leungapplee的个人专页

位於中上環呢間韓國餐廳真係有驚喜！成間舖頭用晒木系裝修，感覺好似去咗韓國傳統屋企食飯咁，仲要周圍都係韓國人喺度飲酒傾偈，氣氛一流！坐低無耐，就送上三款前菜：泡菜辣得嚟好正宗，食到好新鮮嘅味道，韭菜鮮味十足，粟米清甜爽口，食完即刻胃口大開！主角薯仔排骨湯一上枱就聞到超香！我哋叫咗大份，果然份量十足，排骨大大件，燉到淋晒又入味，啖啖肉真係滿足到暈。個湯底濃郁得嚟帶少少辣，飲完成個身暖笠笠。仲有吸盡湯汁嘅雞髀菇同其他配料，正！仲叫左半份韓式原味豬手，呢個都係必點！豬手皮爽肉滑，點埋佢哋自家製嘅大醬，味道即刻提升咗幾個層次。用新鮮生菜同紫蘇葉包住食，清新得嚟又唔會膩，忍唔住食咗好多件！仲叫左個紫蘇油拌麵，個賣相已經贏晒！麵條撈勻紫蘇油之後油潤光亮，上面嘅豬肉輕輕烤過，香口得嚟又唔會太乾，同啲麵一齊食簡直絕配！最後叫咗燒酒同韓國啤酒，冰凍清爽，同咁多款美食都好夾。食到捧住個肚走，已經諗緊幾時再encore！…查看更多

今晚同朋友去咗深水埗食日式鐵板燒，間舖頭裝修好和風，仲有吧枱位可以睇住師傅即場表演，氣氛幾正。我哋叫咗個活龍蝦活鮑魚鐵板燒餐，個餐好豐富。一開始係個清爽沙律，跟住上咗四款刺身，款款都新鮮清甜。重頭戲開始，師傅先整活鮑魚，鮑魚好重牛油香味，果然冇令我失望，彈牙得嚟又好夠味。跟住到隻活龍蝦，師傅用蝦膏炒龍蝦肉，嘩，真係冇得頂，龍蝦肉鮮甜，加埋蝦膏嘅濃香，惹味到不得了！之後仲有牛肉薄燒，牛肉包住蔥花同蒜片，入口好香口，仲唔會太膩。跟住仲有我好期待嘅鵝肝多士，鵝肝外脆內軟，油脂香豐富，好滿足呀！最後仲有麵豉湯、炒飯同炒野菜，個炒飯炒得乾身有鑊氣，成餐飯滿足到震！總括嚟講，呢間鐵板燒無論食材同手勢都好好，深水埗有咁高質素嘅鐵板燒真係驚喜，一定會再encore！…查看更多

今日第一次初嘗尖沙咀呢間泰式餐廳，環境幾鬆動，燈光好有氣氛，好適合收工過嚟輕鬆吓。一坐低緊係叫返支象啤先，夠凍又順喉，爽！同埋原來呢間餐廳係有好多唔同款式嘅酒係可以叫，有啤酒、紅白酒同埋唔同款嘅Cocktail😙首先嚟個泰式炒椰菜花苗，估唔到咁大碟，鑊氣夠，食落爽口又有啲微辣，好快就清晒。跟住叫左個辣椒膏炒蜆，啲蜆肉大大隻又冇沙，個汁撈埋啲蒜蓉辣椒一齊炒，香噴噴得黎唔會太辣，送酒一流。重點嚟啦——火山排骨！真係未食已經嚇親，十幾條排骨疊到成座山咁高，面頭鋪滿芫茜。仲提供埋手套，可以直接用手拎起嚟咬，啲肉煮到好淋，個酸辣汁完全入晒味，好開胃，雖然好飽，但係都食得晒🤭最後個芒果蟹肉炒飯都冇欺場，飯炒到粒粒分明，落足蟹肉同芒果粒，每一啖都食到蟹肉，好好味呀😋，而且大大碟夠飽肚。呢度真係幾抵食，份量足，味道正，放工過嚟chill下食飯飲酒，絕對冇介紹錯！…查看更多

