安德魯咖啡廊

3月20日, 嚟到澳門點可以唔食葡撻? 之前食過瑪嘉烈, 但就一直無機會試同樣出名嘅安德魯葡撻! 不過佢幾間分店都好似有d隔涉, 都諗住可能食唔到… 言語交談之際, 就讀澳門大學嘅友人推介我地去佢間大學嘅café~ 原來都有安德魯葡撻食! 咁啱大學原來就係喺我地酒店隔離~ 天時地利人和, 一起身唔駛plan都知道要去食個早餐先啦~ 一路走去澳門大學圖書館都用咗15分鐘, 個café仲要捐窿捐罅先搵到! 不過呢度環境真係幾有大學feel, 仲對住大個海景添! d大學生真係識嘆~

::: 葡撻 ::: $8
葡撻係一早整好擺喺度, 雖然無出邊新鮮出爐咁熱辣辣香噴噴, 但就仍然keep到脆身! 成個葡撻好飽滿, 外層酥皮好鬆化~ 內裡嘅蛋料豐厚, 面頭d焦糖薄薄一層烘得微脆, 甜道適中, 咬落好有質感! 好好食呀~

::: 吞拿魚火腿全麥包 ::: $8
呢個三文治就真係學生價~ $8一個喺出面麵包舖都買唔到. 吞拿魚火腿料之外仲有一款蔬菜選擇, 好健康~ 我地要咗青瓜, 好fresh同餡料好夾, 吞拿魚撈咗沙律醬, 唔會乾爭爭~全麥包輕輕焗過, 一咬就知新鮮, 幾鬆化~

::: 碎蛋焗薯 ::: $1x
焗薯仲會配少少沙律~ 薯仔唔似點焗過, 應該係烚熟完就咁烘咗一下. 雖然感覺健康d但係就唔夠香, 又唔夠燶… 碎蛋比較少, 都幾乾下, 味道亦冇乜… 所以食個焗薯, 不如叫多2個三文治~

::: 熱朱古力 ::: $1x
熱朱古力嘅奶味比較濃, 朱古力味唔夠多. ok咁啦~

真係為咗食個葡撻而來, 葡撻同三文治都幾ok~ 都應該無乜遊客識嚟, 真係未試過咁地道遊澳門, 有機會再嚟感受澳門大學生嘅生活~

葡撻

葡撻和友人早餐

吞拿魚火腿全麥包

碎蛋焗薯

熱朱古力

環境舒適恬靜

多款三文治配搭

飲品櫃

蛋糕, 生果