焼肉スマイル (燒肉smile)

海陸牛特盛套餐套餐有板腱牛排、牛五花、現流冷藏雞腿、鮮蝦、鮮魷魚、鮮味鱸魚，肉質好嫩，色澤均勻新鮮，燒嘅時候爆晒啲油出嚟好吸引，再配埋蔥花蘭王玉子飯一齊食味道好夾，牛肉好多肉汁，另外仲有濟州海帶豆腐湯，成個套餐好豐富。SMILE盛合套餐牛五花、牛橫膈膜、豚五花、鮮蝦、鮮魷魚、鮮味鱸魚，肉類我最鍾意食牛橫膈膜，燒到外脆內軟，好香濃，牛筋飯啲牛筋好軟淋淋，而且個醬汁好濃郁，令到個飯好入味，另外仲有雪濃牛骨湯。我哋再散嗌咗呢幾款野食，蔥鹽牛舌肉質爽口彈牙，唔洗燒太耐好快就熟，同蔥鹽味道好夾，好濃嘅牛味。雞松板肉質嫩滑，就算燒耐咗少少都唔會好乾好韌。伊比利黑豚同松坂豚，肉質鬆軟，唔會有豬腥味。海鮮方面揀咗鮮蝦同鮮魷魚，魷魚麻油椒鹽味好好食，口感彈牙新鮮，味道啱啱好，唔洗再點其他醬汁都好夠味。每日精選甜品有兩款黑糖布丁刨冰好濃郁黑糖醬味，配埋果肉同布丁一齊食好解渴。士多啤梨布丁刨冰，士多啤梨味好突出，食落比較甜啲，好適合夏天食好消暑。