今日在這間以木質裝潢為主的西餐廳NATA享用晚餐，環境舒適放鬆。前菜的和風蜜糖柚子醋大蝦沙律十分開胃，柚子醋的酸味和蜜糖的甜味平衡得恰到好處，幾隻大蝦都處理得乾淨，吃起來新鮮彈牙。接著的鵝肝多士煎得外層微脆，內裡保持著綿密豐腴的口感，搭配清爽的青蘋果片和烤得香脆的法包，有效中和了油膩感。明太子忌廉大蝦意粉的醬汁濃郁順口，明太子的鹹香風味與忌廉完美融合，每條麵條都掛滿醬汁，大蝦的份量也令人滿意。主菜的美國1855安格斯肉眼牛排，我們選擇了五成熟，火候掌控精準，切開後呈現漂亮的粉紅色，肉質軟嫩且肉汁豐富。搭配的紅酒果香充沛，單寧柔順，與牛排非常對味。最後的甜點伯爵茶忌廉蜜瓜梳乎厘班戟，口感輕盈如空氣，淡雅的伯爵茶香與蜜瓜的清甜組合起來十分和諧，為這頓豐盛的晚餐畫下了一個完美的句點。整體而言，每道菜餚都在水準之上，服務也很周到，是會讓人想再次光顧的餐廳。…查看更多

今日去咗呢間尖沙咀高級西餐廳慶祝紀念日，位置都好方便，一入到餐廳好有驚喜，係望住維港景色，同埋佢有露天嘅位置可以俾你選擇。我哋叫咗個3 course set，分別可以揀前菜、主菜同埋甜品～Starter 我哋揀咗三個，第一個係北海道帶子他他配火龍果脆片，佢個底配咗紅石榴果蓉，作為前菜非常之清新同埋口感好有層次。第二揀咗呢個煙燻海螯蝦，蝦肉好鮮甜，佢係浸咗落有石榴加巴馬火腿整嘅清湯，入面仲有啲蜆肉同埋果凍，酸酸甜甜咁好開胃。最後呢個係我最鍾意嘅Starter，杯入面係有好豐富嘅蟹肉配咗溫泉蛋，上面配咗個芝士脆片同埋海膽，蟹肉配埋海膽，味道十分濃郁同好滿足。主菜方面就揀咗兩款，第一款係呢個慢煮伊比利豬，第一眼見到以為係牛肉，食落非常有驚喜，肉質非常軟腍，經理有講話佢係呢隻豬嘅第一刀，所以肉質非常之好，同埋配咗果蓉同埋話梅鹽，中和咗本身豬嘅少少油膩感，非常值得推介。第二個主菜揀咗呢個和牛牛舌同牛小排，肉質同樣非常之軟腍，同埋配咗呢個黑松露北非小米，好特別，個汁係鵝肝龍蝦汁，非常之香，而且啲汁鎖入哂係小米入面～最後就食埋個甜品，係檸檬芝士蛋糕，芝士十分香濃，配埋檸檬雪葩，一啲都唔膩，為呢一餐作一個完美嘅總結。…查看更多

今日去開旺角就入咗去呢間金西南米線試下，點知好有驚喜！ 環境十分舒適，而且冷氣十足，唔使驚食到身水身汗。呢度主打份量十足的酸辣小窩米線，配料選擇好豐富，我揀咗好多款試下。 招牌「金牌廁肉」肉質軟嫩，油脂甘香，無論配搭濃郁酸辣湯底或微辣版本都非常出色。試咗兩碗米線：一碗加入墨魚咀、竹笙及滷水豬大腸，墨魚咀彈牙，竹笙吸飽酸辣湯汁，豬大腸滷香入味；另一碗微辣湯底更突出廁肉香氣，辣度溫和，呢碗叫咗牛肝菌同豬肚，豬肚炊得好脆，同埋好少店鋪有牛肝菌，而且非常入味。 小食同樣好出色──「藤椒魚皮」爽脆帶麻香，開胃非常，「椒鹽燒賣」外皮酥脆，內餡鹹香惹味。套餐附贈飲品，性價比高。 整體而言，金西南米線湯底濃郁、配料足料，大碗飽足，嗜酸辣者值得一試！#kamsainam.noodle📍旺角花園街3-5號鴻威大廈9號舖📍銅鑼灣登龍街41-51號金龍大廈D號舖…查看更多

今天終於嚟試吓呢間餃子專門店，叫咗幾款招牌餃子。 ✨龍鳳松茸豬肉煎餃一上枱就聞到濃郁的松露香氣！煎得恰到好處的金黃脆底，咬開後松茸的野味和豬肉的鮮甜完美融合，建議可沾些醋，可使味道更昇華！🥟椰菜雲耳豬肉湯餃湯頭清澈卻意外鮮甜，餃子皮吸飽高湯後變得半透明，內餡的椰菜爽脆、雲耳滑嫩，口感層次超豐富。💫元貝豬肉湯餃元貝的鮮味完全包在餃子中，同埋佢呢個湯係佢招牌狀元湯，好飲到直接喝光見底～🍳黃金原味皮蛋皮蛋黃呈現完美的流心狀態，搭配鹹蛋黃嘅香味，沾上特製酸甜醋，完全沒有皮蛋的刺鼻味，味道很新鮮！🍹蜂蜜檸檬薏米水現煮的薏米水加入新鮮檸檬片，微酸清甜超級解膩！還能吃到顆顆飽滿的薏仁，感覺喝完皮膚都變好了呢～整體來說每道菜都很有記憶點，從傳統中創新卻不失本味。而且感覺上完全冇加味精，食完感覺很舒服！#nomnomdumpling(tseung kwan o)…查看更多

