梁姓同學住東港城附近，今日朝早喺將軍澳工業邨做完野，特登約佢食早餐，佢第一句就話: 『真係𢱑爆頭，唔知同你食乜好。』我就話: 『飲茶啦！咁佢就揀左畔溪。』
佢叫左八個點心，我問: 『使唔使咁多呀，平日飲早茶我同媽子都係叫五六個喎！』佢話: 『實食得哂，放心。』
點心到，第一樣嚟嘅係
义燒酥
不俗，皮鬆化而不油膩，义燒饀飽滿。
煎腸粉
份量只有三條整條，蔥花蝦米腸有蔥而唔見蝦米乜滯，豉油味道亦普通。
蝦餃
只有兩隻，皮唔夠靱，但蝦肉爽口，質素普通。
燒賣
亦只有兩件，唔多肥肉，蝦爽口，但畧畧蒸得濕身，又係中中庭庭。
咖啡糕
有成四件，睇賣相應該都係交嚟嘅貨，食味其實幾好，咖啡用嚟做糯米糕點，效果幾唔錯。
薑蔥牛栢頁
牛栢葉煨得好有薑蔥香味，頗爽滑，但份好細，每塊都切到比手指尾更細，咁樣會令到牛栢頁失去𡁻頭，一隻麻雀大細嘅牛栢頁先可以食倒爽口彈牙嘅感覺吖嗎！但成碟牛栢頁嘅份量加埋都唔夠兩隻麻雀大細，少得好可憐。
山竹牛肉球
三粒乒乓波大細嘅牛肉球擺係度，硬係覺得份量好細，可能我真係去開啲街坊酒家，點心件頭大好多，唔係好睇得慣咁細嘅牛肉。牛肉球幾有牛味，而且爽口，但肉質嚡口唔滑，又係中中庭庭。
流心奶皇包
又係正常偏細，只係大隻正常size 嘅小籠包小小，仲細過我喺平時食嘅雞包仔！搣開睇下，咦？係用雞蛋造嘅奶皇，並唔係咸蛋黃造嘅！佢地只係用普通奶皇校稀啲做個流心。𠵱，佢地話流心而唔係流沙喎，就當佢地冇呃人啦！不過個奶皇都唔多香，又係中中庭庭。
總結: 埋單梁姓同學搞，後尾問佢幾錢，佢話兩舊水左右，對我呢啲成日幫趁街坊酒樓嘅人嚟講，呢間野性價比好低。同大多數嘅集團式酒樓一樣，點心工場交嚟嘅多，所以永冇驚喜，亦無驚嚇。但我真係鄧將軍澳住嘅朋友唔抵，咁多錢買層又新又靚嘅樓，但就食埋的冇啲誠意嘅工場出品！
