宋玉生廣場(皇朝)友誼大馬路星際酒店大堂

雖然早前晌暑假期間放咗個長假，但偶爾攞兩日出外攤抖吓、調劑吓，令個人晌緊張嘅工作中釋放一陣子，情緒會緩和好多。小弟份工有時好hea，反之老婆份工無論對人、對事都幾緊張，所以，今次過嚟澳門玩兩日，目的都喺幫佢舒展吓身心，故此無緊湊嘅行程，無必去嘅景點！落腳酒店喺2006年落成，最近翻新過嘅星際。

星際酒店

到咗星際酒店大堂辦理入住登記手續，因為所訂嘅客房有提供迎賓飲料，所以晌等候期間，被安排先過去大堂酒廊歇一歇:)。由此刻開始，已感受到酒店嘅熱情招待，無論酒店嘅員工，抑或大堂酒廊嘅侍應，都景顯得禮貌周周。

大堂酒廊，對出只喺街景，但環境輕鬆，

大堂酒廊晌酒店大堂一角，落地大玻璃對住仙德麗街及城市日大馬路嘅街景，雖然無乜景緻，但酒廊環境輕鬆，飲住嘢等吓人，都幾唔錯。

絨布梳化椅，叫人坐得舒服。

仲見有個「歐陸閒情」tea set，形式喺我哋常叫嘅high tea，有精選三文治、鬆餅、葡式甜品、法式糕點、精緻蛋糕、曲奇餅及鮮果撻，配優質即磨咖啡或精選英國茗茶，都只喺MOP138，兼且供兩位用，真喺抵到震喎，當然要試埋食物嘅質素先可以下結論喺咪超值。最可惜我哋食飽飯無耐，否則都好想試一試呀！

與其話佢喺大堂酒廊，其實叫佢做café都仲得，因為除以上嘅下午茶套餐外，仲有散點麵包、曲奇、甜品、蛋糕。

講番我哋嘅迎賓飲料，飲品有好多選擇：果汁、汽水、啤酒、咖啡、茶故然有啦，估唔到連烈酒、餐酒都有喎，而且款式唔少添！

老婆揀蕃茄汁，酸香醒胃，小弟就要一杯菠蘿汁，雖然唔喺咩鮮榨，但都算喺唔差牌子嘅鮮菠蘿汁，因為菠蘿味好濃郁，唔會太甜太假。

菠蘿汁（前）、蕃茄汁（後）。

雖然只不過一杯迎賓果汁，但環境、服務已令依個小旅行有個好開始！