好耐冇食過呢間Beans, 今日happy Friday 過嚟食午餐。叫咗個牛肉果蟹肉他他配酸種麵包，蟹肉都算多，牛油果蓉份量OK，但係味道唔夠濃郁。麵包稍為有點硬。整體來說味道還可以，但是份量略嫌有點少。…查看更多

今日同朋友慶祝生日，專登揀咗一間西餐廳。叫咗個黑松露意粉，黑松露味超香，唔會太膩再叫咗個肉眼扒，肉質唔錯，同埋幾大塊。伴碟又有烤蒜頭，啱晒我口味。最後叫甜品又可以幫手寫生日碟，朋友都覺得好surprise好開心…查看更多

呢間有義氣成日幫襯，多數都係食酸菜魚，今日lunch心思思想食米線，最後揀咗酸菜肥牛米線午餐嚟講佢只係$60 到，味道就同平時食正常size嘅酸菜魚有少少唔同，湯底冇平時咁濃郁，但牛肉都算多嘅，同埋唔會太肥，午餐嚟講算係唔錯！…查看更多

呢間韓式大排檔走的是街頭復古風，牆上貼滿韓劇海報，頗有幾分韓國夜市的熱鬧感。 前菜是經典的泡菜和涼拌豆芽，泡菜辣中帶甜，豆芽清爽開胃。叫左呢個芝士泡菜煎蛋卷煎得好金黃，趁熱切開，拉絲的芝士混著微酸的泡菜，蛋香濃郁。仲叫咗呢個火山熔岩辣牛肉鍋，佢好似改良版既部隊鍋，沒有午餐肉，而是堆滿蔬菜，有金針菇、白菜、洋蔥，湯底微辣鮮甜，牛肉份量好多，肉味香濃。食完之後仲加埋個拉麵，好滿足仲有叫左黑松露Mayo炸雞，好驚喜，外皮酥脆，黑松露的香氣濃郁，雞肉多汁，蘸上蛋黃醬醬更添風味。最後叫埋吞拿魚拳頭飯，係已經捏好，紫菜、芝麻和吞拿魚混合得岩岩好，一口一個很方便。最後來一罐冰鎮韓國檸七，清爽解膩，這一頓吃得滿足又過癮。 比起精緻的韓料店，這裡更有街頭隨性的煙火氣，適合三五好友熱熱鬧鬧地吃一頓，十分推介…查看更多

之前喺大陸成日見到呢間餐廳，都未試過，而家見到香港周圍都開咗就試吓啦。叫咗呢個窩，肉就唔係好多，但係就有好多配料，豆皮，紅薯粉呢啲。味道唔錯嘅，不過食完好口渴，同埋味道都偏辣，冇得唔飲嘢應該短期內都唔想再去食…查看更多

平時嚟呢間都主要係食burger，試吓新嘢嗌咗個班尼迪呢個班尼迪算高質，佢個蛋好香，下面塊火腿都煎得好好，佢同平時食嗰啲呢多咗塊薯餅夾埋入去，感覺幾新鮮，效果唔錯，同埋再飽肚啲，另外伴碟仲有烤蕃茄，有啲熱情果喺上面，甜甜地幾好食…查看更多

呢間開咗唔係好耐嘅冰室我已經食過好幾次，覺得佢性價比好高。連續兩次都係食咗呢個麻辣雞髀撈公仔麵，佢個雞髀係好入味，麻辣味幾香，但係唔係太辣，另外佢個撈公仔麵都好出色，個瑞士汁好正，呢個餐仲跟埋個奄列同埋餐包，食得好滿足…查看更多

德福終於開咗呢間漢堡扒專門店，都幾多人排隊。第一次食覺得塊漢堡扒都幾好食嘅，另外可以無限添白飯同埋湯，仲有多款嘅醬可以選擇。另外仲揀咗個特別限定嘅牛油果漢堡扒，味道唔錯，但佢加埋啲醬感覺上有啲膩，原味會比較好…查看更多