俾大家！！！自問嘴刁嘅我今次真係冇挑剔，每道餸嘅擺設同埋份量都好足夠！我同朋友都食得好開心，感謝OpenRice呢個優惠…查看更多

真係純random 揀左依間食個晚飯～意外地滿足！兩個人叫兩份漢堡加一份沙律，晚餐包野飲加一埋單$271，雖然漢堡唔juicy，塊漢堡冇得揀幾多成熟，嚟到都差唔多well done，不過都唔會話好難食，係接受到既熟成度，份量都十足，配菜薯條好夠脆，凍左都好食。野飲我揀凍荔枝茶唔洗加錢，正。好鍾意呢間餐廳嘅環境，枱凳夠闊落，坐得舒服。近窗邊位夠光猛，打卡一流。雖然有限時90分鐘，未必啱一大班人吹水嘅地方，但兩個人坐低傾吓偈都好夠時間。同埋上菜好快，員工做野好爽手。…查看更多

生活左係大角嘴咁多年，第一次見依個鋪位做食肆！趁早收工又唔多人排隊就試吓啦。同媽媽兩個人叫左份酸菜魚$139，辣椒炒肉$99，油麥菜$59。酸菜魚夠大份，3個人都夠食！入面仲有薯粉同埋好多腐皮，仲有椰菜花。薯粉係薄身，好透明，口感煙靭。魚肉感覺新鮮，好淋，入味。叫左少辣，岩我平時食開三哥麻辣五小既人。不過都幾多幼細既魚骨。辣椒炒肉：我一向麻麻地炒豬肉，不過媽咪中意食就試下～一上菜就會有個火哄住，保持溫度同更加入味，哄得愈耐就愈惹味，肉身又唔會話好韌，送飯好唔錯。油麥菜好食！用咗蒜頭爆香佢，應該都落咗唔少油，食落好滑好香口。菜感覺都洗得乾淨。個人感覺CP值都幾高，份量多又唔係話好貴，茶水係蕎麥茶，好飲又消滯。環境坐得都舒服，枱夠大，燈光又夠光猛。餐廳暫時無限時，服務都幾好，一企門口就有哥仔招呼，隔離枱等咗半個鐘好似漏單，個樓面講左勁多次唔好意思，跟住都好快搵人幫手又好快上到菜。離開嗰陣見到好多人等位，希望好生意繼續長做落去！…查看更多

之前食完隔離間新泰經過見到依間好多人排隊就諗住有咩好西啦，再睇openrice見到好似賣烏冬賣到好出色，身為烏冬控既我更係唔會放過啦，不過試完一次真心失望。同友人叫左碗天婦羅冰烏冬同埋泡菜豬扒烏冬，嘢飲就唔加啦好似都要$20飲罐可樂？飲佢送既麥茶都好飲既。冰烏冬口感比較硬身，而且比較幼身，雖然唔係好啱我嘅胃口，但係我覺得好食過泡菜豚肉鍋嘅熱烏冬，熱烏冬可能個湯太熱，令到佢嘅面身比較腍，唔係煙靭嗰隻。同埋佢個豬扒係浸喺湯入面，令到佢嘅肉身鞋咗同埋豬味比較濃烈。天婦羅得四小嚿：一隻蝦，半隻冬菇，非常薄嘅南瓜同埋一條青椒仔。個人認為唔值個價錢。兩碗野加一埋單$270左右。題外話，我覺得入座安排有啲奇怪，明明有枱都唔俾人入去坐住等，我叫咗嘢食如果你唔限時其實我都唔介意坐喺度等～…查看更多

同媽媽慶生，經OpenRice訂燉湯鮑魚餐，CP值好高，連茶位加一人均$545.5。中式Fine dining咁，8道餸，食左2個鐘。一開始係燉湯，燉得好入味，鹹鹹地好開胃，啲肉又唔會話好嚡，連湯渣全清。之後嚟蓬萊素鵝～即係食齋，中間夾住啲冬菇餡，外面係炸嘅，意外地好食。蜜汁叉燒每人兩件，我嗰碟有少少偏肥。鮑魚鵝掌我就唔評論啦，因為我冇食鵝掌，但媽媽話好好食，佢話好滑好腍，不過汁太多有少少鹹（佢平時都食得好清淡）。煎海魚球本身以為係整到好似一個個波咁，但原來係一塊煎魚柳咁嘅樣，冇骨，又係鹹鹹地，但係我都覺得好好食，肉身好腍，同時又有啲煙靭嘅感覺。德州牛柳真係要讚，一入口就知道係正嘢，我食埋阿媽嗰份，兩碟都好tender，如果有Wasabi就正啦！要提埋嘅係糖水：木瓜雪耳，木瓜佢整整到一粒粒咁好得意，比較甜，但係我接受到。整體嚟講每碟餸都好食，份量又多，員工服務都好好，有笑容，好pleasant既生日飯真心推介！…查看更多

黎到Kennedy Town就試下啲小店啦，隨機見到依間菠蘿漢堡包就即刻黎試試。因為我中意試新奇既野食。同友人叫左兩個lava，我揀左菠蘿包，友人就normal bread，佢就無得揀牛肉熟成程度，不過出到黎效果都好岩我依個牛肉食開5成既人士。整體感覺唔錯，咸中帶甜都幾開胃，配少許沙律菜，材料感覺都新鮮。另外叫多左份薯條with truffle sauce 。薯條係幼身既，同埋炸到好脆，雖然我中意粗身又淋啲既薯條，不過佢依個配埋黑露醬都好match幾好食。價錢我自己就覺得少貴，無野飲埋單$357，份量唔算多，但都值得一試。…查看更多

見依間啲comment唔錯就帶個好耐無見既朋友去試下啦，openrice訂左6:00 準時到達，入去果陣reception staff無提我地有限時。叫左2個一人餐：鹽蔥厚切牛舌飯同照燒雞扒白咖喱烏冬～飲品揀凍荔枝椰果烏龍茶同埋百香果梳打。前菜芝麻雞翼同埋芝士年糕，甜品朱古力mousse 撻。牛舌係朋友既，我唔食牛舌就無試，朋友話碗飯無咩汁都幾乾下，牛舌好淋佢prefer爽口果啲，但份量好夠多！我照燒雞扒就覺得好咸，烏冬係稻庭烏冬，配白咖喱都唔錯。可能間野唔多位，7:00左右開始比較多人排隊，我地食到大概6:50有位staff主動話幫我地執執野先，不過果時我地全部野都未食完。無幾耐7:10左右又有staff話佢地比較多人等位然後又好主動幫手執野。想講佢地服務其實都ok不過就想你食快啲唔好阻佢地做多幾轉生意既感覺。建議如果去食就快手小小食唔好諗住同frd坐得耐傾計～總體而言，野食同服務都ok啦，係無諗過食個dinner都比人吹左2次，信用卡收據7:17分～…查看更多

想為妹妹慶祝生日，揀返佢做嘢附近又容易搭車返屋企同時又想得體啲嘅餐廳，就揀咗呢間啦。加埋屋企人四個人，每人最低消費$300 ，咁就試吓兩個生日set同兩個普通dinner set。食完嘅第一個感想係，非常飽！其實兩個set嘅嘢都好類似，只係份量同選擇方面有少少嘅分別。是日廚師精選既pasta係黑松露蘑菇意大利飯，正常發揮無咩特別。本身比較擔心佢個pork tomahawk 會唔會好大份，因為4個人其中2個set都揀左pork tomahawk ，不過好彩唔會話好巨！但我想講真係煮得好好食，豬肉夠淋，唔會話有好勁臭豬味，唔落汁都好好食！係味signature 黎？😂😂不過有個dinner set 加左$128轉ribeye medium 就比較失望，其實佢整得好好，切開顏色鮮艷，不過應該本身塊扒質素一般，所以食落唔會係淋，仲反而覺得有啲鞋口～Anyway 服務好好，我哋被安排坐最入嘅6人枱，一去到就有好靚嘅生日裝飾。坐低冇幾耐又有職員問凍唔凍，好貼心咁幫我哋較高咗個冷氣，加上又冇限時，慢慢打卡再食吓嘢唔覺唔覺都兩個幾鐘，坐得舒服。整體感覺滿意！…查看更多

（非試食）Happy Friday就想食好西，主食叫左個虎蝦意粉同埋帶子risotto，飲品係土多啤梨同埋抹茶野飲，甜品basque芝士蛋糕～名我唔記得曬啦，有興趣請睇圖。首先啲野食黎到係熱既，OK～但份量唔係話好多，一男一女食咁多野係唔飽既。不過味道都唔錯，兩個主食都好creamy，可以一試既。但係抹茶果杯靜係得奶味，無抹茶味，士多啤梨果杯叫黎想打卡既，因為睇menu係粉紅色同粉藍色好靚，咁實物都ok既～相比之下士多啤梨味果杯好飲啲，似士多啤梨益力多味。一開頭被安排坐兩人枱，近廚房張枱勁細，張櫈有點污糟因白色櫈有黑色污漬，不過staff都好好比我地轉去窗台位，張櫈都舒服啲同打到靚卡。…查看更多